5 خطوات لتعديل سلوك الطفل الجنسي

5 خطوات لتعديل سلوك الطفل الجنسي

الاستكشاف طبيعة فطرية للأطفال من سن صغير، وبنلاقي عندهم حب في التعرف على كل حاجة حواليهم حتى أجسامهم، وبيلاحظ الأهل ميول الطفل لاكتشاف جسمه وأعضاءه التناسلية من خلال اللمس أو النظر.

ووقتها مش بيحتاج الأهل لتعديل سلوك الطفل الجنسي، إلا إذا تحول لسلوك شاذ وغير مقبول. وعشان تعرف أكتر عن سلوك طفلك الجنسي، هنتكلم من خلال المقال عن مراحل التطور الجنسي عند الأطفال والسلوكيات الجنسية، وإزاي نقدر نعالجها. 

ما هي مراحل التطور الجنسي عند الأطفال؟

ما هي مراحل التطور الجنسي عند الأطفال

كبداية لازم تعرف إن الطفل بيمر بمراحل نفسية مختلفة، وبيكون عنده تطور جنسي بمرور سنوات عمره، ولازم تتقبل كولي أمر، وتفهم إزاي تتعامل معاه بشكل صحيح، وإزاي بيتم علاج السلوك الخاطئ.

ومن مراحل التطور الجنسي عند الطفل اللي هتتعامل معاها هي:

1- مرحلة النشاط الجنسي  أو “المرحلة القضيبية” 

بتبدأ من سن سنتين لـ 4 سنوات وتشمل الولاد والبنات، وهنا بيكون عند الطفل فضول وحب استكشاف طبيعي لأي شيء من أول لمس جسمه وأعضائه، وكمان يحاول يستكشف حد من أخواته أو أطفال زيه.

والطفل في السن دا معندوش المفاهيم الأساسية زي الكبار من عيب وغلط، وكل دا بيكون طبيعي، ومش قاصد يحرج نفسه أو يحرج أمه قُدام الناس.

وللأسف اللي بيحصل إن الطفل بيتم تعنيفه، وبيتفهم غلط من الناس اللي حواليه في الحضانة أو الأهل، ودا كله بيرجع لعدم المعرفة بوجود ميول جنسية طبيعية، وإزاي نقوم بتعديل سلوك الطفل الجنسي بدون إيذائه.

2- مرحلة الخمول الجنسي 

 سن ما قبل البلوغ من 6 سنوات لـ 9 سنوات، هنا بيكون الطفل قادر يتحكم في غرائزه بسبب المفاهيم الصحيحة اللي اتزرعت فيه من الأهل.

وممكن الاستفادة من المرحلة دي، لإنها مختلفة عند الأطفال من ناحية الإدراك والفهم، وبيكون عدى من مرحلة الفضول الجنسي تجاه نفسه أو غيره. 

ولو في المرحلة السابقة أكدت على تعديل سلوك الطفل الجنسي وأهمية معرفة هويته، فهنا بتبدأ تشرح للطفل كل ما يخص هويته الجنسية، وبعض المفاهيم والأسئلة اللي بتدور في باله.

وفي حالة البنت ممكن تبدأ الأم بتعريفها عن الدورة الشهرية وأهميتها، لإن الطفل في السن دا بيميل للمعرفة، فلازم الأم تنتقل معاه للمرحلة دي، وتشبع فضوله واستمتاعه بسماع المعلومات. 

3- مرحلة البلوغ 

بيختلف سن البلوغ من طفل للتاني، ولكن الراجح إنه بيكون في الفترة بين 14-12 عام، وبيعاني فيها البالغين من اضطرابات نفسية بترجع لعوامل داخلية متعلقة بالتغيير في النمو، وعوامل خارجية متعلقة بانجذابهم للجنس الآخر،

وبتختلف علامات البلوغ حسب الجنس؛ بالنسبة للفتيات بيحصل تغيير شكل الجسم وطفرة نمو، وبدء الدورة الشهرية، وظهور شعر في مناطق حساسة، لكن للولاد بيتمثل البلوغ عندهم بنمو الأعضاء الذكرية، وتغير الصوت، نمو الجسم، وعوامل أخرى تختلف من شخص لآخر. 

وبشكل عام، بيكون اتكون عند الجنسين المفاهيم والتصرفات المسموحة والمقبولة جنسيًا، وقادرين يفرقوا بين الصح والغلط. 

ما هي السلوكيات الجنسية الطبيعية عند الأطفال؟

أغلب السلوكيات الجنسية عند الأطفال بتكون طبيعية، واللي بتتراواح نسبتها بين 73:42%، ووقتها بيكون تعديل سلوك الطفل الجنسي سهل، ومن أمثلتها:

  • ميل الطفل أو الطفلة للمس أعضائه التناسلية لوحده أو في وجود الآخرين. 
  • محاولة حك الأعضاء التناسلية باستخدام يديه أو في الأشياء. 
  • الميل لاستكشاف غيره خاصةً الأطفال القريبين منه سناً. 
  • محاولة إظهار أعضاءه التناسلية لغيره من الأطفال. 
  • الرغبة في رؤية الآخرين في وقت تغيير الملابس.

ووقتها الأم لازم تتفهم أن حدوث السلوكيات دي طبيعي طالما بشكل عابر وعدد مرات قليل، بينما تكرارها بيكون علامة على حدوث شيء غير طبيعي، وبيلزم تعديل سلوك الطفل الجنسي، وفهم السبب وراءه.

ما هي السلوكيات الجنسية غير الطبيعية عند الأطفال؟

تواجد سلوكيات جنسية غير طبيعية عند الأطفال بتدل على وجود شهوة، وبتتطلب تدخل الوالدين عشان يتخلصوا منها، ومن أمثلتها:

  • يُكرر الطفل أي سلوك من السلوكيات السابق ذكرها لكن بشكل متكرر وملحوظ. 
  • يلعب مع أطفال آخرين ألعاب جنسية سرًا، خاصة بعد التنبيه.
  • يميل لإمساك عضوه التناسلي بقوة أو حكه بالأشياء بعنف.
  • يظهر أعضائه التناسلية للآخرين بشكل مستمر ومقصود.
  • يقلد أو يحاول ممارسة الجماع مع الألعاب أو الحيوانات.
  • يغضب بشدة لما تحاول توقفه أو تشتته عن الفعل.
  • يستخدم كلمات ومعلومات جنسية لا تُناسب سنه.
  • يجبر أطفال زيه على ممارسة نشاط جنسي معه.

وبتكون السلوكيات دي متكررة بشكل كبير، وفي محاولة الوالدين للتشتيت أو تعديل سلوك الطفل الجنسي بيرفض بشكل عنيف، ووقتها لازم اللجوء لمختص نفسي لعلاج المشكلة.

ما هي أسباب السلوكيات غير الطبيعية عند الأطفال؟

ما هي أسباب السلوكيات غير الطبيعية عند الأطفال

كتير من الأهالي مش بتكون عارفة سبب سلوكيات الطفل الجنسية، لكن في أسباب كتير، ومنها:

1- انعدام التوعية الجنسية

ودا مش مقصود بيه الإباحية أو الكلام عن شيء الطفل مش هيفهمه، ولكن المطلوب من الأهل التوعية وتعديل سلوك الطفل الجنسي اللي يناسب كل مرحلة.

وأثبتت دراسة معهد الصحة الأمريكي إن الأطفال من عمر 5 لـ 12 سنة بيعانوا من مشاكل في السلوك الجنسي، والتربية الجنسية بتساهم في تأخير ظهوره وبتكون عندهم إدراك ومسؤولية.

2- رد فعل الأهل عند ظهور السلوك الجنسي 

الطفل بيدور دايمًا على الاهتمام، وبيميل لتكرار السلوك اللي بيركز عليه الأهل، وعصبيتهم بتسبب معاودة نفس الفعل، عشان كدا التركيز الشديد على رفض السلوك الجنسي عند ظهوره، هيخلي الطفل يكرره تلقائي. 

3- تعرض الأطفال لمشاهد جنسية من وسائل الإعلام

في زمن التكنولوجيا، الطفل من سن صغير بيبدأ يهتم بالموبيل والتلفزيون والألعاب على الإنترنت، وفي غياب التوعية الجنسية في البيت والمدرسة بيستقبل الطفل مشاهد غير مناسبة لسنه، وخاصةً في مرحلة المراهقة، وممكن تثير فضوله ويدور عليها، ووقتها بيكون مهم تعديل سلوك الطفل الجنسي من بداية ظهوره.

 4- الأُسرة غير الآمنة

كتير من البيوت بيتعرض فيها الطفل للإيذاء البدني والجنسي من أحد أفراد الأسرة والأقارب، أو مشاهدة فعل جنسي غير مناسب من الأهل.

وتبعًا لدراسة مركز تقييم الأطفال لقوا إن 84% من حالات الإيذاء الجنسي للأطفال تحت سن 12 عام بتحصل في البيت وخاصة من شخص موثوق فيه.

ونتيجة للإهمال بنلاقي الأم والأب مش عارفين إيه اللي الطفل بيعاني منه، وبترتبط السلوكيات الجنسية عند الأطفال بشكل كبير بأساليب التربية غير الصحيحة،، بيحتاجوا بذل مجهود لتعديل سلوك الطفل الجنسي.

5- الظروف المحيطة المشجعة على السلوك الجنسي 

بعض الأسر بتكون منفتحة وعندهم تقبُل للتقارب والسلوكيات الجنسية، ودا بيؤثر بشكل قوي في سلوك الطفل، وعدم تعلمه للخصوصية. 

وكمان في حالة ولادة الأم طفل جديد وقلة الاهتمام به ومراقبة تصرفاته بشكل سليم بيسهل نمو السلوك الجنسي عنده، بالاخص إذا ملاحظش الأهل التغير دا وبدأوا في تعديله. 

6- التعرض للتحرش الجنسي

أحيانًا يتزايد النشاط الجنسي للطفل نتيجة تقليد غيره أو مجبر عليه، ومش بسبب غريزة حقيقية عنده، ومن أكتر أسباب ظهور السلوكيات الجنسية الشاذة للأطفال هو تعرضهم للاعتداء الجنسي بشكل ما.

 ولكن في نفس الوقت، فيه أطفال عندهم سلوكيات جنسية شاذة ومتعرضوش قبل كدا لتحرش جنسي أو للإيذاء الجسدي بأي شكل.

وممكن أي نقطة من دول تكون السبب في سلوك الطفل الجنسي غير الطبيعي، عشان كدا مهم وعي الأهل بالنشاط الطبيعي عنده ومراقبة سلوكه، والحرص على تعديل سلوك الطفل الجنسي.

اقرأ عن: 13 نصيحة لمعرفة كيفية حماية طفلك من التحرش الجنسي

ما هي طرق التربية الجنسية الصحيحة للأطفال؟

بعد ما وضحنا سلوكيات الطفل الجنسية، بيظهر سؤال مهم عند الأمهات، إيه هي التربية الجنسية وإزاي أوعي طفلي جنسياً؟ 

 ودا بشكل بسيط بيعتمد أولاً على التقبل ووعي الأم بوجود سلوكيات جنسية طبيعية عند الأطفال، والطريقة الصحيحة للتربية الجنسية هي التوعية الجنسية للطفل، وبتتمثل في: 

مرحلة النشاط الجنسي 

بداية من سن سنتين بيتكون عند الطفل مفهوم الفرق بين كونه ولد أو بنت، فبيكون مهمة الأم: 

1- تعزيز الهوية 

“البنت زي ماما، والولد زي بابا” وبالتالي التصرفات بتبقى مشابهة ليهم، عشان كدا لازم تتصرفوا قدامهم بالطريقة اللي عايزنهم يتعلموها،  ويتم تشجيعهم على السلوكيات الصحيحة.

 2- مبدأ الخصوصية 

وده بيتعلمه بالمواقف زي “نقفل باب الحمام شوية، نبعد الطفل في حالة تغيير الملابس في البيت أو التمارين، تعليم الطفل إن جسمه يخصه ومينفعش حد يشوفه وغيره من الأمثلة.

 3– التوعية ضد التحرش الجنسي

 بداية من سن 4 سنوات الطفل بيتعرض للمجتمع ويحتك بالناس، فلازم الأم تبدأ تدربه على الفرق بين السلوك السوي وغير  السوي زي الفرق بين اللمسة الكويسة واللمسة الوحشة.

و ما ينفعش حد يهزر بإنه ينزله البنطلون أو يلمس أعضاءه التناسلية،  ولا حد يحتك بجسمه في مناطق مُعينة، وغيرها من المواقف، فبيتكون عند الطفل إدراك الفرق بين الأمان والخطر، والصح والغلط. 

مرحلة الخمول الجنسي

 من سن 7 سنوات بيكون عنده أسئلة كتيرة وحب للمعرفة، دور الوالدين في المرحلة دي: 

  • شرح نمو الجسم بيولوجيًا زي: الدورة الشهرية، ونزول السوائل، وكل ما يخص التطور الجنسي. 
  • سماع الأسئلة، وإجابتها بوضوح وصراحة حسب عمر الطفل.
  • تعزيز الهوية الجنسية للبنت والولد.

وضروري مراقبة الأهل لسلوكيات أطفالهم بدون مضايقتهم، ولازم نسألهم بشكل مستمر عن أي حاجة مش مفهومة بالنسبة لهم، أو غريبة، فالثقة المتبادلة ومنع الحرج مهمين في الفترة دي عشان تمر بأمان.

مرحلة البلوغ الجنسي

بتبدأ غالبًا من سن 12 عام وبيدخل فيها مرحلة نمو عام للجسم، وبتكون اسئلته أكتر دقة واهتمام بالجنس، ومهمة الوالدين في الفترة دي بتتمثل فيه:

  • تعليمهم حدود جسمه بشكل أوضح عن الرغبات الجنسية اللي جددت لديه.
  • التواصل معاهم باستمرار، وبناء صداقة متينة عشان يثقوا فيك.
  • تثقيفهم جنسيًا من خلال الأب إذا كان ولد، أو الأم إذا كانت بنت.
  • تشجيعهم على ملء أوقات فراغهم بالأنشطة المختلفة.
  • تعليمهم حدود الاختلاط بالجنس الآخر. 

واحتواء الأهل لابنهم أو بنتهم في المرحلة دي مهم جدًا، لإن بيكون فيها حرج كبير وكسوف من تغيرات جسدية بتحصل.

كيفية التعامل مع سلوك الطفل الجنسي

في حالة ملاحظة الأهل لبعض السلوكيات الجنسية الشاذة للطفل، بيكونوا محتاجين يعرفوا إزاي يقوموا بتعديل سلوك الطفل الجنسي ووقف السلوكيات غير الطبيعية والسيطرة عليها، ومنها:

 1- عدم المبالغة في رد الفعل

المشكلة دايماً في استقبال التصرف بمبالغة شديدة، ودا بينتج عن عدم فهم إن دا طبيعي جداً يحصل، وبعض الأهالي بتقوم بتعنيف الطفل، واللي بيكون تصرف خاطئ منهم.

ومن الأفضل يحافظوا على هدوئهم، ويتصرفوا بحكمة، لإن العصبية هتشتت الطفل، ومش هتعمله إزاي يميز الصح من الغلط. 

2- عدم الاهتمام المبالغ فيه تجاه التصرف

الاهتمام المبالغ بالموضوع هيلفت انتباه الطفل، وهيخليه يميل لتكرار التصرف بسبب رد الفعل المبالغ، والأفضل تشتيته وتعديل سلوكه كإن الأمر مش مهم، وهو لوحده مش هيرجعله تاني.

3- سؤال الطفل والكلام معاه عن سبب التصرف

ونوعية الأسئلة في الموقف دا عشان يتم تعديل سلوك الطفل الجنسي بتكون:

  • ليه عملت كذا؟ حد عملك حاجة زي دي قبل كدا؟ 
  • هل بتحس بحاجة لما بتعمل كدا؟ 
  • هل في ألم أو الجزء دا بيوجعك؟
  • حد عمل كذا قدامك قبل كدا؟

لازم الأم والأب يفهموا سبب السلوك، وبعد فهمه بيوضحوا إن التصرف دا غير صحيح، وتكراره هيكون ليه عقاب تعليمي بدون تعنيف، زي حرمانه من حاجه بيحبها مثلًا.

4- تعليم الطفل العادات السليمة 

مهم تعليم الطفل العادات الصحيحة، وطريقة التصرف في حالة تعرضه لموقف فيه محاولة اعتداء عليه.

ولازم يتدرب على عدم القبول لأي تصرف فيه تعدي من شخص تجاهه أو طفل بالتعرض لأعضائه الحساسة سواء من الأهل أو أصحابه، والتوجه لمعلمته في المدرسة أو أنه يبلغ أمه بالتصرف.

5- التأكيد على مبدأ الخصوصية

النقطة دي بتشمل التفريق بين تصرفاته كولد أو تصرفاتها كبنت، وتوضيح السلوكيات اللي ينفع تتعمل والسلوكيات الغلط قُدام الناس.

كيفية علاج سلوك الطفل الجنسي  

بعد ما وضحنا التعامل الصحيح مع تعديل سلوك الطفل الجنسي، لازم يبدأ الأهل في علاج تصرفاته الجنسية، واللي بيبدأ بتحديد ولي الأمر للسلوك الطبيعي أو غير الطبيعي، عشان يعرف إزاي يتصرف مع طفله,

ففي الحالة الطبيعية ممكن يستخدم كل الأساليب اللي ذكرناها، ويركز على تعليم الطفل العادات الصح، أما في حالة تكرار السلوكيات بطريقة مش طبيعية فلازم نحدد الأول السبب، ونحط خطة تعديل سلوك.

وهنا ضروري إن ولي الأمر يقرأ كتير، ويكون عنده ثقافة عن كل الأمور اللي بيمر بيها الطفل، ومن الطرق اللي ممكن يستخدمها:

التشتيت

“الممنوع مرغوب”، لو ركزنا على الفعل هيتكرر، لكن ممكن نشتته عن الفعل بلعبة أو بالكلام عن حاجة تانية، ومنعملش رد فعل قوي أو عنيف، ومع مرور الوقت هيتعود على عدم لمس أعضائه أو أي تصرف ذكرناه يحتاج لتعديل سلوك الطفل الجنسي.

تعليم السلوك المناسب الطفل

الأم ملزمة بتعليم طفلها السلوك الصحيح ومعرفة حدود جسمه، ومفهوم اللمس الآمن لجسمه والمنطقة الحساسة، عشان يقدر يفرق بين الصح والغلط، وإزاي يرفض اللمس غير المريح من أي شخص. 

اقرأ أيضاً: مشكلات الأطفال السلوكية | تعرف على أسباب وعلاج أهم 6 مشكلات سلوكية.

تعليم رفض السلوكيات الجنسية 

أمهات كتير بتشتكي إن ابنها بيقلع بنطلونه قدام الناس، أو ميل الطفل للمس منطقة الثدي عندها، ودا بيسببلها إحراج، ووقتها التصرف الصح أنها  تستبدل السلوك غير المقبول بالسلوك الصحيح.

وفي حالة لأن تطبيق النقاط دي ما جبش نتيجة مع الطفل يبقى وقتها لازم نستعين بمتخصص خاصة إذا كان بيمر بمرحلة عدم تحديد الهوية الجنسية، أو حصله أي اعتداء جنسي قهري سبب له مشاكل مختلفة جنسيًا.

ووقتها بيقدر يعرفك كيفية التعامل مع طفلك بطريقة صحيحة، وكمان يقدر يساعده أنه يمر بالمرحلة دي بدون عواقب نفسية كبيرة.

الخلاصة

معرفتك بكل مرحلة من تغيرات النشاط الجنسي للطفل بتخليك قادر تستوعب بشكل كافي طريقة التعامل مع تعديل سلوك الطفل الجنسي، خاصة لما يمر بفترة نمو ونشاط جنسي متغير.

ومن المهم توعية الطفل الجنسية من سن صغير، واستيعاب الأمور النفسية والسيكولوجية اللي بيمر بيها، والتأكيد على هويته الجنسية وتمتعه بيها من غير ضرر ليه أو تعرضه لضرر من الآخرين.

وكمان خلق تواصل بينك وبين طفلك بيخليك قادر تستوعب أفكاره الشاذة في بعض الأوقات، ومعرفة السلوكيات غير الطبيعية جنسيًا، وعلاجها في وقت أسرع.

لإن دايمًا مراقبة طفلك وملاحظته وبداية علاجه في وقت مبكر سواء كان من خلال تثقيف نفسك، أو استشارة متخصص نفسي بتساعده يغير سلوكياته الغريبة لسلوكيات طبيعية، وييتحسن للأفضل. 

المصادر

Sexual Behaviors in Children: Evaluation and Management

Developmentally appropriate sexual behaviour in children

Sexual Behaviors in Young Children: What’s Normal, What’s Not?

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق