أهم سمات الطفل المستكشف وكيفية التعامل معه

أهم سمات الطفل المستكشف وكيفية التعامل معه

كتير من الأهالي بيعتبروا إن أول تعليم بيحصُل عليه طفلهم بيكون في الحضانة، من سن 3 سنوات وأكتر، لكن المعلومة دي مش صحيحة؛ طفلك من أول يوم لسن 3 سنوات بيستقبل الخبرات والمعرفة الأساسية لكل شيء.

وعشان كدا لازم تغيري نظرتك للطفل في الفترة دي، وتفهمي إن لمسُه لكل حاجة حواليه وحركته في كل مكان، دول بسبب روح الاستكشاف والفضول اللي جوه طفلك عشان يعرف كل حاجة.

ومن خلال المقال هنعرضلك أهم سمات الطفل المستكشف وكيفية التعامل معاه، وأهم النصائح لتشجيع الأطفال على الاستكشاف.

ما أهم سمات الطفل المستكشف؟

ما هي أهم سمات الطفل المستكشفخلينا نقولك هنا إن الخلايا العصبية عند الطفل في عمر سنتين تُشبه بشكل كبير الخلايا العصبية لشخص عنده 40 سنة، ودا لإن الخلايا دي عند الطفل بتكبر وبتتعقد نتيجة لكل الخبرات اللي بيستقبلها عن طريق التفاعل مع رد الفعل من أمه أو أي شخص تاني أو المكان اللي بينام فيه.

ده غير إن قوة الملاحظة عند الطفل في السن دا ضعف قوتها عند الشخص البالغ، وقوة حواسه 10 أضعاف قوتنا، وخاصةً الشم واللمس، وبكدا تقدري تعرفي إن سبب لمس طفلك لأي حاجة حواليه بيكون بدافع الاستكشاف وتكوين المعرفة.

وبالتالي دورك في السن دا مهم جداً، لإن عقل الطفل وقتها بيسمى “العقل الماص”، أهم حاجة عنده تخزين الخبرات، وبالتالي لازم تحاولي قدر المستطاع تعززي الاستكشاف عنده، وتساعديه، وتوفري بيئة إيجابية تساعده.

مساعدة طفلك على الاستكشاف والمعرفة بتؤثر عليه في تعليم الحساب، وتطوير اللغة، وحتى صفاته الشخصية، ومن أهم السمات اللي بتميز الطفل المستكشف بنلاقي:

1- الحيلة

يتسم الطفل المستكشف بالقدرة على حل المشكلات، والتفكير في حلول مختلفة وغريبة، دا غير إنه بيكون عنده القدرة على استخدام الموارد المتاحة لخلق حل لأي مشكلة أو عائق.

دا بيكون ناتج من فضوله واستكشافه لكل حاجة حواليه طول الوقت، وبالتالي بيكون إدراكه للأمور مختلف وأسرع.

2- مهارات التفكير الناقد

من أكتر السمات اللي هتلاحظي وجودها في الطفل المستكشف هي القدرة على تقييم المعلومات، وترتيب الأمور حسب الأولويات، واستخدام الحُكم المعقول لحل المشكلات، لإنه بيبني الحكم على أساس معطيات موجودة في عقله.

3- زيادة احترام الذات

بيزداد شعور الطفل المستكشف عن غيره من الأطفال باحترامه لذاته، وإحساسه بقيمته، ودا بيكون نتيجة لانبهار الآخرين برد فعله أو طريقة كلامه، وذكائه، وبالتالي بيحس بتقدير لنفسه.

4- زيادة الثقة بالنفس

الطفل المستكشف بطبعه جريء وبيجرب كتير، يقدر يتحدى ويجرب حاجات مختلفة، ودا بيزود عنده الشجاعة، وبالتالي بيعزز ثقته بنفسه.

5- النمو المعرفي من سن صغير

ومن أكتر السمات اللي بتميز الطفل المستكشف هي زيادة النمو المعرفي، فبتحسي إن عقله سابق سنه، وعنده مهارات مختلفة، زي:

  • العد.
  • استخدام مفردات جديدة.
  • سرعة الملاحظة وتحديد التغيير في أي مكان حتى لو بسيط.
  • احتفاظه بالمعلومات بشكل ملحوظ.

6- استخدام حواسه بقوة

الطفل في الطفولة المبكرة بيعتمد على حواسه بشكل كبير، عشان يعرف يتواصل مع العالم، ويخزن معلومات، وبتكون المرحلة العمرية من سنة لـ 3 سنوات مرحلة استكشافية للطفل تقدري تسميه فيها “المستكشف الصغير”.

هنا الطفل بيعتمد على حاسة اللمس بشكل كبير عشان يتعرف على كل حاجة، لإنه ما يملكش أي معرفة عن أي شيء، فبتلاقي كل حاجة عاوز يمسكها، وبيتعرف عليها عن طريق الفم، وكمان عنده القدرة على الشم والتمييز بين الروائح المختلفة.

الفضول والاستكشاف موجودين في الطفل بطبيعته، لكن دورك تعززي روح الفضول عنده، وتستفيدي من إيجابيات الاستكشاف في كل المراحل العمرية من سن صغير، وتعرفه على الأشياء بحواسه، وتعرضه للعالم، وحتى لما يكبر ويكون عنده فضول ناحية كل حاجة ويسأل كتير، بيكون دورك تساعديه على الإجابة عن الأسئلة، وتوفريله سبل المعرفة وتكوين الخبرات.

كيف تتعاملين مع الطفل المستكشف؟

نصائح لتشجيع الاطفال على الاستكشافتقدري تساعدي طفلك على الاستكشاف في سن صغير بتهيئة مكان آمن، وممارسة بعض الأنشطة معاه للتعلُم، واتباع الخطوات دي:

  • عقمي الأرضيات والأسطح عشان يكون البيت آمن لتواجد طفلك ولمسه.
  • خصصي دُرج واحد منخفض في المطبخ للعب طفلك بحاجات آمنة زي: أدوات مطبخ بلاستيكية، ألعاب وهكذا.
  • احرصي على تجربة طفلك لأشياء جديدة، زي ملء طبق بالماء ووضع بعض الألعاب بيه.
  • خلي طفلك يلمس الخضروات والفاكهة ويشمها ويلمسها، وكوني على علم إن مص الأشياء حاجة مهمة لتطور طفلك اللغوي.
  • امسكي المرآة وخليه يشوف نفسه، ويحفظ شكله، والمسي شعره وأنفه، لتعليمه أجزاء وجهه.
  • وفري له ألعاب مختلفة كل فترة؛ ألعاب بلاستيكية، وعرائس قطنية محشوة، وألعاب متحركة، وألعاب صوتية، ومكعبات.
  • عرضي طفلك لأصوات وألوان مختلفة من خلال الخروج والتفاعل مع البيئة المحيطة.
  • اهتمي بحركة الطفل، واستخدمي كرة للعب معاه عشان يتحرك، ويلتقط الكرة، ولما يكون عنده قدرة على المشي يقدر يركل الكرة,
  • وفري لطفلك صلصال آمن للعب.
  • اعرضي عليه صور كرتونية للحيوانات، وعرفيه اسمها، أو فيديو يكون فيه الحيوان وصوته عشان يفرق بين الحيوانات.
  • ابحثي معاه عن إجابة الأسئلة اللي بتدور في عقله، عن طريق الكتب أو البرامج التعليمية.
  • وفريله أدوات للرسم أو الكتابة أو أي هواية بيحبها.
  • ساعديه يمارس رياضة، لإنها هتساعده بشكل كبير يخرج الطاقة اللي جواه.
  • وفري وقت يومياً للنقاش معاه في أي أمر حابب إنه يعرف عنه أكتر.
  • اسمحي لطفلك بالخطأ، لإنه مش هيتعلم إلا لما يجرب بنفسه.
  • شجعيه على ألعاب التمثيل والتقمص، لإنها بتنمي الخيال عند طفلك، وبتوسع إدراكه لمشاعر مختلفة.
  • خليه يكتشف الطبيعة عن طريق الرحلات، أو النظر للسماء عن طريق تليسكوب.
  • امنحيه فرصة للطبخ، وإعداد أي طبق بسيط.
  • احرصي دايماً على البحث عن أجوبة لأسئلته، وفي حالة سأل سؤال غير تقليدي، اتناقشي معاه واعملوا عصف ذهني لحد ما توصلوا لإجابة.

وخليكي على علم إن تجهيز البيت لوجود طفلك وحركته من غير قيود من أكتر الأمور اللي هتساعده في الاستكشاف والمعرفة، فاحرصي على الأمور المذكورة واستخدمي كل الموارد، وحوليها لطرق مختلفة لتعليم طفلك شيء جديد، عشان يكبر ويتسم بصفات الطفل المستكشف الذكي.

وأهم شيء في المرحلة دي، إنك تعلمي طفلك الموازنة في الأمور، إنه يسأل عن كل حاجة ويعرفها، لكن من غير ما يسأل أسئلة تحرج الآخرين، أو يتدخل في كلام الكبار.

وأخيراً، الطفل المستكشف بتحركوا قوتين أساسيتين هما ” الفضول والاستكشاف”، ودا طبيعي عشان يتطور، وينمو، ويكون حصيلته المعرفية, مهمتك الأساسية هنا إنك توفري له بيئة آمنة للاستكشاف والحركة، وتساعديه بكل الموارد المتاحة، عشان يعرف أكتر، ويتعلم أسرع.

يمكنك أيضًا قراءة: تعديل سلوك الطفل كثير الحركة | 11 نصيحة فعالة لتعديل سلوك الطفل كثير الحركة

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية

إقرأ أكثر..

  • No comments yet.
  • Add a comment