إزاي تعلم ابنك الوضوء خطوة بخطوة؟
الوضوء مش بس خطوة قبل الصلاة، دا كمان طريقة جميلة نعلم بيها ولادنا النظافة والنظام وحب ربنا. بس السؤال اللي بيجي لأي أم أو أب: أبدأ منين؟ وإزاي أوصل المعلومة من غير ما الطفل يزهق أو يحس إنها أوامر؟
في المقال دا هتلاقي خطوات واضحة لتعليم الوضوء للأطفال، وهنجاوب على كل الأسئلة اللي بتخص الوضوء، ونصايح بسيطة عشان تعلم ابنك أو بنتك الوضوء بشكل عملي ومن غير تعقيد.
إمتى أبدأ أعلّم طفلي الوضوء؟
أنسب وقت لتعليم الوضوء للأطفال هو من عمر 7 سنوات حسب أمر الرسول صلى الله عليه وسلم، بيكون الطفل وصل لسن التمييز، وبقى عنده القدرة على الفهم والتقليد. المهم تكون صبور وتخلي الموضوع ممتع، مش واجب مفروض.
مهم نعلمه الوضوء بدري، لإنه:
- بيعوّد الطفل على النظافة الشخصية.
- بيزرع فيه حب الطاعة والعبادة من بدري.
- بيخليه يجهز للصلاة بشكل طبيعي وسلس.
ما هي خطوات تعليم الوضوء للأطفال؟
المطلوب إنك هتعرفه كل ما يخص الوضوء بشكل يناسب فهمه، هتعرفه على كل المفاهيم اللي تخصه سواء سُنة أو فرض، ممكن تقول بس الكلام دا كبير عليه، واحتمال فعلاََ مايفهمش كل حاجة بنسبة كبيرة بس الأفضل إنك تعلمه من البداية صح عشان مايرجعش يعمل أخطاء تخص الوضوء.
أو يكبر وهو مش فاهم كل المفاهيم اللي تخص العبادة دي، فتعالى نبدأ ونتعرف على خطوات تعليم الوضوء للأطفال ببساطة.
أولاََ: نعرفه يعني إيه وضوء؟
الوضوء هو حاجة أساسية في دينّا “واحد من أهم شعائر الإسلام” وهو عبارة عن غُسل أجزاء معينة من الجسم بطريقة مخصوصة علشان نكون طاهرين قبل ما نصلي.
وطبعًا بما إن الصلاة هي عِماد الدين، فمينفعش تتقبل من غير وضوء. عشان كدا تعليم الوضوء للأطفال من بدري مهم جدًا، علشان يعرفوا إزاي يطهّروا نفسهم ويتعلموا النظام والنظافة في حياتهم الدينية واليومية.
ثانياََ- نعلمه فروض الوضوء
من أهم خطوات تعليم الوضوء للأطفال إننا نعرفه الفرق بين الفروض والسُنن، فهنوضحله إن فروض الوضوء يعني الحاجات اللي لازم نعملها بالترتيب علشان الوضوء يكون صح ومقبول.
ولو حاجة منهم ما اتعملتش، الوضوء بيكون باطل، وعلشان نعلم أولادنا الوضوء بشكل صح، لازم نعرفهم إن فيه أربع فروض رئيسية للوضوء ربنا ذكرها في القرآن الكريم، وكل المذاهب متفقة عليها، وهي:
1- غسل الوجه
ربنا قال: “فاغسلوا وجوهكم”، ودا معناه إننا لازم نغسل الوجه من أول منبت الشعر لحد الدقن، ومن شحمة الودن للتانية. أهم حاجة إن الميه تسيل من الوش وتتقاطر، يعني لازم نقطتين ميه على الأقل، وساعتها يكون الغُسل صحيح.
2- غسل الإيدين لحد الكوع
دا كمان ربنا أمر بيه في نفس الآية، وقال: “وأيديكم إلى المرافق”. والنبي عليه الصلاة والسلام علّمنا نغسل الإيدين كويس، من أول صوابعنا لحد الكوع، والكوعين كمان جوه الغسل، يعني ماينفعش نوقف قبليهم.
3- مسح الرأس
ربنا قال: “وامسحوا برؤوسكم”، والعلماء اتفقوا إن لازم نمسح على الرأس.
فيه اختلاف بسيط بين المذاهب في الكمية:
- بعضهم قال نمسح كل الرأس، ودا رأي الإمام مالك وابن تيمية.
- وفيه اللي قال يكفي نمسح جزء منها، حتى لو كان شوية شعر.
- وفيه رأي خاص إن الست ممكن تمسح جزء بس تسهيلاً عليها.
4- غسل الرجلين لحد الكعبين
ربنا قال: “وأرجلكم إلى الكعبين”. والسُنة بتقول نبدأ برجْلنا اليمين زي ما النبي كان بيحب يعمل، وبعدها الشمال.
ودي الآية اللي ربنا قال فيها الكلام دا:
“يَا أَيُّهَا الَّذِينَ آمَنُوا إِذَا قُمْتُمْ إِلَى الصَّلَاةِ فَاغْسِلُوا وُجُوهَكُمْ وَأَيْدِيَكُمْ إِلَى الْمَرَافِقِ وَامْسَحُوا بِرُءُوسِكُمْ وَأَرْجُلَكُمْ إِلَى الْكَعْبَيْنِ”.
ودي فرائض الوضوء المختلف فيها
وعشان يكون على علم بكل شيء حوالين الموضوع عرفه كمان فرائض الوضوء اللي العلماء اختلفوا عليها:
1- النيّة
النيّة معناها إن الإنسان يقصد الفعل بقلبه، والمقصود هنا إنه ينوي إنه بيتوضأ علشان يرفع الحدث الأصغر أو يستعد للصلاة.
ومكان النيّة في القلب، ومش لازم يقولها بلسانه. كمان مش شرط يفضل مركز فيها طول الوضوء، لكن لازم تكون في البداية. يعني لو بدأ من غير ما ينوي، حتى لو غسل بعض الأعضاء الوضوء يبقى غير صحيح.
2- الموالاة
يعني يغسل كل عضو ورا التاني من غير فواصل كبيرة، يعني مثلًا ما يغسلش وشّه ويروح يعمل حاجة ويرجع يكمل بعد وقت طويل.
3- التدليك
التدليك يعني يفرك العضو اللي بيغسله بإيده، يعني مش بس يرش عليه ميه ويسيبها تنزل، لأ، لازم يمرر إيده عليه وهو بيغسل.
ودي كلها مسائل فيها خلاف، يعني العلماء اختلفوا فيها، بس الأحوط للمسلم إنه يعملها كلها علشان يضمن صحة وضوءه على كل الآراء.
ثالثاََ- نعرفه سُنن الوضوء
السُنّة هي الأفعال اللي كان بيعملها رسول الله صلى الله عليه وسلم، ونفهمه إنها مُستحبة ولكنها مش فرض. يعني لو ما عملناهاش الوضوء صحيح، لكن لو عملناها نأخذ أجر أكبر. ومن سنن الوضوء اللي كان بيعملها النبي صلى الله عليه وسلم:
1- استعمال السواك لتنظيف الأسنان وتطييب الفم قبل الوضوء.
2- التسمية قبل الوضوء فبيقول “بسم الله الرحمن الرحيم”.
3- غسل الكفين أولًا: يسُن غسل اليدين ثلاث مرات قبل البدء في الوضوء.
4- البدء باليمين: يعني يبدأ المسلم باليد اليمنى أولًا وبعدين اليد اليسرى، وكمان القدم اليمنى وبعدها القدم اليسرى.
5- التكرار: يسن تكرار غسل كل عضو 3 مرات.
6- تخليل الأصابع يعني يمرر الماء بين أصابع اليدين والقدمين.
7- مسح الأذن بعد مسح الرأس، يسن مسح الأذنين باستخدام السبابة لمسح باطن الأذن والإبهام لمسح ظاهرها.
8- المبالغة في المضمضة والاستنشاق، بمعنى المبالغة في غسل الفم والأنف 3 مرات باستثناء الصائم.
9- تدليك أعضاء الوضوء بغرض مرور اليد على العضو بعد غسله.
10- الدعاء بعد الوضوء؛ فكان بيقول: “أشهد أن لا إله إلا الله، وحده لا شريك له، وأشهد أن محمدًا عبده ورسوله. اللهم اجعلني من التوابين، واجعلني من المتطهرين”.
11- تجديد الوضوء من السُنة قبل كل صلاة حتى لو الوضوء ماتنقضش.
12- الصلاة بعد الوضوء “يسُن أداء ركعتين بعد الوضوء”.
رابعاََ- نفهمه فضائل الوضوء؟
في رحلتك لتعليم الوضوء لأطفال ربنا سبحانه وتعالى وعد اللي بيتوضى كويس وبيهتم بالوضوء بأجر عظيم. ومن ضمن الحاجات الجميلة اللي لازم نقولها لأولادنا وإحنا بنبدأ في تعليم الوضوء للأطفال:
ربنا بيحب الناس اللي بتحافظ على الطهارة، والوضوء طهارة للجسم والروح كمان؛ فاللي بيتوضى وبيصلي ركعتين بإخلاص، ربنا وعده بالجنة، ودي حاجة نحب نزرعها في قلوب أولادنا من بدري.
والوضوء كمان من علامات الإيمان، يعني اللي بيحافظ عليه بطريقته الصحيحة دا دليل على حبّه لربنا ودينه.
ومن رحمة ربنا إن الوضوء بيكفّر الذنوب، ويمسح السيئات، ودا شيء لازم الطفل يعرفه علشان يحب الوضوء من قلبه.
اقرأ أيضاً: القيم الأخلاقية للأطفال | إليك أهم القيم التي يجب غرسها في طفلك.
خطوات وضوء النبي صلى الله عليه وسلم
ودلوقتي هنقول خطوات تعليم الوضوء للأطفال بطريقة النبي متضمنة السُنة، وهي:
1- كان بينوي يتوضى، والنّيّة دي بتكون جوا القلب من غير ما يقولها.
2- يُسمي الله، ويقول: “بسم الله الرحمن الرحيم” قبل دخول الخلاء.
3- يغسل كفيه كويس 3 مرات “يفرك بين الأصابع”.
4- يُمضمض ويستنشق: ياخد شوية ميّة في إيده اليمين، نصهم يتمضمض بيه والنص التاني يشمّه من أنفه ويطلّعه، ويكرر دا 3 مرات.
5- يغسل وجهه كله من منبت الشعر لحد الدقن، ومن ودنه لودنه 3 مرات.
6- يغسل إيده اليمين لحد الكوع 3 مرات، وبعدين الشمال بنفس الطريقة.
7- يحط شوية ميّة على إيديه ويمسح بيهم رأسه مرة واحدة” من قدام لوراه ومن ورا لقدام” وبعد كدا يمسح ودانه من جوه وبرّه.
8- يغسل رجله اليمين من أول صوابع رجله لحد الكعب، وبيخلل الماء بين أصابعه، وبعد كدا يعمل نفس اللي عمله في رجله الشمال.
ونأكد على الطفل إن الرسول كان بيدي الوضوء حقه، فكان يعمّم الميّة كويس على كل عضو من غير إسراف؛ فبيقول ﷺ: “ويلٌ للأعقاب من النار”، يعني لازم ناخد بالنا من غسل الرجلين كويس.
ولما كان بيخلص يقول: “أشهد أن لا إله إلا الله وأشهد أن محمدًا عبد الله ورسوله”.
اقرأ أيضاً: أبرز 10 طرق لتعليم آداب الطعام للأطفال بطريقة سهلة.
أنشطة تساعد الطفل يتعلم الوضوء
علشان تعليم الوضوء للأطفال يكون سهل وممتع، لازم نستخدم أنشطة تبسط المعلومة وتخليها تثبت في دماغه، زي:
- مسرحية صغيرة؛ نخلي الطفل يمثل كأنه بيعلّم أخوه أو صاحبه إزاي يتوضّى، دا بيعزز ثقته بنفسه وبيثبّت الخطوات عنده.
- فيديوهات قصيرة مخصصة للأطفال، بتشرح خطوات الوضوء واحدة واحدة بصوت وألوان وحركات، ودا بيجذب الطفل جدًا.
- لعبة “ترتيب الخطوات”، نطبع صور لكل خطوة ونخلي الطفل يرتبها بالترتيب الصح، ولو جاوب صح ياخد استيكر أو نجمة.
أخطاء شائعة الأطفال بيقعوا فيها
أوقات كتير الأطفال بيغسلوا وشهم بسرعة من غير ما يوصلوا المية لكل الوجه، أو ينسوا يمسحوا رأسهم أو يغسلوا رجل واحدة بس. الأخطاء دي طبيعية جدًا في البداية، ومش لازم نزعل أو نتوتر.
اللي علينا نعمله في تعليم الوضوء للأطفال إننا نلاحظ الخطأ بهدوء، ونصححه بلطف، ونفهمه ليه دا غلط، ونعيد عليه الخطوة تاني بشكل عملي.
مثلًا نقوله: “بُص، ربنا قال نغسل وشّنا كله… تعالى نغسله مع بعض ونشوف إزاي نوصل المية لكل حتة.”
إزاي أخلي الوضوء عادة؟
علشان الوضوء يبقى عادة في حياة الطفل، لازم نربطه بحاجة ثابتة زي الصلاة. يعني قبل كل صلاة، نذكّره بلُطْف إنه لازم يتوضّى، ونساعده يفتكر الخطوات لو نسي.
ممكن نعمل جدول متابعة عليه صور خطوات الوضوء، وكل مرة يتوضّى صح يحط استيكر، ولما يكمّل الأسبوع ياخد هدية بسيطة.
كمان ممكن نستخدم الألعاب زي العرايس ونخليهم “يتوضّوا” مع الطفل، ودا هيخليه يتعلّم وهو بيلعب، ومن غير ما يحس إن الموضوع تقيل عليه.
ومع الوقت هتلاقيه سهل، والطفل بيعمله لوحده وبحب.
وفي النهاية، تعليم الوضوء للأطفال مش بس خطوة دينية، دي كمان فرصة نعلمهم فيها النظام والنظافة وحب العبادة من بدري.
ولما نبدأ في السن المناسب، ونستخدم معاهم الطرق اللي بتحببهم في التعلم زي اللعب والتقليد والتشجيع، ساعتها الوضوء هيكون عادة جميلة بيفهموها وبيحبّوها.
افتكر دايمًا إن الصبر والتكرار هو المفتاح، وكل خطوة بتعلمها لطفلك النهاردة هتفرق في مستقبله.
ابدأ معاه من دلوقتي، وخلّي تعليم الوضوء للأطفال بداية حقيقية لعلاقة حلوة بينه وبين ربنا.
المصادر
كتاب الفقه المنهجي على منهج الإمام الشافعي.
أضف تعليق