تتميز مرحلة الطفولة بحب الاستكشاف والتجربة، وعلى الرغم من كونها حاجة مفيدة للطفل إلا إنها على الجانب الآخر ممكن تعرضه لعديد من المشاكل والإصابات، عشان كدا مهم الأم تكون حذرة، وتوازن بين حب الطفل للاستكشاف وحمايته.
هنتعرف في المقال دا على واحدة من المشاكل اللي بيتعرض ليها الطفل، وهي الاختناق، وإيه هي طرق الإسعافات الأولية للأطفال عند الاختناق، عشان ننقذ أطفالنا لو حصل -لا قدر الله-.
تعريف الاختناق، وأسبابه عند الأطفال
بداية قبل ما نتعرف على طرق الإسعافات الأولية للأطفال عند الاختناق هنعرف إزاي بيحصل، وإيه هي أسبابه.
الاختناق بيحدث لما يُغلق مجرى الهواء بسبب أي جسم بيقفل الحنجرة أو القصبة الهوائية سواء بشكل جزئي أو كلي، وممكن يعرض الطفل للوفاة، لأنه بيمنع وصول الأكسجين إلى الدماغ، فمهم تتقدم الإسعافات الأولية بأسرع ما يمكن.
الطفل ممكن يتعرض للاختناق بسبب عوامل كتير، لكن أهمها:
- اختناق الرضيع في حالة دخول اللبن في مجرى التنفس، وبالتالي انسداده، وحدوث الاختناق.
- دخول الماء إلى مجرى التنفس.
- انسداد مجرى التنفس بقطع الطعام الكبيرة بالنسبة إلى الطفل.
- ابتلاع أجزاء صغيرة، فتقف في مجرى التنفس، وتسبب انسداد.
علامات حدوث الاختناق
بعد ما بيتعرض الطفل للاختناق بتظهر عليه عدة علامات عشان تنبه الأهل لتطبيق طرق الإسعافات الأولية للأطفال عند الاختناق، واللي منها:
- الإغماء وفقدان الوعي.
- عدم القدرة على التنفس أو حتى التنفس بصوت مسموع.
- تغير لون البشرة والشفاه والجلد، وتحوله للون الرمادي أو الأزرق.
- الهلع ونظرات دالة على الارتباك والخوف.
- وضع الطفل يده على حنجرته.
- السعال بشكل قوي أو حتى ضعيف.
- فقدان القدرة على الكلام والصراخ والبكاء.
كل دي علامات بتظهر في حالة الاختناق، وممكن يظهر بعضها أو كلها، لكن مهم في حالة ظهورها نقدم الإسعافات الأولية للأطفال عند الاختناق بسرعة وفورًا لإنقاذ حياته.
خطوات الإسعافات الأولية للأطفال عند الاختناق
عشان نقدر نساعد الطفل لو اتعرض للاختناق لازم نعرف إزاي نتخلص من الجسم الغريب اللي سبب الاختناق بسرعة وفعالية، ودي بعض الطرق المتبعة في الإسعافات الأولية للأطفال عند الاختناق:
1- تشجيعه على السعال
لو ظهر على الطفل أي من أعراض الاختناق وبدأ بالسعال فما تخليهوش يوقفه، بالعكس ساعديه وخليه يستمر، لأن السعال طريقة فعالة لإزالة أي جسم عالق، ومن أفضل طرق الإسعافات الأولية للأطفال عند الاختناق.
2- تطبيق طريقة الخمس ضربات
لو ظهر على الطفل أي علامة اختناق ممكن تقوم الأم بحمله، وتقلب وجهه في اتجاه الأرض، ويكون مسنود على إيدها وفخذها.
بعدها تبدأ الضرب على ظهره ما بين كتفيه خمس مرات، ولما يظهر الجسم وتتأكد من مكانه تقدر تستخدم إيدها لاستخراجه، لكن مهم ما تدخلش إيدها قبل ما تتأكد من مكان الجسم الغريب، عشان ما تساعدش في دخوله مرة تانية.
ولو تم تنفيذ الخطوات السابقة ومحصلش أي تغيير، ممكن نغير وضعية الطفل بوضعية تسمح له بالمحافظة على تنفسه، زي اللي بيتم تطبيقها في طريقة الخمس ضغطات، واللي هيتم ذكرها في المقال.
غالبًا الطريقة دي بتساعد في خروج الجسم اللي سبب الاختناق بسهولة وسرعة، لكن لو تم تطبيقها ولسه الطفل بيعاني من الاختناق، أو ولو توقف التنفس عنده لمدة عشر ثواني لازم يتوجه بيه لأقرب طوارئ، أو طبيب أطفال لطلب المساعدة مع تطبيق التنفس الصناعي، ومحاولة تكرار الخطوات السابقة.
3- المساعدة بالتنفس الصناعي
لو زاد الاختناق وبدأ يتغير لون الطفل والتنفس بيكون أصعب ممكن نساعده بإجراء التنفس الصناعي.
يتم فتح فم الطفل والتنفس فيه بنفخ الهواء بمقدار ملأ خدوده، والنفخ يكون بهدوء ولطف لحد ما يرتفع صدر الطفل، وعندها بيتوقف التنفس الصناعي وبنخلي الطفل يرتاح، ممكن تتكرر العملية دي خمس مرات.
4- تقنية الضغط على البطن
الطريقة دي من الإسعافات الأولية للأطفال عند الاختناق تناسب الأطفال الأكبر سن، وبتكون بإن الأب أو الأم يقفوا خلف الطفل ويكون ظهره ملتصق بصدرهم، وذراعهم تحت ذراع الطفل عند منطقة البطن العلوية.
الإيد اليمنى تتكون على شكل قبضة، وتوضع بين أضلاع الطفل والسرة.
نجمع الإيد اليسرى بقبضة اليمنى على مستوى أسفل الصدر، والضغط خمس مرات على البطن للداخل ولأعلى، ونكرر العملية لحد ما يخرج الطفل الجسم الغريب، أو الوصول لأقرب مكان عشان يتلقي المساعدة الطبية.
وكمان ممكن نطبق تكنيك مشابه للأطفال الرضع تحت العام، وبيكون عن طريق إن الأم تجلس وتضع الرضيع على أحد ساعديها، بحيث يكون وجهه للأعلى، وبعد كدا بتبدأ تضغط بواسطة إصبعين فقط للداخل ولأعلى أسفل منطقة الصدر، وحتى 5 ضغطات متتالية، وبنسيب فرصة للصدر إنه يرتفع بين كل ضغطة والثانية، علشان ندي فرصة للطفل بالتنفس.
ملاحظات عند تطبيق الإسعافات الأولية لطفل المختنق
مع تطبيق خطوات الإسعافات الأولية للأطفال عند الاختناق مهم كمان نكون بنسعى للوصول إلى أقرب مستشفى طوارئ أو طبيب أطفال، أو الاتصال بالإسعاف للمساعدة.
كمان مهم إن الطفل لا يأكل ولا يشرب أي حاجة؛ لأن دا ممكن يعقد الأمر ويزداد الاختناق، ومش دي الطريقة الصحيحة للتخلص من الاختناق، على العكس النتيجة بتكون سلبية.
نصائح لوقاية الأطفال من الاختناق
الوقاية خير من العلاج، عشان كدا مهم نحافظ على أطفالنا ونجنبهم التعرض للاختناق؛ عشان ما نلجأش لتطبيق أي من طرق الإسعافات الأولية للأطفال عند الاختناق وتبعات الأمر دا، ونقدر نعمل دا بأمور مختلفة منها:
1- تعليم الأطفال آداب الطعام
فيتعلم إزاي يمضغ الطعام بشكل جيد، واتباع آداب الطعام فما ياكلش وهو واقف، ولا يتكلم ويضحك والطعام في فمه، وغيرها من الآداب الخاصة بتناول الطعام.
2- إبعاد الألعاب ذات القطع الصغيرة
مهم نراعي إن الألعاب اللي بنشتريها للطفل تكون مناسبة لسنه، وما تحتويش على أي قطع صغيرة ممكن يحاول يبلعها فتقف في حنجرته، وتسبب له اختناق.
3- تجنب الأطعمة صعبة المضغ
بعض الأطعمة صعب على الطفل مضغها وتكسيرها، فممكن يحاول بلعها بدون مضغ فتسبب انسداد في الحلق، وبالتالي نجنبه الأطعمة دي زي: المكسرات، أو الحلويات الكبيرة الصلبة، قطع الفاكهه والخضار إذا كان غير قادر على مضغهم.
4- الانتباه للطفل أثناء الاستحمام والشرب
وطفلك بيشرب مياه أو بيستحمى لازم نتأكد إن مفيش أي مياه بتدخل للأنف، أو للفم بطريقة تسبب انسداد مجرى الهواء.
5- مراقبة الطفل بصورة مستمرة
بعد أخذ كل الاحتياطات هيفضل مطلوب من الأهل مراقبة أطفالهم وخصوصًا في مرحلة الاستكشاف؛ عشان يقدروا يتدخلوا في الوقت المناسب لو حصلهم أي حاجة.
يمكنك أيضًا قراءة: صندوق الإسعافات الأولية في المنزل | تعرف على أهم الأدوات الضرورية به.
الخلاصة
أول خطوة في تقديم الإسعافات الأولية للأطفال عند الاختناق هي السيطرة على الأعصاب والهدوء عشان الطفل ما يتعرضش للذعر، ويزداد خوفه، ويتفاقم الوضع، كمان سرعة التدخل بالخطوات وتطبيقها لإنقاذ الطفل في حالة تعرضه للاختناق هيساعد في الحفاظ على حياته، ودا هيحصل لما يكون الأهل متعلمين ومتدربين على الإسعافات الأولية اللازمة للأطفال بشكل عام حتى قبل حدوثها.
أضف تعليق