صعوبات التعلم في الرياضيات | أنواعها وأعراضها وكيفية التعامل معها

صعوبات التعلم اللي بتواجه أطفالنا مش بتقتصر على القراءة والكتابة بس، فبنلاقي كمان نوع مهم وهو صعوبات التعلم في الرياضيات، واللي بتُعرف على إنها الصعوبات التعليمية اللي بتواجه الطلاب خلال دراسة مادة الرياضيات.

وبالتالي دي حاجة بتجذب اهتمام كل أولياء الأمور، لحرصهم الشديد على تفوق أطفالهم في مادة أساسية ومهمة زي مادة الرياضيات. 

ودا لإن الحياة حوالينا حالياً معتمدة بشكل كبير على علوم مبنية على الرياضيات. وعلى الرغم من جمال عالم الأرقام والعمليات الحسابية، إلا إن جزء كبير من الطلاب بيلاقي نفسه في محنة وصراع قصاد العالم الرقمي المعقد دا. 

وعشان كدا في المقال دا هنتكلم عن تعريف صعوبات التعلم في الرياضيات، ونخوض رحلة استكشافية عن أسبابها، ونسلط الضوء على أعراضها، ونعرف أنواع الصعوبات دي ونفهم ازاي بيتم تشخيصها وعلاجها. 

ما هو مفهوم صعوبات التعلم في الرياضيات؟

يطلق عليه عسر القراءة في الرياضيات أو عسر الحساب، وهو اضطراب نمو محدد ليه أساس بيولوجي، وبيأثر بشدة على تعلم الرياضيات والعمليات الحسابية.

وتعريفه إنه عبارة عن خلل في الوصلات العصبية اللي بتعالج اللغة الرقمية بيأدي لصعوبة الوصول للمعلومات الرقمية ومعالجتها، وبتوصل نسبة انتشار اضطراب عسر الحساب لحوالي من 3-6 % من الأطفال والبالغين، بحسب الإحصائية اللي نشرها موقع “Research Gate” في مقاله عن “عسر الحساب التنموي: الانتشار والتشخيص“. 

والحالة دي غير مرتبطة بمستوى ذكاء الطفل أو طرق التدريس المستخدمة، وبتتركز الصعوبة على تفسير الرموز الرقمية والعمليات الحسابية زي: الجمع، والطرح، والضرب، والقسمة.

اقرأ أيضاً: صعوبات القراءة عند الأطفال وكيفية التغلب عليها. 

أعراض صعوبات التعلم في الرياضيات

مهم جداً نفهم إيه أعراض عسر الحساب عشان نقدر نتعامل معاه ونعالجه، وبتختلف الأعراض على حسب العمر، وممكن نقسمها كالتالي: 

أعراض عسر الحساب في المرحلة المبكرة

• بيصعب على الطفل معرفة الأحجام مين الأصغر ومين الأكبر، أو الأقصر والأطول. 
• ما يقدرش ينفذ الحسابات الذهنية. 
• بيواجه صعوبة في إكمال الواجبات. 
• بيعاني من صعوبة في تعلم العد. 

أعراض صعوبات تعلم الحساب في المرحلة الابتدائية

• بيتجنب الطفل أي حاجة ليها تعامل مع الأرقام، حتى الألعاب اللي بتشمل عمليات حسابية بسيطة. 
• بيصعب عليه التفريق بين القيم المكانية للأرقام، زي: الآحاد والعشرات والمئات. 
• بيضعف فهمه للإشارات الحسابية زي (+) و (-) و (\) وغيرها. 
• مش بيعرف يفرق بين علامات أكبر من وأصغر من. 
• بيصعب عليه حساب تكلفة أي حاجات يشتريها. 
• مش بيقدر يحل مسألة رياضية كاملة لوحده. 

أعراض عسر الحساب في المرحلة الثانوية

• بيعاني الطالب من عدم الثقة في تنفيذ التمارين اللي بتتطلب المسافة والاتجاهات والسرعة. 
• بيصعب عليه فهم المعلومات على الرسومات البيانية والمخططات.
• بيصعب عليه إيجاد طرق مختلفة لحل نفس المسألة. 
• بيصعب عليه قياس الأحجام والأوزان. 

أعراض عسر الحساب لدى لبالغين

• الشخص بيبعد تماماً عن كل حاجة تخص الرياضيات، حتى المسائل الحسابية البسيطة. 
• بيعاني من بطء في حساب تكلفة المشتريات.
• بيضعف عنده الإحساس بالأرقام والتقدير.
• مش بيقدر يعد الأرقام تنازلياً.  

وبكدا نكون ذكرنا أهم الأعراض للمراحل العمرية المختلفة اللي تخلينا ناخد بالنا، وهنكون محتاجين نتأكد من خلال التشخيص والتقييم على يد مختص، لوضع خطة للعلاج.

اقرأ أيضاً: الفرق بين صعوبات التعلم واضطرابات التعلم.

أنواع صعوبات التعلم في الرياضيات

وفقاً لموقع “Cognifit Research” في مقاله عن “عسر الحساب عند الأطفال” بنلاقي إن عسر الحساب ليه 6 أنواع رئيسية، وهما:

عسر الحساب التشغيلي

بيعاني الأطفال في النوع دا من صعوبة في إكمال العمليات الحسابية المكتوبة، أو المنطوقة، أو الحسابات بشكل عام، رغم فهمهم للأرقام والعلاقات بينها، لكن بيواجهوا مشكلة في تعديل الرموز الرياضية والأرقام أثناء حل المسألة الحسابية. 

عسر الحساب الإدراكي

الطفل هنا مش بيقدر يعتمد على عقله بس في تنفيذ العمليات العقلية للإجابة عن مسائل الرياضيات، فمثلاً لو خطوة من المسألة هيجمع فيها رقمين يبقى هيكتبهم على ورق أو يستخدم إيده في العد، لكن مش هيعرف يجمعهم في دماغه، وكمان مش بيفتكر المفاهيم الرياضية بعد ما بيتعلمها.

عسر الحساب الرسمي

بيواجه الأطفال هنا صعوبة في كتابة الرموز الرياضية، ورغم كدا الأطفال اللي بيعانوا من النوع دا من عسر الحساب بيكونوا مُدركين للمفاهيم الرياضية، لكن مفيش عندهم قدرة على قراءة أو كتابة أو استخدام أي رموز، وبيصعب عليهم تحديد الرسومات المناسبة مع الكلمات. 

عسر الحساب المعجمي

واحد من صعوبات التعلم في الرياضيات اللي بيعمل مشكلة عند في فهم وقراءة الأرقام الرياضية والرموز والمعادلات الرياضية.

وهنا الأطفال بيكونوا مستوعبين المفاهيم الرياضية وهما بيتكلموا بيها، لكن بيصعب عليهم كتابتها وفهمها وهي مكتوبة. 

عسر الحساب العملي

بيلاقي الطفل صعوبة في ترجمة المفاهيم الرياضية المجردة إلى مفاهيم عملية وواقعية، فبيكون الطفل مُدرك للمفاهيم، لكن ما بيقدرش يسرد المعادلات الحسابية ويقارنها ويعالجها. 

عسر الحساب اللفظي

بيتميز النوع دا بوجود صعوبة في فهم وتسمية المفاهيم الحسابية شفهياً، لكن الأطفال بيكونوا قادرين يقروا الأرقام ويكتبوها، بس ما بيتعرفوش عليها لو اتقالتهم شفهياً. 

أسباب صعوبات التعلم في الرياضيات

بعد ما اتكلمنا عن أنواع وأعراض عسر الحساب، فمن الضروري نفهم إيه هي الأسباب اللي ممكن تخلي طفلك يعاني منه، ومن أبرزها: 

• صعوبات في التركيز والانتباه، ودي حاجة بتأثر سلبياً على قدرة الطفل على فهم وحل المسائل.
• العوامل الوراثية، ودا سبب مشترك في كل صعوبات التعلم عند الأطفال.
• مشاكل الرؤية، واللي بتأدي لصعوبات في الملاحظة وحفظ المعلومات.

ولو كان الطفل مصاب بنوع تاني من أنواع صعوبات التعلم فدي حاجة بتزود من فرصة إصابته بصعوبات التعلم في الرياضيات كمان، وتقدر تعرف أكتر عن صعوبات التعلم من خلال مقال: أنواع صعوبات التعلم عند الأطفال وطرق علاجها. 

التقييم والتشخيص 

في استراتيجيات كتير مختلفة لتشخيص حالة الطفل إذا كان بيعاني من عسر الحساب ولا لأ، وبعدها بيتحدد أكتر أنشطة لعلاج صعوبات التعلم في الرياضيات بطريقة تناسب الطفل وقدراته، ومن أهم الاستراتيجيات دي بنلاقي: 

• اختبارات قياس المهارات الحسابية الأساسية زي: العد، والجمع، والطرح، والضرب، والقسمة. 
• أدوات التقييم اللي بتحدد مستوى صعوبات الحساب عند الطفل مقارنةً بغيره من نفس سنه. 
• مقابلة أولياء الأمور والمدرسين وسؤالهم عن آرائهم في حالة الطفل ومستواه. 

اقرأ أيضاً: كيف أعرف أن ابني لديه صعوبات تعلم؟ إليك 7 علامات واضحة. 

كيف يتم علاج صعوبات التعلم في الرياضيات؟

بحسب مقال “عسر الحساب: ما هو، الأسباب، الأعراض والعلاج” اللي اتنشر على موقع “Cleveland Clinic” بنلاقي إن عسر الحساب ممكن يتعالج عند الأطفال بسهولة، لإن دماغ الطفل بتكون لسه في مرحلة النمو والتطور، وكل ما بدأ العلاج بدري بيكون أحسن. 

أما بالنسبة للبالغين فعسر الحساب بيتعالج لو هو مُكتسب مش الوراثة، لإن دماغهم بتكون اتطورت خلاص بشكل كامل، لكن في الحالتين بنتبع بعض الاستراتيجيات والبرامج العلاجية اللي بيكون ليها دور كبير في تقليل أثر عسر الحساب على الشخص، والاستراتيجيات دي كالتالي: 

استراتيجيات علاج صعوبات التعلم في الرياضيات عند الأطفال 

• ممارسة مفاهيم الرياضيات الأساسية باستمرار زي: العد، والجمع، والطرح، والضرب، والقسمة. 
• المذاكرة مع مجموعة من الأطفال في سنه، وكل طفل يشرح جزء من الدرس للباقي.
• تقسيم كل موضوع أثناء الدراسة لوحدات أصغر، لتسهيل استيعاب المعلومات. 
• أخذ مواهب الطفل واحتياجاته واهتماماته في الاعتبار أثناء خطة العلاج. 

استراتيجيات علاج صعوبات التعلم في الرياضيات عند البالغين  

بيعتمد العلاج هنا على ممارسة تمارين مُخصصة لتقوية المسارات العصبية داخل دماغ الشخص، واللي بتستخدم في الرياضيات، ومن أهم التمارين دي: 

1- كتابة المسألة 

قراءة وكتابة المسألة على الورق حاجة مهمة بالنسبة للشخص اللي بيعاني من عسر الحساب، إن المفاهيم الرياضية والأرقام بالنسبة له هي مجرد علامات على ورق مش أكتر، وكتابة المسألة على شكل جملة بيساعده على ربط العلاقات بين العناصر وبعضها. 

2- رسم المسألة 

ودي بتفيد أكتر الأشخاص البصريين في إنهم يشوفوا العلاقات، ويستوعبوا المفاهيم اللي في المسألة. 

3- ربط المسائل بالحياة الواقعية 

استخدام الأشياء المادية من الحياة اليومية للطلاب، وربطها بالرياضيات وتطبيقاتها بيساعدهم بشكل أكبر على إدراك المفاهيم الرياضية. 

4- تقسيم المسألة لمجموعات صغيرة 

فصل المسألة لأجزاء أصغر، وحل كل جزء لوحده بيساعد الطلاب على التركيز بشكل أكبر، والوصول لحل المسألة أسرع. 

اقرأ أيضًا: أنشطة لعلاج صعوبات الحساب عند الأطفال. 

الخلاصة

في رحلتنا لاكتشاف صعوبات التعلم في الرياضيات بنلاقي إن القوة الحقيقية بتكمن في التعاون بين الأسرة والطفل لمواجهة تحديات صعوبات الحساب عنده، ومواجهة التحديات دي بتتطلب مننا فهم عميق، وتحليل دقيق للأسباب والعوامل المؤثرة على حالة الطفل. 

والرحلة دي مش هتكتمل غير بتشخيص دقيق من أخصائيين متميزين، عشان يكون التدخل العلاجي فعّال، ومن هنا نقدر نحول التحديات دي لفرص للتعلم والنجاح، لكن الموضوع محتاج لصبر، وتكوين رؤية جديدة معتمدة على تمهيد الطريق للطفل، عشان يظهر إمكانياته وقدراته. 

المصادر

5 STRATEGIES FOR MANAGING DYSCALCULIA.

What Is Dyscalculia? Overcoming Ways Difficulties in Mathematics.