التحرش الجنسي للأطفال من المواضيع المهمة اللي بتشغل بال أولياء الأمور، واللي بتتجسد في أشكال وطرق مختلفة، وعشان تضمن سلامة طفلك لازم تقرأ كويس عن طرق الاعتداء الجسدي وطرق الوقاية منه، وتعرف مدى الأذى النفسي اللي بيتعرض ليه.
وفي المقال دا هنتعرف بالتفصيل عن كيفية حماية طفلك من التحرش الجنسي، وخطوات الوقاية والدعم النفسي ليه. فتابعونا.
تعريف التحرش الجنسي بالأطفال
التحرش الجنسي بالأطفال هو أي تصرف أو لمس أو اعتداء جنسي يتعرض له الطفل بدون موافقته أو فهمه الكامل للي بيحصل، وبيتمثل في استغلاله من خلال شخص أكبر منه في السن وأقوى من الناحية الجسدية أو الجنسية.
وبيشمل التحرش الجنسي بالأطفال مجموعة واسعة من السلوكيات غير الملموسة، زي التحرش اللفظي، والمساس بأجزاء الجسم بطريقة غير لائقة، والاستغلال الجنسي الإلكتروني من خلال وسائل التواصل الاجتماعي أو الإنترنت.
ووفقًا لإحصائية المركز الوطني للجرائم NCVC فالأطفال بيكونوا أكتر عرضة للتحرش الجنسي، وإن من كل 5 بنات بيعتدي على بنت واحدة، ومن بين 20 ولد بيتم الاعتداء على واحد منهم، وبيتراوح أعمارهم بين 7 : 13 سنة.
كيفية حماية طفلك من التحرش الجنسي
مسؤولية حماية الطفل من التحرش الجنسي بترجع لثقافة وتوعية الأهل، ومعرفتهم بطرق وقايته من الاعتداء الجسدي، وتوعية الطفل بالحفاظ على جسمه بصورة بسيطة وواضحة.
ومن هنا هنوضح بعض النصائح اللي يقدر ولي الأمر يتبعها في حماية طفله وهي:
1- ثقف نفسك وطفلك
عشان تقدر تتعامل مع التحرش الجنسي لازم تكون فاهم كويس أبعاده النفسية والصحية، وإيه هو الاستغلال الجنسي للأطفال، ومصطلحاته وليه ممكن يتعرض طفلك ليه.
وبعدا كدا تبدأ تتكلم مع طفلك أول ما تحس أنه قادر يستوعب الكلام، حتى لو عن طريق تجسيد الموضوع بطريقة تفاعلية بسيطة تناسب عمره.
2- وعي بحدود جسده
لازم طفلك يستوعب حدود جسمه وإزاي يستكشفه بطريقة صحيحة وبدون خجل، ومن غير حدوث أخطاء، وعلشان تقدر تفهمه أكتر الحدود دي هنوضحلك بعض التصرفات اللي لازم تعرف بيها كيفية حماية طفلك من التحرش الجنسي، وهي
تسمية أجزاء الجسم في وقت مبكر
يفضل أول ما يقدر الطفل يستوعب كلامك تبدأ تعرفه على جسمه واسم كل جزء فيه، واتكلم معاه إنه مش لازم يكتشف بنفسة وممكن يسألك أو يكلمك لو حابب يعرف أكتر.
تعريفه بالمناطق المحظورة في الجسم
عرف طفلك الأماكن الحساسة في جسمه والمختلفة عن باقي المناطق، واشرح دورها وخطورتها بطريقة بسيطة، وطبعًا عرفه إننا مش بنتكلم عن الأماكن دي مع أي حد تاني، واديلو فرصة السؤال عنها بدون خوف.
عدم لمس جسده والعكس
علم طفلك حدود جسمه، وأنه ممنوع حد يلمسه بأي شكل خاصة في أعضائه الشخصية، وممنوع هو كمان يخلي حد يقنعة بنفس الفعل مهما كان قريب منه أو يعرفه.
عدم تغيير ملابسه أمام أي شخص
لازم طفلك يتعلم خصوصية وكشف جسمه قدام الآخرين، ويستوعب إن مينفعش يقلع هدومة قدام حد غريب أو حتى قريب، ولا يدخل الحمام أو يستحمي مع حد تاني، واللي بيكون من الطرق الفعالة لكيفية حماية طفلك من التحرش الجنسي.
عدم تصوير الطفل عاري
تصوير طفلك بدون ملابس بيخليه يعتقد أن دا شيء عادي، ومش بياخد باله من إضرار تصوير حد ليه بالشكل دا، أو نشر صوره على الإنترنت بنفس الطريقة.
3- احمي طفلك من الشاشات
التحرش الجنسي مش بس بيكون جسدي لكن كمان ممكن يكون إلكتروني، ومع انتشار المواد الإباحية أثبتت الدراسات الحديثة انجذاب الطفل للمحتوى الجنسي بيبدأ من عمر 12 سنة، واللي بيعرضه للإيذاء والاستغلال الجنسي بدون وعي.
ودا بيخلي الثقافة الجنسية عنده معتمدة على معلومات خاطئة، وعشان تعرف كيفية حماية طفلك من التحرش الجنسي الإلكتروني لازم تحدد وقت لعبة على التليفون أو الشاشة، وتتكلم معاه بطريقة واضحة.
وكمان من ضمن المحتوى المهم مراقبة طفلك فيه هو نوع الكرتون اللي بيتفرج عليه، لإنه ممكن يحتوي على مشاهد بتشجع على الشذوذ أو ممارسات جنسية محدودة.
4- راقب طفلك
راقب طفلك وتصرفاته اليومية، وطريقة لعبة، وخليك عارف كل شئ عنه، ويفضل متسيبش الطفل مع حد سواء كان غريب أو بالأخص لو كان قريب لمدة طويلة بدون مراقبة، لأن أغلب الاعتداءات الجنسية بتيجي من شخص بتثق فيه العائلة.
5- عزز ثقة طفلك
من الطرق المهمة في كيفية حماية طفلك من التحرش الجنسي هي دعمه وتعزيز ثقته بنفسه، وتشجيعه على الهوايات اللي بيحبها، واتكلم عن مميزاته وقد إيه هو بيسمع الكلام وإنه طفل جميل، عشان ميلجأش أنه يسمع الكلام من شخص تاني ووقتها يعتدى عليه جنسيًا.
6- تواصل معه بدون قيود
شعور الطفل بالأمان ناحيتك بيحصل من خلال مواقفك الإيجابية معاه، ومن المهم إنك تبني رابط قوي يخليه قادر يتكلم معاك بحرية عن كل شيء حتى بالمواضيع اللي بيتكسف منها.
واوعي تبدأ كلامك معاه باللوم أو العتاب، لأن دا بيقلل من فرص لجوئه ليك لما بيحصله اعتداء جنسي، وحسسه إنه عادي يغلط لكن لازم يتعلم من غلطه، و أشكره على ثقته فيك، وابدأ فهمه الموضوع بدون عصبية وباحتواء.
7- علم طفلك الرفض والتصرف
من الطرق الفعالة في كيفية حماية طفلك من التحرش الجنسي، هي تعليمة ثقافة الرفض والاعتراض على أي تصرف غريب ممكن يتوجه لي من أي شخص يعرفة، أو حتى من شخص غريب.
وكمان علمه سرعة التصرف إذا حس بالخطر، وإزاي يدافع عن نفسه، زي أنه يجري أو يدفع الشخص بعيد عنه، أو حتى ينده بصوت عالى، واتفق معاه على إشارة معينة يقدر يستخدمها في وجود أي شخص يوصلك بيها إحساسه بعدم الأمان.
8- تعرف على أصدقائه
اتعرف على أصدقاء طفلك، وفهمه حدود التعامل معاهم، لأن أغلب بداية المشاكل الجنسية بتكون من خلال الأصدقاء وفضولهم في رؤية أعضائهم التناسلية.
وبتشير الدراسات أن 39% من المراهقين بيشاركوا صورهم بدون ملابس وبالذات المناطق الحساسة، واللي بيخلينا نعرف أهمية الحديث المستمر معاهم عن حدودهم وخصوصيتهم.
9- احذف كلمة سري
معظم المتحرشين جنسيًا بيبلغوا الأطفال بسرية الموضوع بينهم، وممكن يكون بيغريه بلعبة او حلويات، وبعضهم بيستخدم التهديد كسلاح يخوف بيه الطفل.
وعشان تعرف كيفية حماية طفلك من التحرش الجنسي لازم تحذف كلمة سري بينك وبينه، وتعرفة الفرق بين السر والحديث العادي في أي شئ يخصه بدون خوف منك أو من الشخص الآخر.
10- اتكلم معاه عن اللمسات
فيه بعض أنواع من اللمسات بتخلى الطفل ميقدرش يميز تعرضه للتحرش الجنسي بالذات أنها غير مؤذية له، عشان كدا مهم تعرفة إزاي يفرق بين اللمسات بغض النظر عن إحساسه الداخلي، ويفهم أن ممنوع حد يلمسه بالشكل دا، حتى لو من أخواته أو من العائلة عامه.
11- مارس لعب الأدوار
مارس مع طفلك دور المتحرش بأكتر من طريقة في صورة لعبة، عشان يستوعب اللي ممكن يحصل معاه من أي حد، وحدد اللمسات العادية واللمسات السيئة، عشان يحدد بنفسه إيه الغلط من الصح.
و معرفتك بكيفية حماية طفلك من التحرش الجنسي بالطرق التفاعلية التعليمية عن أشكال التحرش الجسدي اللي ممكن يتعرض ليها، بتخليه قادر يستوعب أكتر ويفهم امتى بيكون معرض للخطر.
12- شاهد معه رسوم متحركة عن الوقاية من التحرش
من الطرق الفعالة والسريعة لتعلم الطفل عن التحرش إنك توصل له المعلومة بصورة لطيفة وكرتونية تناسب عمره الصغير، وطبعًا يكون اختيار الكرتون من خلالك، وتكون مشرف على الموضوع.
13- استشر متخصص نفسي
لو معندكش خلفية كويسة عن كيفية حماية طفلك من التحرش الجنسي، خاصة لما يتعرض لاعتداء جسدي، ويكون بيمر بتغيرات جسدية غريبة ومش راضي يتكلم معاك.
فيفضل وقتها تستعين بمتخصص نفسي، عشان يقيم حالته ويعرف سبب سلوكه الغريب، وكمان يفيدك بطرق التعامل الصحيحة.
وإذا حابب تعرف أكتر عن التطور الجنسي وتعديل سلوك الطفل اقرأ مقال: 5 خطوات لتعديل سلوك الطفل الجنسي
علامات تحذيرية تخبر بأن طفلك يتعرض للتحرش الجنسي
معرفتك بكيفية حماية طفلك من التحرش الجنسي مربوط بأهمية معرفة العلامات اللي ممكن تظهر عليه وتحذرك من بداية وجود اعتداء جنسي بيتعرض ليه، ومنها:
- الشعور بالترجيع وعدم استقرار الأمعاء.
- فقدان الاهتمام بالأنشطة والأصدقاء.
- الانطواء ورغبته في الجلوس وحيدًا.
- التصرف بسرية وتخبئة التليفون.
- الخوف من أي تلامس جسدي.
- التعرق الشديد والمستمر.
- ألم في الأعضاء التناسلية.
- التبول المستمر واللا إرادي.
- ضربات قلبه سريعة.
وبعد معرفة الأعراض اللي بيمر بيها الطفل وبينتج عنها تغيرات جسدية بتساعد في حدوث أثر نفسي عميق عليه، لازم تتبع خطوات تساعد بيها طفلك أنه يعدي المرحلة الصعبة دي، ويكون أحسن نفسيًا وجسديًا.
هل ينسى الطفل التحرش؟
بعد معرفة كيفية حماية طفلك من التحرش الجنسي، مهم تعرف الآثار النفسية اللي بيسببها ليه، وإزاي تساعده على التخلص منها.
وبتظهر الدراسات إن 20% من البنات و 5-10% من الأولاد بعد البلوغ بيفتكروا حادثة الاعتداء الجنسي اللي حصلت وقت طفولتهم، وبتفضل مأثرة عليهم طول حياتهم.
وبالرغم من صعوبة الموضوع، لكن بيكون للأسرة دور في تخليص الطفل من أثر تجربة الاعتداء الجنسي، واللي بتتلخص في خطوات بتنفيذها الأهالى وهي:
- تواصل مع طفلك باستمرار، عشان يكون مرتاح للتعبير عن مشاعره بدون خوف.
- توفير الدعم العاطفي والنفسي بيخلي الطفل مستعد يتكلم عن اللي حصله.
- تجنِب استخدام أي مصطلحات تتعلق بالتحرش الجنسي والكلام قدامه.
- تواصل مع المدرسة لتقديم المساعدة والدعم الكافي ليه معاك.
- مشاركة اهتماماته وتوفير جو دافئ يحسسه بالأمان في البيت.
- تشجيعه الدائم على سرد الأحداث اليومية اللي بيمر بيها.
- توجه لمتخصص نفسي عند اللزوم.
الخلاصة
في النهاية، معرفتك بكيفية حماية طفلك من التحرش الجنسي متوقفة على تثقيفك لنفسك ولطفلك، والحدود اللي بتحطها ليه علشان يحمي جسمه من الاعتداء.
إلى جانب إنك لما بتصاحب طفلك وتقرب منه، بتقدر تلاحظ أعراض وعلامات التحرش، ومع اتباع الخطوات اللي ذكرناها هتقدر تبني ثقة بينك وبينه فإنه يتكلم معاك عن أي شئ بيؤذيه جسديًا، وكمان يتغلب على الأثر النفسي اللي بيحصله نتيجة التحرش الجنسي.
المصادر
The Right to Protection from All Forms of Sexual Exploitation and Sexual Abuse
Nudes are the New Norm: 5 Ways to Keep your Child Safe Online
Protecting children from sexual abuse
10 Ways to Protect your Child from Sexual Abuse and Exploitation Online
أضف تعليق