ما هي مناهج مدارس STEM في مصر؟

عدد كبير من الطلبة في مدارس مصر بيعانوا من كمية الحفظ الكبيرة المطلوبة منهم خلال السنة، فمش بيكون عندهم الوقت الكافي للبحث عن المعلومات دي أو التعمق في فهمها، وبالتالي مش بيقدروا يطبقوا المعلومات اللي درسوها أو حتى يفتكروها.

ولكن ظهرت مناهج مدارس STEM كبديل مختلف لمناهج الثانوية العامة، وبتحقق للطالب أكبر استفادة من دراسته.

ودا موضوع مقالنا اللي هتعرف من خلاله على مدارس ستيم، ومناهجها، وطريقة الدراسة فيها، فتابع معنا.

ما هي مدارس STEM؟

مدارس STEM هي مدارس للمتفوقين في العلوم والتكنولوجيا، وبدأ تطبيق نظامها في مصر من سنة 2011 كمنحة مقدمة من الحكومة الأمريكية.

والقائمين على المنحة كانوا هم المسؤولين عن تطبيق نظام ستيم، وبناء المدارس الخاصة بيه في مصر، وبعدها أصبح النظام بالكامل تابع لوزارة التربية والتعليم المصرية.

وصل عدد مدارس ستيم في مصر حاليًا لـ 19 مدرسة موجودة في محافظات مختلفة، بالإضافة لمدرستين مقرر تشغيلهم في العام الدراسي 2023 – 2024 (الحي 11 بأكتوبر، والقاهرة الجديدة)، بالإضافة لموافقة الوزارة على إنشاء مدرسة بمدينة الخارجة في محافظة الوادي الجديد، وبتسعى لزيادة أعدادها خلال السنوات القادمة.

واللي بيميز مناهج مدارس STEM إنها معتمدة بنسبة كبيرة على الطلبة؛ لإن الطالب هو المسؤول عن جمع المعلومات لفهم موضوع الدرس، وشرح الجزء دا لزمايله في وجود مدرس المادة للتقييم.

كمان النظام قائم على الفهم، وبيساعد الطالب يفكر بطريقة عملية لحل مشاكل موجودة حواليه بالفعل عن طريق المشاريع اللي بيقدمها. 

ودي نقطة بتميز نظام الدراسة في STEM عن الثانوية العامة أو غيرها من الأنظمة المتاحة للطلاب.

الفرق بين مناهج نظام STEM والثانوية العامة

نظام الدراسة في مدارس ستيم مختلف تمامًا عن نظام الثانوية العامة؛ لإنه بيعتمد أكتر على التطبيق العملي والفهم زي ما ذكرنا، وما بيكونش في أي مجال للحفظ أو التلقين.

ومن أبرز الاختلافات بين نظام STEM والثانوية العامة:

اختلاف مناهج مدارس STEM

بتحتوي على جزء بسيط من منهج الثانوية العامة المصرية، بالإضافة لمناهج حديثة مصممة على النظام الأمريكي. 

والمناهج ما بيكونش موجود فيها كل المعلومات، وبكدا الطالب بيبذل جهد كبير، عشان يوصل للمعلومات اللي محتاجها، عشان يفهم المنهج، ويقدر يحل كويس في الامتحانات.

تطبيق التعليم من خلال المشاريع Capstones

من مميزات مناهج مدارس STEM هو الـ Capstone، فبيكون مطلوب منهم كل فصل دراسي تسليم مشروع بيقدم حلول تطبيقية لمشكلةٍ ما موجودة في مصر تحت إشراف المدرسين، وبيمتحنوا عليه كل أسبوعين.

المشروع بيكون جماعي، وبتتقسم الطلبة لمجموعات، ويشتغلوا مع بعض لحد ما المشروع يخلص ويتسلم. 

مكونات مشروع الـ Capstone

• جزء البورتفوليو Portfolio اللي الطالب بيكتب فيه تفاصيل المشروع، أو المشكلة اللي هيبدأ يبحث فيها، عشان يوصل لحلول قابلة للتطبيق.
• جزء البوستر Poster، وهنا الطالب بيكتب خلاصة المشروع، ودا بيتعمل في الآخر. 
• جزء Prototype، وفي الجزء دا بيتكتب المشروع ذاته. 

الاهتمام بالعلوم والتكنولوجيا

مناهج مدارس STEM مخصصة لطلبة القسم العلمي؛ لإنها معتمدة على العلوم، والبحث، والتكنولوجيا، وبتساعدهم يتعلموا صح ويوصلوا لكليات متميزة.

الدراسة باللغة الإنجليزية 

مناهج مدارس STEM كلها بتكون باللغة الإنجليزية؛ لإنها نظام أمريكي في الأصل زي ما وضحنا، ودي نقطة بتخلي الطالب متردد إنه يقدم في النظام دا، ظنًا منه إنها ممكن تكون صعبة، وهتكون مش مفهومة بالنسبة له، لكن بالوقت بيتعود.

الطالب هو المسؤول عن الشرح

في مدارس ستيم بيكون الطالب هو المسؤول عن الشرح، والمدرس مسؤول فقط عن التوجيه والتقييم بعكس مدارس الثانوية.

المدرس بيحدد الموضوع اللي الطالب هيبدأ يبحث فيه مع مجموعته، وبعدها الطالب بيجمع المعلومات المطلوبة، ويعرضها على المدرس وزمايله، وينتظر تقييم المدرس.

عدد الطلبة في الفصول أقل من نظام الثانوية العامة

عدد الطلبة اللي بتدخل مدارس STEM كل سنة أقل بكتير من اللي بيدخلوا مدارس الثانوية العامة، وبكدا بيكون عدد الطلبة في فصول مدارس ستيم قليل، فبنلاقيه بيتراوح من 20 – 25، ودا بيتيح للطالب فرصة أكبر للمناقشة مع المدرس وزمايله، ومنها بيكون معدل الاستفادة أكبر.

الالتحاق بالكلية يعتمد على النسبة المرنة وليس التنسيق

نظام STEM بيكون غير خاضع للتنسيق العادي، بمعنى إن كل سنة بيكون في أماكن محددة لطلبة STEM في الجامعات.

وبيتم حساب النسبة المرنة بالنسبة لأي كلية عن طريق قسمة عدد الطلاب الناجحين في نظام STEM على عدد الطلاب الناجحين في نظام الثانوية العامة، وضرب الناتج في عدد المقاعد المتاحة للطلبة في الكلية دي.

والناتج هنا بيكون عدد طلبة STEM اللي عندهم فرصة يدخلوا الكلية دي، وبيكون قليل مقارنة بعدد الطلبة اللي ممكن يدخلوا نفس الكلية بس من نظام الثانوية العامة.

نظام الإقامة

مدارس STEM مش بيكون لها فترة دراسية بسيطة في اليوم زي ما بيحصل في نظام الثانوية العامة، لكن الدراسة بتكون لفترة طويلة خلال اليوم، وعشان كدا بيكون في سكن تابع للمدرسة، ووجبات تُقدم للطلبة على مدار اليوم.

اقرأ أيضاً: الفرق بين المدارس الناشونال والانترناشونال في مصر.

الفرق بين نظام STEM والمدارس الدولية

المدارس الدولية هي مدارس بتطبق أنظمة تعليم مختلفة عن نظام التعليم المصري، وبتختلف عن نظام STEM في:

المناهج الدراسية

المناهج الدراسية في المدارس الدولية بتختلف من مدرسة لأخرى حسب الدولة المسؤولة عن تطبيق النظام، فمثلًا في نظام فرنسي، ونظام أمريكي، وغيرهم، وغالبًا بتكون الدراسة باللغة الإنجليزية، ودا بيختلف تماماً عن مناهج مدارس STEM المعتمدة على العلوم والتكنولوجيا.

امتحانات الطلبة 

الامتحان في المدارس الدولية بيكون من خارج مصر، على عكس نظام STEM اللي بتكون امتحاناته من داخل المدرسة. 

وهنا نقدر نختصر الفرق بين أنظمة التعليم دي من ناحية المناهج ولغة الدراسة.

مناهج مدارس STEM

بتختلف عن المناهج الموجودة في نظام الثانوية العامة زي ما وضحنا الطالب بيدرس بعض المواد الأساسية الخاصة بالمجال العلمي ككل في أول سنة دراسية، والمواد دي هي:

•  الكيمياء 
• الفيزياء
•  الأحياء
•  جيولوجيا
•  رياضيات
•  ميكانيكا
•  دراسات
•  كمبيوتر
•  لغة عربية
•  لغة إنجليزية

وفي السنة التانية الطالب بيحدد مجال الدراسة اللي حابب يكمل فيه سواء علمي علوم، أو علمي رياضة، ومن هنا بيبدأ يدرس مواد متعلقة بس بالمجال اللي دخله.

اختيار الشعبة في السنة الثانية من الدراسة بيكون متاح بردو في نظام الثانوية العامة، بالإضافة  لوجود الشعبة الأدبية. 

كيفية الدراسة في مدارس ستيم

الدراسة في مدارس STEM بتكون بنظام 3 سنوات زي الثانوية العامة، لكن طبعًا باختلاف طريقة التدريس.

الطالب في مدارس STEM مش بيستلم كتب دراسية زي ما بيحصل في الثانوية العامة، لكن المدرسة مسؤولة إنها توفر له لابتوب يستمر  معاه خلال سنوات دراسته.

اللابتوب دا بيساعد الطالب إنه يوصل للمعلومات المطلوبة منه، عشان يقدر يفهم الدروس كويس، ويعمل العروض التقديمية (Powerpoint slides) عشان يشرح منها لزمايله. 

كمان ممكن الطالب يحصل على المراجع اللي هتساعده في عملية البحث من خلال طلبة الدفعات الأكبر في المدرسة. 

الطالب بيقدم في كل فصل دراسي مشروع خاص بمشكلة معينة في مصر، وبيكون عليه 60% من درجة الترم ككل، أما باقي الـ 40% بيكونوا على الحضور والمشاركة داخل الفصل، وامتحانات العملي والميدترم.

وبالتالي الطالب بيكون عليه مسؤولية إنهاء المشروع خلال الفصل الدراسي مع الالتزام بالحضور والمشاركة عشان يقدر ينجح في نظام ستيم، ويتنقل للسنة اللي بعدها. 

تخوفات من نظام STEM

رغم مميزات مناهج مدارس STEM الكتيرة، إلا إن في بعض التخوفات اللي بتمنع الطلبة من الالتحاق بنظام ستيم. ومن أبرزها:

عدم الحصول على فرصة الالتحاق بكلية معينة

طلاب الثانوية العامة بتكون فرصة التحاقهم للكليات اللي حابينها أعلى بكتير من فرصة طلاب نظام ستيم؛ ودا لإن نظام ستيم بيعتمد على النسبة المرنة، واللي بتحدد عدد المقاعد المتاحة لطلبة نظام ستيم في الكليات العلمية. 

وبكدا لو كان الطالب بيركز أكتر على كلية معينة وغير مهتم بالبحث أو التعليم التطبيقي هتكون مدارس الثانوية العامة مناسبة له أكتر.

صعوبة طريقة الدراسة

بعض الطلبة مش بيعرفوا يتعلموا إلا بنظام الفهم والتلقين، وما بيقدروش يبحثوا عن المعلومات صح، ويوصلوا لنتائج كويسة حتى لو في حد بيساعدهم، وبكدا بيكون في احتمالية كبيرة إن طريقة مناهج مدارس STEM تكون مش مناسبة ليهم.

ودا بيخليهم يترددوا كتير في قرار تقديمهم في نظام ستيم، ويوجهوا اهتماماتهم أكتر ناحية مدارس الثانوية العامة.

كمان الدراسة بتكون باللغة الإنجليزية، ودي بتمثل صعوبة عند عدد كبير من الطلبة، إلا إن صعوبة النقطة دي بتقل مع التدريب الكتير، والتعود على نظام الدراسة مع الوقت.

شروط الالتحاق بمدارس STEM

تتطلب مدارس ستيم عدد من الشروط يجب توافرها في الطالب، ودا لإن مناهج مدارس STEM بتتطلب نوعية معينة من الطلبة المميزين، واللي بيتملكوا القدرة على البحث، والصبر، والإبداع. 

أما عن أهم الشروط اللي أعلنت عنها الوزارة لسنة 2023 – 2024 فهي إن الطالب يكون مصري الجنسية، ولا يزيد عمره عن 18 سنة في أول أكتوبر من العام الدراسي.

ويشترط حصول الطالب على 98% في شهادة الإعدادية، ولمنح الطلاب فرصة أكبر للتقديم وبناءً على رغبة أولياء الأمور، تم إلغاء شرط الحصول على الدرجة النهائية في واحد من المقررات (الرياضيات  أو العلوم، أو اللغة الإنجليزية)، ودا لإن أوقات كان الطالب بيكون مجموعه 98% ولم يحصل على الدرجة النهائية في واحد من المقررات السابق ذكرها.

وكفرصة أكبر لطلاب الشهادة الإعدادية وتوافر أماكن ببعض مدارس ستيم، يُمكن للطلاب الحاصلين على مجموع 95% التقديم، ولكن يُطبق عليهم شرط الحصول على الدرجة النهائية في واحد من المقررات (الرياضيات أو العلوم أو اللغة الإنجليزية).

وفي حالة الطلبة الذكور المتقدمين لمدرسة ستيم الثانوية بعين شمس للبنين، يجب الحصول على 252 أي بنسبة 90%.

ولو الطالب حقق الشروط دي فيقدر يملى استمارة التسجيل الإلكتروني على موقع الوزارة.

الخلاصة

مدارس STEM هي مدارس مصرية للمتفوقين في العلوم والتكنولوجيا، بتساعد الطالب على التفكير المنطقي وإيجاد حلول للمشكلات قابلة للتطبيق، وبتؤهله لدخول الكليات العلمية.

ومناهج النظام بتحتوي على جزء من مناهج الثانوية العامة بجانب مناهج أمريكية بتعتمد أكتر على الفهم والمشاركة في المشاريع المطلوبة في كل ترم دراسي.

ومن هنا لازم الطالب وولي الأمر يتعرفول كويس جدًا على تفاصيل النظام دا قبل التقديم فيه، لمعرفة هل هو مناسب للطالب ولا لأ.