5 مميزات الدبلومة الأمريكية في مصر

مميزات الدبلومة الأمريكية 2021

 

الحصول على منح تعليمية واستكمال الدراسة الجامعية في الخارج هو حلم كتير من الطلبة؛ عشان يتعرفوا أكثر على الأنظمة التعليمية المختلفة ويضمنوا مستقبل ناجح لنفسهم.

وأول خطوة في تحقيق الحلم ده هو التحاق الطالب بالدبلومة الأمريكية في مصر، واللي بتعادل شهادة الثانوية العامة، بالإضافة إلى إنها بتتيح للطالب فرصة للتقديم على امتحان معين يأهله للدراسة بالخارج.

في المقال ده هنتعرف أكثر على نظام التعليم الأمريكي، ومميزات الدبلومة الأمريكية في مصر، وإيه أحدث القرارات اللي أصدرتها وزارة التربية والتعليم المصرية بخصوص الدبلومة دي.

نظام التعليم الأمريكي في مصر

النظام الأمريكي هو واحد ضمن الأنظمة التعليمية الموجودة في مصر، واللي بتستخدم التقنيات الحديثة للتعليم، وبتساعد الطلاب على مواكبة التطور والتغيرات حواليهم.

الطالب في النظام ده بيدرس مناهج معتمدة من خارج مصر، ومش بيكون مضطر إنه يدرس كل المناهج الموجودة في نظام النظام الحكومي، واللي أغلبها بيعتمد على نظام الحفظ والتلقين بدون ما يكون في أي مجال للإبداع.

وبيكون في إمكانية للطلاب في الأنظمة الأخرى إنهم يحولوا دراستهم إلى النظام الأمريكي في أي مرحلة، ويحصلوا على شهادة الدبلومة الأمريكية بعد انتهاء سنوات دراستهم.

عدد سنوات الدراسة في النظام الأمريكي بتكون 12 سنة زي باقي الأنظمة الموجودة في مصر إلى جانب سنوات الحضانة، وخلال أول 9 سنوات بيتم تقييم الطالب بناء على الأنشطة والمشاريع اللي بيقدمها على مدار العام الدراسي.

يعني الدرجات متقسمة على أنشطة كتيرة، والطالب بيكون معاه فرصة يحصل على مجموعة درجات كويسة قبل ما يدخل الامتحان النهائي، ودا بيقلل الضغط النفسي عليه ويساعده يحل كويس في الامتحانات النهائية.

والنقطة دي تعتبر من أهم مميزات الدبلومة الأمريكية في مصر، أما عن باقي مميزات الدبلومة الأمريكية فهنتعرف عليها حالًا.

أهم مميزات الدبلومة الأمريكية

مميزات الدبلومة الأمريكية في مصر

اختلاف الدبلومة الأمريكية عن نظام التعليم الحكومي في مصر بيكسبها مجموعة من المميزات اللي بتساعد ولي الأمر إنه يختارها ويقدم فيها لأولاده؛ عشان يستفيدوا من المميزات الموجودة.

فمن مميزات الدبلومة الأمريكية في مصر:

1. تقديم شهادة تعادل شهادة الثانوية العامة

بعد انتهاء سنوات الدراسة في الدبلومة الأمريكية بيتم تقديم شهادة معتمدة تعادل شهادة الثانوية العامة في مصر.

الشهادة دي بتتيح للطالب فرصة الالتحاق بأي كلية حكومية أو خاصة بعد توافر باقي الشروط المطلوبة بالنسبة للكليات.

كمان إذا كان الطالب حابب يكمل دراسته الجامعية بره مصر بيكون معاه فرصة يقدم على امتحان SAT للحصول على شهادة معتمدة تمنحه صلاحية الالتحاق بأي جامعة على مستوى العالم وبالطبع دا من أهم وأفضل مميزات الدبلومة الأمريكية.

2. تشجيع الطالب على البحث

طريقة التعليم في الدبلومة الأمريكية مختلفة تماما عن الموجودة في المدارس المصرية الحكومية؛ لإن في الدبلومة الطالب بيكون معاه مصادر إضافية يقدر يوصل منها للمعلومات اللي حابب يعرفها ويفهمها كويس.

ودا بيعلم الطالب إزاي يوصل للمعلومات بشكل بسيط، ويعتبر من أهم مميزات الدبلومة الأمريكية بالنسبة للطلبة المهتمين بمجال البحث العلمي.

3. الاهتمام بتطوير مهارات الطالب

دايما المدارس الانترناشونال بتركز أكثر أثناء الدراسة على تطوير مهارات الطالب سواء المهارات الشخصية بوجه عام أو المهارات الخاصة بالتعلم، وبيكون هدفها تأهيل الطالب أنه يكون شخص مؤثر في اللي حواليه بجانب إنه يكون ناجح في دراسته.

4. المساعدة على إتقان اللغة الإنجليزية

المناهج الأساسية في الدبلومة الأمريكية بيتم تدريسها باللغة الإنجليزية زي مادة الرياضيات، والعلوم، وغيرهم.

ودا بيساعد الطالب إنه يتعمق أكثر في فهم اللغة الإنجليزية ويتقنها مع مرور الوقت.

5. عدم الاحتياج إلى الكتب الخارجية

المعلومات في الكتب الدراسية الخاصة بالدبلومة الأمريكية بتكون كافية جدا إن الطالب يفهم المنهج بشكل كويس بدون ما يحتاج إلى مصدر خارجي لدعم معلوماته على عكس الموجود في نظام التعليم الحكومي.

كمان المدرس بيوفر مصادر للطلبة خاصة بالجزء اللي هيشرحه يقدروا يرجعولها عشان يفهموا المادة العلمية أكثر.

مناهج الدبلومة الأمريكية

المناهج اللي بيدرسها الطالب في الدبلومة الأمريكية بتكون معتمدة من النظام الأمريكي علشان كدا تعتبر في حد ذاتها من مميزات الدبلومة الأمريكية، وبالتالي بتكون مختلفة عن المناهج الحكومية المصرية.

نظام الدراسة بيختلف من Grade للتانية، فهنلاقي:

مناهج Grade 10

في السنة الدراسية الأولى (Grade 10) الطالب بيدرس المواد الأساسية، بالإضافة إلى بعض الأنشطة.
المواد دي زي:

الرياضيات
اللغة الإنجليزية
الأحياء
التاريخ
الغة الفرنسية

كمان بيدرس بعض المواد من النظام الحكومي المصري زي اللغة العربية والتربية الدينية وغيرهم، والمواد دي بتكون خارج المجموع، لكن الطالب لازم ينجح فيها عشان يتنقل للمرحلة اللي بعدها.

مناهج Grade 11

بالطبع المناهج هنا مختلفة عن مناهج Grade 10 لكن بيتم دراسة نفس المواد الأساسية، بخلاف مادة الأحياء لإنه بيبدأ يدرس الكيمياء.

وبالنسبة لمواد وزارة التربية والتعليم المصرية فبيكون إجباري إن الطالب يدرس اللغة العربية والتربية الدينية، أما مادة الدراسات الاجتماعية بتكون اختيارية.

مناهج Grade 12

الطالب هنا بيبدأ يدرس المستويات المتقدمة من مادة اللغة الإنجليزية والرياضيات، بالإضافة إلى عدة مواد تانية زي الفيزياء والأحياء وعلم النفس واللغة الأجنبية الثانية وغيرهم.

أما عن المواد الخاصة بوزارة التربية والتعليم المصرية فبتكون دراستها إجبارية.

امتحانات الدبلومة الأمريكية

امتحانات الدبلومة الأمريكية لتأهيل الطلبة للكليات

الدبلومة الأمريكية زي ما بتختلف في مناهجها بنلاقيها كمان مختلفة في طريقة الامتحانات اللي بتقدمها للطلبة، واللي بيتم تقييمه من خلالها خلال سنوات دراسته الأخيرة عشان يقدر يلتحق بالجامعة اللي حابب يكمل فيها.

تقييم الطالب في الدبلومة بيكون على حسب درجاته في مواد الـ GPA وبيكون عليهم نسبة بسيطة، بالإضافة إلى الامتحان اللي بيأهله لدخول الجامعة.

مواد GPA دي بتكون:

  • الرياضيات
  • اللغة الإنجليزية
  • العلوم
  • الدراسات الاجتماعية
  • اللغات

أما عن الامتحانات اللي بتأهل الطالب للكليات فهي:

امتحان SAT

امتحان SAT كان بيتم عقده بشكل رسمي بداية من Grade ،11 والطالب معاه فرصة إنه يدخل الامتحان أكثر من مرة، وفي النهاية بيتم اختيار ورصد أعلى درجة حصل عليها.

الامتحان بيكون في قسمين؛ الرياضيات واللغة الإنجليزية، بالإضافة إلى قسم اختياري.

تم اعتماد امتحان SAT في مصر لفترة كبيرة، وبعد نجاح الطالب فيه بيكون معاه فرصة للتقديم في الجامعات الحكومية والخاصة وكمان الجامعات الخارجية، وبعض الطلبة بيعتبروا ده من أهم مميزات الدبلومة الأمريكية.

إلا إنه تم إلغاء الاعتماد الخاص بامتحان الـ SAT في مصر بدايةً من فبراير 2021 بعد حدوث تسريبات للامتحانات الورقية أكثر من مرة واضطرار المسئولين عن الامتحانات إلى تأجيلها.

امتحان ACT

بعض الجامعات الأمريكية بتعتمد نظام امتحان ACT، والامتحان ده نظامه قريب من نظام SAT وكمان بيكون أسهل منه؛ لإن امتحان SAT بيكون متخصص بشكل أكبر.

الطالب ييمتحن هنا في 4 أقسام بالإضافة إلى قسم اختياري، والأقسام دي هي:

  • الرياضيات
  • اللغة الإنجليزية
  • العلوم
  • القراءة

امتحان الـ ACT هيكون غير معترف بيه داخل مصر مع حلول شهر أغسطس 2021، ومش هيتم اعتماد أي امتحان غير EST عشان الطالب يقدر يلتحق بالكليات المحلية والخاصة داخل مصر.

امتحان EST

بناء على القرارات الأخيرة لوزير التربية والتعليم في مصر، فامتحان EST هيكون هو الامتحان الوحيد المعترف بيه في مصر، والطالب لازم يدخله عشان يتمكن من الالتحاق بالكليات الحكومية والخاصة.

الامتحان هيكون مماثل لطريقة امتحان SAT و ACT لكن تحت إشراف وزارة التربية والتعليم المصرية فقط.

جميع الامتحانات دي من مميزات الدبلومة الأمريكية علشان هي بتتميز عن امتحانات الثانوية العامة أنها بتختبر مدى فهم الطالب للمادة العلمية، وبتقيس استعداده للالتحاق بالكليات المتاحة وبالتالي بتكون مقياس عادل لمستوى الطالب.

أما امتحانات الثانوية العامة ففي الغالب بتعكس مدى قدرة على الحفظ، وعدد كبير من الطلبة مش بيكون عندهم الإمكانية لحفظ المناهج وبالتالي بيواجهوا صعوبة في الامتحانات.

بعض عيوب الدبلومة الأمريكية

عيوب الدبلومة الأميكية

رغم تعدد مميزات الدبلومة الأمريكية في مصر، إلا إن بعض العيوب لا تزال موجودة، فلازم نعرف العيوب والمشاكل الموجودة كويس جدًا قبل ما نقدم للطالب في الدبلومة دي.

كمان الطالب لازم يكون على دراية كافية بتفاصيل نظام الدراسة عشان يحدد هل هيقدر يتكيف مع العيوب دي في سبيل إنه يحصل على المميزات الموجودة ولا لأ.

من عيوب الدبلومة الأمريكية:

 إلغاء اعتماد امتحان SAT في مصر

عدد كبير من الطلبة بيدخلوا النظام الأمريكي عشان حابين يكملوا دراستهم الجامعية بره مصر، ومن هنا كان إلغاء اعتماد امتحان SAT أزمة بالنسبة لهم.

إلا إنه ما زال في إمكانية إن الطالب يقدم على امتحان SAT، ويحصل على شهادة معتمدة تأهله لدخول أي جامعة على مستوى العالم بعد توافر باقي الشروط اللي بتطلبها الجامعات دي.

 بعض المناهج غير كافية لتأهيل الطلبة للكليات

المناهج العلمية الموجودة في الدبلومة الأمريكية قيمة جدًا وهي بالفعل من أهم مميزات الدبلومة الأمريكية، إلا إن بعضها مش بيكون فيه معلومات كافية إنها تأهل الطالب لدخول الكليات العلمية، فالطالب مش بيكون عنده خلفية كويسة تساعده في دراسته الجامعية.

الطالب يقدر يتغلب على النقطة دي بإنه يزود اهتمامه بالبحث عن المعلومات اللي محتاجها ويبدأ يذاكرها ويطور نفسه؛ لإن من ضمن مميزات الدبلومة الأمريكية إنها بتعلمه إزاي يبحث ويطور مهاراته، وبكده نتغلب على المشكلة دي.

كيفية الالتحاق بالجامعات لطلبة الدبلومة الأمريكية

الدبلومة الأمريكية بتمنح الطالب شهادة معادلة لشهادة الثانوية العامة زي ما ذكرنا، ومنها بيكون عنده القدرة إنه يلتحق بالكلية اللي حابب يكمل فيها حسب درجاته النهائية ودا من أهم مميزات الدبلومة الأمريكية.

عشان الطالب يقدر يلتحق بأي كلية حكومية أو خاصة في مصر لازم يكون اجتاز امتحان EST اللي بتكون مسئولة عنه وزارة التربية والتعليم المصرية فقط.

تقديم امتحان EST يعتبر من مميزات الدبلومة الأمريكية في مصر؛ لإنه بيكون معيار عادل لتحديد مستوى الطالب بعيدًا عن الامتحانات اللي مش بتقيس غير قدرة الطالب على الحفظ.

الامتحان ده بيأهل الطلبة لدخول الكليات المصرية فقط، لكن مش بيتم الاعتراف بيه دوليا، على عكس امتحان SAT و ACT.

وبالتالي لو الطالب حابب يكمل دراسة بره مصر لازم يقدم على امتحان SAT أو ACT عشان الجامعات الخارجية تعترف بالشهادة اللي معاه.

الخلاصة

نظام التعليم الأمريكي في مصر هي نظام شامل يبدأ من مرحلة الحضانة إلى مرحلة الثانوية العامة، وبتكون المناهج الموجودة فيه تابعة للنظام الأمريكي، ومختلفة تمامًا عن المناهج المتعارف عليها في مصر، والطالب اللي بيتخرج من النظام ده بيكون حاصل على دبلومة أمريكية.

من مميزات الدبلومة الأمريكية في مصر إنها بتمنح الطالب شهادة تعادل الثانوية العامة، وبتسمحله يقدم في جامعات عالمية بعد نجاحه في امتحان SAT، لكن الامتحان المعتمد في مصر هو امتحان EST، وهو بمثابة معيار بيوضح مدى استعداد الطالب لدخول الجامعة.

كمان الدبلومة الأمريكية دايما بتطوير مهارات الطالب وتطبيق التقنيات الحديثة في مجال التعليم عشان الطالب يقدر يواكب التغيرات اللي بتحصل حواليه.

وأخيراً، كل نظام تعليمي بيكون فيه مميزات وعيواب، ودورنا نتعرف كويس على أي نظام حابين نقدم للطالب فيه؛ عشان نتأكد إن فعلا هيكون مناسب لشخصيته وإمكانياته المتاحة، وإن العيوب الموجودة فيه مش هتكون عائق كبير قدام الطالب إنه يتفوق فيه ويكون له مستقبل ناجح.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق