طفلك من أول ما بيبدأ خطواته الأولى بيكون معرض للإصابات البسيطة والصعبة، ومش هتقدري تتحكمي في تصرفاته، ولا توقفي الفضول اللي بيحركه، ولا تمنعي عنه الأذى بشكل كامل.
لكن تقدري تكوني مستعدة وقت ما يتعرض للأذى، وتلحقيه بالتصرف السليم والملائم لحالته، وعشان كدا لازم تكوني على دراية بالإسعافات الأولية للجروح للأطفال، وطريقة تطبيقها بشكل سليم؛ لحمايته من التوابع اللي ممكن تحصله نتيجة أي إصابة.
ومن خلال المقال هنعرض الإسعافات الأولية للجروح عند الأطفال سواء السطحية أو الكبيرة، وأهم الأخطاء الشائعة اللي ممكن تأثر بالسلب عليه، وكمان نصائح مهمة لحماية طفلك من خطر الإصابات، تابعي معنا.
ما هي الإسعافات الأولية للجروح للأطفال؟
التدريب على الإسعافات الأولية شيء مهم تعرفيه وتعلميه كمان لطفلك، لإنه بيساهم بشكل كبير في الشفاء، وتحسين نتائج الإصابات غير المميتة، وتقليل وقت التعافي حسب دراسة اتعملت في بنغلاديش، واتنشرت على موقع PubMed Central.
ولإن طفلك مُعرض طول الوقت للإصابة بجروح سطحية في الوجه، أو أي جزء من جسمه، سواء وقت اللعب أو أثناء أداء الأنشطة الرياضية، لازم تكوني جاهزة لمعالجة طفلك في الجروح.
وبتنقسم الجروح لسطحية، وكبيرة، ووخزية، ويمكن التعامل معاها من خلال الخطوات دي.
الجروح السطحية
تقدري تتعاملي مع الجروح السطحية من خلال خطوات بسيطة لازم تكوني على دراية بيها، وهي:
تهدئة الطفل
أول حاجة لازم تضبطي ردة فعلك، عشان ما تزوديش خوف الطفل، وحاولي تهّديه الأول، وتطمنيه إن الأمر بسيط، وإنه شجاع وهيستحمل تنظيف الجرح.
تعقيم الجرح
عقمي ايديكي واغسليها كويس، ولو متاح قفازات استخدميها أفضل، وبعدين اغسلي المكان المُصاب بالماء الجاري والصابون، وفي المعظم الجروح البسيطة مش بتحتاج مطهر.
وبعدين شيلي أي أوساخ عالقة في المنطقة، وسيبي الماء الجاري فوقها لمدة دقيقتين، لإن الجرح الملوث بيسبب عدوى بعد كدا.
التعامل الصحيح لوقف النزيف
أولاً: اضغطي بقطعة قماش نظيفة أو شاش لمدة 5 دقائق لوقف النزيف في حالة وجوده، وفي حالة النزيف الشديد، اضغطي على الجرح لمدة من 5 لـ 10 دقايق بقطعة قماش نظيفة.
وتابعي الجرح لو قطعة القماش بقيت مبللة حطي فوقها قطعة تانية لحد ما تتأكدي إن النزيف توقف، وما تحركيش القطعة الأولى.
ومهم جدًا تحطي كريم مضاد حيوي أو غسول مطهر على الجرح لو مش سطحي أوي، وأخيرًا، غطي المنطقة بالشاش أو اللاصق الطبي.
متابعة الجرح
من أهم خطوات الإسعافات الأولية للجروح للأطفال؛ هي متابعته كل يوم، فحافظي عليه نظيف وجاف، وشيلي اللاصقة الطبية في حالة تكون قشرة للجرح، وما تحاوليش تشيلي الشاش أو اللاصقة بشكل قوي، استعملي الماء الدافيء أو محلول ملحي لإزالتها.
وابتعدي تمامًا عن النفخ على الجرح، لإن دا بيسبب نمو الجراثيم.
معالجة التورم
احرصي على معالجة التورم أو أثر الكدمة باستخدام الثلج عن طريق وضع كيس ثلج بارد ونظيف على المنطقة كل ساعة إلى ساعتين لمدة 10 لـ 15 دقيقة خلال الـ 24 ساعة الأولى، أهم حاجة إن الثلج ما يبقاش موجود بشكل مباشر على الجلد.
الجروح الوخزية
بتتعرض الأطفال للجروح الوخزية بشكل كبير؛ ودا زي الدوس على مسمار أو أي جسم معدني، ودا مش بيسبب نزيف على أد ما بيكون الجرح عُرضة أكبر للعدوى وحدوث مُضاعفات.
وبيكون التعامل مع النوع دا من الجروح؛ إننا بنعمل نفس الخطوات السابقة للجروح السطحية، وأهم خطوة بتكون بعد تنظيف الجرح كويس ووقف النزيف، إنك تحطي كريم مضاد حيوي أو فازلين مع تغيير كل ضمادة عشان العدوى.
واستخدام الفازلين أصبح من الطرق المفيدة في حالات منع العدوى للجرح، ودا اللي بتأكده دراسة اتنشرت على موقع NIH إن استخدام الفازلين أفضل من المضادات الحيوية للحفاظ على الجروح من الالتهابات.
وفي حال حصل طفح جلدي، أو لاحظتي إن الجرح ما ييخفش وإن في زيادة في التورم أو الألم أو الحمى، الأفضل الذهاب بالطفل للمستشفى.
الجروح الكبيرة
الإسعافات الأولية للجروح للأطفال مهمة، فلازم تكوني على علم بيها، وتطبقيها على طفلك في حالة تعرضه لجرح عميق، وبتكون باتباع الخطوات دي:
- نظفي الجرح بالماء النظيف عشان تقدري تحددي حجمه وعمقه.
- غطي الجرح بقطعة قماش معقمة أو شاش، والبسي القفازات الطبية عشان تحافظي على الجرح من التلوث.
- خلي الطرف المصاب في مستوى أعلى من مستوى القلب.
- ابعدي عن ربط العضو المصاب إلا في حالات معينة، زي في حالة بتر طرف، أو وجود جروح كبيرة في الطرف والنزيف مستمر، أو إن الجرح مش واضح وموجود في مكان صعب توصليله.
- استخدمي ملقاط معقم بالكحول عشان تشيلي أي أوساخ عالقة.
- اغسلي المنطقة المحيطة بالماء والصابون، وابعدي تمامًا عن الجرح.
- استخدمي الفازلين أو مرهم مضاد حيوي عشان يحافظ على ترطيب المكان.
- غطي الجرح بشاش أو لاصقة جروح.
- راقبي الجرح، وفي حالة بلل الضمادة حطي فوقها قطعة تانية زي ما ذكرنا.
- استمري بالضغط على القطعة، وزوري أقرب طبيب للتعامل مع الحالة.
- احرصي على أخذ طفلك لإبرة الكزاز في حالة الجرح الوخزي بجسم معدني؛ ودا لحمايته من مرض التيتانوس اللي ممكن يصاب بيه نتيجة تلوث الجرح.
اقرأ أيضًا: أبرز الإسعافات الأولية للأطفال عند ارتفاع درجة الحرارة
متى تلجأين لزيارة الطبيب لتقديم الرعاية الصحية لطفلك؟
عليكي اللجوء للمستشفى أو زيارة أقرب دكتور في بعض الحالات، زي:
- ظهور علامات عدوى زي: ارتفاع درجة حرارة، أو التورم الزائد، أو حدوث كسر، أو تقرح بالجرح.
- جرح عميق في الرقبة، أو الرأس، أو الصدر، أو البطن، أو كيس الصفن، أو فوق أي مفصل
- النزيف استمر حتى بعد الضغط عليه لمدة 10 دقائق، أو توقف وبدأ ينزف مرة تانية.
- دخول مسمار أو زجاج في جلد الطفل مسبب ثقب.
- إصابة طفلك في عينيه أو منطقة قريبة منها.
- استمرار الألم في الجرح، أو احمرار الجرح.
- الجرح عميق أو أطول من 0.5 سم.
- التعرض لعضة حيوان.
في الحالات دي لازم تروحي لأقرب مستشفى لحصول طفلك على الرعاية الطبية اللازمة لحالته.
اقرئي أيضًا: الإسعافات الأولية للأطفال عند الاختناق.
نصائح هامة لحماية طفلك من خطر الإصابة بالجروح
زي ما مهم تعرفي الإسعافات الأولية للجروح للأطفال، لازم تنبهي طفلك لبعض التعليمات لتقليل خطر إصابته بالأذى زي إنه:
- يلبس الواقيات، زي: واقي الوجه، والعينين، والأذن أثناء ممارسة الأنشطة الرياضية اللي ممكن تسبب له إصابة.
- ما يحطش حاجات في أنفه أو أذنيه، زي: أعواد القطن، والأقلام الرصاص.
- يتجنب مص الأشياء الصلبة أو الحادة.
- ما يجريش وفي حاجة في فمه.
إلى جانب كدا، احتفظي بمجموعة أدوات الإسعافات الأولية للجروح للأطفال في البيت أو السيارة، وتشمل:
- مناديل مبللة بالكحول
- قفازات طبية
- رباط ضاغط
- ترمومتر طبي
- ملقط صغير
- لاصق طبي
- شاش طبي
- قطن طبي
- مقص حاد
- مطهر
وبترجع أهمية التدريب على الإسعافات الأولية للجروح للأطفال، وتنفيذها بشكل صحيح؛ إنها بتقلل من وقت الشفاء في حالة الحروق، وبتقلل عمق الجروح، ودا أثبتته دراسة اتنشرت على موقع ScienceDirect.
تعرفي أيضًا على: أهم الإسعافات الأولية للأطفال عند السقوط.
أبرز الأخطاء الشائعة للإسعافات الأولية للجروح للأطفال
تنتشر بعض الطرق بين الناس على إنها من ضمن الإسعافات الأولية للجروح، وإنها هتفرق مع الجرح بشكل كبير، ولكن النتيجة بتكون العكس، ومن أبرزها:
استخدام القهوة ووضعها على النزيف لوقفه
يعد من أشهر العادات الخاطئة في الإسعافات الأولية للجروح، لإنه بيزود احتمالية تلوث الجرح، وكمان بيعيق تنظيف الجرح، وبيبقى صعب التخلص منها، وخاصةً لو احتاج للخياطة.
والأفضل هو الضغط المباشر على الجرح باستخدام ضمادة نظيفة، ولفه بإحكام بعد التأكد من توقف النزيف، وبيكون التغيير على الجرح يوميًا.
تنظيف الجرح عن طريق اللعاب
أثبتت دراسات كتير إن اللعاب بيحتوي على مركبات بتساعد في التئام الجروح أهمها “الهستاتين”، ومنهم دراسة اتنشرت على موقع ResearchGate عن دور اللعاب بعد تعقيمه من معظم أنواع البكتيريا في شفاء الجروح الجلدية.
وبكدا استخدامه لجروح طفلك مش هتكون نتيجتها كويسة في كل الأحوال؛ لإن الفم مكان مليء بعدد كبير من الجراثيم، لإنه بيزود من تلوث الجرح مش بيعقمه، والأفضل اتباع الخطوات السابقة لتعقيم الجروح باستخدام المطهر أو المحلول الملحي.
ترك الضمادة أو اللاصقة على الجرح لفترة كبيرة
بعض الناس بيظنوا إن من الإسعافات الأولية للجروح للأطفال والكبار؛ إنهم يحطوا مرهم المضاد الحيوي على الجرح، ويغطوه لمدة أيام من غير متابعته، اعتقادًا منهم إن دا هيسرع الشفاء، والجرح مش هيتعرض للتلوث.
لكن اللي بيحصل إن الجرح بيزيد عليه الرطوبة، ودا شيء غير مرغوب فيه، والأفضل هو تنظيف الجرح ووضع المرهم، وترك الجرح يلتئم في الهواء الطلق، أو في حالة تغطية الجرح لازم يتم التغيير عليه مرتين يوميًا، ومهم الحفاظ على المنطقة نظيفة وجافة.
استخدام عاصبة لربط مكان نزيف الجرح
في حالة الجرح العميق في الذراع أو الساق، بيفتكر بعض الناس إن الصحيح هو ربط عاصبة حول الفخذ أو أعلى الذراع لوقف النزيف، لكن دا ممكن يوقف تدفق الدم للطرف بالكامل، ويسبب أضرار كبيرة.
والحل هو الضغط النزولي المباشر على الجرح باستخدام طبقة سميكة من الشاش المعقم، و لف الجرح بإحكام عند توقف النزيف، ولو استمر النزيف، أو كان الجرح محتاج غرز فلازم التوجه لأقرب مستشفى.
وأخيرًا، الإسعافات الأولية للجروح مهمة جدًا، لتجنب طفلك كتير من المضاعفات والتوابع السيئة، ودا بيلزم الآباء والأمهات بالإلمام بالمعلومات وخبرة الإسعافات الأولية للجروح للأطفال، عشان يتعاملوا بشكل سليم مع الإصابات اللي بيتعرض ليها أطفالهم.
اقرئي أيضًا: صندوق الإسعافات الأولية في المنزل
المصادر
A Parent’s First Aid Guide for Treating 10 Common Kid Injuries.
أضف تعليق