أهم 8 معلومات عن مدرسة فريش الدولية للتكنولوجيا التطبيقية

بالتزامن مع الخطوات اللي بتاخدها وزارة التربية والتعليم المصرية لتطوير منظومة التعليم الفني ومواكبة التكنولوجيا الحديثة ظهر لنا نوع جديد من المدارس وهو المدارس الدولية للتكنولوجيا التطبيقية.

المدارس دي مختلفة تماماً عن كل مدارس التعليم الفني السابقة في مصر، لإنها بتتبع معايير جودة عالمية، والمناهج فيها مصممة عشان تواكب الأسواق المحلية والعالمية بكل التطور والتكنولوجيا الحديثة، فبتأهل الطالب يكون فني محترف من خلال التدريب العملي على أحدث الأجهزة والماكينات في مصانع وشركات الشريك الصناعي.

ومن ضمن المدارس الدولية اللي أعلنت عنها الوزارة هي مدرسة فريش الدولية للتكنولوجيا التطبيقية، ومن خلال المقال هنعرض لكم كل ما يخصها من شروط التقديم ونظام التعليم ومميزات المدرسة وغيرهم.

1- ما هي مدرسة فريش الدولية للتكنولوجيا التطبيقية؟

هي واحدة من مدارس التكنولوجيا التطبيقية اللي أعلن عنها نائب وزير التربية والتعليم في بداية السنة، وبدأت استقبال أول دفعة ليها من الطلبة الحاصلين على الشهادة الإعدادية في شهر سبتمبر 2022، ومكانها هو مدينة العاشر من رمضان الجديدة بمحافظة الشرقية.

ووضحت الوزارة على موقعها الرسمي أن مدرسة فريش للتكنولوجيا التطبيقية تم تأسيسها بالشراكة مع شركة فريش اليكتريك، ومشروع قوى عاملة مصر الممول من الوكالة الأمريكية للتنمية الدولية، وبالتالي المدرسة دي هتتبع أعلى معايير الجودة العالمية لتأهيل الطلبة على العمل بعد التخرج من غير ما يحتاج لدورات تدريبية.

ودي هتكون أول مدرسة، وهيتبعها عدد من المدارس في مختلف المحافظات، وكمان التخصصات الفنية فيها هتزيد خلال السنين الجاية.

2- نظام الدراسة بمدرسة فريش للتكنولوجيا التطبيقية

أعلنت الوزارة أن نظام التعليم بالمدرسة هيكون مقسم بين التعليم النظري والتدريب العملي، ففي جزء من الأيام هيدرس فيه الطالب المواد التخصصية والنظرية الأساسية زي الثانوية العامة، والمنهج الدراسي هيكون عبارة عن “علوم سياسية، وعلوم فنية، وتدريب عملي”، وباقي الأيام هيكون تدريب عملي بمصانع شركة فريش الموجودة بمدينة العاشر من رمضان، ومدة الدراسة هتكون 3 سنوات.

النظام دا مناسب جداً للطلبة اللي مش بيحبوا الحفظ الكتير، لإنهم هيتدربوا كتير وهياخدوا تطبيق عملي يساعدهم يلاقوا فرص عمل في مجال الأجهزة الكهربائية.

مدرسة فريش هتبدأ بتخصص من أهم تخصصات مراحل التصنيع، وهو تخصص الاسطمبات اللي بيكون محتاج خبرة كبيرة وكفاءة عالية عشان الطالب يقدر يشتغل فيه في مصر، والمدرسة هتساعده يوصل للمستوى دا، وخلال السنين الجاية هيبقى في مجموعة تخصصات تانية يقدر الطالب يختار بينها.

3- ما هي خطوات التقديم لمدرسة فريش الدولية للتكنولوجيا التطبيقية؟

التقديم لمدرسة فريش بيكون إلكتروني من خلال الموقع الرسمي لوزارة التربية والتعليم والتعليم الفني، والخطوات كالتالي:

• هيختار الطالب بيانات التقديم وتحديد الرغبات ما بين الاختيارات دي: التعليم المزدوج – مراكز التميز – التكنولوجيا التطبيقية.
• هيملى بيانات التقديم وتحديد الرغبات في النموذج اللي هيختاره بحد أقصى 3 رغبات.
• بيتاح للطالب التقديم فقط على المدارس والتخصصات اللي تناسب مجموعه في الإعدادية ومحل سكنه.
• بعد تسليم نموذج الرغبات الإلكتروني، بيتم توجيه الطالب لسداد مبلغ 100 جنيهًا من خلال شبكات الدفع الإلكتروني.
• بعد دفع الرسوم بيتحدد دخول امتحان القبول، وبيعرف الطالب ميعاد الامتحان من خلال المنصة الإلكترونية والبريد الخاص بيه.
• بيخضع الطالب لامتحانات القبول في المدارس المحددة كمراكز للامتحانات، وفي مواعيد محددة.
• بيتم تحديد المقابلة الشخصية بناءً على درجات امتحان القبول.
• يسدد الطلاب المرشحين للمقابلة الشخصية مبلغ 150 جنيهًا من خلال شبكات الدفع الإلكتروني.
• بيتم القبول بدءاً من تنسيق 230 درجة.
• بيتشكل لجان المقابلة الشخصية بالمدارس لفحص أوراق ومستندات الطلبة.
• بيتحدد الطلبة المقبولين على حسب معايير كل مدرسة بعد الانتهاء من المقابلات.

وأخيراً بيتم إعلام الطلبة بالقبول بالمدرسة والتخصص من خلال المنصة الإلكترونية والبريد الإلكتروني للطالب اللي سجل بيه على الموقع.

4- شروط التقديم بمدرسة فريش الدولية للتكنولوجيا التطبيقية بعد الإعدادية

أعلنت وزارة التربية والتعليم والتعليم الفني عن بعض الشروط اللي لازم الطالب يلتزم بيها عشان يتقبل في مدرسة فريش الدولية للتكنولوجيا التطبيقية، وهي:

• يكون الطالب حاصل على الشهادة الإعدادية عام 2021 – 2022.
• لا يقل المجموع الكلي للطالب عن 230 درجة.
• لا تقل درجة الطالب في اللغة الإنجليزية عن 48 درجة.
• التقديم متاح للطلاب البنين فقط من جميع أنحاء الجمهورية.
• يجتاز الطالب كل اختبارات القبول اللي وضعتها وزارة التربية والتعليم مع الشريك الصناعي.
• لا يقل طول الطالب عن 160 سم.
• أن يكون الطالب صحيح النظر.
• لا يزيد سن الطالب عن 18 سنة في أول شهر أكتوبر 2022.

5- اختبارات القبول بمدرسة فريش الدولية للتكنولوجيا التطبيقية

وهنا مفيش قلق لإن الاختبارات هتعتمد على المعلومات اللي درسها الطالب في المراحل السابقة ليه، والاختبارات الطبية والبدنية عشان يتأكدوا إن الطالب بصحة تأهله للوقفة والشغل لوقت طويل، وبتكون عبارة عن:

• اختبارات في اللغة العربية والإنجليزية والرياضة.
• اختبارات ذكاء وقياس للميول المهنية عند الطالب.
• اجتياز المقابلة الشخصية.
• كشف طبي للتأكد من عدم وجود أمراض مزمنة.
• اختبارات بدنية لقياس مدى توافق الطالب لطبيعة التخصص بالمدرسة لضمان السلامة المهنية.

وتعد الاختبارات دي هي الجزء الأساسي والمهم اللي لو الطالب اجتازه يبقى قطع شوط كبير في رحلة قبوله.

6- الأوراق المطلوبة للتقديم بمدرسة فريش الدولية للتكنولوجيا التطبيقية

أوراق التقديم بمدرسة فريش الدولية للتكنولوجيا التطبيقية ما تختلفش كتير عن باقي مدارس التعليم الثانوي بعد الإعدادية والأوراق المطلوبة هي:

• صور للطالب 4*6.
• أصل شهادة ميلاد الطالب.
• أصل شهادة إتمام المرحلة الإعدادية وصورة منها.
• بيان بدرجات الطالب في المرحلة الإعدادية.
• صورة بطاقة الرقم القومي لولي أمر الطالب.

7- مميزات مدرسة فريش الدولية للتكنولوجيا التطبيقية بعد الإعدادية 2022

من أهم المميزات اللي بيحصل عليها الطالب بعد التحاقه بمدرسة فريش الدولية للتكنولوجيا التطبيقية بنلاقي:

• يحصل الطالب على شهادة مصرية معتمدة ومطابقة للمعايير الدولية، بالإضافة لشهادة خبرة من الشريك الصناعي.
• يتوفر للطالب التدريب العملي أثناء فترة الدراسة بمصانع شركة فريش.
• يحصل الطالب على الزي المدرسي.
• يحصل الطالب على مكافآت مالية في فترة التدريب العملي.
• توفر المدرسة أتوبيسات للطلبة لنقلهم لأماكن التدريب.
• بتكون بيئة الدراسة تكنولوجية ومواكبة للتطورات العالمية.
• بتوفر المدرسة أنشطة تربوية لتنمية مهارات الطلبة.
• يتوفر فرص التعيين بشركات ومصانع الشريك الصناعي بعد التخرج.

يمكن للطالب أنه يلتحق بالكليات المتاحة زي شهادة الثانوية العامة بشرط الحصول على درجات تنسيق الكليات دي، وكمان بتزود فرصة الطالب للالتحاق بكليات التكنولوجيا الحديثة المعتمدة من وزارة التربية والتعليم.

اقرأ أيضًا: أهم 4 أنواع المدارس الثانوية في مصر.

8- مصاريف مدرسة فريش الدولية للتكنولوجيا التطبيقية

وضح نائب وزير التربية والتعليم إن المصروفات بالمدارس التكنولوجية التطبيقية الحكومية أو الدولية هتكون مبلغ رمزي ومش هتبقى عائق قدام الأهالي للتقديم، والمبلغ هيكون في حدود 500 جنيهًا سنوياً، والرسوم دي قليلة بالنسبة للتجهيزات المتطورة بالمدارس دي، والخدمة التعليمية اللي بتقدمها للطلبة.

وأخيرا، الثانوية العامة ما بقتش هي المحطة الوحيدة قدام طلاب المرحلة الإعدادية، وكمان مفيش داعي للقلق من التعليم الفني لمصر، لإن الدولة مهتمة بتطويره بشكل كبير جداً، وكل دا هيساعد الطالب يتأهل لسوق العمل ويسهل حصوله على فرصة عمل بعد التخرج.