ما هي شهادة الدبلومة الكندية وما المدارس التي تقدمها في مصر

بتحلم إن ولادك يسافروا كندا، ويحصلوا على الدبلومة الكندية من هناك؟ طب إيه رأيك لو قولنالك إن الموضوع دلوقتي بقى سهل ومن غير سفر؟!

لإنك تقدر تدخّل ابنك واحدة من أفضل المدارس المصرية اللي بتتيح فُرصة الحصول على الدبلومة الكندية المُعتمدة دوليًا، واللي بيقدر الطالب من خلالها يسافر يكمل تعليمه في كندا بعد إتمام الشهادة. 

وعشان تتعرف أكتر على كل ما يتعلق بنظام التعليم الكندي في مصر، تابعنا في السطور الجاية. 

إيه هي شهادة الدبلومة الكندية OSSD ؟

كلمة OSSD هي اختصار “Ontario Secondary School Diploma” يعني دبلوم مدرسة أونتاريو الثانوية الكندية، ودي شهادة بتُمنح لخريجي المدارس الكندية في إقليم أونتاريو بكندا، واللي بيتم تطبيق منهجها التعليمي في مدارس الدبلومة المصرية الكندية. 

الدبلومة الكندية أو زي ما بنقول عليها “الشهادة الثانوية الكندية”، هي شهادة تُعادل شهادة الثانوية العامة المصرية، ولكن بيتم الاعتراف بيها من قِبل وزارتي التعليم المصري والكندي، بمعنى إن الطالب بيحصل على شهادتين ثانويتين، واحدة كندية، والتانية مصرية. 

وفي الدبلومة دي بيدرس الطالب المنهج الكندي التعليمي، ابتداءً من مرحلة رياض الأطفال للمرحلة الثانوية، فبتبدأ الثانوية الكندية في مصر من الصف التاسع، وبتنتهي في الصف الثاني عشر، بعد ما الطالب يدرس 30 مادة. 

والمواد دي بتتقسم ما بين 18 مادة إجبارية، و 12 مادة اختيارية، وفي كل فصل دراسي بيختار الطالب المواد اللي حابب يدرسها. 

في الصف التاسع والعاشر بيدرس جميع الطلاب نفس المواد، أما في الصفين 11 و 12 بيكون الموضوع مُختلف تمامًا؛ لإن كل طالب في الصفين دول بيختار المواد اللي ناوي يتخصص فيها، وبيحصل على الدبلومة الكندية للدخول في المرحلة الجامعية. 

اقرأ أيضًا: أهم 9 معلومات عن المدارس الكندية في مصر. 

نظام التعليم الكندي في مصر

بينقسم التعليم الكندي في مصر لـ 3 مراحل كالتالي: 

المرحلة الأولى

وهي المرحلة العمرية للأطفال في الحضانة من عمر 4 لـ 5 سنين. 

المرحلة التانية

المرحلة العمرية للتعليم ما قبل الجامعي، وبتنقسم إلى: 

• التعليم الابتدائي: بيبدأ من الصف الأول للصف السادس. 
• التعليم المتوسط أو الإعدادي: ودا بيبدأ من الصف السابع لحد الصف الثامن. 
• التعليم الثانوي: ودا بيكون من الصف التاسع لحد الصف الثاني عشر. 

المرحلة التالتة

ودي مرحلة التعليم الجامعي، وهي المرحلة اللي بيدخلها الطالب بعد حصوله على شهادة الثانوية الكندية، فبيدخل إحدى الجامعات أو المعاهد الكندية سواء في مصر أو في كندا. 

اعرف كمان عن: الفرق بين المدارس المصرية الدولية والمدارس الرسمية الدولية. 

منهج شهادة الدبلومة الكندية فى مصر  

يقدر الطالب يختار المواد اللي عاوز يدرسها في الشهادة الكندية من بين المقررات الاختيارية، حسب التخصص اللي هيدخله في الجامعة، وعنده 4 خيارات من المجموعات الدراسية: 

1. مجموعة المواد العلمية، اللي بتأهل الطالب لدخول كلية الطب، والصيدلة، والعلوم بكل التخصصات. 
2. مجموعة المواد الأدبية، ودي بتأهل الطالب للكليات الأدبية زي: الإعلام، وعلم الاجتماع، وآداب. 
3. مجموعة مواد بتأهل الطالب للدراسة في كليات التجارة، وإدارة الأعمال، والاقتصاد. 
4. مجموعة مواد بيدرسها الطلبة اللي هيدخلوا كلية الهندسة. 

ما هو نظام المواد في الشهادة الثانوية الكندية في مصر؟

نظام المواد في الدبلومة الكندية مُختلف عن الثانوي التقليدي في مصر، فكل طالب بيُمنح مجموع درجات المادة بناءً على مدى الجهد اللي بذله في دراستها، بمعنى إن 70% من مجموع أي مادة بيعتمد على الاختبارات، والمشاريع، وإجمالي الواجبات اللي اجتازها الطالب خلال الفصل الدراسي، و 30% بس على الاختبار النهائي للمادة. 

ودي الميزة اللي بتُتيح للطالب فُرصة الحصول على تقييم يشمل جهوده الدراسية في المادة على مدار الفصل الدراسي بالكامل، مش بس على الاختبار النهائي، فبيمكنه من تحصيل مجموع أكبر. 

كمان بيمر الطالب باختبار “PLAR”، عشان يتم تحديد مستواه الدراسي والعلمي، والمصطلح دا هو اختصار لجملة “Prior Learning Assessment and Recognition”، بمعنى “تقييم التعلم المسبق والاعتراف”. 

ودا اختبار بيتم من خلاله تقييم مستوى الطالب على السنين اللي فاتت، عشان يتأكدوا من مدى جدارته للحصول على درجة التقييم، والاعتراف الدولي. 

ولازم يكون مستوى الطالب في اللغة الإنجليزية متوسط؛ عشان يقدر ينضم لنظام البكالوريا الكندية OSSD المُعتمد من ولاية أونتاريو الكندية. 

مُميزات شهادة الثانوية الكندية في مصر “OSSD”

بتتعدد مميزات الحصول على شهادة الـ OSSD في مصر، ومن أبرزها بنلاقي: 

1- إتاحة فرصة الدراسة في إحدى الجامعات الكندية 

لأن عدد كبير من الطلبة بيحلم باستكمال دراسته في الجامعات الخارجية، والتعرف على مناهجها، فشهادة الثانوية الكندية نقدر نقول عليها مفتاح لبوابة الحلم دا، لأنها معتمدة دوليًا، وبالتالي بتسمح للطالب اللي حصل عليها إنه يدرس في واحدة من الجامعات الكندية سواء جوه مصر، أو بره. 

2- الدراسة بنظام المواد بدلًا من الفصول الدراسية 

الدراسة في الدبلومة الكندية بتعتمد على نظام المواد، مش بس الفصول الدراسية، وبكدا يقدر الطالب يجمع درجات طول الفترة الدراسية تساعده في تحقيق درجات عالية آخر السنة. 

3- الدراسة باللغة الإنجليزية 

دراسة المنهج الكندي التعليمي كله بتتم باللغة الإنجليزية، وهي من أقوى اللغات في العالم، ودا بيوسع مدارك الطالب، وبيخليه يتعلم لغة مهمة بجانب لغته الأم. 

المدارس الكندية في مصر 

يوجد في مصر 5 مدراس مشهورة بتقدم الدبلومة الكندية، وهي كالتالي: 

1- المدرسة الملكية الكندية – RCS 

دي واحدة من مدارس العاصمة الإدارية الجديدة اللي تم إنشائها في ظل رؤية مصر 2030 لتطوير التعليم، وبتهدف إدارة المدرسة لإعداد الطالب لمواجهة أي تحديات ممكن تقابله في وظايف المستقبل. 

العنوان: الحي السكني التاني R2 بالعاصمة الجديدة.
رقم التليفون: 01289955185 / 01289831111 

2- مدرسة التراث الدولية – Heritage International School 

المدرسة بتقبل من سن 4 سنوات للحضانة (KG1)، وبتتراوح كثافة الفصول فيها بين 23 لـ 25 طالب بحد أقصى. 

ودي أحد المدارس اللي بتقدم الدبلومة الكندية في مصر، وبتكرس جهودها لتوفير خدمات تعليمية كندية عالية الجودة، من أجل مساعدة الطلاب على الاستفادة من إمكانياتهم الكاملة أكاديميًا، واجتماعيًا، وجسديًا. 

العنوان: المنطقة السياحية التانية – قرية الياسمين – جرين لاند أكتوبر – الجيزة.
رقم التليفون: 01068583873 

3- المدرسة الكندية الدولية – CISE  

المدرسة دي بتُصنف على إنها واحدة من أفضل المدارس الدولية في مصر، وبتعتمد على نظام أونتاريو التعليمي، اللي بيعد واحد من أفضل 10 أنظمة تعليمية حول العالم، وبيتم تقديم مناهج التعليم بالطريقة نفسها كأن المدرسة موجودة في تورنتو أو في عاصمة كندا، أوتاوا.

العنوان: التجمع الخامس، خلف مجلس مدينة القاهرة الجديدة – الحي الرابع – المنطقة رقم 6 – القطامية – القاهرة الجديدة.
رقم التليفون: 01066663313 

4- مدرسة بريتش كولومبيا الكندية الدولية – BCCIS 

اتأسست المدرسة سنة 2005م، وبتهدف لإعداد الطلاب لمواجهة تحديات العالم المتغير بشكل مستمر، ودا من خلال دفع كل طالب فيها لتحقيق أقصى ما عنده. 

العنوان: الحي الخامس – المنطقة 34 مدخل طريق السويس – مدينة الشروق – القاهرة. 

رقم التليفون: 01002128112 / 01227484086 

5- مدرسة بريتش كولومبيا الكندية الدولية بأكتوبر – BCCIS West 

دي الفرع التاني لمدرسة بريتيش كولومبيا الدولية، وطبعًا الفرعين بيعتمدوا على نفس طريقة الإدارة، ونفس الأهداف، ونفس مناهج مقاطعة كولومبيا الكندية (BCCIS)، وخريجين المدرسة مش بيواجهوا أي صعوبة في الالتحاق بأي جامعة في العالم، نظرًا لعلاقات كندا الوثيقة مع أكبر دول العالم. 

العنوان: داخل أويست كومباوند – أكتوبر – الجيزة. 

رقم التليفون: 01028981999 / 01050137911 

شروط القبول في الجامعات الكندية 2024

في مجموعة شروط مهمة لا بد من استيفائها، للقبول في الجامعات الكندية وهي: 

• الحصول على معدل دراسي “جيد” فيما فوق، بس برضو دا بيختلف حسب الجامعة، والتخصص. 
• تغطية الطالب للتكاليف المالية الخاصة بالدراسة والمعيشة في كندا، لو قرر يدرس بره مصر. 
• الحصول على شهادة الدبلومة الكندية. 
• جميع الأوراق مترجمة للإنجليزية. 
• تجهيز السيرة الذاتية CV. 
• إتقان اللغة الإنجليزية. 

اقرأ كمان عن: أسعار المدارس الانترناشونال في مصر 2023-2024. 

الأوراق المطلوبة للدراسة في الجامعات الكندية 2024

• تقديم شهادات اللغة الإنجليزية (الآيلتس أو التويفل). 
• نُسخ مصدقة من بيان درجات الطالب بالكامل. 
• نسخة من شهادة الدبلومة الكندية. 
• صورة عن جواز السفر. 
• شهادة امتحان SAT. 
• شهادات التدريب. 
• خطاب تحفيزي. 
• خطاب توصية. 
• السيرة الذاتية. 
• بيان الغرض. 

والتسجيل بيكون عن طريق الإنترنت للحصول على القبول الجامعي، فبيتم إرسال كل البيانات والأوراق المذكورة على الموقع الرسمي للجامعة اللي هيتم التقديم فيها سواء في مصر أو في كندا. 

الخلاصة

الدبلومة الكندية في مصر بتختصر جزء كبير من طريق الطالب اللي عاوز يحصل على تعليم معتمد دوليًا، أو عاوز يسافر يكمل تعليمه بره، دا غير كمان إن الدراسة فيها باللغة الإنجليزية، ودي حاجة بتساعد الطالب على تقوية لغته الإنجلزية، واعتبارها لغة تانية أساسية بجانب لغته الأم. 

بناء مستقبل أولادنا أمر مهم، وكل قرار فيه لازم يكون مدروس كويس، وعشان كدا عرضنا في المقال مميزات الدبلومة الكندية، وكل المعلومات المتاحة عنها عن المنهج، وشروط القبول، وأماكن المدراس الكندية الموجودة في مصر، عشان تقدر تاخد قرارك صح.