بيمثل ارتفاع الحرارة عند كثير من الأهالي إنذار خطر، لكن في الحقيقة ارتفاع درجة حرارة الطفل اللي بيتمتع بصحة جيدة، مؤشر مطمئِن إن الجسم بيعمل بكفاءة، وفاعلية لمحاربة عدوى أصيب بها الطفل.
وفي المقال دا هنعرض أبرز الإسعافات الأولية للأطفال عند ارتفاع درجة الحرارة، والخطوات اللي لازم الأهل يعملوها عشان يحافظوا على سلامة طفلهم.
تعريف الحُمى
لما بترتفع درجة حرارة الطفل أعلى من 37 درجة في الحالة دي بنقول إن الطفل بيعاني من الحمى. وبتظهر عادةً بسبب إصابة الجسم بعدوى أو التهاب، وكمان بعد التطعيمات الدورية للطفل.
عادةً بيكون ارتفاع درجة الحرارة عند الطفل أمر غير خطير، إلا إذا تطور الأمر وظهرت بعض الأعراض الأخرى، زي: ألم الرأس الشديد، وغيره من الأعراض اللي بتستدعي إن الأهل يعرضوا الطفل على طبيب مختص لفحصه، والحصول على الدواء اللي يناسب حالته.
أسباب ارتفاع درجة حرارة الأطفال
ارتفاع الحرارة هو عرض لمرض، وبيظهر بسبب عدة أمور، الشائع منها عند الأطفال:
- إصابة الطفل بعدوى أيًا كان نوعها، فيبدأ الجسم بمكافحتها، وبتظهر من الأعراض ارتفاع درجة الحرارة، اللي بتختلف شدتها بحسب شدة العدوى.
- التطعيمات، وغالبًا بترتفع درجة حرارة الطفل بعدها، بسبب مقاومة الجهاز المناعي، وتكوينه أجسام مضادة للفيروس اللي بيتطعم عشانه.
- التسنين كمان ممكن يتسبب في رفع درجة حرارة الطفل بشكل بسيط، لكن لو كان بشكل مبالغ فيه، أو استمر لفترة طويلة، فمهم زيارة الطبيب لفحص الطفل.
- زيادة عدد قطع الملابس بشكل مبالغ فيه، فترتفع درجة حرارة جسم الطفل، وتكون معرضة للالتهابات.
- التعرض لدرجات الحرارة المرتفعة، هيحاول الجسم يبرد نفسه بالتعرق، لكن ومع زيادة التعرض للحرارة المرتفعة هيصبح الجسم غير قادر على تبريد نفسه.
معرفتك لسبب ارتفاع درجة حرارة الطفل؛ هتساعدك في اختيار الأنسب من الإسعافات الأولية للأطفال عند ارتفاع درجة الحرارة، ومعرفة الطريقة الصحيحة للتعامل مع الطفل.
كيفية قياس درجة حرارة الطفل
تتوفر خيارات متنوعة لمقاييس درجة حرارة الأطفال، كان القديم الشائع منها المقياس الزئبقي، لكن لا ينصح باستخدامه؛ لأنه في حال انكساره هيكون خطر استنشاق الزئبق الموجود فيه.
أما حاليًا بينتشر مقياس الحرارة الرقمي، واللي بيعتمد على أجهزة استشعار إلكترونية لقياس درجة حرارة جسم الطفل بدقة، وممكن استخدامه للقياس عن طريق الفم، أو منطقة الإبط، أو في المستقيم (مقياس شرجي)، وبيكون أقل دقة عند استخدامه في منطقة الإبط.
بالإضافة لمقياس الحرارة الرقمي من خلال الأذن، مع الوضع في الاعتبار إنه قد يكون غير دقيق.
بنختار المقياس المناسب حسب عمر الطفل، غالبًا ما يُفضل المقياس الشرجي للأطفال الأصغر في السن، وكل ما كان عمر الطفل أكبر ويقدر يحتفظ بالمقياس تحت لسانه بدون حركه؛ نقدر نستخدم معاه المقياس تحت اللسان.
كمان ممكن الأهل يستخدموا مقياس الحرارة عبر الشريان الصدغي اللي موجود في الجبهة لو كان الطفل نائم، والمقياس دا بيتميز بسهولة الاستخدام، وكمان لا يُسبب العدوى، ومش بيحتاج لتعقيم بعد كل استخدام؛ لأنه لا يلامس الأجزاء الداخلية للجسم.
طرق الإسعافات الأولية للأطفال عند ارتفاع درجة الحرارة
إذا كان طفلك بيعاني من عدوى، أو مرض أدى لإصابته بالحمى، فتطبيق طرق الإسعافات الأولية للأطفال عند ارتفاع درجة الحرارة هيساعد على خفضها، واللي من أبرزها:
1- التخلص من الملابس الزائدة
واحدة من طرق الإسعافات الأولية للأطفال عند ارتفاع درجة الحرارة هو التخلص من الملابس الزائدة اللي بيرتديها الطفل واللي بتسبب ارتفاع الحرارة، كمان تجنب تغطيته بأغطية ثقيلة، أو بطانيات؛ لأنها هتخلي جسم الطفل أكثر سخونة، ومش هتفيده، مجرد ملابس وأغطية خفيفة هتفي بالغرض.
2- استخدام الباراسيتامول
لو طفلك أكبر من ثلاث شهور فممكن تستخدمي الباراسيتمول كطريقة فعالة في الإسعافات الأولية للأطفال عند ارتفاع درجة الحرارة، وهيساعده على خفض درجة حرارته، وتخفيف الألم.
لكن مهم نراعي الجرعة اللي الطفل بياخدها حسب سنه، والأفضل استشارة طبيب عشان يوصي بالجرعة اللي تناسب الطفل وحالته.
3- شرب السوائل
المياه هتساعد طفلك يتخلص من درجة الحرارة المرتفعة، وممكن تستخدمي العصائر المخففة كمان كوسائل مساعدة في الإسعافات الأولية للأطفال عند ارتفاع درجة الحرارة، واللي هتحمي الطفل من التعرض للجفاف.
4- توفير الراحة
مهم إن الطفل ياخد قسط كافي من الراحة، ويتجنب الإجهاد بأكبر قدر ممكن، حفاظًا على سلامته، ومساعدته على التعافي في أسرع وقت.
5- السماح للطفل بتناول الطعام
أعطي الطفل فرصة ياكل الأكل اللي بيحبه، مع تجنب الأطعمة الضارة، لإنها مش هتساعد جسمه يقاوم.
ممكن تديله أنواع الخضار والفاكهة اللي بيحبها، أو تعمليها في شكل بيوريه لو طفلك عنده صعوبة في البلع، ولو رفض الأكل ما تفرضيش عليه وتجبريه.
6- مراقبة درجة الحرارة باستمرار
عشان تقدمي الإسعافات الأولية للأطفال عند ارتفاع درجة الحرارة، مهم كل فترة تقيسي درجة حرارة طفلك باستخدام الترمومتر، وتدوني القياسات؛ عشان تراقبي حالة الطفل ومدى استجابته، وهل هيحتاج تدخل طبي أو لا.
7- المحافظة على درجة حرارة الغرفة
لازم نتأكد إن الغرفة اللي موجود فيها الطفل جوها معتدل، بدون برودة زائدة، أو ارتفاع زائد في درجة الحرارة.
كمان مهم توفير التهوية الجيدة للغرفة.
8- استخدام ماء فاتر للاستحمام
عكس الشائع إن الطفل مع ارتفاع درجة حرارته يستحم بماء شديد البرودة؛ عشان يساعد في خفض درجة حرارته، ,دا للأسف بيسبب مشاكل، زي: الرعشة، دا غير إنه بيخفض الحرارة الخارجية للجسم، وبالتالي بيدي إيحاء كاذب بانخفاض درجة حرارة الطفل، في حين إن الحرارة الداخلية بتكون لسه مرتفعة.
الأفضل إن الاستحمام يكون بماء فاتر، أو استخدام قطعة قماش فيها ماء فاتر؛ عشان ما يضرش الطفل، وهي واحدة من الطرق المساعدة في الإسعافات الأولية للأطفال عند ارتفاع درجة الحرارة.
9- عدم استخدام الأسبرين
يوصي الأطباء في حالة الإسعافات الأولية للأطفال عند ارتفاع درجة الحرارة، بتنجنب إعطاء الطفل الأسبرين، لأنه ممكن يسبب له ضرر بالغ، زي:
- الإصابة بمتلازمة “راي”، ورغم ندرة الإصابة بيها، إنها ممكن تتسبب في الوفاة، دا غير تأثيرها الخطير عل الكبد.
- اضطراب في نسبة الصفائح الدموية بالجسم، ما يعرض الطفل لخطر الإصابة بالنزيف
عشان كدا لا يُنصح باستخدام الأسبرين للأطفال تحت سن 12 عام، ويُفضل مراجعة الطبيب لو كان الطفل مازال رضيع؛ عشان يقدر يصف له العلاج اللي يناسبه.
مش شرط تقدمي لطفلك كل الطرق اللي ذكرناها في الإسعافات الأولية للأطفال عند ارتفاع درجة الحرارة، لكن حالته الصحية هي اللي هتحدد إيه اللي الطفل محتاجه بالضبط.
متى تعرض طفلك على الطبيب؟
لو أصيب طفلك بالحمى هتحتاجي إنك تستعيني بطبيب مختص عشان يقدمله الرعاية اللي محتاجها في عدة حالات، أهمها:
- لو طبقتي الإسعافات الأولية للأطفال عند ارتفاع درجة الحرارة، ومازالت الحرارة مرتفعة، ومفيش أي نتيجة تذكر.
- لو كان الطفل أقل من ست شهور وارتفعت درجة الحرارة عن 38 درجة.
- لو كان الطفل أكبر من ست شهور وارتفعت الحرارة فوق 39 درجة.
- ظهور أعراض شديدة مصاحبة لارتفاع درجة الحرارة، مثل: الصداع، والتهيج، ألم البطن، الطفح الجلدي، وغيرهم.
- استمرار ارتفاع درجة الحرارة لمدة خمسة أيام على التوالي.
تقدري تستعيني بطبيب أطفال مختص في أي حالة من اللي ذكرناهم، أو حتى لو سيطر القلق عليكي وما عرفتيش تتصرفي بشكل مناسب، الطبيب هيساعد في تقديم العلاج والأدوية المناسبة، وهيطمنك على طفلك.ختامًا، ارتفاع درجة الحرارة عند الأطفال يقدر الأهل يتعاملوا معاه عادةً، ويقدموا أبرز الإسعافات الأولية للأطفال عند ارتفاع درجة الحرارة اللي ذكرناها بكل سهولة من المنزل.
لكن في شعرة فارقة ممكن تتحول الحرارة من مجرد حالة صحية يسهل التعامل معاها؛ إلى مشكلة خطيرة تهدد صحة الطفل، عشان كدا مهم الأهل يتعلموا الإسعافات الأولية اللازمة، مع دقة الملاحظة لطفلهم، لو ظهر عليه أعراض غير مألوفة يتوجهوا بيه لطبيب الأطفال ويطلبوا المساعدة.
يمكنك أيضًا قراءة: أهم الإسعافات الأولية للأطفال عند السقوط
أضف تعليق