تنمية مهارات الطفل في عمر 4 سنوات هو أمر بيشغل أولياء الأمور؛ عشان بيحرصوا على تربية طفل قوي جسديًا وعقليًا وقادر على فهم التغيرات اللي بتحصل حواليه ومواكبتها.
ومن ضمن الحاجات اللي بتساعدهم على تنمية مهارات أطفالهم بسهولة وبشكل واضح هي ممارسة الرياضات والتمارين المختلفة والمناسبة لعمر الطفل وحجم جسمه.
عشان كدا هنعرض أهمية الرياضة بالتفصيل وكيفية اختيارها، ونتطرق إلى الرياضة المناسبة للأطفال 4 سنوات بوجه عام.
أهمية الرياضة للأطفال في عمر 4 سنوات
تلعب الرياضة دورًا فعالًا في تنمية مهارات الطفل المختلفة خصوصا في مرحلة ما قبل المدرسة؛ لإن الطفل في المرحلة دي بيكون محتاج لخطة متكاملة عشان يقدر يطور من مهاراته بسهولة ويؤهل لمرحلة الدراسة، فبنلاقي إن الرياضة بتتبنى النقطة دي وبتساهم بشكل كبير في الوصول لمهارات الطفل إلى المستوى المطلوب.
من أهم الحاجات اللي بتعملها الرياضة المناسبة للأطفال 4 سنوات إنها بتساعد على:
النمو الصحي
نمو الأطفال بشكل صحي بيساعد على بناء جسم قوي متناسق، وبيقلل فرصة حدوث السمنة المفرطة عند الأطفال، وكمان بيخليهم قادرين على اكتساب المهارات المختلفة وتنميتها بسهولة، وبنلاحظ إن ممارسة الرياضة المناسبة للأطفال 4 سنوات بيساعد بشكل كبير في النمو الصحي للطفل.
زيادة تركيز الأطفال
ممارسة الرياضة بتجبر الطفل يكون مركز دايما على هدف معين عايز يوصله، وبتقلل من فرصة تشتته، ومع الوقت بنلاحظ إن مهارة التركيز عند الطفل بدأت تزيد، وبالتالي فممارسة الرياضة بتكون مفيدة للأطفال اللي بيعانوا من مشاكل في التركيز زي حالات فرط الحركة وتشتت الانتباه.
وسيلة مميزة للترفيه
الأطفال دايما بيحبوا يشاركوا في الرياضات المختلفة كوسيلة للترفيه والمرح؛ جو من الإثارة والمتعة أثناء لعبهم وبتساعدهم يخرجوا الطاقة اللي جواهم بسعادة ونشاط.
زيادة الحماس عند الأطفال
من المعروف إن الألعاب الرياضية بتزود حماس الأطفال وبتخليهم عايزين يتحركوا ويدخلوا تحديات أكثر عشان يكسبوا، وبالتالي حماسهم بيكون مستمر طول اللعبة، ودا بيأثر بشكل إيجابي على باقي يومهم.
قواعد تحديد الرياضة المناسبة للأطفال 4 سنوات
اختيار الرياضة المناسبة للطفل بتكون تبعا للعديد من العوامل المختلفة أهمهم عمر الطفل، فمثلا في سن 4 سنوات بنلاقي إن الطفل بيحتاج إلى ممارسة الرياضة لمدة لا تقل عن 3 ساعات يوميا، وخلال الوقت دا بيكون في اختلاف في مدى قوة الألعاب والرياضات اللي بيمارسها.
بنلاقي كمان إن الرياضة المناسبة للأطفال 4 سنوات لازم تركز على المهارات الحركية للطفل؛ لإن دي الفترة اللي بيحتاج فيها لتطويرها وبيكون عنده طاقة عالية نقدر نستغلها في الرياضات دي، والأفضل إننا نبتعد عن الألعاب اللي بتتطلب مهارات قيادية؛ لإن غالبا الطفل مش هيكون قادر على القيادة.
من ضمن أساسيات اختيار الرياضة المناسبة للأطفال 4 سنوات أيضًا إنها تكون رياضة حرة ومفيهاش قواعد صعبة أو إرشادات؛ عشان نساعد الطفل يلعب بحرية.
تمارين مناسبة للأطفال في عمر 4 سنوات
بعد معرفتنا بقواعد تحديد الرياضة المناسبة للأطفال بنكون قادرين نختار أنسب الرياضات لأولادنا اللي بتساعدهم على نمو جسمهم بشكل صحي والحصول على لياقة بدنية:
بالنسبة إلى الرياضة المناسبة للأطفال 4 سنوات بنلاقي:
لعبة الخطوط
اللعبة عبارة عن إننا بنرسم مجموعة من الخطوط عبلى الأرض سواء كانت الخطوط دي مستقيمة أو متعرجة وبنطلب من الطفل إنه يمشي عليها بدون ما يخرج عن الخط، وبالرياضة دي بنعلمه التركيز وكمان بيكتسب مهارة التناسق بين حركاته الجسدية وحركة العين.
القفز على الألواح الملونة
لعبة القفز تعد من أكثر الألعاب الممتعة للأطفال، وهنا بنجيب بعض الألواح الملونة ونوزعها على الأرض ونخلي الطفل ينتقل بين واحدة والتانية عن طريق القفز بدون ما يمشي بينهم، واللعبة دي بتقوي من مهارات الطفل الحركية بشكل واضح.
لعبة الأضواء
الأطفال دايما بيحبوا الأضواء والإثارة، وبالتالي هيحبوا جدا لعبة الأضواء، واللعبة دي بتندرج تحت قائمة الرياضة المناسبة للأطفال 4 سنوات.
اللعبة عبارة عن 3 أضواء -أحمر وأخضر وأصفر-، وكل لون منهم له دلالة معينة، فمثلا اللون الأحمر معناه إن الطفل لازم يقف، والأخضر معناه إنه يتحرك زي ما يحب، أما الأصفر فبيشير إلى إن الطفل المفروض يمشي ببطء.
فكرة اللعبة إن ولي الأمر هيغير بين الألوان والطفل هيستجيب للإشارة اللي بيفهمها من اللون، وممكن اللعبة تكون في جماعات عشان تزود الإثارة.
ضرب البلالين
من الحاجات اللي ممكن يلعبها الأطفال في عمر 4 سنوات هي لعبة البلالين اللي بيتم ضربها باستمرار عشان تفضل موجودة في الهوا ونتجنب وقوعها، وبالتالي ممكن نحضر للطفل مجموعة من البلالين ونتواجد في مكان مفتوح ونخليه يلعبها سواء لوحده أو مع أحد الأفراد.
اللعبة بتزود التناسق بين حركة اليد والعين، وكمان بتخلي الطفل مبسوط وحابب يلعبها باستمرار.
تسلق الأشجار
يعد التسلق ضمن أنواع الرياضة المناسبة للأطفال 4 سنوات اللي بتساعد في تقوية أجسامهم والحفاظ على رشاقتهم، ولكن عشان تختار لطفلك رياضة التسلق لازم تتأكد إن المكان اللي حواليه آمن عشان ما يحصلش أي إصابات للطفل نتيجة وقوعه على أرض فيها قطع زجاجية مثلا أو أشياء حادة.
كمان لازم طول الشجرة يكون مناسب؛ عشان الطفل يقدر يتسلقها بسهولة وعشان نتجنب سقوط الطفل نتيجة عدم توازنه، وأثناء ممارسة الرياضة دي لازم نحرص إننا نكون بجانب الطفل ومراقبين كل حركاته؛ عشان نكون متطمنين عليه.
البحث عن الكنز
الأطفال دايما عندهم حب استطلاع، وممكن يقعدوا بالساعات عشان يدوروا على حاجة معينة ويستكشفوها، وبالتالي ممكن ننمي النقطة دي عندهم بلعبة البحث عن الكنز.
اللعبة عبارة عن صندوق مليان رمل، وتحت الرمل في مجموعة من ألعاب الطفل اللي بيبدأ يدور عنها لحد ما يلاقيها.
ركل الكرة
ركل الكرة يعد من أشهر أنواع الرياضة المناسبة للأطفال 4 سنوات أو أكثر، وبنلاقي إن عدد كبير من الأطفال بيقبل عليها؛ لإنها بتعطيهم مجال كبير للحركة وبتساعدهم يطلعوا الطاعة اللي جواهم بسعادة، وكمان بتزود من نشاطهم وحيويتهم.
ملحوظة: لازم نركز وإحنا بنشتري الكورة لأطفالنا إنها تكون خفيفة وحجمها مناسب لسنهم؛ عشان يقدروا يلعبوا بيها بأمان بدون ما تحصل إصابات، وكمان لازم نتأكد إن مكان اللعب آمن.
الطيارات الورقية
لعبة الطيارات الورقية من الألعاب القديمة اللي بتكون مبهجة للأطفال والكبار، وبنلاحظ إنها بتحفز الطفل على الجري وبتلعب دور واضح في الحفاظ على لياقته البدنية، وكمان بتسلي الطفل وبتضفي البهجة.
بالتالي ممكن نستغل دا ونحضر طيارة ورقية للطفل ونختار يوم متوسط الرياح ونلعب بيها معاه.
لعبة الفقاعات
الفقاعات الهوائية من الحاجات اللي بتجذب انتباه الطفل بشكل كبير وكمان بتخليه يجري ويقفز عشان يفرقع الفقاعات دي طول اللعبة، وبالتالي نشاطه وحيويته بتزيد، وكمان بيكتسب مهارة التناسق بين حركات العين واليد.
ومن هنا نقدر نحضر اللعبة دي للطفل اللي بلغ 4 سنوات من عمره ونعلمه إزاي بنستخدم العصاية عشان الفقاعات تطلع، ونبدأ اللعبة عشان نشجعه يتحرك أكثر.
ركوب الدراجة
ركوب الدراجات بيلعب دور مهم في تحسين مهارات الطفل الحركية، وبيعلمه إزاي يكون عنده توازن أثناء الحركة، وكمان بيعلمه إزاي يعتمد على نفسه مع الوقت.
وبالتالي ممكن نستخدم الرياضة دي وندرجها تحت بند الرياضة المناسبة للأطفال 4 سنوات اللي بتساعد بشكل كبير في تطوير مهاراتهم، ولكن لازم نتأكد أيضًا هنا إن مكان اللعب آمن وإن العجلة مناسبة لسن الطفل، وكمان نكون جنبه ونساعده في الركوب واللعب.
هل الرياضات الجماعية مناسبة للأطفال في سن أربع سنوات
من المعروف إن الطفل في سن 4 سنوات بيكون محتاج لتوجيه طاقته لحاجة مفيدة زي الألعاب الرياضية، لكن بنلاحظ إن احتياجه لاستكشاف اللي حواليه بشكل حر بيكون أكثر من احتياجه للدخول في منافسة والفوز فيها، وبالتالي تركيزنا على الألعاب الفردية المختلفة والمناسبة لعمر الطفل هيكون أفضل في الفترة دي.
أما عن الألعاب الجماعية فبنلاحظ إن رغم كونها وسيلة لتنمية مهارات الطفل الجماعية إلا إن الطفل في السن دا مش بيكون قادر يبذل فيها جهد كبير أو حتى يتبع قواعد اللعبة، وبالتالي لو خلينا الطفل يلعبها لازم نكون واقعيين ونكون حاطين في اعتبارنا إن الطفل غالبا مش هيقدر يتبع إرشادات وقواعد اللعبة.
أضف تعليق