أهم سمات الطفل المستكشف وكيفية التعامل معه

ازاي ممكن نتعامل مع الطفل المستكشف، ونستغل طاقته، ومهاراته؟

كتير من الأهالي بيظنوا إن الطفل اللي بيلف في كل مكان في الشقة، وإيده بتوصل لأي حاجة، وكل حاجة ما هو إلا طفل شقي، ومُتعب، لكن في الحقيقة هو طفل محتاج حد يكتشف قدراته، وفضوله، ويستغلها صح.

بنقدم لك في المقال دا مختلف صفاته، وازاي ممكن نتعامل معاه بأنسب شكل.

ما أهم سمات الطفل المستكشف؟

مهم نعرف إن قوة الملاحظة عند الطفل في سنه الصغير بتكون ضعف قوتها عند الشخص البالغ، وقوة حواسه 10 أضعاف قوتنا، وخاصةً الشم، واللمس، ولذلك سبب لمس طفلك لأي حاجة حواليه بيكون بدافع الاستكشاف، وتكوين المعرفة، وبتظهر أشهر سماته في:

1- القدرة على حل المشكلات

يتسم الطفل المستكشف بالقدرة على حل المشكلات، والتفكير في حلول مختلفة، وغريبة عشان يتغلب على العقبات اللي بتقابله مهما كانت بسيطة، دا غير إنه بيكون عنده القدرة على استخدام الموارد المتاحة بشكل غير مألوف لخلق الحلول بسرعة، وذكاء.

كمان بيتبع طريقة التجربة، والخطأ بمثابرة عالية، وصبر كبير، عشان يوصل للحل الأمثل في الآخر، ودي من أبرز سماته.

2- التفكير الناقد

من أكتر السمات اللي هتلاحظي وجودها في الطفل المستكشف هي القدرة على تقييم المعلومات اللي بيستقبلها، وترتيب الأمور حسب الأولويات، واستخدام الحُكم المعقول لحل المشكلات، لإنه بيبني الحكم على أساس معطيات موجودة في عقله.

وبجانب دا، هنلاقي إن الطفل بيسأل اسئلة كتير طول الوقت، ودا بسبب إنه بيحلل الإجابات عقلانيًا، وأي إجابة بياخدها، تلقائيًا هيطلّع منها أسئلة تانية، عشان يرضي فضوله، وحبه للمعرفة.

3- احترام الذات

بيزداد شعور الطفل المستكشف عن غيره من الأطفال باحترامه لذاته، وإحساسه بقيمته، ودا بيكون نتيجة لانبهار الآخرين برد فعله، أو طريقة كلامه، وذكائه، وبالتالي بيحس بتقدير لنفسه.

من أهم العوامل بردو اللي بتزوّد احترامه لذاته هو إن عنده روح قيادية، ويقدر يدير اللعب مع غيره من الأطفال، ويساعدهم يستكشفوا زيه، ودا طبعًا بيخلق عنده شعور التقدير لنفسه بشكل غير مباشر.

4- زيادة الثقة بالنفس

الطفل المستكشف بطبعه جريء، وبيجرب كتير، يقدر يتحدى، ويعمل حاجات مختلفة، ودا بيزود عنده الشجاعة، وبالتالي بيعزز ثقته بنفسه.

ودا هنلاحظه لما نلاقي إن الطفل بيوافق، ويرفض، ويعبر عن نفسه، ويتكلم قدام اللي حواليه، ويسأل بدون ما يتردد، او يخجل.

5- النمو المعرفي من سن صغير

المعرفة قوة، والطفل المستكشف بيملك القوة دي، ودا لإنه بيدوّر كتير، وبيحب يكتشف الأجدد دايمًا، حتى لو أعلى من مستواه العقلي، وعينه بتلمع قدام أي شيء غير تقليدي بالنسباله.

ودا بيترتب عليه زيادة نموه المعرفي، واكتسابه لمهارات مختلفة زي:

• قدرته على الاستنتاج، والتحليل بناءً على المعلومات الكتير اللي عنده.
• استخدامه لمرادفات جديدة، وزيادة نموه اللغوي بدرجة كبيرة.
• سرعة الملاحظة، وتحديد التغيير في أي مكان حتى لو بسيط.
• احتفاظه بالمعلومات، وسرعة استرجاعها بشكل ملحوظ.

6- استخدام حواسه بقوة

بيعتمد الطفل في مرحلة طفولته المبكرة على حواسه بشكل كبير، عشان يعرف يتواصل مع العالم، ويخزن معلومات، وبتبقى المرحلة العمرية من سنة لـ 3 سنوات مرحلة استكشافية بالنسباله، نقدر نسميه فيها “المستكشف الصغير”.

هنا الطفل بيعتمد على حاسة اللمس بشكل كبير عشان يتعرف على كل حاجة، لإنه ما يملكش أي معرفة عن أي شيء، فبتلاقي كل حاجة عاوز يمسكها، ويستكشفها، ويشم ريحتها، أو يتعرف عليها عن طريق الفم، وبكدا هو بيوظف كل حواسه عشان يعرف تفاصيلها.

كيف نتعامل مع الطفل المستكشف؟

نقدر نساعد الطفل على الاستكشاف في سن صغير بتهيئة مكان آمن، وممارسة بعض الأنشطة معاه للتعلُم، واتباع الخطوات دي:

1- الصبر على أسئلته 

الأسئلة الكتير دلالة على ذكاء طفلك، عشان كدا ضروري تستقبليها بصدر رحب، وتحاوريه فيها، ولو عندك إجابة تجاوبيه في ساعتها، أو تدوروا سوا على إجاباتها، أو تدليه على الطريق وهو يدوّر لوحده.

مهم كمان نتقبل أسئلة الطفل المحرجة، أو الغريبة اللي ممكن يقولها لنا في أي وقت، وما نزعقلوش، أو نقفّل كلام معاه، لإنه ببساطة جديد على العالم، وهدفه الأساسي إنه يفهم اللي بيحصل حواليه، وضروري نجاوبه بهدوء، وبإجابات مناسبة تشبع حاجته للمعرفة، وفي نفس الوقت تلائم سنه.

2- مشاركته في الأنشطة 

ضروري جدًا وجودك كمرشد، أو موجه أثناء لعب الطفل، أو خلال ممارسته للأنشطة اللي بتوفرها له، ودا لإنك تقدر تساعده يكتشف طرق للعب مختلفة، أو تديله معلومات جديدة عن الحاجات اللي بيعملها على سبيل المثال: لو بيلعب بصاروخ تعرّفه إن الصاروخ دا بيطلع الفضاء اللي فيه الشمس، والكواكب، وتفرجه على أشكالهم، وألوانهم على الإنترنت.

ودا طبعًا هيخلق عنده أسئلة أكتر، وهيتعرف على اهتماماته بشكل أوسع، وبالتالي هنكتشف مهارات جديدة فيه، مش هتظهر إلا بوجود أحد الآباء معاه كمرشد خلال الأنشطة.

3- توفير بيئة مناسبة للاستكشاف

البيئة هي العامل المؤثر الأول في تنشئة الطفل بشكل عام، ولو استخدمناها كويس، وطوّعناها عشان تتناسب في طبيعة الطفل المستكشف، هتنمي مهارات فوق ما نتوقع، فعلى سبيل المثال نقدر نوفر بيئة مناسبة لاستكشاف الطفل من خلال:

إتاحة التجارب الكتيرة

زي إننا نساعده يتعلم التلوين، الرسم، الخزف، الطبخ، أو الزراعة، كل دا ليه دور كبير في مساعدته على اكتشاف نفسه، واستكشاف اللي حواليه.

مساعدته على التعرف على العالم الخارجي

عن طريق إننا ناخده في رحلات لحدائق الحيوان، أو متاحف الأحياء المائية، أو رحلات السفاري.

تحديد روتين يومي للقراءة معاه

عشان يقدر يتعرف على معلومات جديدة، ويكتسب كمان صفات حميدة من خلالها.

عمل مسابقات بينه، وبين اخواته

سواء في المعلومات -لو سنهم كبير-، أو في الألعاب البسيطة زي: بناء المكعبات.

4- توفير وقت للهدوء، ومناقشة الأفكار

طبعًا تعرّض الطفل لتجارب جديدة، ومعلومات مختلفة باستمرار شيء مهم، ولكن الأهم هو وجود وقت لمعالجة المعلومات دي، واستيعابها كويس، ومناقشته فيها.

تخصيص وقت من فترة للتانية نناقش الطفل في الحاجات اللي بيمارسها، أو عنده شغف فيها، هيحفزه يتعلم أكتر، ويدي طاقة لعقله إنه كمان يستكشف أكتر، بجانب إن دي هتكون وسيلة لتربيته بشكل غير مباشر.

5- ترك زمام الاستكشاف للطفل

بالفطرة بنخاف على أطفالنا، وبنبقى عايزين طول الوقت نعلمهم كل حاجة بنفسنا عشان بنقلق من إنهم يتأذوا، ولكن التعلم بالتجربة، وإن الطفل يقوم، ويقع، ويوصل للنتيجة النهائية بنفسه، دي من أفضل طرق التعلم، والاستكشاف.

عشان كدا لازم نسيب أطفالنا يكشتفوا الحياة بنفسهم، كل اللي علينا نحمي دايرتهم من أي عوامل خطر، ونقف من بعيد نديلهم نصايح وبس، وهما اللي ياخدوا الفعل.

يمكنك أيضًا قراءة: كيفية التعامل مع الطفل الخجول في الروضة.

نصائح للتعامل مع الطفل المستكشف

1.  خلي طفلك يلمس الخضروات، والفاكهة، ويشمها، ويلمسها، وخليكي عارفة إن مص الأشياء حاجة مهمة لتطور نموه الحسي.
2.  وفري له ألعاب مختلفة كل فترة؛ ألعاب بلاستيكية، وعرائس قطنية محشوة، وألعاب متحركة، وألعاب صوتية، ومكعبات.
3.  اعرضي عليه صور كرتونية للحيوانات، وعرفيه اسمها، أو فيديو يكون فيه الحيوان، وصوته عشان يفرق بين الحيوانات.
4. خصصي دُرج منخفض في المطبخ للعب طفلك بحاجات آمنة زي: أدوات مطبخ بلاستيكية، ألعاب.
5. امسكي المرآة وخليه يشوف نفسه، ويحفظ شكله، والمسي شعره، وأنفه، لتعليمه أجزاء وجهه.
6. شجعيه على ألعاب التمثيل، لإنها بتنمي الخيال عنده، وبتوسع إدراكه للمشاعر المختلفة.
7. احرصي على تجربة طفلك لأشياء جديدة، زي ملء طبق بالماء، ووضع بعض الألعاب بيه.
8. ابحثي معاه عن إجابة الأسئلة اللي بتدور في عقله، عن طريق الكتب، أو البرامج التعليمية.
9. ساعديه يمارس رياضة، لإنها هتساعده يخرج الطاقة اللي جواه، ويكتشف مهاراته.
10. عقمي الأرضيات والأسطح، عشان يكون البيت آمن لتواجد طفلك، ولمسه.
11. وفري وقت يوميًا للنقاش معاه في أي أمر حابب إنه يعرف عنه أكتر.
12.  اسمحي لطفلك بالخطأ، لإنه مش هيتعلم إلا لما يجرب بنفسه.
13.  وفري له صلصال آمن، وأدوات للرسم، أو الكتابة.
14.  امنحيه فرصة للطبخ، وإعداد أي طبق بسيط.

وأهم شيء في المرحلة دي، إنك تعلمي طفلك الموازنة في الأمور، بمعنى إنه يسأل عن كل حاجة، ويعرفها، لكن من غير ما يسأل أسئلة تحرج الآخرين، أو يتدخل في كلام الكبار.

وخليكي على علم إن تجهيز البيت لوجوده، وحركته من غير قيود من أكتر الأمور اللي هتساعده في الاستكشاف، والمعرفة، فاحرصي على الأمور المذكورة، واستخدمي كل الموارد، وحوّليها لطرق مختلفة لتعليم طفلك شيء جديد، عشان يكبر، ويتسم بصفات الطفل المستكشف الذكي.

أخيرًا

بكدا نكون وضحنا في المقال إن الطفل المستكشف بتحركوا قوتين أساسيتين هما ”الفضول والاستكشاف”، ودا طبيعي عشان يتطور، وينمو، ويكوّن حصيلته المعرفية, مهمتك الأساسية هنا إنك توفري له بيئة آمنة للاستكشاف، والحركة، وتساعديه بكل الموارد المتاحة، عشان يعرف أكتر، ويتعلم أسرع.

تعرّف على: تعديل سلوك الطفل كثير الحركة | 11 نصيحة فعالة لتعديل سلوك الطفل كثير الحركة