صندوق الإسعافات الأولية في المنزل: تعرف على أهم الأدوات الضرورية به

الحوادث ممكن تحصل في أي لحظة -لا قدر الله-، ولأنها بدون ميعاد لازم يكون الأهل مستعدين لمواجهتها وتقديم اللازم عشان ينقذوا نفسهم وأطفالهم.

وجود صندوق الإسعافات الأولية في المنزل هو أولوية وأمر ضروري، عشان كدا هنوضح في المقال أهم المحتويات اللي لازم تكون فيه.

تعريف الإسعافات الأولية، وهدفها

المقصود بالإسعافات الأولية الرعاية والعناية الطبية اللي بيتلقاها الشخص بمجرد التعرض لإصابة مفاجئة أيًا كان نوعها، والهدف منها المحافظة على حياته، والحد من تفاقم الإصابة، وبالتالي المساعدة في الشفاء أسرع بإذن الله.

الإسعافات الأولية بتعتمد بالدرجة الأولى على قدرات الشخص، وحسن تصرفه في الموقف، فلما يحصل حادث يقدر يسيطر على الوضع، ويضبط أعصابه، ويهدي المصاب، ويقوم بالإسعافات اللازمة.

وعشان دا يحصل بطريقة سليمة، ويتجنب الأهل العديد من المشاكل، مهم يتعلموا طرق الإسعافات اللازمة، للحفاظ على حياتهم وحياة أطفالهم، وكل ما الطفل يكبر في السن ويقدر يستوعب يحاولوا يعلموه الأساسيات اللازمة بحسب سنه وإدراكه.

التدخل المناسب في اللحظة المناسبة بيفرق، وممكن يكون هو الشعرة بين الموت والحياة، وبالتالي تعلم الإسعافات الأولية ووجود صندوق الإسعافات الأولية في المنزل مش رفاهية بل واجب.

محتويات صندوق الإسعافات الأولية في المنزل

ممكن يتم شراء صندوق الإسعافات الأولية جاهز من الأماكن المخصصة، وهنلاقيه بيحتوي على معظم الاحتياجات الأساسية للإسعافات الأولية، أو ممكن الأهل يكونوا صندوق الإسعافات الأولية الخاص بيهم.

غالبًا هنلاقي أي صندوق إسعافات أولية بيحتوي على مجموعة من الأدوات والأدوية الأساسية، واللي منها:

1- مجموعة ضمادات بأحجام مختلفة

والأدوات دي بتشمل:

• لاصق طبي
• شاش طبي
• رباط ضاغط
• ضماد طبي معقم

2- أدوات طبية أساسية

وهنا بنضيف في صندوق الإسعافات الأولية:

• مقص حاد
• ملقط
• قفزات غير مصنوعة من اللاتيكس
• ترمومتر رقمي
• كرات قطنية
• عيدان قطنية
• قناع تنفس صناعي
• مطهر للجروح
• كحول لتطهير الأدوات

3- مجموعة مختلفة من الأدوية والعقاقير الأساسية

من أهم الأدوية دي:

• مسكن للآلام مناسب
• أدوية للكحة والسعال
• أدوية لنزلات البرد
• مضاد للحموضة
• مضاد للهيستامين
• دواء للإسهال وآخر ملين
• خافض حرارة
• مضاد للغثيان
• مرهم ضد لدغات الحشرات والحكة
• محلول لغسل وتطهير العين
• مرهم مضاد حيوي
• جل الألوفيرا
• ملطف من بودرة الكلامين
• مرهم للحروق

بالإضافة لكل ما سبق كمان بيضاف الأدوية المخصصة في صندوق الإسعافات الأولية في المنزل لو كان في أفراد من الأسرة بيعانوا من أمراض معينة، وبيلزم تقديم إسعافات أولية ليهم من خلال بعض الأدوية.
كمان لازم نتأكد إن أفراد الأسرة مش بيعانوا من حساسية تجاه أنواع من الأدوية، وممكن نكتب دا كملاحظة في الصندوق.

نصائح للاستفادة من صندوق الإسعافات الأولية

بعد توفير صندوق الإسعافات الأولية في المنزل لازم نراعي عدة أمور منها:

1- اختيار مكان مناسب

مهم بعد تحضير كل الأدوات اللازمة في صندوق الإسعافات الأولية في المنزل إننا نختار مكان مناسب يتوفر في مجموعة شروط، زي:

يكون مكان مخصص

فيختار الأهل مكان معروف وثابت؛ عشان يكون سهل الوصول ليه بسرعة وقت الحاجة، وما يضعش الوقت في البحث عنه.

يتوفر فيه الأمان

فما تتعرضش الأدوات والأدوية اللي في الصندوق لتلف، كمان ما يكونش سهل على الأطفال الوصول ليه، لكن يكونوا عارفين مكانه في حال لو حصل أي أمر يقدروا يساعدوا.

2- التعريف باستخدامات محتويات الصندوق

كل أفراد البيت لازم يكون عندهم علم كافي بمحتويات الصندوق، وإزاي ممكن يستخدموا الأدوات اللي موجودة فيه بطريقة صحيحة، ولو في منشورات توضح إزاي يتصرفوا في الحالات المختلفة هتساعدهم لو حصل حادث طارئ ومش عارفين يتصرفوا، لإنهم يقدروا يستعينوا بيها، ويتدخلوا بشكل سريع وصحيح، لإنقاذ المصاب.

3- تجديد محتويات الصندوق باستمرار

مهم إن الأهل براقبوا محتويات صندوق الإسعافات الأولية في المنزل، ويتأكدوا كل فترة من تاريخ الصلاحية، ويتخلصوا من الأدوية والأدوات المنتهية الصلاحية والتالفة، كمان لو في أي نواقص يوفروها في أسرع وقت ممكن، هيساعد في كدا إنشاء قائمة بمحتويات الصندوق يتكتب فيها كل عنصر، وتاريخ صلاحيته، والعدد المتوفر منه.

4- الاهتمام بالتنسيق وترتيب الصندوق

كمان من الأمور اللي لازم يهتم بها الأهل لما يوفروا صندوق الإسعافات الأولية في المنزل هي مراعاة تنسيق وترتيب محتوياته، فيكون سهل الوصول لأدواته، ودايمًا يكون منظم، وجاهز للاستخدام.

5- إرفاق الأوراق والأرقام الضرورية

بجانب كل الأدوات والأدوية في صندوق الإسعافات الأولية في المنزل مهم يكون مكتوب أرقام الإسعافات أو الطبيب اللي ممكن يلجأ ليه الأهل في حالات الطوارئ، بالإضافة لتاريخ المرض لأفراد العائلة، ولو في أي ملاحظات أو أمور واجب مراعاتها للحالة الصحية لأفراد العيلة تكون مدونة، عشان التعامل في الحالات الطارئة يبقى سهل.

6- مراعاة توفير الأدوية بحسب أعمار الأفراد

مهم نراعي تنوع الأدوية في صندوق الإسعافات الأولية في المنزل بحسب أعمار أفراد الأسرة، فيتوفر أدوية للصغار تناسب سنهم، وأدوية للكبار كمان تناسبهم.

7- توفير صندوق إسعافات أولية متنقل

بجانب وجود صندوق الإسعافات الأولية في المنزل مهم يكون في صندوق متنقل بياخدوه الأهل معاهم في الرحلات أو السفر وغيره، عشان يقدروا يسيطروا على الموقف لو حصل حاجة طارئة -لا قدر الله-، وغالبًا بيكون موجود فيه الاحتياجات الأساسية لكن بشكل أبسط، وأقل من صندوق المنزل، بالإضافة للأدوية اللي ممكن يحتاجها أي فرد من العيلة لو كان بيعاني من مرض مزمن أو أمراض بتحتاج أدوية محددة.

معتقدات خاطئة عن الإسعافات الأولية

بينتشر بين الناس بعض المعتقدات الخاطئة عن تقديم الإسعافات الأولية وأشهرها:

1- الإسعافات الأولية تعتمد على الأدوات

في الحقيقة أهم نقطة في الإسعافات الأولية هي حسن تصرف المسعف مع المصاب، ودا بيعتمد بدرجة كبيرة على المهارات اللي اتعلمها، وقراءته الجيدة للموقف، ومعرفة إيه اللي الشخص محتاجه بالظبط، وبعدها بييجي دور الأدوات الموجودة في صندوق الإسعافات الأولية في المنزل.

عشان كدا مهم إن الأطفال والكبار يتعلموا طريقة التعامل السليمة مع الإصابات المختلفة، وممكن الأهل يتكلموا عنها على فترات، لزيادة معلوماتهم، وترسيخها عندهم.

2- استخدام مواد غير طبية في بعض الحالات

أحيانًا في حالة عدم وجود صندوق الإسعافات الأولية في المنزل أو مع إصابة شخص ومفاجأة الموقف بيلتبس على الأهل إيه اللي مفروض يعملوه أو إيه اللي متاح استخدامه مع نوعية الإصابة دي، فمثلًا:

استخدام الثلج أو الزبدة عند الإصابة بالحروق

ودا خطأ؛ لأن الثلج بيعرض سطح الجلد المحروق للحرق البارد، والزبدة بتكون طبقة عازلة مش بتسمح للجلد بالتنفس، وكل دا بيؤدي لإن الإصابة تتفاقم.

استخدام القهوة لإيقاف النزيف

بينتشر بين الناس استخدام القهوة بعد ما بيتعرض أحد الأفراد للإصابة بجرح، عشان يقدروا يقفوا النزيف ولكن دا خطأ؛ لأن احتمالية تلوث الجرح بتزيد، وبالتالي الضرر هيزيد.

وغيرها كتير من الممارسات الخاطئة اللي ممكن تتحول من محاولة الإنقاذ لضرر أكبر، عشان كدا مهم دراسة الإسعافات الأولية الأساسية من خلال الدورات في المراكز المختصة.

تصرف واحد صحيح في الوقت الصحيح ممكن ينقذ حياة، عشان كدا مهم يتواحد صندوق الإسعافات الأولية في المنزل، وكمان خارجه، ويتعلم أفراد الأسرة إزاي يقدموا الإسعافات الأولية بمهارة ذكاء.

نتمنى السلامة والمعافاة للجميع بجانب استعدادهم للحوادث الطارئة، للحفاظ على سلامتهم، وحياتهم.