كل أب وأم هدفهم الأول حماية ولادهم، بس في حاجات بنخاف نتكلم فيها أو حتى نتخيلها، زي “التحرش الجنسي بالأطفال”. للأسف، بقى موجود حوالينا وبيحصل في أماكن المفروض تكون آمنة زي المدارس، النادي، وحتى بين الأهل والمعارف.
علشان كدا مهم نعرف علامات تعرض الطفل للتحرش الجنسي، لإن أغلب الأطفال مش بيعرفوا يعبروا أو يطلبوا المساعدة.
في المقال دا هنتكلم عن أهم العلامات اللي تدل على الاعتداء الجنسي بالطفل، وإزاي نتصرف لو شكينا، ونعمل إيه علشان نحمي ولادنا من أي أذى نفسي أو جسدي.
يعني إيه اعتداء جنسي بالأطفال؟
الاعتداء الجنسي بالأطفال مشكلة كبيرة ومنتشرة في كل حتة في العالم، مش بتفرق بين غني وفقير، ولا بلد متقدمة أو نامية، ولا حتى نوع أو ديانة. كل أنواع التحرش أو الاعتداء الجنسي على الأطفال تعتبر جريمة في القانون، وكمان انتهاك واضح وصريح لحقوق الطفل.
واللي بيحصل في الحالات دي مش بس بيأذي الطفل، دا كمان بيسيب أثر نفسي كبير على الأسرة والمجتمع كله.
والاعتداء الجنسي على الأطفال ممكن يكون أي تصرف جنسي بيحصل ما بين شخص بالغ وطفل، أو حتى بين طفلين، بس واحد فيهم بيكون ليه سلطة أو سيطرة على التاني. يعني سواء بالإجبار، أو التهديد، أو حتى بالإقناع، فدا يعتبر اعتداء جنسي.
كل دا بيتسبب في ظهور علامات تعرض الطفل للتحرش الجنسي على المستوى النفسي والجسدي.
ومهم نعرف إن التحرش الجنسي بالأطفال مش شرط يكون عبارة عن لمس واضح أو فعل جسدي مباشر، لأ دا ممكن يكون بالكلام أو بالتصرفات أو حتى بالمشاعر. في أنواع كتير من الاعتداءات الجنسية ممكن يتعرض لها الطفل، وعلشان كدا لازم كل أب وأم يبقوا عارفين علامات تعرض الطفل للتحرش الجنسي، حتى لو التحرش دا كان من النوع اللي مش واضح.
ومن التصرفات اللي بتندرج تحت الاعتداء أو التحرش الجنسي:
- فعل جنسي، سواء فيه اختراق أو لأ، ما بين طفل وشخص بالغ أو حتى طفل أكبر منه.
- لمس جسم الطفل بطريقة مش محترمة، سواء كان لابس أو من غير هدوم.
- تصوير الطفل في أوضاع غير لائقة أو مشاركة الصور دي مع ناس تانية.
- طلب تصرفات جنسية من الطفل قدام الكاميرا أو تسجيل فيديو له.
- حيازة أو نشر صور أو فيديوهات تخص اعتداء جنسي على الأطفال.
- عمل أفعال جنسية قدام الطفل أو عرض محتوى إباحي.
- إجبار الطفل يتعرى أو يمارس العادة السرية.
وأخطرهم هو الاستدراج، يعني المعتدي يبدأ يقرب من الطفل أو من أهله أو من المدرسين علشان يبني ثقة وياخد فرصة يتقرب من الطفل. ممكن كمان يستخدم الإنترنت أو السوشيال ميديا علشان يوصل له، ودا بيخلي الموضوع أصعب في الكشف عنه، لأنه بيبدأ بتصرفات شكلها طبيعي جدًا.
كل التصرفات دي بتدق جرس الإنذار عند الأهل، وتخليهم ياخدوا بالهم كويس من علامات تعرض الطفل للتحرش الجنسي.
إزاي نعرف إن الطفل اتعرض للتحرش الجنسي؟
مش دايمًا الطفل اللي بيتعرض لـ الاعتداء الجنسي بيقدر يحكي أو يوضح اللي حصل معاه، وفيه أسباب كتير ممكن تخليه يسكت، زي الخوف، أو الإحراج، أو حتى إنه مش فاهم اللي حصل.
علشان كدا، مهم جدًا إننا نكون وِاخدين بالنا من علامات تعرض الطفل للتحرش الجنسي، لأنها ساعات بتظهر من خلال تصرفاته أو حالته النفسية والجسدية.
والعلامات دي بتختلف من طفل للتاني، حسب سنه، وطبيعة الاعتداء، وهل حصل مرة ولا أكتر، وكمان مين الشخص اللي عمل كدا. فيه أطفال ممكن تلاحظ عليهم تغيّرات كبيرة، وفيه أطفال تانيين ممكن ميبانش عليهم أي حاجة خالص.
اللي لازم نعرفه كويس، إن تجربة التحرش الجنسي بالأطفال بتأثر بشكل كبير على نفسية الطفل، وبتخلي نظرته لنفسه وللعالم حواليه تتشوّه. ممكن الطفل يبدأ يحس بعدم أمان، أو يفقد الثقة في الناس، أو حتى يبقى عنده مشاعر خوف وخيانة. وطبعًا شخصيته وسلوكه بيتغيروا عن زمان، ودا بيكون مؤشر محتاج متابعة سريعة واحتواء.
إيه هي علامات تعرض الطفل للتحرش الجنسي؟
لما الطفل بيتعرض لتحرش جنسي، دا مش بيعدي من غير أثر، وبيختلف تأثيره من طفل للتاني حسب عمره، ووقت الاعتداء، وطول مدته، وكمان طريقة تعامل الكبار اللي حواليه بعد الحادث.
لكن عمومًا بيظهر على الطفل شوية أعراض نفسية وسلوكية وطبية ممكن تبقى بسيطة في الأول، أو قوية وتأثر عليه مدى الحياة ودي بعض الأعراض طبقاً لدراسة اتنشرت على موقع NIH:
أولًا: علامات نفسية
واحدة من أهم علامات تعرض الطفل للتحرش الجنسي هي العلامات النفسية واللي بتظهر فجأة على الطفل وبتخليه حزين ومايل للوحدة أكتر، ومن أهمها:
الهدوء أو الانطواء أكتر من المعتاد
الطفل ممكن يبقى ساكت كتير مش بيتكلم أو مش بيشارك في أي حاجة زي ما كان قبل كدا.
التعلّق الزايد بالأهل
تلاقيه مش عايز يسيب مامته أو باباه، حتى في المواقف العادية، وبيكون عاوز يبقى قريب منهم دايمًا.
خوف جديد أو غريب
زي إنه يخاف من حد معين، أو يرفض يروح مكان معين، أو فجأة يبقى بيخاف من اللمس.
تشتّت وضعف تركيز
يبان عليه إنه مش مركز، ناسي حاجات بسيطة، أو مش منتبه للي حواليه.
انسحاب واكتئاب
يبدأ يبعد عن أصحابه أو عيلته، أو تحس إنه حزين على طول ومش مبسوط.
تشوه نظرة الطفل لنفسه وللعالم
الطفل ممكن يحس إن الأرض مش ثابتة تحت رجليه، يفقد الثقة في الناس، ويحس بالخوف والخيانة حتى من أقرب الناس ليه.
مشاكل في العلاقات والثقة بالغير
طريقة الجاني في “التدليل” وبناء الثقة (الـ Grooming) ممكن تخلي الطفل عقله مشوش في علاقاته بعد كدا، ويتلعثم في الكلام أو يبقى معزول عشان ميعرفش يثق حد.
اضطرابات نفسية طويلة وقصيرة المدى
من اكتئاب وقلق لصدمة نفسية (PTSD)، وبعض الأطفال بيظهر عليهم أعراض زي الأرق أو الكوابيس أو نوبات صرع نفسي.
ثانيًا: علامات جسدية
تعتبر التغيرات الجسدية من أسهل علامات تعرض الطفل للتحرش الجنسي اللي تقدر تلاحظها وبتوضحلك إن في شيء مش طبيعي، وهي:
تغيرات في النوم أو الأكل أو النظافة الشخصية
يبدأ يرفض الأكل، أو ينام كتير أو قليل، أو يبطل يهتم بنظافته.
مشاكل جسدية غامضة
زي صداع مستمر، أو وجع في البطن من غير سبب واضح.
السلوكيات الطفولية
زي التبول أو التبرز اللاإرادي بعد ما كان اتعلم الحمام، أو يطلب يتعامل كأنه طفل صغير.
إيذاء النفس
ممكن تلاحظ عليه جروح أو علامات قطع، أو يتصرف تصرفات خطيرة على نفسه.
ثالثًا: علامات سلوكية
طبيعي الطفل سلوكه يتغير كل ما يكبر، لكن علامات تعرض الطفل للتحرش الجنسي السلوكية بتكون ظاهرة وملهاش علاقة بعمره أو ميوله، بالعكس بتكون طفرة على طفلك سواء في تغير الألفاظ أو سلوكه مع اللي حواليه، ومنها:
معرفة كلام عن الجنس مش مناسب لعمره
زي إنه يتكلم عن حاجات جنسية مش طبيعي يعرفها في سنه، أو يرسم حاجات مش مفهومة.
سلوكيات جنسية واضحة في اللعب
زي إنه يمثل مشاهد مش مناسبة، أو يكرر قصص فيها مواضيع جنسية.
سلوك عدواني أو هروبي
ممكن يبقى عنيف أو يكسر حاجات، أو يهرب من المدرسة أو يرفض يروحها.
مشاكل مع الصحاب أو الدراسة
تلاحظ إن مستواه نزل، أو مبقاش بيحب يروح المدرسة، أو بيزعّل صحابه بسرعة.
جُمل غريبة أو غامضة
زي لما يقول: “في سر بيني وبين حد” أو “لعبنا لعبة الكبار” من غير ما يشرح، ودا لازم يخلينا نقلق.
سلوك إيذاء النفس وأفكار انتحارية
خاصة لو استخدم المعتدي القوة أو التهديد بتزيد احتمالية تعرض الطفل لأفكار أو محاولات انتحار وقطع للنفس.
اضطرابات جنسية وسلوكية
بعض الأطفال أو المراهقين اللي نجوا من الاعتداء الجنسي بيلاقوا صعوبة بعدين في العلاقات الحميمية أو بيكون عندهم خوف أو انعدامات رغبة.
لو لاحظت علامات تعرض الطفل للتحرش الجنسي، فمهم جدًا تستشير مختص نفسي في أسرع وقت علشان تحصلوا على الدعم والعلاج المناسب.
كيفية التعامل مع الطفل المُعرض للإعتداء الجنسي
التعامل مع الطفل اللي اتعرض للاعتداء الجنسي محتاج وعي ودعم حقيقي. تصديق الطفل وتقديم الدعم المناسب في الوقت الصح بيقلل بشكل كبير من آثار الصدمة النفسية اللي ممكن تستمر معاه لسنين.
في أوقات كتير، بتبدأ رحلة التعافي من اللحظة اللي بننتبه فيها لعلامات تعرض الطفل للتحرش الجنسي. العلامات دي ممكن تكون نفسية أو سلوكية، ولازم ناخدها بجدية، لأنها بتكون صرخة غير مباشرة للمساعدة.
ولما الطفل يقرر يتكلم عن تجربته، رد فعل الكبار بيكون فارق جدًا. لو ما تمش تصديقه أو ما حصلش على الدعم الكافي، الصدمة ممكن تتضاعف، وتؤثر على نفسيته وسلوكياته بشكل واضح مع الوقت. لكن في المقابل لو حسّ إن اللي حواليه مصدقينه وواقفين جنبه، دا بيديله الأمان اللي يحتاجه علشان يبدأ يتعافى ويسترد ثقته بنفسه وباللي حواليه.
اتعرف على: 5 خطوات لتعديل سلوك الطفل الجنسي.
مين اللي ممكن يرتكب الاعتداء الجنسي على الأطفال؟
مش دايمًا المعتدي الجنسي على الأطفال بيكون شخص غريب، بالعكس، كتير من الحالات بيكون الفاعل شخص معروف للطفل، ودا اللي بيخلي الموضوع أصعب في الاكتشاف. المعتدي ممكن يكون راجل كبير، مراهق، أو حتى طفل تاني.
ووفقًا لبيانات من منظمة UNICEF بتوضح إن تلت حالات الاعتداء الجنسي على الأطفال بيكون اللي وراها مراهقين أو أطفال أكبر في السن، وكمان 9 من كل 10 أطفال بيكونوا عارفين الشخص اللي أذاهم، وغالبًا بيكون من العيلة أو حد قريب جدًا منهم.
الاعتداءات دي بتحصل في أماكن المفروض تكون آمنة، زي بيت الطفل أو بيت المعتدي، وأوقات كمان في أماكن زي النوادي أو المراكز التعليمية. والمشكلة الأكبر إن المعتدي في أوقات بيحاول يكسب ثقة الطفل أو أهله، سواء بهدايا أو وقت يقضيه مع الطفل لوحده، وكل دا بهدف إنه يجهّز الطفل لوقوع الاعتداء.
عشان كدا ضروري إننا نكون واعيين ونلاحظ أي تغييرات في سلوك الطفل أو تصرفاته، لأنها ممكن تكون من علامات تعرض الطفل للتحرش الجنسي، واللي محتاجة تدخل ودعم سريع من الأهل والمتخصصين.
مين الأطفال اللي ممكن يكونوا أكثر عرضة للخطر؟
مش كل الأطفال في نفس مستوى الخطورة، بس فيه عوامل بتزود احتمال تعرضهم لـ التحرش أو الاعتداء الجنسي؛ فمثلاً لو الطفل سبق واتعرض لإساءة قبل كدا أو عايش في بيت فيه إهمال أو مشاكل أسرية بيكون في خطر أكبر.
كمان الأطفال اللي عندهم إعاقة، خاصةََ لو عندهم صعوبة في الكلام أو التواصل، بيبقوا فريسة سهلة.
الإنترنت كمان بقى باب خطير جدًا، وكتير من المعتدين بيستغلوا وسائل التواصل، أو الشات في الألعاب، عشان يوصلوا للأطفال ويستدرجوهم.
الطريقة دي بتخلي من الصعب على الأهل يلاحظوا من بدري، إلا لو كانوا منتبهين لـ علامات تعرض الطفل للتحرش الجنسي زي العزلة المفاجئة، الخوف من أشخاص أو أماكن معينة، أو حتى تغييرات سلوكية مش مألوفة.
إزاي أتصرف لو شفت علامات غريبة على طفلي؟
لو لاحظت على طفلك أي تغييرات مفاجئة في السلوك، سواء كانت انعزالية، أو خوف مفرط من أشخاص أو أماكن معينة، أو حتى تصرفات جنسية مش مناسبة لسنه، مهم جدًا تتعامل بحذر وتعاطف.
أول خطوة هي إنك تدي له أمان وثقة، وتطمنه إنك معاه مهما حصل. ما تضغطش عليه بالكلام، لكن اسأله بلُطف عن السبب اللي مضايقه، لإن وجود بعض العلامات مش دايماً معناه أكيد إن في اعتداء جنسي على الأطفال، لكنه مؤشر خطير لازم ياخد اهتمامك الكامل.
استشير متخصص نفسي أطفال أو أخصائي حماية الطفل فورًا، علشان تتأكد وتتصرف بطريقة صح.
إزاي أهيّأ طفلي يحمي نفسه؟ (نصايح تربوية مهمة)
بتأكد منظمة UNICEF و Child Mind Institute على أهمية التربية الوقائية في تقليل فرص التعرض للاعتداء، ودا لإن الوقاية دايمًا أفضل من العلاج، وعشان تحمي طفلك من الاعتداء الجنسي لازم تبتدي التوعية من بدري، ودي أهم النصائح الموصى بيها:
- كلم طفلك عن “الخصوصية الجسدية” بشكل مناسب لسنه، وعلّمه أسماء أعضاء جسمه الحقيقية، وإن فيه مناطق محدش ينفع يلمسها.
- علّمه يقول “لأ” بصوت عالي لأي تصرف مش مريح، وييجي يقول لك من غير خوف أو عقاب.
- درّب طفلك يفرّق بين اللمسة “الكويسة” و”الوحشة”، وشجعه يسأل لو حس بأي لبس.
- حافظ على وجود قناة مفتوحة من التواصل والثقة بينكم.
اتعرف على: 13 نصيحة حول كيفية حماية طفلك من التحرش الجنسي.
عقوبة الاعتداء الجنسي على الأطفال في القانون المصري
القانون المصري بيتعامل بصرامة شديدة مع علامات تعرض الطفل للتحرش الجنسي أو أي شكل من أشكال الاعتداء، ودا واضح في المواد 267، 268، و269 من قانون العقوبات، وبتنص على:
المادة 267
بتنص على إن أي شخص يواقع أنثى بدون رضاها يُعاقب بالإعدام أو السجن المؤبد. ولو كانت المجني عليها أقل من 18 سنة، أو الجاني من أقاربها أو المسؤولين عنها، العقوبة بتكون الإعدام.
المادة 268
بتعاقب كل من هتك عرض إنسان بالقوة أو التهديد بالسجن المشدد. ولو كان المجني عليه أقل من 18 سنة، أو الجاني له سلطة عليه، العقوبة توصل للمؤبد.
المادة 269
بتنص على إن كل من هتك عرض طفل أو طفلة تحت 18 سنة بدون عنف يُعاقب بالسجن، ولو كان الطفل أقل من 12 سنة، العقوبة بتبقى مشددة.
والقانون كمان بيواجه الاعتداءات اللي بتحصل عن طريق الإنترنت، خاصةً لما تكون مرتبطة بـ علامات تعرض الطفل للتحرش الجنسي عن طريق الشات أو الألعاب أو مواقع التواصل.
إمتى ألجأ لطبيب نفسي أو استشاري؟
بتشير الجمعية الأمريكية لعلم نفس الأطفال (APA) ومنظمة Child Welfare Information Gateway لأهمية ملاحظة الطفل لو بيعاني من كوابيس متكررة، قلق مستمر، عزلة، عدوانية غير مبررة، أو أي تغيرات سلوكية حادة، فدا مؤشر إن الآثار النفسية الناتجة عن علامات تعرض الطفل للتحرش الجنسي بدأت تظهر، حتى لو ما كانش فيه إفصاح صريح.
والدعم النفسي المبكر بيحمي الطفل من تطور أعراض الصدمة لاضطرابات طويلة الأمد زي الاكتئاب، اضطراب ما بعد الصدمة، أو مشاكل الثقة.
واستشارة متخصص نفسي أطفال بيوفر للطفل بيئة آمنة يعبّر فيها عن مشاعره ويتعامل مع الصدمة بشكل صحي، وحتى في حالة الشك بس، الجلسة الاستشارية مش مضرة، بالعكس ممكن تنقذ الطفل من ألم نفسي كبير.
في النهاية، مهم جدًا كل ولي أمر يعرف علامات تعرض الطفل للتحرش الجنسي، لأنها ممكن تكون إشارات خفية لكن وراها مشكلة كبيرة. كل ما اكتشفنا العلامات بدري، كل ما قدرنا نحمي ولادنا ونعالج تأثير اللي حصل بسرعة.
دورك كبير كأب أو أم في إنك توفّر لطفلك الأمان، وتسمعه، وتصدق كلامه، وتساعده يتخطى أي تجربة صعبة. متترددش في طلب المساعدة من متخصص لو حسّيت إن فيه حاجة مش طبيعية. أمان طفلك مسؤوليتك.
المصادر
Signs and indicators of child sexual abuse.
Child sexual abuse and exploitation.
أضف تعليق