كيفية التعامل مع الطفل الخجول في الروضة بشكل سليم في 6 طرق

كيفية التعامل مع الطفل الخجول في الروضة بشكل سليم

إيه هي كيفية التعامل مع الطفل الخجول في الروضة؟ 

واحدة من المشاكل اللي بتسبب قلق كبير عند الآباء هي إن طفلهم يكون عنده مشكلة في التواصل الاجتماعي بسبب خجله الزائد، ودا بيظهر مثلاً في التجمعات، أو المناسبات اللي بيكون فيها ناس جديدة، ويبدأ فيها الطفل في محاولة الهروب من الموقف بردود أفعال مختلفة، زي البكاء بصوت عالي، أو إخفاء رأسه في مامته، أو حتى إغماض عينه تمامًا.

المشكلة دي بتظهر عادةً في مرحلة ما قبل المدرسة، ومهم جدًا نكتشفها، ونعرف أسبابها، ونسعى لحلها في أسرع وقت، ودا اللي هنقدمه من خلال المقال، فتابع معنا.

9 أسباب للخجل عند الأطفال

9 أسباب للخجل عند الأطفال

بعد اكتشاف مشكلة الخجل محتاجين نرجع خطوتين ورا، وقبل ما نعرف كيفية التعامل مع الطفل الخجول في الروضة، مهم نتعرف على أسباب المشكلة الأول عشان نقدر نفهم تفاصيل أكتر تساعدنا على نجاح علاجها بعد كدا. ومن أهم الأسباب دي بنلاقي:

1- الجينات الوراثية

الجينات لها دور كبير في تشكيل شخصية الطفل، لأنها الوحدات البيولوجية الأساسية اللي بتنقل الخصائص من جيل للتاني، وبالتالي بتكون من أهم الأسباب اللي بتخلي الطفل يتولد بصفات معينة زي صفة الخجل الزائد.

ففي علم الوراثة أُثبت إن حوالي 20% من الناس عندهم ميل وراثي للخجل بشكل طبيعي، 

2- العزلة الاجتماعية

الأطفال اللي بيكبروا في بيئة منعزلة اجتماعيًا، وبيقل احتكاكهم، وتعاملهم مع العالم الخارجي بيظهر عندهم مشكلة في مهارات التواصل، والمهارات الاجتماعية، واللي بتسبب إحساسهم بالخجل لما بيتعاملوا مع ناس غير مألوفين بالنسبة لهم.

وبالإضافة لدا، الحماية الزايدة ليها دور كبير في إن الطفل يكون خجول، فأُثبت في دراسة بعنوان “سمات الأمومة التي تربط خجل الطفل بالتكيف النفسي الاجتماعي، والمدرسي في رياض الأطفال” اتعملت في جامعة كارلتون قسم علم النفس إن أسلوب الأبوّة والأمومة المفرط في الحماية ليه دور كبير في تكوين طفل خجول الشخصية.

3- السلوكيات المكتسبة

وجود شخص من الدائرة المقربة للطفل بيحمل صفة الخجل الاجتماعي هو سبب قوي جدًا إن الطفل يكتسب الصفة دي منهم، لأن الطفل في السنين الأولى من عمره بيعتمد على ملاحظة، وتقليد اللي حواليه، ودا بيأثر على سلوكه بعد كدا.

يمكنك أيضًا قراءة: صفات الطفل المستكشف

4- الانتقادات المستمرة

استمرار توجيه الانتقادات لتصرفات الطفل بيكوّن عنده خوف من أي تصرف غلط يصدر منه، وبالتالي دا بيقلل تفاعله مع اللي حواليه خوفًا من ارتكاب الأخطاء، ومع الوقت بيتحول للشعور بالخجل من أي معاملات اجتماعية.

كمان الانتقادات الزائدة بتقلل ثقته في نفسه، وبتثبت في عقله أنه مايقدرش يتصرف، أو يتواصل مع اللي حواليه بشكل سليم، أو أنه يكتسب قبول أو حب المقربين منه، وبالأخص والديه، على العكس هتلاقي إن الدعم، والتقبل مع التوجيه بطريقة لطيفة بيزودوا من ثقة الطفل بنفسه أكتر.

5- شخصية الطفل

بعض الشخصيات بتكون أكثر عرضة لاكتساب صفة الخجل، على سبيل المثال: الأطفال أصحاب الشخصية الحساسة بيتأثروا من أقل المواقف، والنوع دا بيكون أكتر عرضة إنه يمتلك صفة الخجل الاجتماعي عن غيره من الأطفال.

وبجانب دا، ذكر أحد الباحثين في دراسة اتنشرت في مجلة تنمية الطفل التابعة لجمعية الأبحاث في تنمية الطفل، إن نص الأطفال اللي بيحسوا بخجل زائد باستمرار أكثر عرضة للإصابة باضطراب القلق فيما بعد.

عشان كدا ضروري نلاحظ سمات الطفل من البداية، ونحاول نشتغل عليها، ونساعده يكتسب مهارات مختلفة للتغلب على الخجل.

6- علاقة الطفل بأسرته

سلوك الآباء اللي بيحتوي على حماية زائدة، ومبالغ فيها تجاه أطفالهم بينتج عنه شعور بالخوف عند الطفل، واللي بيتحول فيما بعد لشعور بالخجل، كمان عدم شعور الطفل بالأمان مع أسرته بيتسبب في وجود رهبة اجتماعية عنده.

7- الخوف من الفشل

وضع الطفل تحت ضغط يفوق قدراته، ومطالبته بتحقيق نتائج معينة بيزيد من خوفه بالفشل، ولو حاول، وجرب وفشل بالفعل، واتكرر وضعه تحت ضغط تاني، وفشل لكذا مرة هتتأكد عنده الصورة الذهنية بإنه غير جدير بالثقة، أو المسؤولية اللي بياخدها، وبالتالي يبدأ يتحول الخوف دا مع الوقت لخجل، وانعزال اجتماعي كنوع من أنواع ميكانزمات الهروب.

8- وجود سبب عضوي

وجود مشكلة عضوية عند الطفل، زي: ضعف السمع، أو مشكلة في التأخر اللغوي، أو طيف التوحد بيتطلب توجيه من الوالدين لمساعدة الطفل على إدراك المشكلة، والتعامل معاها سواء بالتقبل، والتأقلم، أو بطرق لحمايته.

لكن عدم وجود التوجيه دا ممكن يؤدي إلى تكوين مشاكل نفسية، واجتماعية عند الطفل زي مشكلة الخجل، ودي تعتبر من أهم الأسباب اللي لازم ناخدها في الاعتبار أثناء البحث عن كيفية التعامل مع الطفل الخجول في الروضة.

9- المرور بمواقف اجتماعية سيئة

لو الطفل بيمر بمواقف اجتماعية مؤذية زي مثلًا تجنبه من قِبل الأطفال، أو التنمر عليه، دا بيسبب عنده خوف، وتوتر كبير، ولو الأم، والأب ما أدركوش دا كويس جدًا، واتعاملوا معاه بطريقة صحية، هتتطور سمات شخصيته، وتتسم بالخجل، والخوف من التعرض لأي موقف اجتماعي، وكمان الهروب منه.

في دراسة بعنوان: “الأطفال الخجولون في الفصل الدراسي” وضح الباحثين القائمين عليها إن استبعاد الطفل من قِبل اللي حواليه، وإيذائه بيؤدي لتدني صورته قدام نفسه، وبالتالي التأثير على حالته النفسية في التعامل بكذا شكل، زي الخجل، والتعرّض للمشكلات النفسية المختلفة.

طرق فعالة لعلاج الخجل الزائد عند الأطفال

سلوك الخجل مش شرط يتعالج بنسبة 100% لكن ممكن نقلله، ونحد من آثاره السلبية، الخطوات التالية هتساعدنا على كيفية التعامل مع الطفل الخجول في الروضة وعلاج مشكلة الخجل بشكل سليم:

  • تقبّل الطفل، عشان تبني بينك وبينه جدار ثقة يقدر من خلاله يآمن بإنه مميز، وياخد خطوة التخلص من الخجل.
  • الاستعانة بمتخصص، لو صفة الخجل الزائد بقت بتأثر عليه بشكل كبير.
  • التشجيع على الإنجازات، مهما كان الإنجاز اللي الطفل بيعمله.
  • عدم دفع الطفل للقيام بأعمال تفوق قدراته، ومهاراته.
  • الابتعاد عن نقد الطفل باستمرار، وخاصة قدام أصحابه.
  • تشجيع الطفل على الحوار، والتحدث.
  • عدم مقارنته بالأطفال الآخرين.

لكن عشان نعالج الصفة دي بشكل كامل هنحتاج اتباع عدد من الوسائل والطرق.

6 طرق توضح كيفية التعامل مع الطفل الخجول في الروضة

كيفية التعامل مع الطفل الخجول في الروضة

دفع الطفل للمشاركة، والاندماج في دوائر اجتماعية مختلفة من أهم الطرق لتحسين مهارات التواصل عنده، دا غير العديد من الطرق الأخرى لكيفية التعامل معاه بشكل سليم عشان نتخلص من الصفة دي، ومن أبرزها:

الاشتراك للطفل في أنشطة اجتماعية

اشتراك الطفل الخجول في أنشطة مختلفة زي إنه يلعب رياضة معينة خاصة الرياضات الجماعية، أو يتعلم مهارة، أو هواية جديدة ويكون وسط مجموعة من الأطفال بيتشاركوا في نفس العمل هيساعد الطفل على التعبير بطرق مختلفة، وهيزود إحساسه بالأمان ناحية اللي حواليه، وبالتالي تتحسن مهارات التواصل عنده.

عدم تكرار كلمة “طفلي خجول” أمام العامة

في حالة تكرار إن طفلك خجول قدام أي شخص غريب وخاصة في وجود الطفل نفسه دا هيتسبب مع الوقت إن الصفة دي تثبت في ذهنه، وهيبدأ يصدقها، ويتأقلم معاها، ويقتنع بيها، وهيكون صعب يتخلص منها في المستقبل. 

عشان كدا ضروري تشجع طفلك الخجول إنه يتكلم ويعبر، وضروري كمان إنك تمدحه بشكل مستمر، لإن تشجيعك لطفلك يعد من أهم طرق كيفية التعامل مع الطفل الخجول في الروضة.

تهيئة الطفل لمواجهة الأماكن، والمواقف الاجتماعية الجديدة

الأماكن الجديدة، والمواقف غير المألوفة عند الطفل الخجول بتُمثل عبء كبير عليه، ولمواجهة المشكلة دي، حاول دايمًا تهيئ طفلك قبل أي موقف جديد بإنك تتكلم معاه عن اللي هيمر به، وتشرح له أكتر عن التفاصيل اللي هتكون موجودة.

يعني مثلاً: قبل أول يوم دراسي يُفضل إنك تزور معاه الحضانة، أو الروضة الجديدة ويشوف الفصل ويتعرف على المدرسين كتمهيد كافي للأجواء اللي هيمر بها.

التحدث مع الطفل عن مزايا الشخص الاجتماعي

من أهم نقاط كيفية التعامل مع الطفل الخجول في الروضة هو إننا نشاركه القصص المختلفة سواء الخاصة بك، أو القصص العامة اللي بتتكلم عن مميزات الشخص الاجتماعي، وشرح عيوب صفة الخجل بشكل مبسط، وإنها ممكن تكون سبب في ضياع فرص حياتية كتيرة عليه، دا هيشجعه أكتر إنه يكون شخص منفتح على الآخرين، ويقلل صفة الخجل الزائد عنده.

عدم المبالغة في ردود الفعل تجاه الطفل الخجول

التعامل بهدوء مع الطفل في اللحظات اللي بيواجه فيها خجل تجاه موقف معين ضروري جداً، لإن شعوره بالرهبة هيزيد لو حس إن كل اللي حواليه بيتعاملوا مع الموقف على إنه مشكلة كبيرة.

عشان كدا حاول تتعامل مع الموقف بشكل طبيعي بدون مبالغة، مع توجيه الطفل للتعبير عن مشاعره، والتعامل مع الموقف بشكل سليم، ودي بتعد نقطة مهمة لكيفية التعامل مع الطفل الخجول في الروضة

التواجد بجانب طفلك في الأماكن المزدحمة

الطفل بيستمد الأمان من والديه وخاصة الطفل اللي بيعاني من الخجل الزائد، فعدم وجود أحد والديه جنبه بيسبب توتر، وخوف كبير عنده.

بالتالي، في المراحل الأولى اللي بيتعود فيها طفلك على مجتمعات جديدة يفضل إنك تكون معاه ويلاحظ وجودك جنبه فيحس بالأمان، ويطمن وتزيد ثقته في إنه يندمج أكتر مع اللي حواليه، ودي كانت أهم الطرق لكيفية التعامل مع الطفل الخجول في الروضة.

تعرف أكثر على: مشكلات الأطفال السلوكية 

الخلاصة

نقدر نقول إن الإجابة على سؤال كيفية التعامل مع الطفل الخجول في الروضة بشكل سليم هي إنك تركز مع طفلك أكتر في المرحلة دي لكن بدون مبالغة، يعني زي ما ذكرنا تشجعه، وتزود ثقته في نفسه، وتحسسه إنك جنبه، وبتدعمه، مع مراعاة إنه طفل حساس بشكل زائد عن باقي الأطفال. 

إلى جانب أهمية تنمية مهاراته، وقدراته المختلفة وخاصة اللي بتدفعه إنه يخرج من دائرته المغلقة على نفسه، ويكون منفتح أكتر على المجتمع.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق