بيميل الأطفال للتركيز على نفسهم واحتياجاتهم، عشان يطوروا مهاراتهم الاجتماعية، وفي نفس الوقت بيكونوا لسه مش واعيين كفاية لتطوير وعيهم العاطفي والشعور بالآخرين.
ولو الأهل ما اهتموش بجانب تطوير التعاطف والمشاعر عند الطفل ممكن تنشأ عنده علامات لاضطراب الشخصية النرجسية اللي بتتمحور بشكل كبير حوالين اهتمام الطفل بنفسه ومشاعره بصرف النظر عن الآخرين.
وفي المقال دا هنعرض لك أهم علامات الطفل النرجسي، وأسباب ظهور علامات النرجسية على الطفل، وكيفية التعامل معاه بشكل سليم للحد من زيادة الاضطراب دا عنده.
من هم الأطفال النرجسيون؟
قبل ما نعرف أهم علامات الطفل النرجسي لازم تفهم إن اكتشاف النرجسية عند الأطفال شيء صعب وخاصةً في بدايته، لإن في نشأة الطفل بيكون اهتمامه كله منصب لنفسه، وما بيقدرش يشوف المواقف من وجهة نظر الآخرين، ودا أمر طبيعي رغم إنه بيرتبط عامةً بالنرجسية.
وبنلاقي إن افتقار الطفل للتعاطف والحنان تجاه الآخرين من أهم المكونات الرئيسية لاضطراب الشخصية النرجسية، ودا واحد من اضطرابات الشخصية العديدة المعترف بيها في الدليل التشخيصي والإحصائي لاضطرابات الصحة العقليك DMS – 5 النسخة الخامسة.
بجانب الشعور المبالغ فيه بأهمية الذات، والغيرة، وغيرها من علامات الطفل النرجسي.
وبيرجع اتسام الطفل بالاضطراب دا للأبوين في مرحلة الطفولة المبكرة خاصةً في العمر من سنة لـ 3 سنوات، وبيظهر على الطفل بداية سلوكه القاسي تجاه الحيوانات، وتباهيه بنفسه طول الوقت.
لكن لازم تحط في ذهنك إن مش كل الثقة نرجسية، فممكن الطفل يكون واثق من نفسه زيادة وأناني نتيجة لأساليب تربوية خاطئة.
فالأفضل من تلقيبه بالنرجسي، إنك تركز على تعليمه الصفات الإيجابية وتوجه مشاعره السلبية لنواحي تانية؛ زي التعاطف وإظهار الاحترام للغير.
تعرف على: تعديل سلوك الطفل العنيد والعصبي.
علامات الطفل النرجسي
التركيز على “الأنا” مش المؤشر الوحيد عشان تحدد إذا كان طفلك نرجسي أو لأ، لإن العلامات هتشمل أشكال مختلفة وغير طبيعية موجودة في طريقة لعب الطفل، وصعوبة تقبله للمسؤولية، وضعف أدائه المدرسي.
ومع كدا فبعض الأخصائيين مش بيأكدوا إصابة الطفل بالنرجسية وتشخيصوا بيها قبل سن الـ 18 لإن الشخصية متغيرة لحد مرحلة البلوغ، إلا في حالة استمرار الأعراض وتطورها طول الوقت.
ودلوقتي هنعرض لك أهم علامات الطفل النرجسي:
1- صعوبة في تكوين الصداقات أو الحفاظ عليهم
بيعاني الأطفال المصابين باضطراب الشخصية النرجسية في جميع علاقاتهم، ودا هيكون واضح بشكل خاص في علاقاتهم مع أقرانهم.
فبنلاقي إن الأطفال الطبيعيين بيدوروا دايمًا على أصحاب من نفس عمرهم يلعبوا معاهم ويشاركوهم اهتماماتهم.
لكن الطفل النرجسي ما بيكونش عنده استقرار في علاقاته بأصدقائه، لإنه بيفتقر للتعاطف تجاههم، والقدرة على تحمل المسؤولية، وبالتالي بيفقد حبهم ليه، وبيبعدوا عنه.
2- انتقاد الآخرين
من أهم علامات الطفل النرجسي إنه ما بيفهمش صعوبة الانتقاد ووجهات النظر السلبية تجاه الأطفال الآخرين، أو الكلام عنهم بشكل سيئ قدام الكبار.
لإن في ذهن الطفل شايف إن النقد دا صحيح، ويمكن يزود لو سمع الكبار بيتكلموا عن أي طفل بشكل إيجابي، لإنه بيكون غيران منه.
3- لوم الآخرين على أخطائهم
الطفل النرجسي بيكون كل همه نفسه، وبيتفاخر بذاته طول الوقت وبيستخدم دا للدفاع عن نفسه، لإنه شايف إن الكبار غير جديرين بالثقة وغير كفء، لإنهم بيغلطوا وبيتعصبوا قدامه عادي.
وبالتالي بيتطور عنده لوم الآخرين على الأخطاء.
4- اختلاف طريقة اللعب
اللعب شيء ضروري للطفل، وبيساعد في تطوره ونموه، وبتظهر أنماط مرضية في طريقة لعب الطفل النرجسي، زي:
- التدمير الشديد والمتكرر لأي لعبة مش حببها.
- عدم استيعابه واعترافه باحتياجات الآخرين.
- افتعال المشاكل مع الطفل التاني.
- ظهور السلوك الانتقامي في لعبه.
5- ثبات السلوكيات واتسامها بالبرود والكبرياء
من أبرز علامات الطفل النرجسي هي اعتقاده الداخلي بإنه شخص متميز عن الباقيين، فبيُظهر دايمًا إنه غير مبالي بمحاولة الآخرين للتواصل معاه، وبيحرص على التقليل منهم، وبيعلق عليهم إنهم أقل منه.
6- عدم القدرة من التحقق من صحة الذات
النرجسية عند الطفل بتنبع من احترام الذات الهش، ونتيجة لدا بنلاقي إن الطفل النرجسي مش قادر يحدد الصفات الإيجابية اللي ليه ويحتفظ بيها.
فبنلاقيه بيركز مع المجاملات اللي بيقولها عليه الآخرين ويكررها، وبيشجع أهله طول الوقت يقولوا عن سمات شخصيته الإيجابية، وممكن أوقات يقول على نفسه صفة من موقف بسيط زي أنا شجاع، أنا أشطر منهم، وهكذا.
7- عدم القدرة على تحمل الضغوط
لما بيتعرض الطفل النرجسي لموقف صعب في الغالب ما بيعرفش يخرج منه، وبنلاقيه بيتراجع وبيتصرف بطريقة أصغر من سنه بكتير، ودا لإنه بيكون مش قادر يهدي نفسه، ويتحمل الضغط عليه.
8- عدم القدرة على التعاطف
بيفتقر الطفل النرجسي للتعاطف وبعض السمات الأخلاقية، والقدرة على التمييز بين الصح والغلط، وعشان كدا بتلاقيه ما بيفهمش مشكلة الكذب، أو الغش، أو السرقة.
وبيفضل يتوه لو مسكت عليه حاجة منهم، وما بيظهرش عليه أي علامة ندم إنه عمل حاجة غلط، أو أذى حد بكلامه،
9- ضعف الأداء المدرسي
من علامات الطفل النرجسي اختياره لمفردات لغوية إيجابية عشان يوصف بيها نفسه، ويتخبى من عدم فهمه لشيء أو معرفته بيه.
ومع ذلك بيتسم الطفل النرجسي في الغالب بضعف الأداء الأكاديمي الناتج عن عدم التركيز في المذاكرة والدروس، واهتمامه الأكبر بنفسه والدفاع عنها.
10- تجنب الاتصال البصري
تعلم الاتصال البصري هو مهارة اجتماعية، وتجنبها واحدة من علامات الطفل النرجسي اللي بيعملها أوقات لما بيحس برفض الآخرين ليه أو التقليل منه.
لكن مش شرط يكون الطفل نرجسي لو بيتجنب النظر لإن دي من سمات طفل التوحد، واضطراب فرط الحركة وتشتت الانتباه.
11- عدم القدرة على تحمل وقبول المسؤولية
الطفل النرجسي بيعتقد إنه مميز، وإن احتياجاته ليها أهمية كبيرة قبل كل حاجة، ودا بيخليه رافض الاعتراف بالخطأ، أو التصرف السيئ، لإنه بيبرره لنفسه إن أهله ما نفذوش اللي عاوزه.
ودا نتيجة طبيعية لتصرفهم معاه، وبالتالي مش بيعتذر، ولا بيتقبل يتحمل نتيجة أخطائه.
12- التكبر والشعور بالاستحقاق
التكبر واحد من أهم علامات الطفل النرجسي، وشعوره بالتفوق والتميز المستمر من أهم سماته، فبيكون عايز كل الناس تبصله إنه شخص متفوق، ويقولوا كلمات إعجاب واهتمام باستمرار.
دا غير شعوره بالاستحقاق إن من حقه يحصل على أي حاجة، وبيحس بالحسد والغيرة من حصول شخص تاني على أي حاجة عاوزها، بالإضافة لرغبته إنه يكون محور الحديث أو يفضل هو اللي بيتكلم في أي تجمع.
ووفقًا لدراسة اتنشرت بموقع ResearchGate بنلاقي إن الشعور بالاستحقاق والكبرياء بيبقى في الغالب مكتسب من معاملة الوالدين للطفل على إنه أكتر خصوصية واستحقاقيته عن غيره، ودا أسلوب تربوي خاطئ.
ما أسباب النرجسية عند الأطفال؟
وفقًا لدراسة اتنشرت على موقع PMC بنلاقي إن سمات النرجسية بتنشأ في الغالب بسبب الحماية المفرطة من الأبوين، والتدليل الزائد، والمبالغة في تقدير الطفل.
دا بجانب مجموعة من الأسباب الأخرى، زي:
- تصرف الأبوين إن طفلهم مستحق، وأكتر تميز عن الآخرين.
- الوراثة، تبعًا لدراسة اتنشرت على موقع ResearchGate.
- التعرض لصدمات الطفولة زي الإحساس بعدم الأمان.
- اتسام بعض الأشخاص حوله بعلامات النرجسية.
- التوقعات الشديدة من الوالدين.
- التعرض للإساءة الجسدية.
- وفاة أحد الوالدين.
- النقد المستمر.
أخطاء تساهم في تنشئة طفل نرجسي
لازم تفهم إن بجانب الأسباب اللي فاتت دي، في سلوكيات بيفكرها الأهل صحيحة، وممكن تتسبب في ظهور علامات الطفل النرجسي، ومن ضمنها:
- مساعدة طفلك في كل شيء، والعادة دي مش صحيحة، لإنها بتعلم الطفل التوكل على أهله.
- إقناع الطفل إن آرائه كلها صح، وإنه صغير مش فاهم.
- إنقاذ الطفل من أي مواجهة، والأفضل إنك تسيب طفلك عشان يتصرف بناءً على تربيتك ليه، ولو ظهر منه سلوك غلط تصلحه.
- المبالغة في دعم طفلك على إنجازاته، وتقدير ذاته، والأفضل الموازنة إن يكون رد الفعل على قد الإنجاز.
- تلبية كل احتياجات الطفل، ودا مش صحيح لازم يفهم إن في حدود لطلباته، ومش كل شيء مجاب.
- عدم ذكر الصواب والخطأ قدامه والتركيز عليهم لإنه صغير.
- وصف الطفل بإنه عبقري أو شخص مفيش زيه.
- كره الأشياء وعدم الإحساس بيها.
طرق التعامل مع نرجسية الطفل
النرجسية بتظهر بشكل واضح في سن 12 سنة، وممكن تلاحظها من سن 8 سنوات، وبتستمر مع الطفل على مدار حياته لو ما اتعالجش منها.
وتصرفه وهو بالغ هيختلف عن تصرفاته في الطفولة، وهيُظهر دا بطرق مختلفة مؤذية للي حواليه، وعشان كدا مهم أول ما تلاحظ ظهور علامات الطفل النرجسي عند ابنك أو بنتك إنك تلجأ لأخصائي نفسي لعلاجه.
ودا هيكون بجانب مشاركتك ودعمك المستمر لطفلك من خلال طرق تعامل خاصة للحد من تصرفاته النرجسية، ومن أبرزها:
وضع حدود ثابتة
الطفل النرجسي مرهِق في التعامل، وبيعدي حدوده في مواقف كتير من خلال التعدي بالألفاظ غير المناسبة، أو اللوم الزايد على أهله.
فمطلوب منك تحاول تحط حدود واضحة للتصرفات والكلام اللي ممكن تقبله، وتحافظ على احتياجاتك وطاقتك الخاصة عشان تقدر تساعد في معالجته.
تحديد أساليب التلاعب
من علامات الطفل النرجسي الواضحة هي المماطلة والتلاعب طول الوقت، عشان يحصل على طلباته، فمهم إنك تعرفها وتفهم أساليبه، وتعزز مبدأ الحدود اللي قلنا عليه بإنك تعرفه المتاح ليه، وإنه مش مسموح له بأي شيء زيادة.
رفض الإساءة
الإساءة ممكن تكون في أكتر من صورة سواء لفظية أو جسدية أو عاطفية، فمهم إنك توضح للطفل النرجسي إن الإساءة مرفوضة بكل أشكالها، وتوضحها له كل ما يعملها في كل جانب واللي يكرره في حاجة حذرته منها قبل كدا حدد عقاب ليه ونفذه ويكون متناسب مع فعله.
اقرأ: أضرار ضرب الطفل في عمر الثلاث سنوات
التعبير عن سلوكياته بلطف
في الغالب الطفل النرجسي مش بيبقى فاهم أثر سلوكياته على الآخرين، فحاول الإشارة لسلوكياته بطريقة لطيفة عشان ما يعاندش معاك وفهمه السلوكيات المقبولة وغير المقبولة.
الاهتمام بسلامتك النفسية
وجودك مع طفل نرجسي ممكن يأثر سلبي على صحتك النفسية والعقلية، فحاول قدر الإمكان تهتم باحتياجاتك العاطفية، وتحدد لنفسك وقت تبعد فيه عن جو التوتر والتفكير في سلوكيات الطفل عشان تقدر تكمل وتساعده.
تقديم الدعم
في حالة معالجة الطفل مع أخصائي نفسي دا ممكن يأثر عليه بشكل سلبي، ويحسسه بالضعف والمرض، فحاول تكون معاه، وتدعمه، وتقوي علاقتك بيه، وتخفف عنه العجز والإحباط لو اتطلب منه حاجة، وما عرفش يتحكم فيها.
تقبل ما لا يمكن تغييره
علامات الطفل النرجسي مش سهل كلها تتغير، لإن اضطراب الشخصية النرجسية هو اضطراب معقد، وغالبًا بيكون مزمن، وصعب الشخص يغيره.
فتقديرك ومعرفتك لظروفه هيساعدك تتقبل الواقع، وعدم إجباره على حاجات هو مش قادر عليها.
وأخيرًا، اضطراب الشخصية النرجسية بيتمحور حوالين اهتمام الشخص بذاته وتقديرها بشكل كبير، والتقليل من الآخرين.
وممكن تنشأ النرجسية من سن صغير بسبب الوراثة، وسلوكيات خاطئة للأهل تجاه أبنائهم، وبالتالي بتظهر علامات الطفل النرجسي، ومنها: صعوبة في تكوين الصداقات، أو الحفاظ عليهم، وانتقاد الآخرين، ولومهم على أخطائهم، وغيرها.
والأفضل لو لاحظت العلامات دي على طفلك تستشير طبيب نفسي لمعالجته، بالإضافة لبعض السلوكيات اللي هتدعمه للحد من اضطرابات الشخصية النرجسية، زي إنك: تحط حدود ثابتة، وترفض الإساءة، وتقدم له الدعم.
أضف تعليق