أهم ألعاب ذكاء للأطفال 13 سنة: 13 لعبة لتنمية أنواع الذكاء المختلفة

إيه هي أفضل ألعاب ذكاء للأطفال 13 سنة؟ 

تنمية ذكاء ومهارات المراهقين وقدراتهم هو أمر بيشغل بال أولياء الأمور، لإنهم دايماً بيكون هدفهم الوصول بمهاراتهم لمستوى مميز، ولكن أحياناً ما بيقدروش يحددوا المهارة اللي محتاجة تنمية، وبالتالي ما بيكونش في تطور ملحوظ بالنسبة ليهم. 

عشان كدا لازم نتعرف على أنواع الذكاء المختلفة، ونحدد بالظبط المهارة اللي هننميها، وبناءً عليه نبدأ في التنفيذ، وبالطبع اللي بيساعدنا في التنفيذ هي الألعاب والأنشطة المناسبة لعمرهم. 

في المقال دا هنتعرف على طبيعة سن الـ 13 في حياة أولادنا، وعلى أنواع الذكاء المختلفة، ونعرض مجموعة من أفضل ألعاب الذكاء المناسبة لهم، عشان نقدر نطور مهاراتهم، وذكائهم، ونوصل للمستوى اللي عايزينه. 

سن الـ 13 وبداية المراهقة 

بيؤكد أطباء الأطفال النفسيين إن السن دا فارق في حياة كل طفل، وبداية لمرحلة المراهقة المبكرة، والمعروف عن المرحلة دي إنها من أصعب المراحل بالنسبة للطفل أو ولي الأمر، ودا بسبب التغيرات الكتيرة اللي بتطرأ على الطفل زي: 

التغيرات البدنية 

على الجانب البدني بيكون في تطور جسماني ملحوظ، فبالنسبة للأولاد بنلاحظ: 

• ظهور الشعر في أماكن مختلفة من الجسم. 
• زيادة في حجم العضلات. 
• نمو الأعضاء التناسلية. 
• خشونة الصوت. 

أما بالنسبة للبنات بيكون في: 

• تمركز الدهون في بعض المناطق الأرداف، والبطن. 
• زيادة نمو الشعر في مناطق متفرقة بالجسم. 
• نمو حجم الثديين. 
• حدوث الدورة الشهرية. 

التغيرات الذهنية 

مستوى تفكير الطفل في سن 13 سنة بيرتفع مقارنةً بسنوات عمره السابقة؛ فبيبدأ يتعامل مع المشاكل اللي بيمر بيها بطريقة منطقية، وبيحاول يوصل لحلول عقلانية ينفع تتطبق، وممكن ندعمه هنا باستخدام ألعاب ذكاء للأطفال 13 سنة، أو أنشطة مناسبة ليه.

كمان بيبدأ يركز جدًا مع اللي حواليه، ويهتم بوجهة نظرهم ورأيهم فيه، والنقطة دي بترتبط جداً بالتقلبات المزاجية للطفل، بمعنى إنه لو اتعرض لآراء سلبية هيتأثر بيها جداً، وهياخدها في اعتباره، وبيبدأ يتعامل إن الرأي دا مُسَلم بيه، أو إنه شخص سيئ.

ومن ضمن التغيرات الملحوظة كمان على الطفل هي الرغبة الكبيرة في الاستقلال، لإن من وجهة نظره إن دي الطريقة الوحيدة اللي هيقدر يثبت بيها إنه أصبح شخص كبير ويمكن الاعتماد عليه. 

التغيرات النفسية 

بيمر الطفل في فترة المراهقة بالعديد من التقلبات المزاجية والنفسية اللي لازم يتقبلها ولي الأمر، والتقلبات دي بتكون بين الخوف والقلق والسعادة وغيرهم، وبتختلف في شدتها من طفل للتاني، لكنها تغيرات طبيعية.

وبيظهر كمان إن أجزاء دماغ الطفل في سن 13 سنة بتكون مجهدة، وبيكون في اضطراب في مشاعره، عشان كدا بنلاحظ إن الطفل مش بيستجيب لحاجات كتيرة بيطلبها منه ولي الأمر، ومش بيكون متعاون في بعض الأحيان.

وبالتالي فهم ولي الأمر لطبيعة المرحلة اللي بيمر بيها طفله هو شيء أساسي جدًا عشان يقدر يتعامل معاه، ويساعده يعيش المرحلة دي بدون اضطرابات نفسية تؤثر عليه فيما بعد.

وهنا بنحتاج نعلم الأطفال تقنيات الاسترخاء، لإنها بتكون فعالة في الحالة اللي زي كدا وفقًا للدراسة اللي ذكرها NCBI. 

السؤال هنا، إزاي كأولياء أمور ومربيين نقدر نتعامل بشكل صحيح مع التغيرات دي؟ دا اللي هنتعرف عليه حالًا. 

كيفية التعامل مع الأطفال في سن 13 سنة 

التعامل الصحيح مع الأطفال بيتطلب وعي بطبيعة المرحلة زي ما ذكرنا، فمثلاً في سن 13 سنة بنلاقي إن تعاملاتنا مع الطفل لازم نوضح من خلالها إننا حريصين عليه، ومهتمين بيه وبرعايته؛ عشان يبدأ يحس بالأمان، والانتماء للأسرة، ونقلل من اضطراباته الداخلية.

كمان الدعم والتشجيع هنا أساسي جدًا؛ لإن بمجرد شعور الطفل بالدعم هنكون قطعنا معاه شوط كبير، فهيبدأ يتعامل بثقة، وبدون خوف من سلبية الآراء، وهيشارك الأسرة مشاكله، ومواضيعه المختلفة، وبكدا هنتجنب إنه يلجأ لحد خارج الأسرة عشان يحكيله. 

بالتالي واجب ولي الأمر هنا إنه يسمع لطفله دايماً، ويسأله عن مشاكله، ويحاول يفكر معاه في طريقة حل ليها، عشان يشجعه يعبر عن مشاعره، ويحكي باستمرار.

في الفترة دي كمان لازم ننمي عنده بعض أنواع الذكاء المهمة، زي: الذكاء الاجتماعي، والشخصي، وغيرهم؛ ودا بيكون عن طريق توفير ألعاب ذكاء للأطفال 13 سنة، ونفهم الطفل إزاي يستخدمها، ولكن دا بيكون بعد ما نفهم أنواع الذكاء المختلفة، ونعرف إزاي ننميها. 

أنواع الذكاء المختلفة وكيفية تنميتها 

البعض بيعتقد إن الذكاء نوع واحد بس، لكن تبعًا للدراسات اللي اتعملت، واللي ذكره موقع Research Gate بنلاقي إنها 9 أنواع مختلفة، والعدد دا قابل للزيادة مع الوقت في حالة التوصل لأنواع تانية، والأنواع المتفق عليها هي: 

الذكاء اللغوي 

الذكاء اللغوي بيتضمن طريقة التفكير في الكلمات، واستخدام اللغة في التعبير، ومن خلاله بنقدر نتواصل مع بعض، ونفهم كل شخص بيتكلم عشان نقدر نرد عليه بطريقة صح.

النوع دا من الذكاء نقدر ننميه بالقراءة المستمرة، وتعلم اللغات الجديدة، واستخدام ألعاب ذكاء للأطفال 13 سنة زي؛ حل الكلمات المتقاطعة وغيرها. 

الذكاء الاجتماعي 

تاني نوع من الذكاء اللي بيظهر في تعاملاتنا بوضوح هو الذكاء الاجتماعي، ودا معناه مدى قدرة الشخص على التصرف في علاقاته.

والشخص اللي بيكون عنده ذكاء اجتماعي بيمتلك مجموعة من المهارات المميزة، زي: مهارة الاستماع، وحسن الإصغاء، والتفاوض وغيرهم.

ومن ضمن ألعاب ذكاء للأطفال 13 سنة المفيدة للنوع دا؛ هي الرياضات الجماعية بأنواعها المعتمدة على الاختلاط والمشاركة. 

الذكاء المنطقي والرياضي 

الذكاء المنطقي والرياضي هو قدرة الشخص على فهم المناهج الرياضية، والمعادلات، والفرضيات، وقدرته على القيام بالعمليات الرياضية، والدوال الحسابية المختلفة، والشخص هنا بيستمتع بالتفكير في حلول المسائل الرياضية المعقدة. 

الذكاء الحركي والعضلي 

الذكاء الحركي بيعبر عن قدرة الشخص على التعامل بشكل كويس مع المهام الجسدية، وبنلاقي إن الرياضيين والجراحين بيشتهروا بالنوع دا من الذكاء. 

ذكاء الإيقاع الموسيقي 

قدرة الشخص على تمييز الإيقاع هي ذكاء موسيقي، ومن هنا الشخص بيكون قادر على خلق وإنتاج ألحان جديدة. 

الذكاء الطبيعي 

هو قدرة الفرد على التمييز بين الحيوانات، والنباتات والصخور، وغيرهم، والنوع دا من الذكاء كان موجود بشكل كبير عند المصري القديم؛ لإنه كان بيقضي وقت طويل يتجول في الطبيعة، ويتعامل مع أنواع مختلفة من الحيوانات، والكائنات على مدار حياته. 

الذكاء الداخلي 

النوع دا من الذكاء بيعكس مدى إدراك الشخص لذاته وتحديد قدراته، والشخص اللي بيتميز بيه بيكون عارف إزاي يطور من مهاراته بناءً على فهمه لنفسه كويس. 

الذكاء المكاني 

بيشتهر بالنوع دا من الذكاء الأشخاص اللي عندهم قدرة على تصور الأبعاد الثلاثية للأشياء، ورسم صورة للأشياء دي بعد حدوث تغيير معين فيها.

وبنلاقي إن الذكاء المكاني موجود بشكل ملحوظ عند الأشخاص المسؤولين عن المعمار الهندسي، وكمان عند الطيارين والبحارين. 

الذكاء الوجودي 

بنلاحظ في كلامنا مع بعض الأشخاص إنهم بيطرحوا أسئلة وجودية باستمرار، وأحياناً مش بناخد أسئلتهم على محمل الجد، إلا إنهم بيكونوا جادين، وعندهم رغبة كبيرة في الوصول لإجابات الأسئلة دي، والأشخاص دول بيتميزوا بالذكاء الوجودي.

تنمية كل نوع من الذكاء بيتطلب مجموعة من الأنشطة والألعاب المختلفة، وفي السطور الجاية هنعرض ألعاب ذكاء للأطفال 13 سنة يمكن الاعتماد عليها لتنمية ذكاء الأطفال في السن دا.

أولًا: ألعاب تنمية الذكاء اللغوي 

الذكاء اللغوي يعد من أهم أنواع الذكاء اللي لازم ننميها في أطفالنا خصوصاً في مرحلة المراهقة؛ عشان يكون عندهم قدرة على المناقشة، والتحدث بلباقة مع الآخرين، وبالتالي ممكن نستخدم ألعاب ذكاء للأطفال 13 سنة لتنمية الذكاء اللغوي زي: 

1– لعبة الكلمات المتقاطعة 

اللعبة دي بتساعد الطفل يتعرف كل مرة على مصطلحات جديدة بدون ما يضطر إنه يحفظها، ويسمعها بالطريقة التقليدية، وبتخليه يفكر بشكل متصل طول فترة اللعب.

وبالتالي فهي بتزود الحصيلة اللغوية عنده، وبتعلمه إزاي يركز لفترة طويلة عشان يوصل للحل الصحيح للكلمات. 

2– لعبة الأغاني 

ممكن يشارك فيها أفراد الأسرة كلهم، وبتبدأ بتأليف فرد لجملة فيها قافية، أو ممكن تتغنى واللي بعده يألف جملة بتبدأ بآخر حرف قاله الفرد اللي قبله، واللعبة دي بتنمي المهارات اللغوية، وحصيلة المفردات للأطفال في سن 13 سنة، وكمان بتنمي سرعة البديهة والتفكير. 

3– مسابقات القراءة 

القراءة اليومية تعد أقصر طريق لزيادة الحصيلة اللغوية عند أطفالنا، ورغم أهميتها إلا إن بعض الأطفال بيملوا منها، ومش بيكونوا منتظمين فيها. 

عشان كدا المسابقات بتكون مفيدة في الحالة دي؛ لإنها من أكتر الحاجات اللي بتشجع الطفل على القراءة، عشان روح المنافسة الموجودة بين الأطفال. 

والمسابقات هنا بتكون بمثابة ألعاب ذكاء للأطفال 13 سنة، وبتجيب نتائج ملحوظة جداً مع الوقت. 

ثانيًا: ألعاب تنمية الذكاء النمطي والحسابي 

بنلاحظ دايماً حرص ولي الأمر إنه ينمي عند طفله الذكاء الحسابي، وقدرته على حل العمليات الحسابية المعقدة، وبيساعده على كدا ألعاب ذكاء للأطفال 13 سنة، ومن أهمها: 

4– الألغاز الرياضية 

تعد من أشهر الألعاب اللي بتساعد بشكل كبير في تنمية الذكاء الحسابي عند الطفل؛ لإنه بيتعلم من خلالها إزاي يفكر بشكل صحيح في حل العمليات الحسابية المختلفة، ومع الوقت مش بيلاقي صعوبة كبيرة في حلها، ولإيجاد ألغاز رياضية مناسبة للأطفال، ممكن تزور موقع IXL Learning. 

5– السودوكو 

أغلب الأطفال في سن 13 سنة -خاصةً الأولاد- بيحبوا لعبة السودوكو، والنقطة دي ممكن نستغلها بإننا نوفر نماذج كتير من اللعبة، ونخليهم يفكروا في حلها، عشان ننمي ذكائهم الرياضي. 

6– لعبة Scratch لتعلم البرمجة 

هي لعبة لتعليم مبادئ البرمجة للأطفال المبتدئين؛ صممها مطوري معهد ماساتشوستس للتكنولوجيا MIT، واللعبة مناسبة للأطفال في سن 13 سنة، وبتساعدهم على تنمية الذكاء الرياضي وحل المشكلات،. 

سكراتش تعلمها سهل، وبتمكن الطفل من تصميم برامج، وألعاب كمبيوتر بسيطة من خلال تكوين أكواد سهلة، وبتكون بداية ممتازة لتعلم مهارات البرمجة.   

اقرأ أيضاً: 8 ألعاب لزيادة التركيز عند الأطفال.

ثالثًا: ألعاب ذكاء للأطفال 13 سنة لتنمية التفكير النقدي والتحليل

التفكير النقدي هو القدرة على تقييم الأشياء الموجودة حوالينا، وتصنيفها لأشياء سلبية وإيجابية، وعشان ننمي مهارة التفكير النقدي عند المراهقين بنحتاج ألعاب ذكاء للأطفال، واللي من أشهرها: 

7– لعبة بيكشنري Pictionary 

هي لعبة جماعية فكرتها قائمة على التعبير عن الأشياء بواسطة الرسم، وهنا بنطلب من الطفل إنه يوضح مبرر لرسمه وتخيلاته اللي اتصرف على أساسها، وبالتالي بننمي عنده مهارة التفكير النقدي، والتحليل. 

8– حل لغز أينشتاين 

واحدة من أهم ألعاب ذكاء للأطفال 13 سنة اللي بتختبر التفكير التحليلي، والقدرة على حل المشكلات، ولازم الطفل يستخدم فيها خياله وورقة وقلم عشان يحلها.

رابعًا: ألعاب لتنمية التفكير الاستراتيجي والتخطيط 

استخدام ألعاب ذكاء للأطفال 13 سنة بيكون مُجدي جداً في تنمية التفكير الاستراتيجي والتخطيط عندهم، ومن ضمن الألعاب دي هي: 

9– لعبة الليجو 

فكرتها قائمة على تجميع مجموعة من الأشكال المختلفة لتكوين مجسم ثلاثي الأبعاد، والطفل بيتعلم من خلالها التخطيط والتفكير الاستراتيجي، وهنا بتكون عدد القطع الموجودة باللعبة كبير عشان نقدر نستخدمها. 

10– لعبة الشطرنج 

بتعد ضمن قائمة ألعاب ذكاء للأطفال 13 سنة اللي بنقدر من خلالها ننمي مهارة التفكير الاستراتيجي، وطريقة التخطيط عند الأطفال، فبيكون عندنا طفل قادر على مواجهة المشاكل اللي بيواجهها بطريقة تفكير حكيمة يقدر من خلالها يوصل لحلول قابلة للتنفيذ. 

خامسًا: ألعاب لتنمية الذكاء العضلي والحركي

هي ألعاب بتعتمد على تنمية الجانب العضلي والحركي، ومن أهمها: 

11– السباحة 

من أهم الألعاب والرياضات اللي بتنمي الذكاء العضلي والحركي عند الأطفال في سن 13 سنة، وبتقوي تناسق الحركة بين أطراف الجسم؛ لإن الطفل بيحرك جميع عضلات الذراعين والرجلين أثناء السباحة. 

12– الرياضات الجماعية 

ودي زي كرة القدم، والكرة الطائرة، وكرة السلة، والتنس، وغيرهم من الرياضات اللي بتنمي الذكاء الحركي والعضلي عند الأطفال 13 سنة، وكمان بتساعد في تنمية الذكاء المكاني.

ودا لإن أثناء ممارسة الرياضات دي الطفل بيستخدم أجزاء مختلفة من المخ، وبينمي نشاط الدماغ عنده. 

الأنشطة الاجتماعية لتنمية ذكاء الأطفال 13 سنة  

بتلعب الأنشطة الاجتماعية دور حيوي جداً في تنمية ذكاء الأطفال في عمر 13 سنة؛ لإنها بتحسس الطفل إنه عنصر فعّال في المجتمع، وله دور مميز ومؤثر في اللي حواليه، وبالتالي بتكسبه الثقة في النفس، وبتنمي عنده الذكاء الاجتماعي. 

وبالتالي لازم نحرص على ممارسة الطفل للأنشطة دي باستمرار، زي إننا نشجعه على القيام بالأعمال التطوعية، أو نعطي له بعض المهام المنزلية اليومية، أو نخليه يمارس هواية بيحبها زي هواية الرسم مع مجموعة من أصدقائه، وغيرهم. 

نصائح لتنمية الذكاء عند الأطفال

بعد معرفة ألعاب ذكاء للأطفال 13 سنة خلينا نقولك إن في مجموعة من النصايح اللي محتاج تطبقها عشان تساعد طفلك على تنمية الذكاء، ومنها:

• الاهتمام بنظام غذائي صحي من خضروات، وفواكه، وبروتين، والتقليل من المأكولات الجاهزة.
• الاهتمام بتحفيظ الطفل القرآن، لإنه بينمي ذكائه، وبيحافظ على صحته النفسية.
• بدء ممارسة الرياضة من سن صغير، وألعاب تنمية الذكاء المناسبة لكل سن.
• الاهتمام بترفيه الطفل، ومساعدته على معرفة أشخاص وأماكن مختلفة.
• الإيمان بطفلك، وتشجعيه طول الوقت، لإن دا بيفتحله أفق أكبر لذكائه.
• مشاركة الطفل لقراءة كتاب أو قصة بشكل منتظم قدر الإمكان.
• الحفاظ على النوم المنتظم، فلا يقل عن 8 ساعات يومياً.

في النهاية، استخدام ألعاب ذكاء للأطفال 13 سنة هو شيء ضروري جداً لتنمية ذكاء أطفالنا، ولكن قبل استخدامها لازم نكون محددين إيه نوع الذكاء اللي محتاجين ننميه عندهم، وبناءً عليه نختار اللعبة المناسبة، عشان نقدر نلاحظ تطور في المهارات والذكاء مع الوقت.