عدد كبير من الطلبة في مصر بيكون هدفهم إنهم يكملوا دراستهم الجامعية في أمريكا؛ عشان يكتسبوا خبرات أكتر، ويتعرفوا على مناهج الجامعات الخارجية.
ومن أقصر الطرق اللي هتساعد الطلبة دي على تحقيق حلمهم هو التقديم على امتحان sat والنجاح فيه، لإن باجتياز الطالب للامتحان دا بيحصل على شهادة معتمدة بتثبت إنه مؤهل بشكل كافي للالتحاق بالجامعات الأمريكية.
والتقديم على امتحان السات بيتطلب سداد بعض الرسوم، ومن المتعارف عليه إن سعر امتحان sat في مصر بيكون مرتفع لإنه بيكون بالدولار.
وفي المقال دا هنتعرف أكتر على الامتحان، وأسباب ارتفاع سعره، وامتحان EST البديل المتاح حاليًا في مصر.
ما هو امتحان SAT؟
في نهاية مرحلة ما قبل التعليم الجامعي -المرحلة الثانوية- بيحصل الطالب على شهادة تؤهله للالتحاق بالكليات، فعلى سبيل المثال؛ بنلاقي إن الجامعات المصرية بتشترط الحصول على شهادة الثانوية العامة؛ عشان الطالب يقدر يلتحق بيها.
أما بالنسبة لعدد كبير من الجامعات في أمريكا، وكندا، وغيرهم بيكون مجموع الطالب في المرحلة الثانوية -الـ GPA- مابيكونش كافي لإثبات مدى استعداد الطالب للالتحاق بالجامعات، وبيعتمد على امتحان sat بالإضافة للمجموع الكلي للطالب.
وفي بعض الجامعات بيكون الحصول على امتحان sat حاجة اختيارية، ولكنه بيزود فرصة قبول الطالب في الجامعة، وكمان بتخليه يتعود على نظام الدراسة والامتحانات باللغة الإنجليزية.
وبالتالي نقدر نقول إن امتحان sat هو امتحان القبول في أغلب الجامعات الأمريكية والتركية، وعن طريقه بيقدر يدرس في الجامعات دي أو يحصل على منحة دراسية فيها.
وبيختلف سعر امتحان sat في مصر عن باقي الدول، لكن قبل ما نعرض سعره خلينا نقولك إن امتحان SAT الأمريكي متقسم لنوعين، وهما:
1- امتحان SAT 1
وهو عبارة عن اختبار عام -General test- بيقيس مدى تفوق الطالب في اللغة الإنجليزية والرياضيات، وبيعتمد بشكل كبير على طريقة التفكير الممنهجة، وسرعة البديهة، ودا الامتحان اللي بيكون مطلوب في الجامعات التركية، وبيتكون من 4 أقسام:
- الرياضيات – Maths
- القراءة – Reading
- الكتابة – Writing
- المقال – Essay
2- امتحان SAT 2
والامتحان دا بيكون متخصص أكتر -Subject test-، بمعنى إن الأقسام اللي بيمتحن فيها الطالب بتكون متعلقة بشكل كبير بالتخصص اللي حابب يكمل فيه دراسته الجامعية.
فالطالب اللي بيقدم على امتحان sat بيكون متاح له دخول الامتحان أكتر من مرة للتعويض، وبالتالي بيكون معاه فرصة كبيرة لتخطي الحد الأدنى للقبول في الجامعات الخارجية، والحصول على درجات مرتفعة.
وبالتالي التقديم على امتحان SAT واجتيازه بيعتبر فرصة كويسة للطلبة اللي خلصوا المرحلة الثانوية، وحابين يدرسوا في جامعات أجنبية.
كيفية التقديم على امتحان SAT
التقديم ودفع سعر امتحان sat في الدول العربية بيكون عن طريق الموقع الإلكتروني الخاص بمؤسسة College board المسئولة عن كل ما يخص الامتحان.
لكن قبل التسجيل لازم التأكد من ميعاد الامتحان المحدد؛ عشان الطالب يقدر يستعد له، ويُفضل إنه يقدم قبل الامتحان بمدة لا تقل عن شهر؛ لإن التأخير عن ميعاد التقديم بيتطلب دفع رسوم إضافية.
وبيكون التقديم من خلال خطوات وهي:
- عمل حساب شخصي على الموقع
- كتابة كل البيانات الشخصية المطلوبة
- التأكد إن كل المعلومات المكتوبة مظبوطة قبل ما يكمل
- حفظ الاسم وكلمة المرور عشان يعرف يدخل الموقع بيهم بعد كدا
- ضغط تأكيد عشان الحساب يتفعّل
- الضغط على كلمة SAT واختيار التسجيل
- كتابة اسم المستخدم (Username) وبتظهر صفحة التسجيل للامتحان
- تسجيل اسم المدرسة، وبلد الإقامة، والمجموع الكلي في كل مادة -GPA-، وغيرهم، وضغط المتابعة في كل مرة
- الموافقة على الشروط والأحكام
- اختيار ميعاد الامتحان بالظبط، والمكان اللي هيمتحن فيه، ودا بيكون حسب الرقم البريدي اللي سجله في البداية؛ لإن الموقع بيعرض أقرب الأماكن للطالب
- اختيار جزء المقال في امتحان sat 1 لو الطالب هيأديه، فوقت التسجيل بيحدد هل هياخد الجزء دا ويمتحنه ولا لأ
- تحميل صورة شخصية واضحة للطالب بدون ما يكون في أشخاص تانيين في الصورة
- دفع المصاريف عن طريق PayPal أو فيزا
وبعد السداد بيكون الطالب أنهى عملية التسجيل بنجاح.
اقرأ أيضًا: كيفية التدريب على امتحان السات | أهم 5 نصائح للتدريب.
أسباب زيادة سعر امتحان SAT
امتحان sat في مصر بيكون سعره مرتفع عن الامتحانات التقليدية، ومن أهم الأسباب اللي أدت إلى زيادة سعره هي إن الامتحان تابع لهيئة أمريكية College board، وبالتالي بيكون سعر امتحان SAT بالدولار، فالبعض بيعتبر إن قيمة الرسوم مرتفعة.
كمان امتحان SAT مختلف تمامًا عن الامتحانات التانية زي امتحان الثانوية العامة وغيره؛ لإنه بيأهل الطالب لدخول أكبر الجامعات الموجودة في أمريكا، وكندا، وغيرهم، من غير ما يضطر إنه يحصل على شهادات معادلة تانية، فمن الطبيعي يكون سعره في مصر مرتفع.
سعر امتحان SAT في مصر 2024
التقديم على امتحان SAT بيتطلب سداد بعض الرسوم وقت التسجيل على الموقع الإلكتروني، فبتكون رسوم تسجيل الاختبار 68 دولار؛ بالإضافة لـ 43 دولار رسوم إقليمية.
ودا بيتوقف على الموقع اللي هيمتحن عليه الطالب والمركز اللي بيديره.
والطلبة اللي بيقدموا على امتحان SAT في مصر بيمتحنوا داخل المدارس في أماكن مخصصة لإجراء الامتحان دا، وهنتعرف على تفاصيلها.
وفي حالة التسجيل المتأخر بيدفع الطالب رسوم زيادة 34 دولار، ولتغيير مركز الاختبار بيدفع 29 دولار.
ورسوم إلغاء التسجيل فبتكون 29 دولار ، وفي حالة رغبة الطالب لإلغاء التسجيل بعد الموعد النهائي للتغيير، يعني قبل يوم الاختبار بيدفع رسوم 39 دولار.
أما بالنسبة للنتيجة فبتكون تقارير الدرجات الأربعة الأولى مجانية لو طلبتها قبل تاريخ الاختبار، لكن بعد الوقت دا بيكون في رسوم تأخير حوالي 14 دولار.
ولو الطالب عمل استعجال للنتيجة بيدفع رسوم 31 دولار، وبيوفر الموقع خدمة إرسال النتيجة على رقم الهاتف برسوم 15 دولار.
اقرأ أيضًا: ما هو امتحان EST ؟ تعرف على أكثر من 10 معلومات هامة عنه.
أماكن اختبار SAT في مصر
بعد ما بيتسدد سعر امتحان sat في مصر، بيكون في لجان معينة في بعض المدارس لأداء الاختبارات؛ لإن مش كل المدارس بتكون متاحة لإجراء الامتحان دا.
ففي وقت التقديم على امتحان sat على موقع College board، بيكون مطلوب كتابة الرمز البريدي لمكان سكن الطالب، وبناءً عليه بيتعرض أقرب الأماكن المتاحة ليه عشان يمتحن هناك.
عيوب الإلغاء المتكرر لامتحان SAT
امتحان SAT في مصر فضل معتمد لفترة كبيرة، ولكن في الفترة الأخيرة حصل بعض المشاكل اللي أدت إلى إصدار قرار بإلغاء اعتماد امتحان SAT في مصر من سنة 2020.
ودا بسبب سهولة تسريب الامتحان، ودا اللي حصل لأكتر من مرة في مصر وبعض الدول التانية، وبالتالي من الأسباب اللي أدت لإلغاء الاعتماد هو تسريب امتحان SAT في مصر، فكان بيوصل تعليمات خارجية بتأجيل الامتحان لحين إشعار آخر.
وبسبب الإلغاد المتكرر لامتحان SAT اللي كان بيسبب توتر وضغط للطلاب، لإنه بيكون مستعد لدخوله في وقت معين وفجأة بيتأجل، وهنا بدأ يشتكي عدد كبير من أولياء الأمور من المشكلة دي، ودا أثر بالسلب على عدد المتقدمين للجامعات والحاصلين على امتحان الدبلومة الأمريكية.
وعشان المشكلة دي تنتهي، تم استبدال امتحان SAT بامتحان EST المصري، ودا امتحان بيشبه امتحان SAT إلى حد كبير في هيكله، لكنه بيكون تحت إشراف وزارة التربية والتعليم المصرية بدون أي تدخل خارجي، وبالتالي اتغلبوا مؤخرًا على المشاكل اللي كانت موجودة قبل كدا في نظام الـ SAT.
هل امتحان SAT وامتحان EST لطلبة الدبلومة الأمريكية فقط؟
التقديم على امتحان SAT مش بيكون له شروط معينة، وبالتالي أي طالب خلص مرحلة الثانوية وحابب يكمل دراسته في جامعة أمريكية يقدر يسدد سعر امتحان sat في مصر، ويقدم عليه.
لكن عشان الطالب يقدر يحقق درجات عالية في الامتحان لازم يكون مستواه كويس في اللغة الإنجليزية؛ لإن مفيش نسخة من الامتحان دا باللغة العربية.
وفي مايو 2022، أعلنت وزارة التربية والتعليم، إن امتحان EST هو المؤهل الوحيد لطلبة الدبلومة الأمريكية لتنسيق الجامعات المصرية، بعد تعليق امتحانات الـ SAT في مصر.
وهو تصميم وتنفيذ امتحان مصري إلكتروني خالص لقياس درجة تحصيل طلاب الدبلومة الأمريكية، فلو الطالب خريج أي تعليم أمريكي ثانوي وحابب يكمل دراسته الجامعية في مصر؛ فهيكون امتحان الـ EST إلزامي ليه يعادل بيه مجموعه، ولو هيكمل دراسة برا مصر فلازم يمتحن SAT.
وبالتالي أي طالب بيدرس في نظام مختلف عن النظام الأمريكي في مصر مش بيكون مضطر إنه يقدم على امتحان EST.
الفرق بين SAT و EST
امتحان SAT بيشبه اختبار EST بشكل كبير، لكن بيكون في شوية اختلافات بينهم، من أبرزها:
التأهيل لدخول الجامعات
من المتعارف عليه إن اجتياز امتحان SAT بيأهل الطالب لدخول أغلب الجامعات في أمريكا وغيرها، والشهادة اللي بيحصل عليها الطالب بعد الامتحان بيكون معترف بها دوليًا، ولكنها غير معترف بها حاليًا في مصر.
على الجانب الآخر بنلاقي امتحان EST بيمكن الطالب من دخول الجامعات المصرية فقط، لكن عشان يقدر يلتحق بالجامعات الخارجية بيحتاج إلى شهادة تانية.
ودا بيثبت إن خريج المدارس اللي مش بتتبع النظام الأمريكي في دراستها مش مضطر يقدم على امتحان EST.
الإشراف على الامتحان
امتحان SAT هو امتحان تابع في الأصل إلى نظام التعليم الأمريكي في مصر، وبالتالي بيكون في إشراف أمريكي على الامتحان، ودايمًا الامتحانات بيتم وضعها وتصحيحها خارج مصر.
أما بالنسبة لامتحان EST فهو خاص بمصر، بمعنى إن مسؤولية الإشراف على الامتحان دا بتخص وزارة التربية والتعليم المصرية فقط.
المصاريف المطلوبة للتقديم
سعر امتحان SAT في مصر بيختلف عن سعر امتحان EST؛ فبالنسبة لامتحان SAT هنلاقي إن المصاريف المطلوبة بتبدأ من 111 دولار ، وبتزيد في بعض الحالات زي ما وضحنا.
أما امتحان EST في مصر بيكون توثيق المحاولة الواحدة للتقديم للجامعات المصرية بـ 7600 جنيه لسنة 2024.
الخلاصة
امتحان SAT هو امتحان يؤهل الطلبة لدخول الجامعات الأمريكية، وبيتم تحت إشراف هيئة College board، ودي مؤسسة أمريكية غير ربحية مهتمة بالأنشطة الأكاديمية.
وبينقسم الامتحان لنوعين، SAT 1 ودا امتحان عام بيختبر مدى استيعاب الطالب وسرعة البديهة عنده، وامتحان 2 SAT ودا متخصص بشكل أكبر.
وتم إلغاء امتحان SAT في مصر أكتر من مرة، بسبب حدوث التسريبات المتكررة، وبناءً عليه أصدرت مصر قرار بإلغاء اعتماد SAT واستبداله بامتحان EST اللي بتشرف عليه وزارة التربية والتعليم المصرية.
وسعر امتحان sat في مصر في تزايد كل سنة، ووصل إلى حوالي 111 دولار أمريكي، وبيكون في رسوم إضافية بتتسدد وقت التقديم للامتحان على الموقع، وبيكون مخصص لطلبة الدبلومة الأمريكية اللي حابين يكملوا دراستهم الجامعية برا مصر.
أما امتحان الـ Est فوصل سعر المحاولة الواحدة لـ 7600 جنيه مصري في سنة 2024، ودا خاص لنفس الطلبة بس اللي هيكملوا دراستهم الجامعية في مصر.
رسوم إضافية بيتم سدادها وقت التقديم للامتحان على الموقع.
أما لو عندك أي استفسارات تانية ما تنساش تكتبها في Comment عشان نجاوبك عليها.
مريم
يوليو 22, 2021 at 1:26 صهل هناك فرصة لاجراء اختبار السات في مصر في 2021 أم لا
Ashraqat Mostafa
يوليو 22, 2021 at 1:32 مالسات امتحاناته موجودة عادي بس مش معترف بيه للقبول في الجامعات المصرية
Mohamed
ديسمبر 4, 2024 at 2:31 مهل يوجد اختبار سات فى مصر 2024.
واذا الطالب المصري امتحن فى السعودية وهو غير مقيم هناك بل اختبر خلال رحلة عمرة هل يمكن اعتماد نتيجة الاختبار للتعامل به فى الجامعات الاجنبية
أضف تعليق