في وقت بنهتم فيه بصحة أطفالنا من كل ناحية، لازم ناخد بالنا من موضوع مهم جدًا وهو “اضطرابات الأكل عند الأطفال”. ممكن نفتكر إن الطفل اللي مش بيحب ياكل أو بياكل كتير شوية دا طبيعي، بس الحقيقة إن فيه حالات بتكون وراها مشكلة أعمق محتاجة تدخل.
في المقال دا، هنتكلم عن كل اللي لازم نعرفه: يعني إيه اضطرابات الأكل؟ وأنواعها؟ وإزاي نلاحظ العلامات دي؟ وإيه التصرف الصح لو شكّيت إن ابنك بيعاني منه؟
يعني إيه اضطرابات الأكل عند الأطفال؟
تبعاََ دراسة اتنشرت في مجلة طب الأطفال الأمريكية لعام 2023 أفادت بإن نسبة 22٪ من الأطفال في 16 دولة بيعانوا من اضطرابات الأكل عند الأطفال والمراهقين، وإن البنات عرضة أكتر للإصابة من الأولاد.
وهي واحدة من المشاكل الخطيرة اللي بتصيب الأطفال وبتأثر على صحتهم النفسية والجسدية وسلوكهم، وكمان على علاقتهم باللي حواليهم. ممكن نلاحظ النوع دا من الاضطرابات كتير في سن الطفولة بالتحديد.
وبتكون أسبابها خليط من عوامل وراثية ونفسية واجتماعية. بس المطمئن إن النوع دا من الاضطرابات قابل للعلاج، ولما بيستمر من غير تدخل ممكن يسبب مشاكل صحية كبيرة تأثر على حياة الطفل.
وبتظهر اضطرابات الأكل عند الأطفال من بداية الرضاعة، فبتكون طريقة أكل الطفل مرتبطة أوي بعلاقته مع أهله.
والطفل بيعتمد على إشارات من الأم، زي النظرات أو نبرة الصوت، عشان يحس بالأمان وياكل. وكل ما الطفل كبر وبدأ يمسك المعلقة وياكل لوحده، بتبدأ تظهر صراعات بينه وبين أهله على “مين اللي هيأكله”، ودا بيخلي وقت الأكل يتحول لمعركة بدل ما يكون لحظة ترابط.
وزي ما قولنا الاضطرابات دي ممكن تتعالج. بس الأهم إن الأهل ماينساقوش ورا المشاعر السلبية، زي الغضب أو التوتر. مش كل طفل بياكل قليل أو بينقي الأكل عنده مشكلة. بس لو الموضوع زاد عن حده، ممكن يعمل مشاكل كتير.
فبنلاقي إن تطور مراحل أكل الطفل:
- من يوم ما يتولد لحد 6 شهور: لبن الأم هو المصدر الأساسي، ومش محتاج حاجة تانية حتى الميّه.
- من 6 لـ 8 شهور: نبدأ نديله أكل مهروس أو عصاير خفيفة.
- من 8 لـ 10 شهور: يدخل أكل طري ومهروس بشكل أكبر.
- بعد سنه: الطفل ممكن ياكل مع العيلة، ويبدأ يختار أكله، ودا وقت ممكن تظهر فيه اضطرابات الأكل.
أنواع اضطرابات الأكل عند الأطفال
اضطرابات الأكل بتشمل تصرفات غير طبيعية حوالين الأكل بتأثر على صحة الطفل الجسدية والنفسية. ومن أشهر أنواعها عند الأطفال:
1- اضطراب الوحم أو شهوة الغرائب (Pica)
الطفل هنا بياكل حاجات مش أكل أصلاً، زي الورق أو التراب أو الصابون أو الطباشير أو القماش وغيرها.
ودا ممكن يسبب له مشاكل في الجهاز الهضمي، أو نقص في الحديد والزنك، وأوقات توصل للتسمم بالرصاص أو انسداد في الأمعاء.
وغالبًا بتظهر بين عمر 12 و24 شهر، ومن عوامل الخطر:
- الذكور أكتر عرضة.
- البيئة غير المحفزة.
- التخلف العقلي.
- الفصام.
ووجدوا العلماء إن فيه ارتباط بين البيكا في الطفولة وحدوث اضطرابات أكل في سن البلوغ، زي النهام العصبي.
2- اضطراب الاجترار (Rumination)
هو رد فعل لا إرادي فيه الطفل بيرجّع الأكل من المعدة وبيكون غير مهضوم أو مهضوم بشكل جزئي، وبيرجع يمضغه تاني ويبلعه، ودا بيحصل من 15 – 30 دقيقة من الأكل.
وبتحصل أكتر في الأولاد، وممكن تظهر عند أي سن خصوصًا من عمر 1 إلى 12 سنة، وعادةً في حالة الأطفال بتتحسن من غير علاج، أما الكبار بيحتاجوا علاج نفسي.
والأسباب المحتملة:
- اضطرابات في العلاقة بين الأم والطفل.
- البحث عن الراحة أو جذب الانتباه.
- مشاكل نفسية – اجتماعية.
- نقص التحفيز.
أعراض اضطراب الاجترار:
- الإسهال أو الإمساك.
- الانتفاخ وألم البطن.
- الغثيان والتجشؤ.
- حرقة المعدة.
- الدوخة.
- الأرق.
المضاعفات الصحية:
- تسوس الأسنان.
- التهاب المريء.
- سوء التغذية.
- تقرحات الفم.
- فقدان الوزن.
- الجفاف.
وفي بعض الحالات بيؤدي إلى الوفاة بنسبة تصل إلى 25%.
3- فقدان الشهية العصبي (Anorexia Nervosa)
الطفل بيرفض فيها الأكل أو بيقلل منه جدًا، وبيبقى عنده خوف إنه يتخن حتى لو وزنه قليل، ودا بيكون في سن أكبر حوالي 6 سنوات فيما فوق.
4- الشره المرضي (Bulimia Nervosa)
الطفل بياكل كميات كبيرة من الأكل في وقت قصير، وبعدها بيحاول “يعوّض” عن كدا إما إنه يرجّع الأكل أو ياخد ملينات.
5- اضطراب الأكل الانتقائي أو المحدود (Avoidant/Restrictive Food Intake Disorder – ARFID)
الطفل بيكون رافض يجرب أطعمة جديدة أو بيخاف من شكل أو ملمس الأكل، وساعات بينزل وزنه بشكل مقلق.
اتعرف على: كيفية التعامل مع الطفل المريض نفسياََ.
أسباب اضطرابات الأكل عند الأطفال
بتتنوع الأسباب ما بين نفسية وطبية واجتماعية لاضطرابات الأكل المختلفة عند الأطفال، ومنها:
أحداث صادمة مرتبطة بالأكل
زي مثلًا لو الطفل عمل عملية أو حصلت له تجربة صعبة أثرت على فمه أو بلعومه أو مريئه، زي دخول أكل في مجرى التنفس. التجارب دي بتخلي الطفل يخاف وقت الأكل، وخصوصًا من البلع أو الاختناق.
أسباب حسّية
في أطفال مش بترتاح لأكلات معينة بسبب طعمها أو ريحتها أو حتى شكلها وملمسها. ودا بيخليهم يرفضوا يجربوا أكلات جديدة، وبتلاقيهم بيحبوا نوعين تلاتة وبيأكلوهم بس، والباقي لأ.
تأخر في النمو
في بعض الأطفال نموهم بيكون أبطأ من الطبيعي، سواء بسبب هرمونات النمو أو لأسباب وراثية، ودا ممكن يبان في شكلهم أو في وزنهم، وبيكون مرتبط أحيانًا بسلوكهم الغذائي.
مشاكل صحية مرتبطة بالأكل
زي ارتجاع المريء أو أمراض في القلب أو الرئة، ودا ممكن يخلي الطفل ياكل قليل جدًا أو يضعف في التغذية..
انتقاء الطعام
الطفل بياكل أنواع محدودة جدًا من الأطعمة، ودا بسبب:
- تأخر في تطور قوام الأكل: عدم قدرة الطفل على الانتقال إلى أطعمة أكتر صلابة.
- نقص التغذية الذاتية: الطفل مش بيحاول إطعام نفسه.
- رفض الأكل: تناول كميات قليلة جدًا أو عدم الأكل نهائيًا
- تكرار التقيؤ، أو التهيج وقت الوجبات.
ودي بعض العوامل المساهمة:
- رفض الحواس لبعض أنواع الطعام (بسبب الشكل، الطعم، الرائحة أو القوام).
- أسباب وراثية أو هرمونية تؤثر على النمو.
- وجود تاريخ عائلي من اضطرابات الأكل.
- صدمة جسدية تؤثر على الفم أو الحلق.
- ضعف التركيز والانتباه عند الطفل.
- وجود مشاكل نفسية عند الأم.
- الفتيات أكتر عرضة من الذكور.
- وجود عدد كبير من الإخوة.
- الأم العاملة.
اتعرف على: مشكلات الأطفال السلوكية| أبرز وأسباب وعلاج مشكلة سلوكية عند الأطفال.
علامات اضطرابات الأكل عند الأطفال | إمتى أقلق؟
في شوية علامات كدا لو لاحظتها على طفلك؛ لازم تاخد بالك وتقف عندها. مش كل طفل بيرفض الأكل يبقى عنده اضطراب، بس لو الحاجات دي بقت متكررة أو مأثرة على صحته، يبقى محتاجين نفهم أكتر.
- الطفل أكله قليل جدًا ومحدد في أنواع معينة بس، وبيرفض أي حاجة تانية حتى لو كانت مفيدة.
- ابنك بيرفض ياكل باستمرار، بيقفل بُقه، وبيعيط وقت الأكل، أو بيهرب من الترابيزة.
- مش بيجرب أكلات جديدة، ولو جرّب حاجة ممكن يتقرف منها من غير سبب واضح.
- وزنه مش بيزيد، أو بدأ يخس من غير ما يكون مريض أو بيبذل مجهود زيادة.
- الأكل بقى مصدر قلق في البيت، وكل الوجبات بقت معركة.
- شكله دايمًا مرهق أو مش بيكبر زَي باقي الأطفال.
- بيخاف من البلع أو الأكل.
الحاجات دي مش لازم تكون كلها موجودة، لكن حتى لو فيه واحدة أو اتنين منهم مستمرين لفترة، يبقى مهم نبدأ نتحرك ونفهم أكتر.
إزاي تفرق بين الطفل اللي شهيته قليلة واللي عنده اضطراب؟
في فرق بين علامات اضطرابات الأكل عند الأطفال والشهية القليلة في بعض الأوقات، فبنلاقي إن الطفل اللي شهيته قليلة ممكن:
- يرفض الأكل في وقت معين، بس يرجع ياكل بعدين عادي.
- ياكل أنواع معينة ويميل ليها، بس لو جعان بياكل.
- بيكون مزاجه حلو وبيتحرك وبيكبر طبيعي.
- بيكون وزنه ثابت أو بيزيد حتى لو ببطء.
تأثير اضطرابات الأكل عند الأطفال على الصحة والنمو
تبعاََ لدراسة اتنشرت على موقع NIH فإن اضطرابات الأكل مش بس بتأثر على شهية الطفل، دي ممكن تسيب أثر كبير على صحته ونموه لو ما اتلحقتش بدري. يعني الطفل اللي بياكل قليل جدًا أو بيرفض الأكل نهائي جسمه مش بياخد كفايته من الفيتامينات والمعادن اللي محتاجها عشان يكبر بشكل طبيعي.
وممكن تلاحظ إن وزنه مش بيزيد، أو طوله ثابت لفترة، أو حتى شكله العام باين عليه الضعف. ساعات كمان بشرته تبقى باهتة، وشعره خفيف، وسهل يتعب أو يدوخ بسرعة. دا غير إن مناعته بتضعف، وبيبقى عُرّضة أكتر للعدوى والبرد والتعب المستمر.
ومش بس كدا، اضطرابات الأكل عند الأطفال كمان بتأثر على التركيز والمزاج. فبنلاقي الطفل اللي مش بياكل كويس ممكن يبقى دايمًا متعصب أو مكتئب، ومش مركز في المدرسة أو اللعب.
علشان كدا أي علامة من علامات اضطرابات الأكل عند الأطفال محتاجة متابعة، ومش لازم نستنى لحد ما الحالة تبقى صعبة. التدخل المُبكر بيفرق كتير وبيساعد الطفل يرجع لطبيعته واحدة واحدة.
نصايح عملية لتحسين علاقة الطفل بالأكل
أول حاجة لازم نفتكرها إن اضطرابات الأكل عند الأطفال مش مجرد دلع أو اختيار، دي حالة طبية ونفسية، والطفل أو المراهق مش هيقدر يتخطّاها لوحده، مهما حاول هو محتاج دعم وعلاج، ومحتاجك تكون جنبه طول الطريق.
يعني لازم تراقب سلوك أكله من غير ما تضيّق عليه.. شوف بياكل إيه؟ بيهرب من أكلات معينة؟ بيتجنب الأكل قدام الناس؟ كل دي إشارات مهمة.
- ابعد عن اللوم أو المقارنة، وركّز على إنك تساعده ياخد اللي جسمه محتاجه من غير ضغط أو أوامر.
- خلي العلاقة بينكم دايمًا فيها تعاطف لكن كمان فيها حدود واضحة.. مش كل حاجة نمشيها علشان “ما يزعلش”.
- اعرف إن مشكلته مش بإيده، ومهمتك كأب أو أم إنك تكون الأمان والدعم في وقت هو نفسه مش فاهم اللي بيحصل جواه.
- ما تتردّدش تطلب مساعدة من مختصين.. لأن دور الأسرة أساسي جدًا في رحلة التعافي.
علاج اضطرابات الأكل عند الأطفال
كل طفل ليه حالته وظروفه، علشان كدا بيكون فيه كذا نوع من الرعاية، على حسب اللي يناسب احتياجاته:
رعاية داخل المستشفى
ودي للأطفال اللي حالتهم الصحية أو التغذية أو النمو متأثرة جدًا وبيحتاجوا يقيموا في المستشفى علشان ياخدوا رعاية طبية دقيقة بعد الكشف الطبي والنفسي.
إقامة جزئية في المستشفى
يعني الطفل بيقعد في المستشفى طول اليوم بياكل هناك ويتابع علاجه، وبيرجع البيت ينام. خلال اليوم بيشارك في العلاج الجماعي وبيتعلم إزاي يتعامل مع الأكل بطريقة صحية.
رعاية خارجية مكثفة
ودي للأطفال اللي حالتهم بدأت تتحسّن، وبيقدروا ياكلوا في البيت ويروحوا المدرسة، بس لسه محتاجين متابعة مستمرة، والعيلة تكون مستعدة تدعمهم في البيت.
دا بالإضافة لاستخدام طرق مختلفة في العلاج علشان تساعد الطفل يفهم مشكلته ويرجع ياكل طبيعي من تاني. ومن ضمن الحاجات دي:
جلسات فردية مع الطفل
بتركز على مشاعره، وعلى الحاجات اللي مضايقاه أو خوفه من الأكل أو شكله، وكمان بيكون في استشارة نفسية لو بيعاني من أي توتر أو اكتئاب ممكن يكون ورا المشكلة.
علاج أسري
مهم كأهل كمان تخلّي الجو حوالين الأكل أهدى، وتعلم الطفل إزاي يتعامل مع الأكل صح.
علاج جماعي
بيكون فيه الأطفال والأهالي بيقابلوا ناس بيمروا بنفس الظروف، فدا بيخفّف عليهم ويديهم دعم نفسي حقيقي.
تثقيف غذائي
دا من خلال معرفة إزاي بيتحضر الأكل، وإيه يتقال وإيه مينفعش يتقال على السفرة، علشان وقت الأكل مايبقاش مرهق ولا متوتر.
تثقيف للأهالي
ودا من خلال تجهيز الأهل إنهم يحافظوا على التغييرات الإيجابية دي في البيت وعلى المدى الطويل.
سبب الخوف عند الأطفال من الأكل
في أطفال بيوصلوا لحالة خوف شديدة من الأكل، لدرجة إنهم ممكن يمتنعوا عنه تمامًا، ودا مش زي الطفل اللي بيتدلّع أو مش بيحب طعم معين! لأ، دا بيكون خوف حقيقي ورافض ياكل خالص، ودا محتاج تدخل نفسي متخصص.
اللي بيحصل في الحالات دي إن الطفل ممكن يكون جسمه اتعلم يرفض الأكل كنوع من الدفاع عن نفسه، سواء بسبب تجربة مزعجة حصلت له، أو ضغط نفسي، أو حتى مرض.
والحل بيكون من خلال التدخل من أخصائيين نفسيين متخصصين، واللي غالبًا بيستخدموا علاج اسمه العلاج السلوكي المعرفي (CBT)، ودا بيساعد الطفل يغير أفكاره ومشاعره السلبية عن الأكل.
كمان ممكن يدخلوا معاه في:
- علاج أسري: يشتغلوا مع الأهل علشان يعرفوا يتعاملوا معاه بشكل صحي ويدعموه من غير ما يزيدوا خوفه أو توتره.
- علاج فردي: يشتغلوا مع الطفل لوحده علشان يساعدوه يفهم هو ليه بيخاف من الأكل.
وطبعًا كل ما التدخل كان بدري، كل ما كانت النتايج أسرع وأفضل.
الخلاصة
اضطرابات الأكل عند الأطفال مش مجرد مرحلة وهتعدّي، ومش حاجة نقدر نغضّ الطرف عنها. هي مشكلة حقيقية بتأثر على صحة ولادنا الجسدية والنفسية، وكل ما تدخلنا بدري، كل ما كانت فرصة التعافي أكبر.
خلّي دايمًا علاقتك بولادك مبنية على الحب والدعم والتفاهم، وافتكر إنك مش لوحدك في الرحلة دي، فيه أخصائيين ومراكز جاهزين يساعدوا ابنك أو بنتك يخرجوا من الأزمة دي أقوى من الأول.
فلو حسّيت إن فيه حاجة مش طبيعية في سلوك ابنك أو أكله، ما تتأخرش في طلب المساعدة.
لإن صحتهم النفسية والجسدية تستاهل كل التعب.
أضف تعليق