بيتساءل كتير من الطلبة والأهالي عن نصائح للتركيز في الامتحان؛ للحصول على أعلى الدرجات والنجاح، لإن الخطوة دي مهمة زي خطوة التحضير للامتحانات، وليها تأثير كبير في تحصيل الدرجات.
هنعرض لك من خلال المقال أهم النصائح لزيادة التركيز في الامتحانات، وطرق للتعامل مع القلق اللي بيأثر على تركيز الطالب وتحصيله النهائي، تابع معنا.
فترة التحضير للامتحانات
التحضير للامتحانات قبلها بفترة من أهم عوامل نجاح الطفل لاجتياز الامتحانات، دا غير إن المراجعة الجيدة للمواد، وتنظيم المذاكرة قبلها بفترة بيساهم بشكل كبير في تركيز الطفل في الامتحان، لإنه بيكون محضرله كويس، واتدرب على شكل الامتحان قبلها بفترة كفاية.
إليك أهم الاستراتيجيات اللي ممكن تتبعها مع طفلك:
- الابتعاد عن الحفظ، والتركيز على الفهم، لإنه بيثبت المعلومة اكتر.
- حل امتحانات السنين السابقة، والتركيز على الإجابات النموذجية لها.
- الاستفادة من الامتحانات التدريبية للمواد طوال فترة الدراسة.
- المذاكرة الدورية على كل درس من بداية الدراسة.
- مراجعة كل المواد قبل بداية الامتحانات.
- التحضير للامتحانات قبلها بوقت كافي.
- الاهتمام بالنوم الصحي وعدم السهر.
- تناول وجبات صحية.
وتقدر تعرف تفاصيل أكتر من خلال: أهم خطوات الاستعداد للاختبارات للأطفال.
أهم النصائح للتركيز في الامتحان
التركيز من العوامل المهمة لتحقيق النجاح والتفوق الدراسي، وبيحتاج الطلبة إنهم يكونوا في قمة تركيزهم يوم الامتحان، عشان يقدروا يستوعبوه بسرعة، يحلوه بشكل صحيح.
إليك أهم النصائح للتركيز في الامتحان:
الحصول على قسط كاف من النوم
احرص على نوم طفلك في ليلة الامتحان عدد ساعات كافية، لإن دا هيخليه يقوم نشيط ومركز، وفاكر المعلومات اللي ذاكرها.
وفقًا لدراسة نشرها موقع PubMed Central للبحث عن وجود علاقة بين سلوك النوم والأداء الأكاديمي للطلاب؛ وأثبتت الدراسة عدة نقاط، من أهمها إن 60% من الطلاب اللي ضحوا بعدد ساعات نومهم يوم الاختبار تركيزهم وأدائهم قل في الاختبار، على عكس الطلاب اللي ناموا عدد ساعات متواصلة في ليلة الامتحان.
ودا بيبين إن عدد ساعات النوم ونمطها إن كانت بشكل متواصل أو متقطع كان ليه تأثير كبير على أداء الطلاب في الاختبارات.
الوصول مبكرًا
الوصول للجنة الامتحان بدري من الأمور اللي بتقلل التوتر، وبتدي إحساس بالطمأنية، وبالتالي الطالب بيركز في الامتحان من أول الوقت، لإنه خد وقت راحة، وحضر كل اللي محتاجه عشان يبدأ يحل.
الثقة بالنفس
القلق من الامتحان من أكتر الأمور اللي بتؤثر على نتيجة ابنك في الامتحان، لإن القلق والتوتر بيشوشوا التركيز، وبيحسسوا بالنسيان، فعشان كدا ثقة الطفل بنفسه، ومجهوده بتخليه هادي ومركز.
ودا هيحصل لما يكون عمل اللي عليه وذاكر كويس، وراجع أهم مواضيع المادة، وحل أسئلة كتير، وسمع كلام تشجيع وتدعيم من أهله.
وفي دراسة اتنشرت في International Journal of Creative Research Thoughts عن العلاقة بين الثقة بالنفس للطالب والأداء الأكاديمي وجدوا إن كل ما كان الطالب واثق من نفسه كان أداءه الأكاديمي أفضل، وأقل عرضة لاضطرابات القلق في الامتحانات.
تصفية الذهن قبل الامتحان
طلاب كتير بيفضلوا يراجعوا لحد قبل دخول الامتحان، ودا بيسبب توتر وإرهاق عقلي ليهم، والأفضل تصفية الذهن، والبعد عن مراجعة المعلومات، والاسترخاء قبل الامتحان بنصف ساعة على الأقل؛ عشان يتوفر طاقة عقلية للامتحان الفعلي.
وأكدت دراسة على موقع Journal of School Counselling إن استخدام تقنيات الاسترخاء المختلفة أدت لخفض القلق من الاختبار عند الطلاب، وبالتالي دا أدى لتحسين التركيز والأداء أثناء الامتحان.
الاستماع لتعليمات اللجنة
مهم جدًا الانتباه للتوجيهات الخاصة بالامتحان، وتسليم الورق، وطريقة الإجابة؛ لإن بعض الأوقات بيكون في غلطة في السؤال، ونتيجة لتوتر الطالب مبياخدش باله من المعلومة.
وأوقات عدم الالتزام بالتعليمات لطريقة الإجابة، بيسبب إن الطالب يعمل حاجة غلط، ويضطر يغير الورقة، ودا بياخد وقت كبير منه، وممكن يسببله توتر، ويفقد تركيزه.
قراءة ورقة الامتحان أولًا
انصح طفلك بتمرير عينه على ورقة الأسئلة لتقدير وقت الإجابة، ومعرفة معظم الأسئلة، وفي حال وجود أسئلة لسه مراجعها دا بيطمنه وبيخليه مرتاح أكتر، أو في حاجة محتاجة توضيح، يقدر يسأل عنها معلم المادة عند مروره.
تخطي بعض الأسئلة
لو في سؤال تعثر على الطفل، ممكن يعديه، ويرجعله بعد ما يخلص باقي الأسئلة، لإن أوقات بيقدر يحل السؤال وبيتذكر المعلومة من خلال باقي الإجابات.
التنفس بعمق
في حالة التوتر الشديد أثناء أداء الامتحان، ينصح بأخذ نفس عميق من 4 – 5 مرات، وتحريك أصابع اليد أو القدم، وممكن كمان يفصل دقيقة من الامتحان، ويرجع يكمل تاني.
عدم الخوف من انتهاء الوقت
انصح طفلك بعدم الخوف في حال انتهاء وقت الامتحان، والأهم هو بذل الجهد في باقي الأسئلة اللي عارفها، والأفضل يراجع إجابات باقي الأسئلة اللي متأكد منها، ولو باقي أي وقت يجاوب أي تخمين عنده للأسئلة اللي مش عارفها، لإن ممكن تكون صح.
مراجعة الإجابات بتأني
معظم الأحيان بينبه المعلمين على الوقت المتبقي من الامتحان، وقرب انتهاءه، وعشان كدا يفضل الاسترخاء نص دقيقة، ومراجعة الإجابات بتركيز عشان ميرجعش ليها تاني، ويسلم الورقة.
اقرأ أيضًا: أسباب عدم التركيز في المذاكرة عند الأطفال وكيفية التغلب عليها
أهم الطرق للتعامل مع قلق الامتحانات
في حال طفلك كان بيعاني من التوتر والقلق من الامتحانات، ودا بيقلل من تركيزه في الامتحان، وبيقلل من درجاته، ومستواه الأكاديمي.
فبيكون هنا مهمتك هي توعية طفلك، ونصيحته باستراتيجيات لتقليل التوتر والقلق، ومنها:
- استبدال الأفكار السلبية بالإيجابية؛ يعني نحرص على إن الطفل يقول لنفسه هنجح، ويبعد تمامًا عن كلمات هفشل، ومش هعرف أحل، وهكذا.
- طلب المساعدة من استشاري في حالة وصول الطفل للذعر والقلق الشديد، أو الوصول للإغماء أو المرض.
- تعزيز مبدأ “الأخطاء هي فرص للتعلم”، يعني نفهم الطفل إن مفيش مشكلة نغلط في الإجابة، المهم نعرف الصح.
- التركيز على المواد اللي الطفل ضعيف فيها، عشان متكونش سبب ضغط عليه.
وأخيرًا، من الأمور المهمة لنجاح الطالب بالامتحان؛ هو الحفاظ على تركيزه وزيادته خلال الامتحان لتحقيق أفضل النتائج.
ومن أفضل النصائح للتركيز في الامتحان؛ هي الثقة بالنفس، والحصول على قسط كاف من النوم، والوصول المبكر للامتحان، وتصفية الذهن، وممارسة تقنيات الاسترخاء، وقراءة ورقة الامتحان أولًا، ومراجعة الإجابات قبل التسليم، لاجتياز الاختبارات بنجاح.
المصادر
14 Tips for Test Taking Success
أضف تعليق