مناهج مدارس STEM في مصر 2021

مناهج مدارس Stem

 

عدد كبير من الطلبة في مدارس مصر بيعانوا من كمية الحفظ الكبيرة المطلوبة منهم خلال السنة، إنهم مش بيكون عندهم وقت للبحث الكافي عن المعلومات دي أو التعمق في فهمها، وبالتالي مش بيقدروا يطبقوا المعلومات اللي درسوها أو حتى يفتكروها.

ظهر بديل لنظام المدارس دي يساعد الطالب إنه يفهم أكثر ويطبق اللي فهمه كويس؛ عشان يحقق أقصى استفادة على مدار دراسته، وده اللي بيتطبق في مناهج مدارس STEM.

إيه هي مدارس ستيم؟ وإيه هي مناهجها وطريقة الدراسة فيها؟ ده اللي هنوضحه في المقال.

ما هي مدارس STEM

مدارس STEM هي مدارس للمتفوقين في العلوم والتكنولوجيا بدأ تطبيق نظامها في مصر من سنة 2011 كمنحة مقدمة من الحكومة الأمريكية.

القائمين على المنحة كانوا هم المسئولين عن تطبيق نظام ستيم وبناء المدراس الخاصة بيه في مصر، وبعدها أصبح النظام بالكامل تابع لوزارة التربية والتعليم المصرية.

حاليًا مدارس ستيم وصلوا إلى 14 مدرسة موجودة في مصر في محافظات مختلفة.

الدراسة في نظام ستيم معتمدة بنسبة كبيرة على الطلبة؛ لإن الطالب هو المسئول عن جمع المعلومات المطلوبة لفهم موضوع الدرس، وبعدها بيكون من مسئول عن شرح الجزء ده لزمايله في وجود مدرس المادة للتقييم.

كمان النظام قائم على الفهم، ويساعد الطالب يفكر بطريقة عملية لحل مشاكل موجودة حواليه بالفعل عن طريق المشاريع اللي بيقدمها.

ودي نقطة بتميز نظام الدراسة في STEM عن نظام الثانوية العامة أو غيره من الأنظمة المتاحة لطلاب الثانوية.

الفرق بين مناهج نظام STEM والثانوية العامة

الفرق بين نظام STEM ونظام الثانوية العامة

نظام الدراسة في مدارس ستيم مختلف تمامًا عن نظام الثانوية العامة؛ لإنه بيعتمد أكثر على التطبيق العملي والفهم زي ما ذكرنا، ومش بيكون في أي مجال للحفظ أو التلقين.

من أبرز الاختلافات بين نظام STEM والثانوية العامة:

اختلاف مناهج مدارس STEM

مناهج مدارس STEM بتحتوي على جزء بسيط من منهج الثانوية العامة المصرية، بالإضافة إلى مناهج حديثة مصممة على النظام الأمريكي.

والمناهج مش بيكون موجود فيها كل المعلومات، وبكده الطالب بيبذل جهد كبير عشان يوصل للمعلومات اللي محتاجها عشان يفهم المنهج ويقدر يحل كويس في الامتحانات.

تطبيق التعليم من خلال المشاريع Capstones

طلاب مدارس STEM بيكون مطلوب منهم كل فصل دراسي تسليم مشروع بيقدم حلول تطبيقية لمشكلة ما موجودة في مصر تحت إشراف المدرسين، والمشروع ده بيمتحنوا عليه كل أسبوعين.

المشروع مش بيكون فردي، بيتم تقسيم الطلبة إلى مجموعات، ويشتغلوا مع بعض لحد ما المشروع يخلص ويتسلم.

المشروع بيتكون من كذا جزء:

  • جزء البورتفوليو Portfolio

الطالب بيكتب في الجزء ده تفاصيل المشروع أو المشكلة اللي هيبدأ يبحث فيها عشان يوصل لحلول لها قابلة للتطبيق.

  • جزء البوستر Poster

وهنا الطالب بيكتب خلاصة المشروع، وده بيتعمل في الآخر.

  • جزء Prototype

في الجزء ده بيتكتب المشروع ذاته.

وبالإضافة للأجزاء دي بيكون في امتحان كل أسبوعين على المعلومات اللي تم التوصل إليها أثناء البحث.

المدارس مهتمة بالقسم العلمي فقط

مدارس STEM بتقدم دعمها لجميع الطلاب المهتمين بالمجال العلمي والبحث والتكنولوجيا، وبتساعدهم يتعلموا صح ويوصلوا لكليات متميزة.

لكن بالنسبة للطلبة اللي بتهتم بالمجال الأدبي ودخول الكليات الأدبية هتكون مناهج مدارس STEM غير مناسبة لهم.

الدراسة باللغة الإنجليزية

دراسة مناهج مدارس STEM بتكون باللغة الإنجليزية؛ لإن النظام أمريكي في الأصل زي ما وضحنا، ودي نقطة بتخلي الطالب متردد إنه يقدم في النظام ده ظنًا منه إنه ممكن يفشل بسبب إن الدراسة باللغة الإنجليزية هتكون مش مفهومة بالنسبة له.

الطالب هو المسئول عن الشرح

في مدارس الثانوية العامة بيكون المدرس هو المسئول الأول عن الشرح، وبعد الشرح بيكون الطالب معاه كل المعلومات اللي محتاج يعرفها، وبيبدأ يزاكر ويحفظ المعلومات دي عشان يقدر يحل كويس في الامتحان.

أما في مدارس ستيم بيكون الطالب هو المسئول عن الشرح، والمدرس مسئول فقط عن التوجيه والتقييم.

المدرس بيحدد الموضوع اللي الطالب هيبدأ يبحث فيه مع مجموعته، وبعدها الطالب بيجمع المعلومات المطلوبة ويعرضها على المدرس وزمايله وينتظر تقييم المدرس.

عدد الطلبة في الفصول أقل من نظام الثانوية العامة

عدد الطلبة اللي بتدخل مدارس STEM كل سنة أقل بكتير من اللي بيدخلوا مدارس الثانوية العامة، وبكده بيكون عدد الطلبة في فصول مدارس ستيم قليل.

عدد الطلبة في الفصل الواحد بيتراوح بين 20-25 طالب، والنقطة دي بتتيح للطالب فرصة أكبر للمناقشة مع المدرس وزمايله، ومنها بيكون معدل الاستفادة أكبر.

الالتحاق بالكلية يعتمد على النسبة المرنة وليس التنسيق

نظام STEM بيكون غير خاضع للتنسيق العادي، بمعنى إن كل سنة بيكون عدد المقاعد المحددة لطلبة STEM في الجامعات محدودة.

بيتم حساب النسبة المرنة بالنسبة لأي كلية عن طريق قسمة عدد الطلاب الناجحين في نظام STEM على عدد الطلاب الناجحين في نظام الثانوية العامة، وضرب الناتج في عدد المقاعد المتاحة للطلبة في الكلية دي.

والناتج هنا بيكون عدد طلبة STEM اللي عندهم فرصة يدخلوا الكلية دي، وبيكون قليل جدا مقارنة بعدد الطلبة اللي ممكن يدخلوا نفس الكلية بس من نظام الثانوية العامة.

والنقطة دي بيعتبرها بعض الطلاب من عيوب نظام STEM، لإن في بعض الأحيان ممكن الطالب يكون مستواه كويس لكن النسبة المرنة تمنعه من دخول الكلية اللي بيحلم بيها.

نظام الإقامة

مدارس STEM مش بيكون لها فترة دراسية بسيطة في اليوم زي ما بيحصل في نظام الثانوية العامة، لكن الدراسة بتكون لفترة طويلة خلال اليوم، وعشان كده المدرسة بتوفر سكن تابع لها ووجبات تُقدم للطلبة على مدار اليوم.

الفرق بين نظام STEM والمدارس الدولية

الفرق بين نظام STEM والمدارس الدولية

المدارس الدولية هي مدارس بتطبق أنظمة تعليم مختلفة عن نظام التعليم المصري، وبتختلف عن نظام STEM في:

المناهج الدراسية

المناهج الدراسة في المدارس الدولية بتختلف من مدرسة لأخرى حسب الدولة المسئولة عن تطبيق النظام، فمثلًا في نظام فرنسي، ونظام أمريكي، وغيرهم، وغالبًا بتكون الدراسة باللغة الإنجليزية.

امتحانات الطلبة

الامتحان في المدارس الدولية بيكون من خارج مصر، على عكس نظام STEM اللي بتكون امتحاناته من داخل المدرسة.

وهنا نقدر نختصر الفرق بين أنظمة التعليم دي من ناحية المناهج ولغة الدراسة.

وجه المقارنة

نظام مدراس STEM

نظام الثانوية العامة

نظام المدارس الدولية

طبيعة المناهج الدراسية

نظام الدراسة قائم على المشاريع اللي بتقدم حلول تطبيقية لمشاكل موجودة بالفعل في مصر، بالإضافة إلى بعض الأنشطة الأخرى.

نظام التدريس قائم على الحفظ والتلقين عشان الطالب يقدر ينجح فيها بدرجات كويسة بغض النظر عن التعمق في الفهم.

النظام بيختلف حسب الدولة القائمة عليه، لكن كل الدول دي بتعتمد في الدراسة على الأنشطة والمشاركة أكثر من الحفظ.

لغة الدراسة

اللغة الإنجليزية

اللغة العربية

الدراسة بتختلف في اللغة بردو على حسب الدولة، لكن في الغالب بتكون باللغة الإنجليزية

مناهج مدارس STEM

مناهج مدارس STEM بتختلف عن المناهج الموجودة في نظام الثانوية العامة زي ما وضحنا

الطالب بيدرس بعض المواد الأساسية الخاصة بالمجال العلمي ككل في أول سنة دراسية، والمواد دي هي:

  • الكيمياء
  • الفيزياء
  • الأحياء
  • جيولوجيا
  • رياضيات
  • ميكانيكا
  • دراسات
  • كمبيوتر
  • لغة عربية
  • لغة إنجليزية

وفي السنة الثانية الطالب بيحدد مجال الدراسة اللي حابب يكمل فيه سواء علمي علوم أو علمي رياضة، ومن هنا بيبدأ يدرس مواد متعلقة بس بالمجال اللي دخله.

اختيار الشعبة في السنة الثانية من الدراسة بتكون موجودة بردو في نظام الثانوية العامة، بس بالإضافة إلى وجود الشعبة الأدبية.

كيفية الدراسة في مدارس ستيم

الدراسة في مدارس STEM بتكون بنظام 3 سنوات زي الثانوية العامة، لكن طبعًا باختلاف طريقة التدريس.

الطالب في مدارس STEM مش بيستلم كتب دراسية زي ما بيحصل في الثانوية العامة، لكن المدرسة مسئول إنها توفر له لابتوب يستمر وجه معاه خلال سنوات دراسته.

اللابتوب ده بيساعد الطالب إنه يوصل للمعلومات المطلوبة منه عشان يقدر يفهم الدروس كويس، ويعمل العروض التقديمية (Power point slides) عشان يشرح منها لزمايله.

كمان ممكن الطالب يحصل على المراجع اللي هتساعده في عملية البحث من خلال طلبة الدفعات الأكبر في المدرسة.

الطالب بيقدم في كل فصل دراسي مشروع خاص بمشكلة معينة في مصر، وبيكون عليه 60% من درجة الترم ككل، أما باقي الـ 40% بيكونوا على الحضور والمشاركة داخل الفصل، وامتحانات العملي والميدترم.

وبالتالي الطالب بيكون عليه مسئولية إنهاء المشروع خلال الفصل الدراسي مع الالتزام بالحضور والمشاركة عشان يقدر ينجح في نظام ستيم ويتنقل للسنة اللي بعدها.

تخوفات من نظام STEM

تخوفات من نظام Stem

رغم مميزات نظام مدارس STEM الكتيرة وإنه بيأهل الطلبة للتعامل مع المشكلات ومحاولة إيجاد حلول تطبيقية لها، وبيساعد في خلق باحث جديد، إلا إن هناك بعض التخوفات اللي بتمنع الطلبة من الالتحاق بنظام ستيم.

من أبرز التخوفات من نظام ستيم:

عدم الحصول على فرصة الالتحاق بكلية معينة

طلاب الثانوية العامة بتكون فرصة دخولهم للكليات اللي حابين يدخلوها أعلى بكتير من فرصة طلاب نظام ستيم؛ وده لإن نظام ستيم بيعتمد على النسبة المرنة، واللي بتحدد عدد المقاعد المتاحة لطلبة نظام ستيم في الكليات العلمية.

وبكده لو كان الطالب بيركز أكثر على كلية معينة وغير مهتم بالبحث أو التعليم التطبيقي هتكون مدارس الثانوية العامة مناسبة أكثر له.

صعوبة طريقة الدراسة

بعض الطلبة مش بيعرفوا يتعلموا إلا بنظام الفهم والتلقين، ومش بيقدروا يبحثوا عن المعلومات صح ويوصلوا لنتائج كويسة حتى لو في حد بيساعدهم، وبكده بيكون في احتمالية كبيرة إنهم يفشلوا في نظام ستيم.

وده بيخليهم يترددوا كتير في قرار تقديمهم في نظام ستيم، ويوجهوا اهتماماتهم أكثر ناحية مدارس الثانوية العامة.

كمان الدراسة بتكون باللغة الإنجليزية، ودي بتمثل صعوبة عند عدد كبير من الطلبة، إلا إن صعوبة النقطة دي بتقل مع التدريب الكتير والتعود على نظام الدراسة مع الوقت.

الخلاصة

مدارس STEM هي مدارس مصرية للمتفوقين في العلوم والتكنولوجيا، بتساعد الطالب على التفكير المنطقي وإيجاد حلول للمشكلات قابلة للتطبيق، وبتأهله لدخول الكلية العلمية.

مناهج مدارس STEM بتحتوي على جزء من مناهج الثانوية العامة بجانب مناهج أمريكية بتعتمد أكثر على الفهم والمشاركة في المشاريع المطلوبة في كل ترم دراسي.

الطالب في نظام STEM بيكون هو المسئول عن الوصول للمعلومات اللي هتساعده يفهم المواد المقررة، بجانب مسئوليته عن الشرح لزمايله في حضور مشرف للتقييم والتعديل.

في السنة الأولى في مدارس ستيم بيتم دراسة كل المواد المتاحة، والطالب في بداية السنة الثانية بيختار الشعبة اللي حابب يكمل فيها.

من المخاوف الخاصة بالنظام ده هي عدم الحصول على فرصة لدخول الكلية اللي الطالب محددها؛ نتيجة وجود النسبة المرنة اللي بتختلف في كل سنة عن اللي قبلها.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

ورك شيت للاطفال Worksheet For Kids

ماث شيت – Math Worksheet 2

ماث شيت – Math Worksheet 2 يحتوي  علي الارقام و الاعداد للاطفال في مرحلة الكي جي للتدريبات علي توصيل الارقام و كتابتها و المراجعة عليها

كي جي 1 انترفيو – KG 1 Interview Worksheet

كي جي 1 انترفيو – KG 1 Interview Worksheet بيساعدك تدرب طفلك علي اسئلة اللي بيتعرض ليها اثناء التقديم لاي مدرسة لمرحلة الحضانة تدريبات اخري

انضم إلي جروب دليل المدارس المصرية

إقرأ أكثر..

mood_bad
  • لا توجد تقييمات/تعليقات.
  • اضف تعليق