الطفل بيتولد على الفطرة، قلبه نقي ومستعد يستقبل أي حاجة بنزرعها فيه. لكن دور الأهل مش بس في الرعاية، لكن كمان في الاختيار الواعي للطريق اللي هيكبر عليه الطفل.
النبي ﷺ وضّح المسؤولية دي بوضوح في حديثه الشريف: “فأبواه يهوِّدانه أو ينصِّرانه أو يمجِّسانه”. ودا معناه إن التوجيه الحقيقي بيبدأ من البيت، بس كمان لازم نكون واخدين بالنا إن المجتمع حواليه ممكن يكون له تأثير أكبر لو ماكناش مستعدين وواعين.
من هنا بتبدأ أهمية إننا نغرس في أولادنا القيم الأساسية من بدري، وأول وأهم قيمة في رحلة التربية الإيمانية هي الصلاة.
لإن الصلاة مش مجرد عادة، دي العمود اللي بيقوم عليه الدين، وغيابها معناه خلل كبير في العلاقة بين الطفل وربه.
في المقال دا، هنمشي مع بعض خطوة بخطوة في تعليم الطفل الصلاة؛ بداية من الوضوء لحد التسليم بأسلوب بسيط وسهل يناسب سنه، ويخلي الصلاة جزء طبيعي من يومه.
مراحل تطور تعليم الطفل الصلاة
الرسول أمرنا بإننا نبدأ في تعليم الطفل من 7 سنوات، لكن تسهيلاََ عليك ابدأ بتمهيد طفلك من بدري من خلال صلاتك قدامه من وهو صغير، أو تعليم الوضوء والصلاة للأطفال بالصور والفيديوهات.
وبتتقسم مراحل تطور تعليم الطفل الصلاة لـ 3 مراحل بناءََ على السن.
أولاً: مرحلة الطفولة المبكرة (من 3 لـ 5 سنين)
الطفل في المرحلة دي بيبدأ يحس إنه له شخصية مستقلة، وبيحب يقلد اللي حواليه. وعلشان كدا لما نلاقيه بيقف جنبنا وإحنا بنصلي، ماينفعش نقوله: “لسه بدري عليك، الصلاة مش فرض دلوقتي”. لا، نسيبه يقلد براحته، لأنه بيتعلم بالفطرة، ومن غير ما نحس بنكون بنزرع فيه حب الصلاة.
لو وقف جنبنا وما ركعش أو سجد، أو بدأ يلعب؛ نسيبه في حاله ومش لازم نعلّق أو نزعق. في السن دا طبيعي جدًا يقعد قدامك وإنت بتصلي، أو حتى يطلع على ضهرك، أو يبكي. لو خفت عليه، ممكن تشيله وإنت بتصلي، ودا حصل حتى في عهد النبي ﷺ، وكان بيصلي وهو شايل أحفاده.
وفي المرحلة دي، نبدأ نحفظه شوية سور بسيطة زي:
- الفاتحة.
- الإخلاص.
- المعوذتين.
ومن غير ضغط، خليه يسمعها منك كل يوم وهي تثبت في دماغه لوحدها.
ثانياً: مرحلة الطفولة المتوسطة (من 5 لـ 7 سنين)
في السن دا نبدأ نكلم الطفل بلُغة بسيطة عن ربنا: عن كرمه، ورحمته، وحبه لينا، ونقربله فكرة إن ربنا بيحب اللي بيصلي وبيطيعه.
ونربط الكلام دا بأمثلة حقيقية من حياته: زي لما ربنا بيساعدنا، أو لما ندعي ونلاقي الحاجة حصلت… كل دا بيخليه يحب ربنا ويحب يرضيه.
كمان مهم يشوف قدوة حواليه؛ لما يشوف الأب والأم بيصلوا كل يوم من غير ما يتضايقوا أو يتكاسلوا، دا بيسهل تعليم الطفل الصلاة وبيزرع جواه حبها. بيحس إنها حاجة طبيعية، وبيبدأ يلتزم بيها زي ما بيتعود على غسيل سنانه أو لبس هدومه.
بس علشان الصلاة ما تتحولش لروتين وخلاص، نبدأ نربطها بـ قصص فيها معنى:
- نحكي له عن رحلة الإسراء والمعراج وفرض الصلاة.
- نحكي له عن صحابي كان بيحب الصلاة وبيستنى وقتها.
ونبعد تمامًا عن:
- الضرب؛ ممنوع تمامًا في السن دا.
- اللوم والنقد الشديد.
- التهديد أو الترهيب.
وبدل دا كله، نركز على التشجيع والدعم، عشان الطفل يرتبط بالصلاة من جواه، وتبقى جزء من حياته باختياره.
خطوات عملية تساعد في تعليم الطفل الصلاة
1- في الشتاء، لازم ناخد بالنا من نقطة مهمة: الميه الباردة ممكن تخلي الطفل يهرب من الصلاة، فلو وفرنا له ميه دافية، دا هيخليه يتوضى من غير عناد أو خوف.
2- بالنسبة للبنات، حاجات بسيطة ممكن تفرق جدًا معاهم، زي:
- نعمل لهم طرحة صغيرة وملونة شبه طرحة الأم، يلبسوها وقت الصلاة.
- نجيب لهم سجادة صلاة خاصة بيهم، تكون شكلها حلو ويختاروها بنفسهم.
الحاجات دي بتخلي البنت تحب الصلاة وتحس إنها حاجة تخصها.
3- لو لاحظنا الطفل كسلان أو مش متحمس، مفيش مشكلة نبدأ معاه بالتدريج:
- نخليه يصلي ركعتين بس في الأول، ولما يحس بحلاوة الصلاة، نبدأ نزود له الركعات.
- ممكن نعمل فكرة لطيفة زي “طابور وضوء”، الطفل الكسول يكون هو القائد، وكل اللي في البيت يدخلوا معاه، كأنها لعبة بس بتعلمه.
4- نبدأ مثلاً بصلاة واحدة في اليوم – زي صلاة الفجر – ولما يلتزم بيها، نزود له صلاة الظهر، وهكذا… لحد ما يوصل للصلوات الخمس.
ولما يثبت على الصلاة، نبدأ ندربه يصليها في وقتها، وبعدين نعلمه السُنن، كل دا على حسب قدرته وتجاوبه.
5- في السن دا، بنبدأ نعلم الطفل شوية حاجات أساسية عن الطهارة:
- يعني إزاي يتحفظ من النجاسة، ويفهم يعني إيه استنجاء.
- يتعلم آداب دخول الحمام، والمحافظة على نظافة جسمه وهدومه.
- يتعلم الوضوء عمليًا، زي الصحابة لما كانوا يعلموا ولادهم، خطوة بخطوة، وبحب.
والأهم من دا، نربطه دايمًا بين الطهارة والصلاة.
ثالثًا: مرحلة الطفولة المتأخرة (من 7 لـ 10 سنين)
في المرحلة دي، الطفل بيكون عنده استعداد أكبر للفهم، والتركيز، وتحمل المسؤولية. ودا الوقت اللي النبي ﷺ أمرنا نبدأ فيه تعليم الطفل الصلاة بشكل فعلي.
يعني:
- من سن 7 نبدأ نأمرهم بالصلاة بانتظام.
- ومن سن 10 لو ما التزمش، نبدأ نستخدم وسائل حازمة – لكن بأسلوب فيه حكمة وبدون عنف.
في المرحلة دي من تعليم الطفل الصلاة:
- هتعلّمه كل أركان الصلاة بشكل واضح من الوضوء لحد التسليم.
- هتبدأ تشرح له الفرق بين الفرض والسُنة، وبين الصلاة الجهرية والسرّية.
- علمه أذكار الصلاة والمعاني البسيطة للسور اللي بيقرأها، علشان يحس بالكلام مش بس يقوله.
كمان لازم نخليه يشارك في المسؤولية:
- نخليه يحافظ على الصلاة في المسجد مع والده، ويشوف دا كنوع من الرجولة والجدية.
- نديه جدول متابعة يعلّم فيه على الصلوات اللي صلى فيها.
وكمان في المرحلة دي مهم نربط الصلاة بالحياة اليومية يعني:
- نوضح له إن الصلاة بتخليه هادي أكتر، وأقرب لربنا، وربنا بيحبه وبيحميه.
- نأكد له إن كل مرة بيصلي فيها، بيكبر أجره، وبيزيد نوره، وربنا بيكتب له حسنات.
اقرأ أيضاً: أبرز 10 طرق لتعليم آداب الطعام للأطفال بطريقة سهلة.
خطوات تعليم الطفل الصلاة
وبعد ما وضحنا المراحل اللي بيمر بيها الطفل في تعلم الصلاة، هنوضح الخطوات بالترتيب للرحلة دي وكمان إيه المعلومات اللي المفروض يعرفها والطرق المثالية لتعليمه.
1- هتعلمه الوضوء
أول خطوة في تعليم الطفل الصلاة هي إنك تبدأ معاه بتعليم الوضوء، لإن الصلاة مش هتنفع من غير طهارة. وعلشان الطفل يتعلم الوضوء بطريقة صحيحة، ممكن نمشي معاه بالشكل دا:
- تنفذ الوضوء قدامه كذا مرة، وتتأكد إنه شايف كل خطوة بوضوح. بعد كدا تطلب منه يقلدك ويعمل الوضوء بنفسه.
- وضح له بهدوء لو غلط في أي حاجة واشرحله الصح، لأن المشاهدة والتجربة من أكتر الطرق اللي بتثبت المعلومة في دماغ الطفل.
- شجعه بجايزة بسيطة لما ينفذ الوضوء صح، ويُفضل تكون حاجة هو بيحبها وبتهمه، علشان يتحمس أكتر.
- ابعد تمامًا عن العنف أو العصبية لو غلط، لأنه لسه في مرحلة التعلم ودا طبيعي.
- اشرحله أهمية الطهارة سواء الجسدية أو النفسية، واربط دا بثواب كبير، زي ما قال النبي ﷺ: “إذا توضأ الرجلُ المسلمُ خرجت ذنوبُه من سمعِه وبصرِه ويديه ورجليه، فإن قعد قعد مغفورًا له”.
ولإن الوضوء هو أول خطوة مهمة في تعليم الطفل الصلاة، لازم نبدأ بيه بالتدريج علشان نوصل في الآخر لصلاة صحيحة ومقبولة.
وتقدر تتعرف أكتر على: خطوات تعليم الوضوء للأطفال | وأهم الفروض والسنن الخاصة بيه.
2- هتخليه يشوف خطوات الصلاة
الإسلام شجع الأهل على إنهم يربّوا أولادهم تربية كويسة فيها أخلاق وعبادة، وأهم عبادة لازم نعود الطفل عليها من بدري هي الصلاة.
علشان كدا مهم جدًا إن الطفل يشوف الصلاة بعينه، لأن المشاهدة بتثبت المعلومة في دماغه أسرع.
ودي طرق ممكن تستخدمها:
شاهد معاه فيديوهات بتشرح الصلاة خطوة بخطوة
ودي موجودة كتير على السوشيال ميديا، واليوتيوب، والمنصات التعليمية، وحتى على التلفزيون.
هتلاقي الفيديوهات دي بتوضح حركات الصلاة بالتفصيل، وبتكون وسيلة سهلة وممتعة للطفل علشان يتعلم من خلالها، وكمان ممكن تستفيد من الفيديوهات دي سواء أهل أو معلمين، ونستخدمها كجزء من تعليم الطفل الصلاة.
الفكرة إنك تخلي الطفل يشوف ويشارك ويتفاعل، ودا هيساعده يحفظ الصلاة بطريقة بسيطة وسلسة.
صلي قدام الطفل بنفسك
من أهم خطوات تعليم الطفل الصلاة هي إنه لازم يشوفك وإنت بتصلي قدامه، ويكون أداء الصلاة بخشوع وبشكل صحيح؛ علشان هو بطبيعته بيقلد. زي ما بيقلد في الكلام والأكل، هيقلد كمان في الصلاة، المهم:
- كرر المشهد دا كل يوم، علشان يتعود على الحركات وعلى شكل الصلاة.
- ابدأ اشرح له أركان الصلاة وسُننها، لما الطفل يقرب من عُمر 7 سنين.
- شجعه بجايزة بسيطة لو صلى كويس، ودي فكرة بتربط في دماغه بين الصلاة والجائزة، وفهمه إن الجايزة الكبيرة في الآخر هي الجنة.
ولما الطفل يوصل لعُمر 10 سنين، اطلب منه الانتظام في الصلاة بشكل جاد.
خُده معاك المسجد
من أحسن الطرق لتعليم الطفل الصلاة صح، هي إنه يشوف بعينه الناس وهما بيصلوا في المسجد. علشان كدا، من المستحب إن الأب يبدأ ياخد ابنه معاه المسجد من بعد ما يتم 7 سنين، ودا علشان:
- لما يكبر ويدخل سن البلوغ، تكون الصلاة بقت جزء من حياته اليومية، ويكون اتعود على جو المسجد والصحبة الصالحة.
- يبقى المسجد مكان مألوف بالنسباله، ويرتبط عنده بالعبادة والسكينة.
- يتعود على الصلاة ويتعلق قلبه بيها.
إزاي نصلي صح زي ما النبي ﷺ كان بيصلي؟
الصلاة ليها طريقة معينة وصحيحة، ودا اللي النبي محمد ﷺ علمه لنا، واللي لازم نعلمه لأولادنا خطوة بخطوة. ودي طريقة لتعليم الطفل الصلاة الصحيحة، هتشرحها الأول، وبعدين تنفذها قدامه:
1. استقبال القبلة
لازم نكون واقفين في اتجاه القبلة من غير ما نميل أو نلتفت.
2. النية في القلب
من غير ما نقولها بصوت، بس ننوي جوانا إننا هنصلي الصلاة دي.
3. تكبيرة الإحرام
بنقول “الله أكبر” ونرفع إيدينا لحد الكتفين، وبعدين نحط اليد اليمين على الشمال فوق الصدر.
4. دعاء الاستفتاح
زي مثلًا “سبحانك اللهم وبحمدك، وتبارك اسمك، وتعالى جدك، ولا إله غيرك”.
أو “اللهم باعد بيني وبين خطاياي كما باعدت بين المشرق والمغرب، اللهم نقني من خطاياي كما يُنقى الثوب الأبيض من الدنس، اللهم اغسلني من خطاياي بالماء والثلج والبرد”.
5. الاستعاذة من الشيطان
نقول “أعوذ بالله من الشيطان الرجيم”، وبعدها نبدأ بالبسملة.
6. قراءة السور
نبدأ بقراءة سورة الفاتحة، وبعدين أي سور تانية من القرآن.
7. الركوع
ننحني بحيث يكون الضهر مستقيم ونقول “سبحان ربي العظيم” 3 مرات، وبعدين نرفع من الركوع، ونقول: “سمع الله لمن حمده”، ونرفع إيدينا تاني للكتفين ونقول” الله أكبر”.
8. السجود الأول
نسجد ونقول “سبحان ربي الأعلى” 3 مرات، ونقول “الله أكبر” وإحنا نازلين، وبعدين نرفع من السجود ونقول “الله أكبر”، ونقعد بين السجدتين.
9. الجلوس بين السجدتين
نقعد على الرجل الشمال وننصب الرجل اليمين لو نقدر، ونرفع السبابة أثناء الدعاء.
10. السجدة التانية
زي السجدة الأولى بالضبط.
11. القيام للركعة التانية
ونقول “الله أكبر”، ونصليها زي الأولى، بس من غير دعاء الاستفتاح.
12. قراءة التشهد بعد الركعتين
“التحيات لله…” لحد “وأشهد أن محمدًا عبده ورسوله” إذا كانت الصلاة أكتر من ركعتين، لو الصلاة 3 أو 4 ركعات، نقوم بعد التشهد الأول ونكمل الركعات الباقية.
وفي الجلوس الأخير ونقول “اللهم صلِّ على محمد…” ونكمل الصلاة الإبراهيمية.
13. التسليم
نلف وشّنا لليمين ونقول “السلام عليكم ورحمة الله”، وبعدين نلف لليسار ونقول نفس الكلام.
وممكن نقول قبل التسليم دعاء “اللهم إني أعوذ بك من عذاب النار، وأعوذ بك من عذاب القبر، وفتنة المحيا والممات، وأعوذ بك شر فتنة المسيح الدجال. اللهم إنك عفو كريم تحب العفو فاعف عني. اللهم اشفني وعافني وارحمني، ربي اكفني بحلالك عن حرامك، وأغنني بفضلك عن من سواك واقض عني الدين وأغنني من الفقر”.
الخطوات دي في تعليم الطفل الصلاة فيها حاجات واجبة، وفيها حاجات سُنة، وكل ما نلتزم بالطريقة دي، نكون بنصلي زي ما النبي ﷺ كان بيصلي.
ليه لازم نسعى نعلم ولادنا الصلاة؟
أولاََ، لإنها فرض ورُكن أساسي من أركان الإسلام، ربنا سبحانه وتعالى أمرنا بيها، مش مجرد نصيحة أو اختيار. ربنا قال: “يا أيها الذين آمنوا قوا أنفسكم وأهليكم ناراً وقودها الناس والحجارة”.
وكمان قال: “وأمر أهلك بالصلاة واصطبر عليها، لا نسألك رزقاً نحن نرزقك”. يعني مسؤوليتنا نعلم ولادنا ونوجههم، مش نسيبهم يتعلموا من نفسهم.
ثانياََ، *النبي محمد ﷺ بنفسه أوصى بيها وقالها صريحة: “مروا أولادكم بالصلاة لسبع، واضربوهم عليها لعشر”؛ يعني لازم نبدأ نعلمهم من بدري، ونثبت عليهم لحد ما يلتزموا.
ثالثاََ، لإن أولادنا أمانة بين إيدينا؛ كلنا بنتمنى نشوفهم صالحين وناجحين في دينهم ودنياهم. والنبي ﷺ قال: “كلُّكم راعٍ وكلُّكم مسئول عن رعيته”، يعني كل أب وأم هيتسألوا قدام ربنا عن ولادهم، وربنا هيسألنا: “علمتوهم؟ ربيتُوهم؟ وجَّهتوهم؟”
إزاي تحبب الطفل في الصلاة؟
أول خطوة مهمة جدًا هي إن الأب والأم أو اللي بيربي الطفل يكونوا متفقين على طريقة واحدة، يكون في سياسة ثابتة وواضحة. لأن لو كل واحد بيتصرف بطريقة، الطفل هيتلخبط، وممكن يضيع المجهود المبذول لتعليم الطفل الصلاة.
يعني مثلًا؛ ماينفعش الأم تكافئه علشان صلى، وييجي الأب يجيب له هدية أكبر وهو ماعملش حاجة؛ كدا الطفل هيفهم إن المكافأة مش مرتبطة بالسلوك.
أو إن الأم تعاقبه علشان ما صلاش وييجي الأب يطبطب عليه. كدا هيتلخبط، ومش هيفهم الصح من الغلط.
المكافأة لازم تكون في وقتها؛ لأن الطفل بينسى بسرعة. يعني لو صلى الخمس صلوات في يوم، يبقى ياخد المكافأة بعد العشاء على طول، علشان يحس إن تعبه جاب نتيجة.
الخاتمة
تعليم الطفل الصلاة مش بييجي في يوم وليلة، هي رحلة بنمشيها معاه بحب وصبر وتشجيع. وكل مرحلة ليها طريقتها، وكل طفل له أسلوبه. والمفتاح الحقيقي في الرحلة دي هو “القدوة”، والكلمة الحلوة، والجو اللي بيشوف فيه إن الصلاة حاجة حلوة ومهمة.
لو زرعنا في قلبه من بدري إن الصلاة مش مجرد فرض، دي علاقة بينه وبين ربنا، ومفتاح للجنة، وسكينة للقلب، هنشوف مع الوقت طفل بيصلي وهو مبسوط، وبيحب يقف قدّام ربنا بنفسه ومن غير ما حد يطلب منه.
ومع كل خطوة بندربه فيها، لازم نكون فاكرين إننا مش بس بنعلّمه يركع ويسجد، إحنا بنربّي إنسان يعرف ربنا ويحب يقرب له… ودي أكبر هدية ممكن نسيبها لولادنا في الدنيا والآخرة.
أضف تعليق