بتهتم فئة كبيرة من الأمهات بتعليم أطفالهم بداية من 5 سنوات بعض المهارات المتعارف عليها زي: مهارات التواصل، والتفكير، وطرق التعبير عن المشاعر والآراء المختلفة، وعلى الرغم من كونها مهارات مهمة، إلا إن البعض بيغفل عن مهارة أساسية جدًا بتحافظ على حياة الطفل وهي تدريبه على الإسعافات الأولية.
تدريب طفلك على الإسعافات الأولية بيساعده على التصرف السليم لو أصابه مكروه، ومساعدة الآخرين في حالة الطوارئ، وتعزيز ثقته بنفسه وثقة الآخرين فيه، دا غير إنها بتعلمه تحمل المسؤولية.
وتقدري تبدئي بتدريب طفلك على الإسعافات الأولية في المنزل من سن 5 سنوات فيما فوق.
ولكن يا ترى إيه الخطوات اللي تتبعيها في تدريبه؟ وإزاي تعرفيه على المواقف اللي ممكن تواجهه، وتعلميه إزاي يتعامل معاها؟ دا اللي هنعرفه من خلال المقال.
9 طرق لتدريب طفلك على الإسعافات الأولية في المنزل
أثبتت دراسة اتنشرت على موقع NIH أهمية تعليم الإسعافات الأولية للأطفال، وتأثيرها الإيجابي في زيادة مهاراتهم ومعرفتهم.
كمان لقينا إنها بتعزز التعاطف والرحمة عند الأطفال، وبتزود رغبتهم في مساعدة الغير، ودا تبعًا لدراسة اتنشرت على موقع ResearchGate. دا غير إن تدريب طفلك على الإسعافات الأولية هيقلل من خوفه، ويشجعه على التصرف السليم لو حصله أي إصابة.
وتدريب الطفل على مهارة زي الإسعافات الأولية في المنزل مش أمر صعب، ولكن محتاج منك مجهود مع الممارسة بشكل مستمر على كل خطوة.
وتقدري تنفذي الخطوات دي من خلال طريقين:
- عمل سيناريو واقعي مليان مغامرات وأحداث مشابهة للمواقف اللي هيقابلها.
- لعب تبادل الأدوار بينك وبين الطفل.
ومن أهم الطرق اللي لازم تتبيعها معاه:
1- معرفة رقم الطوارئ
أول خطوة في رحلة التدريب على الإسعافات الأولية في المنزل هي معرفة رقم الطوارئ، وايه هي الحالات القصوى اللي يستعمله فيها.
فرقم الإسعاف هو 123، ويقدر يتصل بيهم في حالة وجود شخص بينزف، أو شخص تعرض لحادث سيارة، ورقم الشرطة هو 122، واللي يقدر يستعين بيهم في حالة السرقة، أو الخطف، أو غيرها من الأمور الخطيرة.
2– التعامل مع الحروق
دايمًا فضول الطفل ممكن يعرضه لحوادث مؤذية، زي إنه يلمس حاجة سخنة، أو يلعب بحاجة مشتعلة.
فلو حصل وتعرض طفلك أو زميله للحرق، هتكون الخطوات لتدريب طفلك على الإسعافات الأولية في المنزل للتعامل مع الحروق هي:
- يبّرد الحرق عن طريق وضع المكان المصاب تحت مياه عادية (من صنبور المياه أو الزمزمية) وتكون نظيفة، لمدة من 10 إلى 20 دقيقة.
- يتجنب لمس الحرق عشان ميكونش ميكروبات.
- يغطي الجرح لمدة 15 دقيقة بضمادة معقمة غير لاصقة، أو قطعة قماش نظيفة؛ ودا عشان يمنع الهواء عن سطح الجلد، وبالتالي يخفف الألم.
- يستخدم مرهم مناسب للحروق من شنطة الإسعافات الأولية في المنزل، أو من أقرب صيدلية.
وخليكي عارفة إن ممارستك للخطوات دي قدامه في حالة تعرض أي شخص للحرق هيفرق معاه جداً في تثبيت المعلومة.
دا غير إنك تقدري تمارسي معاه لعبة محاكاة الواقع، وهي كأنك تعرضتي للحرق وهو الشخص المسعف، وتشوفي إزاي هيتعامل مع الوضع.
3– التعامل مع عضة حيوان
وارد جدًا طفلك يطلع رحلة مع المدرسة أو يكون بيلعب مع أصدقائه ويتعرض حد فيهم لعضة حيوان.
وفي الحالة دي تقدري تعلمي طفلك الإسعافات الأولية في المنزل لعضة حيوان عن طريق التمثيل، وتفهميه إنه لازم:
- يهدأ وما يخافش سواء كان اتعرض هو أو حد من صحابه للعض.
- يحاول يدور على مصدر مياه، عشان ينضف الجرح كويس.
- يلف الجرح بقطعة قماش نظيفة، أو شاش طبي، عشان يوقف النزيف.
- يحافظ على المنطقة المصابة دايمًا ثابتة، وتكون مرفوعة، عشان يتجنب التورم.
- يتواصل معاكي، أو مع أي شخص كبير، عشان ينقل الطفل المصاب للمستشفى فورًا.
اقرئي أيضًا: أهم الإسعافات الأولية للجروح عند الأطفال.
4- التعامل مع نزيف الأنف
نزيف الأنف حالة شائعة جدًا ممكن أي شخص مهما كان عمره يتعرض له، ومن الخطوات المهمة لمساعدة الآخرين، في الحالة دي:
ومن أفضل الممارسات لنزيف الأنف تبعاً لدراسة اتنشرت على موقع ResearchGate، هي:
- يميل رأس الشخص اللي بينزف لقدام شويه، بدلًا من الخلف، لإن دا ممكن يخلي الدم ينزل في مجرى الهواء، أو المعدة.
- يبدأ يضغط على جانبي الأنف من بداية الجزء الغضروفي، عشان يخفف من حدة النزيف.
- يطلب من الشخص إنه يتنفس من فمه بدلاً من أنفه.
- يستعين بطبيب أو صيدلي لو استمر النزيف لأكثر من 30 دقيقة.
5- التعامل مع نوبات الربو
نوبة الربو من الحالات المؤلمة اللي بيعجز الطفل فيها عن فعل أي شئ يساعده، لأنه شبه بيكون بيختنق كل ما يتنفس، وتعليم طفلك الإسعافات الأولية في المنزل لإنقاذ طفل آخر مصاب بالربو هو شيء مهم جدًا.
وخطوات التعامل مع مريض الربو بتتمثل في:
- نساعده على الجلوس بشكل مريح، ونبحث عن جهاز الاستنشاق.
- نساعده في الانحناء لقدام بشكل بسيط، عشان نسهل عليه التنفس.
- تشجيعه على التنفس ببطء، وبشكل عميق.
- نخليه يحبس أنفاسه لأطول وقت ممكن ويخرج الزفير ببطء، وتُكرر الحركة لو لزم الأمر.
وفي حالة إن الأمور ساءت، علمي طفلك إزاي يتصل بالطوارئ، أو الإسعاف في أسرع وقت.
6– التعامل مع الاختناق
في البداية ضروري تعّرفي طفلك معنى الاختناق ومسبباته قبل ما يتعلم الإسعافات الأولية في المنزل للحالة دي.
والاختناق هو حالة خطيرة بتهدد حياة الشخص بتحصل نتيجة لدخول جسم غريب في مجرى الهواء، ووقتها بيكون التنفس صعب جداً، وأحيانًا مستحيل.
وممكن تحصل لأسباب كتير زي: بلع الطعام بطريقة غلط، والأكل بشكل سريع، ووجود حالة طبية معينة زي الربو أو الحساسية، وغيرهم.
وطريقة التعامل مع الطفل المصاب بالاختناق هي:
- تشجيع الطفل على السعال عشان لو فيه حاجة في حلقه يقدر يخرجها.
- تنفيذ 5 ضربات على ظهره، وتحديدًا ما بين أكتافه.
- تطبيق مناورة هيمليك، وهي الوقوف خلف الطفل ولف الذراعين على بطنه والضغط على بطنه 5 مرات من الخلف، ودا هيساعده يخرج أي جسم غريب دخل حلقه.
7– التعامل مع نوبات الصرع
تقدري تعملي مسرحية بسيطة في البيت عشان تدربي طفلك إزاي يتعامل مع صديق له تعرض لنوبة صرع.
ومن ضمن الأعراض اللي ممكن تعرضيها على طفلك؛ هي وجود تشنجات، وحركات اهتزازية مفاجأة، مع خروج رغوة من فم الطفل المصاب.
والحل الأمثل لتقديم المساعدة هو إزالة أي أدوات حوالين الطفل ممكن تأذيه وقت التشنجات، وإننا نخلي النوبة تاخد مجراها الطبيعي لحد ما تنتهي.
وبعدها ممكن توضحي لطفلك إزاي يميل المصاب على جنبه بهدوء، ويرفع رأسه للخلف؛ عشان يساعده على التنفس.
8– التعامل مع الكسور
يعد الكسر من أصعب وأخطر الإصابات اللي ممكن يتعرض لها الطفل، عشان كدا التعامل معها مهم يكون من خلال متخصص.
ولكن لو طفلك شاف شخص أصيب بكسر إزاي يقدر يساعده لحد ما توصل الإسعاف؟
عرفيه إنه:
- مينفعش يحرك الشخص المصاب بالكسر نهائياً، لإنه ممكن يأذيه أكتر من إنه يساعده.
- يطلب من الشخص إنه يفضل ساكن وميتحركش أثناء الإسعافات الأولية.
- يوقف أي نزيف خارجي ممكن يكون نتج عن الحادث؛ عن طريق قطعة قماش نظيفة ومعقمة.
- مايضغطش أبدًا على العظمة المكسورة، وما يحاولش يرجعها لمكانها.
- يلف قطع من الثلج في فوطة أو قماشة، ويعمل كمادات خفيفة من غير ضغط على منطقة الكسر، عشان يمنع التورم.
التعامل مع إصابة الكسر مش سهل خصوصاً لو الشخص غير متخصص، ولكن من باب الحرص تقدري تعلميها لطفلك في المنزل.
اقرئي أكتر عن: أهم الإسعافات الأولية للأطفال عند السقوط.
9- عمل إنعاش قلبي رئوي
حسب مجلس الإنعاش الأوروبي، فـ 12 سنة هو العمر المناسب لبداية الاعتماد على الطفل في عمل إنعاش قلبي رئوي، ودا لإنه بيكون اكتسب القوة اللازمة اللي تسمح له ينفذ ضغطات قوية تنقذ حياة الشخص المصاب.
ومع ذلك، تعليمك لطفلك الطريقة المناسبة للإنعاش القلبي حتى لو كان أصغر سناً، فهو أمر ممكن ينقذ حياة إنسان تاني.
والطريقة دي بتتمثل في معرفة إزاي:
- يفحص نبضات القلب والتنفس، ويبدأ في عملية الإنعاش إذا كان مفيش تنفس، ولا نبض.
- يحط إيديه الاتنين فوق بعض، ويبدأ يضغط بكف إيده في منتصف الصدر.
- يعمل 30 ضغطة على الصدر، وما بين كل 10 ضغطات يعمل تنفس صناعي.
- يفضل يكرر الأمر لحد ما الشخص يفوق أو لحد ما توصل الإسعاف.
أهم نقطة تعلميها لطفلك هي إنه يحافظ على هدوئه، ويركز في كل اللي اتعلمه.
وكمان الاستعانة بالمتخصصين والتواصل مع الطوارئ أمر مهم في حالة إن مفيش استجابة من الشخص المصاب.
تعرفي أيضًا على: أهم خطوات الإسعافات الأولية عند ارتفاع درجة الحرارة.
أدوات مهم تكون في شنطة طفلك
ولإن مش كل مكان طفلك هيلاقي فيه صندوق إسعافات أولية يستخدمه، فمهم يكون معاه بعض الأدوات البسيطة اللي ممكن تدعمه في حالات الطوارئ، زي:
- جوانتي طبي عشان يقدر يتعامل مع الجروح، أو النزيف بشكل سليم وصحي.
- كيس بلاستيك، ودا ممكن يلفه على مكان الحرق، أو يستخدمه كجوانتي.
- شاش طبي لوقف النزيف وتضميد الجرح، لتجنب فقد كمية كبيرة من الدم.
- لزق طبي، ودا يقدر يستعمله في الخدوش والإصابات البسيطة.
- محلول مطهر لتنظيف الجروح، عشان ما يحصلش تلوث.
- مقص صغير ودبابيس محكمة الغلق، لقص وتثبيت الشاش.
- صفارة طوارئ لجذب انتباه اللي حواليه لو في مكان بعيد.
- مصباح يدوي في حالة ما كنش فيه ضوء، أو كان ضعيف.
- غسول للعين، في حالة دخول جسم غريب فيها.
- مرهم مضاد حيوي مناسب مع الجروح.
- كريم خاص باللسعات والحروق.
- ورقة بأرقام الطوارئ اللي ممكن يحتاجها.
نصائح مهمة عن الإسعافات الأولية
بعد تعلم طفلك طرق تطبيق الإسعافات الأولية في المنزل، مهم جدًا يفهم كويس بعض النصايح اللي هتدعمه في الحفاظ على حياته أو إنقاذ حياة الآخرين، أبرزها:
المحافظة على الجرح من العدوى
ودا من خلال إنك تفهميه إن ممنوع لمس جرح سواء سطحي، أو عميق بينزف من غير ما يكون لابس قفازات أو كيس بلاستيك، لإن الدم بيحمل العدوى، وممكن ينقله ميكروبات، ويسبب له أمراض خطيرة.
الاستعانة بمتخصصين في بعض الحالات
لازم تفهميه إن التعامل مع بعض الحالات زي؛ كسر العظام، والإغماء، وحالات الغرق محتاج متخصصين؛ فأفضل حل هو الاستعانة بمساعدة شخص كبير أو الاتصال بالإسعاف.
التعامل الصحيح مع الحروق
من الأخطاء المشهورة للتعامل مع الحروق هو استعمال تلج أو ماء بارد في تبريد الحرق، ودا بيسبب قتل خلايا الجلد، وبيسبب ضرر أكبر، ودا أثبتته دراسة اتنشرت على موقع pubMed قارنت بين الحروق اللي اتبردت بالمياه العادية والمثلجة.
ووجدوا إن الجروح المبردة بماء الصنبور كانت أقل في تلف الأنسجة عن غيرها.
التعرف على إجراءات السلامة
لازم الطفل يفهم إجراءات الأمن والسلامة لأي مكان يروحه، ويتعرف على أماكن وجود صندوق الإسعافات الأولية سواء في المدرسة، أو الأماكن العامة اللي ممكن يتوفر فيها.
الخلاصة
تعليم الإسعافات الأولية في المنزل هي مهارة أساسية ممكن تغفل عنها بعض الأمهات، ولكن من مهامك الأساسية كأم هي الحفاظ على طفلك من أي أذى.
عشان كدا لازم تساعديه يحافظ على حياته بشكل آمن، وينقذ حياة الآخرين سواء كانوا أهله، أو أصدقائه، أو أي شخص محتاج مساعدة.
عشان كدا لازم تمارسي معاه بشكل عملي في البيت إزاي يتعامل مع حالات الطوارئ، زي: التعامل مع الكسور، والحروق، والاختناق، ونوبات الصرع، ونزيف الأنف، وغيرها.
المصادر
8 Helpful Ways to Support Teaching First Aid For Children
5 First Aid Skills you can teach your Child at home
7 First Aid Skills you can Teach your Child at Home
First Aid Training for Children: When to start & What to teach
أضف تعليق