أهم ألعاب ذكاء للأطفال 13 سنة: 13 لعبة لتنمية أنواع الذكاء المختلفة

ألعاب ذكاء للأطفال 13 سنة

 

تنمية ذكاء ومهارات المراهقين وقدراتهم هو أمر بيشغل كل أولياء الأمور؛ لإنهم دايما بيهدفوا للوصول بمهاراتهم لمستوى مميز، ولكن أحيانا مش بيكونوا قادرين يحددوا المهارة اللي محتاجة تنمية، وبالتالي مش بيكون في تطور ملحوظ بالنسبة لهم.

عشان كدا لازم نتعرف على أنواع الذكاء المختلفة ونحدد بالظبط المهارة اللي هننميها، وبناءً عليه نبدأ في التنفيذ، وبالطبع اللي بيساعدنا في التنفيذ هي الألعاب والأنشطة المناسبة لعمرهم، لكن بعد ما نفهم متطلبات المرحلة اللي بيمر بيها أولادنا.

في المقال دا هنعرف طبيعة سن الـ 13 في حياة أولادنا وبعدها نتعرف على أنواع الذكاء المختلفة، ونعرض أفضل ألعاب ذكاء للأطفال 13 سنة بالتفصيل؛ عشان نقدر نطور مهاراتهم وذكائهم ونوصل للمستوى اللي عايزينه.

سن الـ 13 وبداية المراهقة

سن الـ 13 هو سن فارق في حياة كل طفل؛ لإنه يعد بداية لمرحلة المراهقة المبكرة، والمعروف عن المرحلة دي إنها من أصعب المراحل بالنسبة للطفل أو ولي الأمر نظرًا للتغيرات الكثيرة اللي بتطرأ على الطفل سواء على الجانب البدني أو النفسي أو غيرهم.

التغيرات البدنية

على الجانب البدني بيكون في تطور جسماني ملحوظ، فبالنسبة للأولاد بنلاحظ:

  • زيادة في حجم العضلات
  • خشونة الصوت
  • ظهور الشعر في أماكن مختلفة من الجسم
  • نمو الأعضاء التناسلية

أما بالنسبة للبنات بيكون في:

  • نمو حجم الثديين
  • حدوث الدورة الشهرية
  • تمركز الدهون في بعض المناطق كالأرداف والبطن
  • زيادة نمو الشعر في مناطق متفرقة بالجسم.

التغيرات الذهنية

مستوى تفكير الطفل في سن 13 سنة بيرتفع مقارنة بسنوات عمره السابقة فبيبدأ يتعامل مع المشاكل اللي بيمر بيها بطريقة منطقية ويحاول يوصل لحلول عقلانية ينفع تتطبق، وممكن ندعمه هنا باستخدام ألعاب ذكاء للأطفال 13 سنة أو أنشطة مناسبة له.

كمان بيبدأ يركز جدًا مع اللي حواليه ويهتم بوجهة نظرهم ورأيهم فيه، والنقطة دي بترتبط جدا بالتقلبات المزاجية للطفل، بمعنى إنه لو تعرض لآراء سلبية هيتأثر بيها جدا وهياخدها في اعتباره ويبدأ يتعامل إن الرأي دا مسلم به أو إنه شخص سيئ.

من ضمن التغيرات الملحوظة أيضا على الطفل هي الرغبة الكبيرة في الاستقلال؛ لإن من وجهة نظره إن دي الطريقة الوحيدة اللي هيقدر يثبت بيها إنه أصبح شخص كبير ويمكن الاعتماد عليه.

التغيرات النفسية

بيمر الطفل في فترة المراهقة بالعديد من التقلبات المزاجية والنفسية اللي لازم يتقبلها ولي الأمر، والتقلبات دي بتكون بين الخوف والقلق والسعادة وغيرهم، وبتختلف في شدتها من طفل للتاني، لكنها تغيرات طبيعية.

بعض الدراسات بتوضح أن أجزاء دماغ الطفل في سن 13 سنة بتكون مجهدة وبيكون في اضطراب في مشاعره، عشان كدا بنلاحظ إن الطفل مش بيستجيب لحاجات كتيرة بيطلبها منه ولي الأمر ومش بيكون متعاون في بعض الأحيان، وبالتالي فهم ولي الأمر لطبيعة المرحلة اللي بيمر بيها طفله هو شيء أساسي جدًا عشان يقدر يتعامل معاه ويساعده يعيش المرحلة دي بدون اضطرابات نفسية تؤثر عليه فيما بعد.

علماء النفس هنا بيرشحوا إننا نعلم الأطفال مهارات التهدئة؛ عشان نقدر نسيطر على الاضطراب، وممكن الطفل يتعلم المهارات دي باستخدام ألعاب ذكاء للأطفال 13 سنة أو غيرها من الألعاب اللي هتساعد في تخفيف الاضطرابات عنده.

إزاي كأولياء أمور ومربين نقدر نتعامل بشكل صحيح مع التغيرات دي؟ دا اللي هنتعرف عليه حالًا.

كيفية التعامل مع الأطفال في سن 13 سنة

التعامل الصحيح مع الأطفال بيتطلب وعي بطبيعة المرحلة زي ما ذكرنا، فمثلا في سن 13 سنة بنلاقي إن تعاملاتنا مع الطفل لازم يوضح من خلالها إننا حريصين عليه ومهتمين به وبرعايته؛ عشان يبدأ يحس بالأمان والانتماء للأسرة ونقلل من اضطراباته الداخلية.

كمان الدعم والتشجيع هنا أساسي جدًا؛ لإن بمجرد شعور الطفل بالدعم هنكون قطعنا معاه شوط كبير، فهيبدأ يتعامل بثقة وبدون خوف من سلبية الآراء وهيشارك الأسرة مشكلاته ومواضيعه المختلفة، وبكدا هنتجنب إنه يلجأ لحد خارج الأسرة عشان يحكيله.

بالتالي واجب ولي الأمر هنا إنه يسمع لطفله دايما ويسأله عن مشكلاته ويحاول يفكر معاه في طريقة حل لها عشان يشجعه يعبر عن مشاعره ويحكي باستمرار.

في الفترة دي لازم ننمي عنده بعض أنواع الذكاء المهمة زي الذكاء الاجتماعي والشخصي وغيرهما ودا بتم عن طريق توفير ألعاب ذكاء للأطفال 13 سنة ونفهم الطفل إزاي يستخدمها، ولكن دا بيتم بعد ما نفهم أنواع الذكاء المختلفة ونعرف إزاي ننميها.

أنواع الذكاء المختلفة وكيفية تنميتها

أنواع الذكاء المختلفة

بيعتقد بعض الناس إن الذكاء نوع واحد فقط، ولكن العلماء اتفقوا حتى الآن على 9 أنواع مختلفة من الذكاء، والعدد دا قابل للزيادة مع الوقت في حالة التوصل لأنواع تانية، والأنواع المتفق عليها هي:

الذكاء اللغوي

الذكاء اللغوي بيتضمن طريقة التفكير في الكلمات واستخدام اللغة في التعبير، ومن خلاله بنقدر نتواصل مع بعض ونفهم كل شخص بيتكلم عشان نقدر نرد عليه بطريقة صح.

النوع دا من الذكاء نقدر ننميه بالقراءة المستمرة، وتعلم اللغات الجديدة، واستخدام ألعاب ذكاء للأطفال 13 سنة زي حل الكلمات المتقاطعة وغيرها.

الذكاء الاجتماعي

تاني نوع من الذكاء اللي بيظهر في تعاملاتنا بوضوح هو الذكاء الاجتماعي، ودا معناه مدى قدرة الشخص على التصرف في علاقاته، والشخص اللي بيكون عنده ذكاء اجتماعي بيمتلك مجموعة من المهارات المميزة زي مهارة الاستماع وحسن الإصغاء، والتفاوض وغيرهم.

الذكاء المنطقي والرياضي

الذكاء المنطقي والرياضي هو قدرة الشخص على فهم المناهج الرياضية والمعادلات والفرضيات، وقدرته على القيام بالعمليات الرياضية الدوال الحسابية المختلفة، والشخص هنا بيستمتع بالتفكير في حلول المسائل الرياضية المعقدة.

الذكاء الحركي والعضلي

الذكاء الحركي بيعبر عن قدرة الشخص على التعامل بشكل كويس مع المهام الجسدية، وبنلاقي إن الرياضيين والجراحين بيشتهروا بالنوع دا من الذكاء.

ذكاء الإيقاع الموسيقي

قدرة الشخص على تمييز الإيقاع تعتبر ذكاء موسيقي، ومن هنا الشخص بيكون قادر على خلق وإنتاج ألحان جديدة.

الذكاء الطبيعي

الذكاء الطبيعي هو قدرة الفرد على التمييز بين الحيوانات والنباتات والصخور وغيرهم، والنوع دا من الذكاء كان موجود بشكل كبير عند المصري القديم؛ لإنه كان بيقضي وقت طويل يتجول في الطبيعة ويتعامل مع أنواع مختلفة من الحيوانات والكائنات على مدار حياته.

الذكاء الداخلي

النوع دا من الذكاء بيعكس مدى إدراك الشخص لذاته وتحديد قدراته، والشخص اللي بيتميز بالنوع دا من الذكاء بيكون عارف إزاي يطور من مهاراته بناءً على فهمه لنفسه كويس.

الذكاء المكاني

بيشتهر بالنوع دا من الذكاء الأشخاص اللي عندهم قدرة على تصور الأبعاد الثلاثية للأشياء، ورسم صورة للأشياء دي بعد حدوث تغيير معين فيها.
بنلاقي إن الذكاء المكاني موجود بشكل ملحوظ عند الأشخاص المسئولين عن المعمار الهندسي، وكمان عند الطيارين والبحارين.

الذكاء الوجودي

بنلاحظ في كلامنا مع بعض الأشخاص إنهم بيطرحوا أسئلة وجودية باستمرار، وأحيانا مش بناخد أسئلتهم على محمل الجد إلا إنهم بيكونوا جادين وعندهم رغبة كبيرة في الوصول لإجابات الأسئلة دي، والأشخاص دول بيتميزوا بالذكاء الوجودي.

تنمية كل نوع من الذكاء بيتطلب مجموعة من الأنشطة والألعاب المختلفة، وفي السطور الجاية هنعرض ألعاب ذكاء للأطفال 13 سنة يمكن الاعتماد عليها لتنمية ذكاء الأطفال في السن دا.

أولًا: ألعاب تنمية الذكاء اللغوي

الذكاء اللغوي يعد من أهم أنواع الذكاء اللي لازم ننميها في أطفالنا خصوصا في مرحلة المراهقة؛ عشان يكون عندهم قدرة على المناقشة والتحدث بلباقة مع الآخرين، وبالتالي ممكن نستخدم ألعاب ذكاء للأطفال 13 سنة لتنمية الذكاء اللغوي زي:

1_ لعبة الكلمات المتقاطعة

اللعبة بتساعد الطفل يتعرف كل مرة على مصطلحات جديدة بدون ما يضطر إنه يحفظ المصطلحات دي ويسمعها بالطريقة التقليدية، وبتخليه يفكر بشكل متصل طول فترة اللعب، وبالتالي فهي بتزود الحصيلة اللغوية عنده وبتعلمه إزاي يركز لفترة طويلة عشان يوصل للحل الصحيح للكلمات.

2_ لعبة الأغاني

لعبة الأغاني ممكن يشارك فيها أفراد الأسرة كلهم، بتبدأ بتأليف فرد لجملة فيها قافية أو ممكن تتغني واللي بعده يألف جملة بتبدأ بآخر حرف قاله الفرد اللي قبله، اللعبة بتنمي المهارات اللغوية وحصيلة المفردات للأطفال في سن 13 سنة وكمان بتنمي سرعة البديهية والتفكير.

3_ مسابقات القراءة

القراءة اليومية تعتبر أقصر طريق لزيادة الحصيلة اللغوية عند أطفالنا، ورغم أهميتها إلا إن بعض الأطفال بيملوا منها ومش بيكونوا منتظمين فيها، عشان كدا المسابقات بتكون مفيدة في الحالة دي؛ لإنها من أكثر الحاجات اللي بتشجع الطفل على القراءة عشان روح المنافسة الموجودة بين الأطفال، والمسابقات هنا بتكون بمثابة ألعاب ذكاء للأطفال 13 سنة وبتجيب نتائج ملحوظة جدا مع الوقت.

ثانيًا: ألعاب تنمية الذكاء النمطي والحسابي

ألعاب تنمية الذكاء النمطي والحسابي

بنلاحظ دايما حرص ولي الأمر إنه ينمي عند طفله الذكاء الحسابي وقدرته على حل العمليات الحسابية المعقدة، وبيساعده على كدا ألعاب ذكاء للأطفال 13 سنة من أهمها:

4_ الألغاز الرياضية

الألغاز الرياضية تعتبر من أشهر الألعاب اللي بتساعد بشكل كبير في تنمية الذكاء الحسابي عند الطفل؛ لإن الطفل بيتعلم من خلالها إزاي يفكر بشكل صحيح في حل العمليات الحسابية المختلفة، ومع الوقت مش بيلاقي صعوبة كبيرة في حلها، لإيجاد على ألغاز رياضية مناسبة للأطفال، ممكن تزور موقع IXL Learning.

5_ السودوكو

أغلب الأطفال في سن 13 سنة -خصوصًا الأولاد- بيحبوا لعبة السودوكو، والنقطة دي ممكن نستغلها بإننا نوفر نماذج كتير من اللعبة ونخليهم يفكروا في حلها عشان ننمي ذكائهم الرياضي.

6_ لعبة Scratch لتعلم البرمجة

لعبة سكراتش Scratch هي لعبة لتعيم مبادئ البرمجة للأطفال والمبتدئين صممها مطوري معهد ماستشوسس للتكنولوجيا MIT، اللعبة مناسبة للأطفال في سن 13 سنة وبتساعدهم على تنمية الذكاء الرياضي وحل المشكلات، سكراتش تعلمها سهل وبتمكن الطفل من تصميم برامج وألعاب كمبيوتر بسيطة من خلال تكوين أكواد سهلة وبتكون بداية ممتازة لتعلم مهارات البرمجة.

 

ثالثًا: ألعاب ذكاء للأطفال 13 سنة لتنمية التفكير النقدي والتحليل

التفكير النقدي هو القدرة على تقييم الأشياء الموجودة حوالينا وتصنيفها لأشياء سلبية وأخرى إيجابية، وعشان ننمي مهارة التفكير النقدي عند المراهقين بنحتاج ألعاب ذكاء للأطفال 13 سنة واللي من أشهرها:

7_ لعبة بيكشنري Pictionary

لعبة بيكشنري هي لعبة جماعية فكرتها قائمة على التعبير عن الأشياء بواسطة الرسم، وهنا بنطلب من الطفل إنه يوضح مبرر لرسمه وتخيلاته اللي اتصرف على أساسها، وبالتالي بننمي عنده مهارة التفكير النقدي والتحليل عند الأطفال.

8_ حل لغز أينشتاين

لغز أينشتاين من ألعاب ذكاء للأطفال 13 سنة اللي بتختبر التفكير التحليلي والقدرة على حل المشكلات، لازم الطفل يستخدم خياله وورقة وقلم ليتمكن من حله، لمعرفة لغز أينشتاين وكيفية حله شاهد الفيديو التالي..

رابعًا: ألعاب لتنمية التفكير الاستراتيجي والتخطيط

استخدام ألعاب ذكاء للأطفال 13 سنة بيكون مجدي جدا في تنمية التفكير الاستراتيجي والتخطيط عندهم، ومن ضمن الألعاب دي هي:

9_ لعبة الليجو

اللعبة فكرتها قائمة على تجميع مجموعة من الأشكال المختلفة لتكوين مجسم ثلاثي الأبعاد، والطفل بيتعلم من خلالها التخطيط والتفكير الاستراتيجي والممنهج، وهنا بتكون عدد القطع الموجودة باللعبة عددها كبير عشان نقدر نستخدمها ضمن ألعاب ذكاء للأطفال 13 سنة.

10_ لعبة الشطرنج

لعبة الشطرنج تعد ضمن قائمة ألعاب ذكاء للأطفال 13 سنة اللي بنقدر من خلالها ننمي مهارة التفكير الاستراتيجي وطريقة التخطيط عند الأطفال، فبيكون عندنا طفل قادر على مواجهة المشاكل اللي بيواجهها بطريقة تفكير حكيمة يقدر من خلالها يوصل لحلول قابلة للتنفيذ.

خامسًا: ألعاب لتنمية الذكاء العضلي والحركي

11_ السباحة

السباحة من أهم الألعاب والرياضات اللي بتنمي الذكاء العضلي والحركي عند الأطفال في سن 13 سنة وبتقوي تناسق الحركة بين أطراف الجسم لأن الطفل بيحرك جميع عضلات الذراعين والرجلين أثناء السباحة.

12_ الرياضات الجماعية

الرياضات مثل كرة القدم، الكرة الطائرة، كرة السلة، التنس، وغيرهم بينموا الذكاء الحركي والعضلي عند الأطفال 13 سنة وكمان بيساعدوا في تنمية الذكاء المكاني، أثناء ممارسة الرياضات دي الطفل بيستخدم أجزاء مختلفة من المخ وبينمي نشاط الدماغ عنده.

13_ العزف على الآلات الموسيقية

تعلم على العزف على آلات موسيقية مثل البيانو، الكمان، التشيلو، الأكورديون من أهم ألعاب ذكاء للأطفال سن 13 لأنها بتنمي الذكاء الحركي والعضلي بالإضافة للذكاء المكاني وذكاء الإيقاع الموسيقي. دراسات كتير أثبتت إن الأطفال اللي بيحترفوا العزف على آلات موسيقية معدل ذكاءهم بيكون أعلى من المعدلات المتوسطة.

إلى جانب الألعاب بنلاقي مجموعة من الأنشطة المهمة اللي يمكن الاستعانة بيها أيضا لتنمية ذكاء الأطفال، والأنشطة دي هنتعرف عليها حالا.

الأنشطة الاجتماعية لتنمية ذكاء الأطفال 13 سنة

أهمية الأنشطة الاجتماعية لتنمية ذكاء الطفل

الأنشطة الاجتماعية بتلعب دور حيوي جدا في تنمية ذكاء الأطفال في عمر 13 سنة؛ لإنها بتشعر الطفل إنه عنصر فعال في المجتمع وله دور مميز ومؤثر في اللي حواليه، وبالتالي بتكسبه الثقة في النفس وبتنمي عنده الذكاء الاجتماعي، وبالتالي لازم نحرص على ممارسة الطفل للأنشطة دي باستمرار زي إننا نشجعه على القيام بالأعمال التطوعية، أو نعطي له بعض المهام المنزلية اليومية، أو نخليه يمارس هواية بيحبها زي هواية الرسم مع مجموعة من أصدقائه، وغيرهم.

في النهاية

وأخيرًا، استخدام ألعاب ذكاء للأطفال 13 سنة هو شيء ضروري جدا لتنمية ذكاء أطفالنا، ولكن قبل استخدامها لازم نكون محددين إيه نوع الذكاء اللي محتاجين ننميه عند أطفالنا وبناءً عليه نحضر اللعبة المناسبة له؛ عشان نقدر نلاحظ تطور في مهارات وذكاء الطفل مع الوقت.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية

إقرأ أكثر..

  • No comments yet.
  • Add a comment