تتميز مرحلة الطفولة بحب الاستكشاف والتجربة، وبالرغم من إنها حاجة مفيدة للطفل لكن ممكن تعرضه لمشاكل وإصابات كتير، عشان كدا مهم الأم تكون حذرة، وتوازن بين حب الطفل للاستكشاف وحمايته.
وفي المقال دا هنتعرف على واحدة من المشاكل اللي بيتعرض لها الطفل، وهي الاختناق، وأهم أسبابه، وعلاماته، وإيه هي طرق الإسعافات الأولية للاختناق للأطفال، عشان ننقذهم لو حصل -لا قدر الله-.
تعريف الاختناق، وأسبابه عند الأطفال
الاختناق بيحصل لما مجرى الهواء يتقفل بسبب أي جسم سد الحنجرة أو القصبة الهوائية سواء بشكل جزئي أو كلي، وممكن يعّرض الطفل للوفاة، لإنه بيمنع وصول الأكسجين للدماغ، فمهم تتقدم الإسعافات الأولية للاختناق للأطفال بأسرع ما يمكن.
الطفل ممكن يتعرض للاختناق في حالات كتير، أشهرها:
- اختناق الرضيع في حالة دخول اللبن في مجرى التنفس، وبالتالي انسداده.
- انسداد مجرى التنفس بقطع الطعام الكبيرة بالنسبة للطفل.
- ابتلاع أجزاء صغيرة تقف في مجرى التنفس، وتسبب انسداد.
- دخول الماء لمجرى التنفس.
والأهم من معرفة طرق الإسعافات الأ,لية للاختناق للأطفال هي إتقان ممارستها، ودا اللي أثبتته دراسة اتنشرت على موقع ScienceDirect وكان غرضها المقارنة بين تصرف الأمهات اللي مارست خطوات الإسعافات الأولية للاختناق للأطفال أقل من 5 سنوات، واللي عندهم معرفة بدون ممارسة.
ووجدوا إن الأمهات اللي مارست دا بشكل عملي كان أسهل وأسرع بالنسبالها من الأمهات اللي عندهم معرفة فقط.
ودا بيوجب عليكي إنك تحضري ورش عملية للنوع دا من الإسعافات، أو تشوفي فيديوهات بتنفذها وتفهمي الطريقة الصحيحة بالظبط
تعرفي أيضًا على: أهم خطوات الإسعافات الأولية عند ارتفاع درجة الحرارة.
علامات حدوث الاختناق عند الأطفال
بعد ما بيتعرض الطفل للاختناق بتظهر عليه علامات عشان تنبه الأهل لتطبيق طرق الإسعافات الأولية للاختناق للأطفال، واللي منها:
- تغير لون البشرة والشفاه والجلد، وتحوله للون الرمادي أو الأزرق.
- فقدان القدرة على الكلام، والصراخ، والبكاء.
- الهلع ونظرات بتدل على الارتباك والخوف.
- السعال بشكل قوي أو حتى ضعيف.
- وضع الطفل إيده على حنجرته.
- عدم القدرة على التنفس.
- الإغماء وفقدان الوعي.
كل دي علامات بتظهر في حالة الاختناق، وممكن يحصل بعضها أو كلها، لكن مهم في حالة ظهورها نقدم الإسعافات الأولية للاختناق بسرعة لإنقاذ حياته.
تعرفي أيضًا على: أهم الإسعافات الأولية للجروح عند الأطفال.
خطوات الإسعافات الأولية للاختناق للأطفال
وفقًا لدراسة اتنشرت على موقع NIH اتنفذت للمقارنة بين معلمين على علم بالإسعافات الأولية في حالة الاختناق، ومعلمين ما اتدربوش قبل كدا عليها لقوا إن مستوى المعرفة بخطوات الإسعافات الأولية منخفض عند اللي مش متدربين.
وكمان البعض مارس طرق خطأ تمامًا، ووجب التدخل العاجل لتدريب المعلمين على الإسعافات الأولية للاختناق للأطفال.
وعشان تساعدي طفلك لو اتعرض للاختناق؛ لازم تعرفي إزاي تتخلصي من الجسم الغريب اللي سبب الاختناق بسرعة وفعالية، ودي أهم الخطوات المتبعة في الإسعافات الأولية للاختناق:
1- شجعيه على السعال
لو ظهر على الطفل أي عرض للاختناق، وبدأ بالسعال فما تخليهوش يوقفه، بالعكس ساعديه وخليه يستمر، لإن السعال طريقة فعّالة لإزالة أي جسم عالق، ومن أفضل طرق الإسعافات الأولية للأطفال عند الاختناق.
2- استخدمي طريقة الخمس ضربات
لو ظهر على الطفل أي علامة اختناق شيلي الطفل، واقلبي وجهه في اتجاه الأرض، ويكون مسنود على إيدك أو فخذك، وبتختلف الطريقة على حسب العمر.
للطفل أقل من سنة
ضعي الطفل على طول فخذك أو ذراعك، ووجهه للأسفل، وادعمي ظهره ورأسه بإيدك، واضربي 5 ضربات متوسطة على الظهر باستخدام أخر تلت من إيدك في منتصف الظهر وبين لوحين الكتف عند الطفل.
ولما يظهر الجسم، وتتأكدي من مكانه؛ استخدمي إيدك لاستخراجه، وما تدخليش إيدك قبل ما تتأكدي من مكان الجسم الغريب، عشان ما يدخلش مرة تانية.
للطفل فوق السنة
خلي طفلك في حضنك، ووجهه للأسفل، وادعميه في وضعية مائلة واضربي على ظهره 5 ضربات من الخلف.
ولو نفذتي طريقة الخمس ضربات، ومحصلش أي تغيير، هتقومي بضغطات الصدر للطفل أقل من سنة، ولو أكبر هتنفذي تقنية الضغط على البطن.
3- استخدمي ضغطات الصدر
الطريقة فعالة للأطفال أقل من سنة واحدة، وبتكون عن طريق إنك بتحطي طفلك على طول فخذيك، وبتدوري عن عظمة الصدر، وتحطي إصبعين في المنتصف.
وبعد كدا تضغطي 5 ضغطات متوسطة على الصدر، مع الضغط على الصدر براحة.
وغالبًا الطريقة دي بتساعد في خروج الجسم اللي سبب الاختناق بسهولة وسرعة، لكن لو طبقتيها ولسه الطفل بيعاني من الاختناق، أو ولو توقف التنفس عنده لمدة عشر ثواني لازم تتوجهي بيه لأقرب طوارئ، أو طبيب أطفال لطلب المساعدة مع تطبيق التنفس الصناعي، ومحاولة تكرار الخطوات السابقة.
4- استخدمي تقنية الضغط على البطن
الطريقة دي من الإسعافات الأولية للاختناق للأطفال الأكبر في السن، وبتكون بإن الأب أو الأم يقفوا خلف الطفل، ويكون ظهره ملتصق بصدرهم، وذراعهم تحت ذراع الطفل عند منطقة البطن العلوية.
والإيد اليمين تكون على شكل قبضة، وتوضع بين أضلاع الطفل والسرة، وبعدين تجمع الإيد الشمال بقبضة اليمين على مستوى أسفل الصدر، والضغط خمس مرات على البطن للداخل ولأعلى، وتُكرر العملية لحد ما يخرج الطفل الجسم الغريب.
ورغم إن الأسلوب دا من الطرق المفيدة لخروج الجسم الغريب إلا إن بعض الدراسات التطبيقية أثبتت إن ليها آثار جانبية.
ومنهم دراسة اتنشرت على موقع NIH؛ وضحت إن بعض الممارسات للأسلوب دا ممكن تضر بالطفل، وتتلف الأعضاء الداخلية، وعشان كدا لازم يتنفذ بطريقة صحيحة.
5- ساعديه بالتنفس الصناعي
وأخيرًا، لو زاد الاختناق وبدأ يتغير لون الطفل، والتنفس بقى أصعب ممكن تساعديه بإجراء التنفس الصناعي.
ودا من خلال إنك تغلقي فتحتي الأنف بالضغط عليهم بالسبابة والإبهام، وتفتحي فم الطفل، وتتنفسي فيه بنفخ الهواء بمقدار ملئ خدوده، والنفخ يكون بهدوء ولطف لحد ما يرتفع صدر الطفل، وعندها بيتوقف التنفس الصناعي وبنخلي الطفل يرتاح، وممكن تتكرر العملية دي خمس مرات.
تعرفي أيضًا على: خطوات تدريب طفلك على الإسعافات الأولية في المنزل.
ملاحظات عند تطبيق الإسعافات الأولية للاختناق للأطفال
مع تطبيق خطوات الإسعافات الأولية عند الاختناق مهم كمان نكون بنسعى للوصول لأقرب مستشفى طوارئ أو طبيب أطفال، أو الاتصال بالإسعاف للمساعدة.
كمان مهم إن الطفل لا يأكل ولا يشرب أي حاجة؛ لإن دا ممكن يعقد الأمر ويزود الاختناق، ومش دي الطريقة الصحيحة للتخلص منه، على العكس النتيجة بتكون سلبية.
اقرئي أيضًا: الإسعافات الأولية للسقوط عند الأطفال.
نصائح لوقاية الأطفال من الاختناق
الوقاية خير من العلاج، عشان كدا مهم نحافظ على أطفالنا ونجنبهم التعرض للاختناق من خلال بعض النصائح، زي:
1- تعليم الأطفال آداب الطعام
علمي طفلك إزاي يمضغ الطعام بشكل كويس، واحرصي على التزامه بآداب الطعام فما ياكلش وهو واقف، ولا يتكلم ويضحك والأكل في فمه، فتقف حاجة في حنجرته وتسبب الاختناق.
2- إبعاد الألعاب ذات القطع الصغيرة
مهم نراعي إن الألعاب اللي بنشتريها للطفل تكون مناسبة لسنه، وما يكونش فيها أي قطع صغيرة ممكن يحاول يبلعها فتقف في حنجرته، وتسبب له اختناق.
3- تجنب الأطعمة صعبة المضغ
بعض الأطعمة صعب على الطفل مضغها وتكسيرها، فممكن يحاول بلعها بدون مضغ فتسبب انسداد في الحلق، وبالتالي نجنبه الأطعمة دي زي: المكسرات، أو الحلويات الكبيرة الصلبة، وقطع الفاكهة والخضار إذا كان غير قادر على مضغها.
4- الانتباه للطفل أثناء الاستحمام والشرب
وطفلك بيشرب مياه أو بيستحمى لازم تتأكدي إن مفيش أي مياه بتدخل للأنف، أو للفم بطريقة تسبب انسداد مجرى الهواء.
5- مراقبة الطفل بصورة مستمرة
بعد أخذ كل الاحتياطات هيفضل مطلوب من الأهل مراقبة أطفالهم وخصوصًا في مرحلة الاستكشاف؛ عشان يقدروا يتدخلوا في الوقت المناسب لو حصلهم أي حاجة.
اقرئي أيضًا: صندوق الإسعافات الأولية في المنزل
الخلاصة
من أكتر المشاكل اللي بتحصل للأطفال هي تعرضهم للاختناق، ودا بيوجب على الأهل معرفة الإسعافات الأولية للاختناق للأطفال عشان ينقذوا أطفالهم في أسرع وقت.
ومن أهم خطوات الإسعافات الأولية في الحالة دي؛ المحافظة على السعال، واستخدام طريقة الخمس ضربات، وفي حال استمر الاختناق يمكن اللجوء لطريقة ضغطات الصدر والبطن على حسب سن الطفل، وأخيرًا المساعدة عن طريق التنفس الصناعي.
وفي حالة استمرار الأعراض على الطفل لازم الوصول لأقرب مستشفى عشان يحصل على مساعدة طبية بأسرع وقت.
المصادر
Learn first aid for a child who is choking
أضف تعليق