مهارات كتير تقدري تطوري من خلالها حياة طفلك، فممكن تعلميه السباحة عشان تقوي جسمه، وممكن تعلميه الشطرنج عشان تزودي من معدل ذكائه، وتعليم ابنك اللغات يُعد من المهارات القيمة اللي بتزود من إبداعه، وبتحسن من الفرص الوظيفية له وقت ما يكبر.
عشان كدا تعليم اللغات للأطفال أصبح من أهم الأنشطة اللي بتسعى إليها كل أم, ومن أهم اللغات، هي اللغة الفرنسية. وفي المقال دا، هتكتشفي ليه تعليم الفرنسية للأطفال مهم، وأسهل الخطوات اللي تساعدك تعلميها لطفلك في البيت.
أهمية تعليم طفلك اللغات
فوائد تعليم اللغات لطفلك كتيرة، وتستحق المحاولة، فالأطفال اللي بيتكلموا لغتين بيكون عندهم قدرة كبيرة على الإبداع، وبيكتسبوا مهارة حل المشكلات، ودايمًا عقلهم بيكون واعي ومُنتج بشكل أكبر.
كمان العلماء أكدوا أن تعلم أكتر من لغة للأطفال بيساعد في تطوير أساليب جديدة في التعلم يستفيدوا من خلالها.
دا غير أن تعليم اللغات لطفلك هيحسن من الفرص الوظيفية له لما يكبر، عشان كدا بننصحك تبدئي فى تعليمه الفرنسية، وإتقانها هيكون أسهل وأسرع في سن صغير، بس ليه تختاري تعلمي ابنك أو بنتك اللغة الفرنسية بالذات؟
لماذا اللغة الفرنسية؟
اللغة الفرنسية بيتم تدريسها في كل بلاد العالم كلغة ثانية زي اللغة الإنجليزية بالظبط، بتدخل فيها معظم المواضيع الخاصة بالفنون زي: الموضة، والمسرح، والطبخ، وغيرهم، وتعليم طفلك للغة دي ليه فوائد كتير، منها:
- هيسهل عليهم تعلم باقي اللغات اللاتينية زي: الإنجليزية، والإسبانية، والإيطالية، وغيرهم.
- يعد فرصة لاستكشاف طفلك ثقافات جديدة، بحيث يطور من عقله وأفكاره، دا غير إن اللغة هتوسع آفاقه.
- بيزود من قدرة طفلك المعرفية، وبيعلي ثقته بنفسه.
- بيعد طريقة للتواصل مع طفلك، فتقدري تقضي معاه أكبر وقت ممكن في الاستماع لحكاياته ومغامراته، والتعرف على جوانب شخصيته بشكل أعمق.
أسهل الخطوات لتعليم الفرنسية للأطفال
أسهل طرق تعليم الفرنسية للأطفال هي أن الطفل يتعايش مع اللغة، عشان كدا دايما هتلاقي الحلول كلها بتتمحور حول تحويل محيط طفلك من ألعاب، وهوايات، واهتمامات إلى اللغة الفرنسية. بمعنى إن بعد تعلم أساسيات اللغة والحروف للطفل يبدأ يتعرف على العالم حواليه بالفرنسية، ودا أحسن حل لتعلم الفرنسية في أسرع وقت. ولكن إزاي تبدئي؟
تقدري تبدئي مع طفلك بخطوات مرتبة وبسيطة، واللي بتتمثل في:
معرفة أساسيات اللغة الفرنسية للأطفال
أساسيات تعليم الفرنسية للأطفال بتنحصر في تعلم الحروف وأصواتها بشكل جيد جداً، لأنها الأساس لكل كلمة وجملة جايين، وتقدري تدريبه على النطق الصح عن طريق فيديوهات اليوتيوب.
ولكن مش هتقفي عند الحروف، فمهم جداً إن مع كل حرف يتعلمه يكون موجود كلمتين أو أكتر بيبدؤوا بنفس الحرف، وقتها هتلاقي مع انتهاء فترة الأساسيات بيكون خارج بحصيلة كلمات كبيرة تساعده في مرحلة تكوين الجمل، وممكن تبدئي بمواضيع بسيطة، زي: الألوان، والأرقام، والأشكال.
وتقدري تستخدمي كروت ملونة، وقص ولزق عشان المعلومات تثبت في دماغه، مثال:
- اطبعي صور ملونة بالحروف في البيت، عشان تلفت انتباهه، وتخليه يستمتع بالتعلم.
- خلي فيه صور للحروف أو الأشكال بالأبيض والأسود، ويبدأ هو ينطق ويلون.
- اتأكدي إن المعلومات ثبتت في دماغه بالفعل عن طريق طباعة نفس الصور، ولكن تكون الكلمة مش كاملة، أو الجدول مكتوبة على شكل نقط، ويبدأ الطفل يكملها بنفسه.ودي كلها ممارسات هتساعدك في تعليم الفرنسية لطفلك بطريقة صحيحة، وسهلة في نفس الوقت.
ممارسة الفرنسية في حياة الطفل
بييجي بعد رحلة أساسيات تعليم الفرنسية للأطفال، نقطتين مهمين، وهم مرحلة تكوين الجمل مع الممارسة. واللي بتشجعي فيها طفلك على إنه:
- يعبر عن جوعه بالفرنسية، فيقول (j’ai faim) بدل ماما أنا جعان.
- يقولك صباح الخير بالفرنسية (Bonjour)
- يبدأ يعبر عن جمال الأشياء فيتعلم يقول (C’est une belle fleur) بدل ما يقول وردة جميلة.
ومن هنا تقدري تخلي طفلك يعيش مع اللغة الفرنسية، وممارسته في البيت بالشكل دا هي أفضل وأسرع طريقة لتعليم الفرنسية للأطفال، أما انتظارك لحد ما يتقن اللغة، بعدها يبدأ يتكلم ويمارس هو أكبر خطأ.
تعليم الفرنسية للأطفال من خلال المرح
أكتر إحساس بيواجهه الطفل هو الملل، ودايمًا بيحب يلعب أكتر من إنه يتعلم أو يذاكر. من هنا ظهرت فكرة تعليم الفرنسية للأطفال عن طريق المرح، واللي بتسمح لهم يحتفظوا بنفس مستوى المهارات اللغوية في اللغة على مدار سنين.
ولكن السؤال المهم، هو إزاي تدمجي بين تعلم الفرنسية والمرح في البيت؟
الرسم يعد من ألطف الطرق المرحة، لأنك تقدري مع كل رسمة بيرسمها طفلك تعلميه كلمة جديدة، يعني لو رسم أسد يقول اسمه (le lion)، أما لو رسم قطة يعرف إن معناها (le chat)، والكلب بنقول عليه بالفرنسية (le chien)، وهكذا.
كمان لو طفلتك بتحب الطبخ والوصفات تقدري تشجيعها عن طريق البحث عن وصفة في المطبخ الفرنسي سهلة وبسيطة، وتبدئي تنفذيها معاها، وقتها هتدرب على معنى ونطق كل مكون من الطبخة.
فيديوهات وقصص قصيرة باللغة الفرنسية للأطفال
الانغماس والتعايش مع اللغة يعد من أكتر الطرق فعالية في تعلم اللغات، من هنا، فاندماج طفلك مع اللغة الفرنسية من خلال الفيديوهات والقصص هيساعده في تعلمها بشكل أسرع. ولكن إزاي الفيديوهات والقصص يقدروا يساعدوكي في تعليم الفرنسية للأطفال؟
الفيديوهات
الفيديوهات هي أدوات تعليمية سهلة، ومن أكتر الحاجات اللي بينجذب إليها الأطفال. تقدري تستغلي دا في تعلم الفرنسية للأطفال عن طريق إنك تختاري موضوع معين بيحبه طفلك، وتبدئي في تجميع فيديوهات مبتدئين عنه.
سماع فيديو كبير كل يومين هيفرق جداً في مستوى طفلك في تعلم اللغة الفرنسية، دا غير إنه هيزود عنده حصيلة لغوية كبيرة، وهينمي مهارة التحدث.
القصص
تقدري تساعدي طفلك على قراءة كتب للأطفال مكتوبة باللغة الفرنسية كل يوم قبل النوم. وتساعديه في التعرف على الثقافة الفرنسية، وتنمية مهاراته اللغوية. وممكن مثلًا تبدئي بقصص زي:
- قصة “Le Petit Prince” d’ Antoine de Saint-Exupéry
- قصة “Mon père est femme de ménage” de Saphia Azzeddine
- قصة “Le Petit Nicolas” de René Goscinny
تعلم اللغة الفرنسية للأطفال من خلال اهتماماتهم
كل آراء الخبراء والمختصين في تعليم اللغة، اجتمعت على إن تعلم الفرنسية للأطفال عن طريق ربط اللغة باهتماماتهم نتائجه عظيمة. على سبيل المثال:
- إذا كان طفلك مهتم بالسفر والسياحة ومعلومات عن البلاد تقدري تعلميه الكلمات الخاصة عن السفر والمعالم الأثرية باللغة الفرنسية.
- لو كان مهتم بالرسم والفنون تقدري تبحثي عن معلومات بسيطة بالفرنسية عن اللوحات الفنية والرسامين. كمان متحف اللوفر وأسماء اللوحات العالمية جواه.
توظيف اهتمامات طفلك لتعلم اللغة الفرنسية هيفرق معاه جداً، وهيعلي مستواه في اللغة في وقت أسرع.
يمكنك أيضًا قراءة: كيفية تعليم اللغة الإنجليزية للأطفال من 2 إلى 5 سنوات
الخلاصة
تعليم الفرنسية للأطفال شيء ممتع وبسيط وهو لسه صغير، لأن تأثير اللغة عليه بيكون كبير جداً. فبتفَتح مداركه، وبتزود ذكائه. كمان وهو في سن المراهقة والبلوغ بيبقى عنده مهارة زيادة، مُتقنة بشكل كويس، فبتفرق معاه سواء في دراسته في الجامعة، أو في حياته العملية. فـ ليه ما تكونش دي البداية لتعليم الفرنسية لطفلك؟
ابدئي مع رحلة تعليم الفرنسية للأطفال، واستثمري فيها، ونتيجة الاستثمار دا هتبقى واضحة جدًا لما طفلك يكبر.
أضف تعليق