أقسام وشروط التحاق وأرقام تليفونات مدارس مبارك كول الجيزة

الثانوية العامة مبقتش الحل الوحيد قدام طلاب المرحلة الإعدادية، بدائل كتير جداً ظهرت مؤخرًا، ويقدر الطالب يختار منها اللي يناسبه عشان يضمن مستقبل أفضل، ومنها مدارس مبارك كول الجيزة وتعُرف حاليًا بمدارس التعليم المزدوج.

مدارس مبارك كول تُعد اختيار جيد وليه مستقبل على المستوى المهني، في حالة الطلاب اللي لم يُوفقوا في مجموع الثانوية العامة، ودا لإنها بتوفر أكتر من مجال مهني يقدر الطالب يتعلمه، وبتأهله للعمل بمختلف المجالات الهامة في الصناعة.

والميزة كمان إن مدارس مبارك كول موجودة بمختلف محافظات مصر، وفي المقال دا هنعرض كل التفاصيل اللي هتساعد في التعرف أكتر على مدارس مبارك كول بالجيزة.

ما هي مدارس مبارك كول الجيزة؟

مدارس مبارك كول هي فكرة ألمانية تم تنفيذها بعد زيارة الرئيس السابق محمد حسني مبارك لألمانيا سنة 1991م، واللي كان هدفها تطوير التعليم الفني في مصر.

بتعتمد مدارس مبارك كول على المشاركة بين رجال الأعمال أصحاب المصانع، والشركات الخاصة، ووزارة التربية والتعليم والتعليم الفني، لتوفير أيدي عاملة ومُدربة للشغل في المصانع والشركات دي بعد كدا، هي وغيرها.

وبالتالي تم الربط بين التعليم والتدريب، من خلال قيام وزارة التربية والتعليم بتدريس المواد الفنية، والقطاع الخاص هيكون مهمته هنا هي التدريب المهني للطلاب داخل الأماكن الخدمية ومواقع الإنتاج.

المدارس دي موجودة في كل المحافظات، وبيعتمد نظام التعليم المزدوج على الجانب العملي أكتر من النظري، فبيدرس الطالب يومين نظري بس في المدرسة، ويقضي أربعة أيام في التدريب العملي في الشركات والمصانع.

الدراسة في مدارس مبارك كول الجيزة بتكون لمدة 3 سنين، وبعدهم بيحصل الطالب على دبلوم تعليم فني، بالإضافة للشهادة المحلية اللي هياخدها من التدريب العملي، بحيث توفر للطلبة تعليم عملي في مختلف المجالات المهنية المطلوبة في السوق، بالإضافة لحصول الطالب على مصروف شهري من المدرسة.

من أهم مميزات مدارس التعليم المزدوج دي إنها بتأمن للطلبة وظيفة بعد التخرج من المدرسة، وكمان بتأهل الطلاب لدخول كلية الهندسة، وغيرها من الكليات في حالات التفوق.

ومن أبرز النتايج الإيجابية لوجود مدارس التعليم المزدوج (مبارك كول سابقًا):

1- العائد على الحكومة

بالنسبة للحكومة فتم خفض استهلاك الطاقة، والخامات المستخدمة، وتكاليف الصيانة، ودا لتحمل القطاع الخاص معظم تكاليف تدريب الطلاب داخل مصانعهم، بالإضافة لخفض تكلفة الأجور للمدرسين، لأن الطلبة بتدرس “نظري” يومين بس في الأسبوع.

2- العائد على القطاع الخاص

بعد تطبيق نظام التعليم دا تمكن القطاع الخاص من:

• ضمان ولاء العمال ليهم، نتيجة لارتباطهم بالشركات والمصانع اللي اتدربوا فيها.
• توفير تكاليف الصيانة الناتجة عن العمالة غير المُدربة.
• الحصول على عمالة مُدربة.
• خفض تكاليف العمالة.

3- العائد على طلبة مدارس مبارك كول الجيزة

العائد الأكبر كان في حصول طلاب الإعدادية على اختيار جديد بيوفرلهم تدريب مهني جيد، وفرصة عمل مباشرة بعد التعليم الفني، بالإضافة للاستمرار في تطوير استراتيجية التعليم المزدوج وزيادة إقبال الطلبة عليه.

وعشان كدا زاد عدد الطلاب من 42 ألف طالب في سنة 2017م، لـ 55 ألف طالب مُلتحق بمدارس مبارك كول سنة 2021م بجميع المحافظات، وزادت عدد المدارس من 47 لـ 66 مدرسة، وكمان زاد عدد المهن اللي ممكن الطالب يشتغل بيها من خلال التعليم المزدوج لـ 56 مهنة.

وبتستمر جهود الدولة وطموحها لزيادة نسبة الطلبة المُلتحقين بالتعليم المزدوج من 3% لـ 10% من إجمالي طلاب التعليم الفني سنة 2030م، ودا من خلال التوسع وزيادة عدد شركات القطاع الخاص المُشاركة في المشروع.

أقسام مدارس مبارك كول الجيزة

تتوفر العديد من التخصصات المهمة بمدارس مبارك كول في الجيزة، وهي:

تخصص ملابس (بنين وبنات)

بيتدرب فيها الطالب على مهنة الملابس الجاهزة داخل خطوط الإنتاج، وبتبدأ من مراحل التجهيزات، والباترون، والقص، والحياكة، والسرفلة، والتشطيب، للوصول للمنتج النهائي، فيقدر الطالب بعد التخرج إنه يشتغل في أي مصنع للملابس أو ترزي لخياطة الملابس.

تخصص تركيبات كهربائية (بنين فقط)

هنا الطالب بيتدرب على تركيب، وصيانة، وتوصيل، وتشغيل الأجهزة، والدوائر الكهربائية، وتصميم وتشغيل أجهزة إنذار الحريق والإضاءة، بالإضافة لإصلاح المعدات، والمحركات الكهربائية، وبيقدر يشتغل كأخصائي كهرباء بالشركات، أو كهربائي لإصلاح الأجهزة المنزلية.

تخصص صناعات غذائية (بنين وبنات)

في القسم دا من أقسام مدارس مبارك كول الجيزة بيتدرب الطالب في مصانع الألبان، والعصائر، والمخبوزات، والحلويات، وبيقدر يشتغل بأي مصنع للصناعات الغذائية.

تخصص إلكترونيات (بنين وبنات)

في التخصص دا بيتم تدريب الطالب على مجال تصميم، وتجميع، ولحام الكروت الإلكترونية، وتجميع الأجهزة المنزلية الإلكترونية، ومعايرتها، وتحديد الأعطال فيها، وإصلاحها، بالإضافة لصيانة كاميرات المراقبة، وأنظمة الإنذار.

تخصص تشغيل ماكينات البلاستيك (بنين)

بيتدرب الطالب على تشغيل ماكينات البلاستيك المختلفة، وبيتعرّف على أجزاء الماكينة، وطريقة صيانتها، والخامات المستخدمة، وبيتعرّف كمان على نُظم الجودة، والفحص، ومراقبة الجودة، والبيئة.

تخصص طباعة وصباغة وتجهيز منسوجات (بنين)

التدريب هنا بيكون في مصانع الطباعة، والصباغة، وتجهيز المنسوجات، والطالب بيتعرّف على مراحل الطباعة، والصباغة اليدوية، والأوتوماتيكية، والأدوات المستخدمة، وبيكون قادر يشتغل بمصانع الطباعة، وصباغة النسيج.

تخصص فني إداري (بنين وبنات)

أحد أهم أقسام مدارس مبارك كول الجيزة، ودا لإن الطلبة فيه بيتدربوا على مختلف الأعمال الإدارية، زي:

• المشتريات.
• السكرتارية.
• الحسابات.
• المبيعات.
• الكمبيوتر.
• المخازن.

تخصص سمكرة ودوكو (بنين)

هنا الطالب بيتعرّف على جسم السيارة، وتركيب أجزائها، واستخدام الآلات، وبيتعرّف كمان على المعدات المستخدمة لمهنة السمكرة، والدوكو، ودهانات السيارات.

تخصص معدات ثقيلة (بنين)

بيتعرّف الطالب على جميع أنواع المعدات الثقيلة (الأوناش بأشكالها وأحجامها المختلفة)، والفرق بين المعدات، والتدريب على معرفة الأعطال، وصيانتها، وعمل الصيانات الدورية، وإصلاح الأعطال المفاجئة ميكانيكياً، وهيدروليكياً.

تخصص نجارة (بنين)

الطالب بيتخرج عنده معرفة بأنواع الأخشاب المختلفة، ومواد التشغيل الأساسية، وطلاء الأثاث، واستخدام الأدوات، وتشغيل ماكينات الأخشاب القديمة والحديثة، زي الـ CNC الإلكتروني، وتعلم مهارة كتابة وإدخال البرامج، والأوامر، والرسومات للماكينات اللي شغالة بالكمبيوتر.

تخصص تبريد وتكييف (بنين)

بيدرس الطلبة فك، وتركيب أجهزة التبريد والتكييف، والصيانة الدورية ليها، بالإضافة لصيانة جميع أنواع الثلاجات.

تخصص صيانة وإصلاح السيارات (بنين)

القسم دا من أقسام مدارس مبارك كول الجيزة بيركز على معرفة كل الصيانات الدورية، والإصلاحات اللازمة للسيارات، وفك وتجميع أجزاء السيارة، وكيفية الكشف عن الأعطال.

تخصص ميكانيكا صيانة وإصلاح (بنين)

خريجي القسم بيكونوا مؤهلين لفحص، وصيانة الماكينات والمعدات، والكشف عن الأعطال وإصلاحها، ومعرفة المهارات اليدوية، زي: البرادة، والحدادة، والتدريب على ماكينات الخراطة، واللحام لخدمة الصيانة.

تخصص طباعة وتغليف (بنين)

بيتدرب الطالب على المهارات الفنية لأقسام الطباعة المختلفة من تجهيزات فنية، وطباعة، ومعرفة جميع أنواع ماكينات طباعة الأوفست، وتشغيلها، وصيانتها.

كيفية التقديم في مدارس مبارك كول بالجيزة

أول حاجة الطالب بيعملها هي الدخول على الموقع المخصص لوزارة التربية والتعليم، ويسجل بالبريد الإلكتروني الخاص بيه، ويدخل بياناته الشخصية، وبعدها يختار مدارس مبارك كول الجيزة، وهنا بيكون من حقه اختيار 3 تخصصات كحد أدنى.

وبعد كدا هيسدد مصروفات التقديم في المرحلة الأولى (وقيمتها 100 جنيهًا)، ويسلّم نموذج إبداء الرغبة، وبيتم إعلام الطالب بترشحه من خلال المنصة.

بعد الوصول للمرحلة دي بيسدد الطالب رسوم 150 قدرها جنيه، وينتظر موعد الامتحان الخاص بيه.

شروط الالتحاق بمدارس مبارك كول الجيزة

بيعتمد التحاق الطلاب بمدارس مبارك كول في الجيزة، وغيرها من مدارس التعليم المزدوج بالمحافظات على بعض الشروط اللي لازم الطالب يحققها، وهي:

• عدم معاناة الطالب من الأمراض مثل: عمى الألوان، أو ضعف النظر، أو أي إعاقة تؤثر على الحركة.
• عدم قبول التحويل من المدارس الثانوية بأنواعها، سواء راسبين أو ناجحين.
• حصول الطالب على الشهادة الإعدادية في نفس سنة التقديم.
• الحصول على مجموع أعلى من تنسيق القسم اللي مقدم عليه.
• تجاوز الاختبار التحريري، والمقابلة الشخصية، والكشف الطبي.
• وجود الطالب كأحد سكان منطقة المدرسة، أو بالقرب منها.
• عدم قبول طلاب الإعدادية الأزهرية، أو المهنية، أو الدمج.
• عمر الطالب لا يقل عن 15 عام، ولا يزيد عن 18 عام.
• تجاوز طول الطالب لـ 150 سم كحد أدنى للتقديم.
• تقديم أصول الأوراق المطلوبة للمدرسة.
• الطالب يكون مصري الجنسية.

مع العلم إن المدرسة مش بتقدم أي منح دراسية للتعليم في ألمانيا، لا في مدارس الجيزة، ولا غيرها من المحافظات، ودي واحدة من عيوب النظام دا في نظر البعض.

قائمة بمدارس مبارك كول الجيزة

تتوفر فروع عديدة لمدارس مبارك كول في محافظة الجيزة في مختلف الأنحاء، لالتحاق الطلاب بيها، ومنها:

1- مدرسة مبارك كول الثانوية الصناعية المشتركة

تعد من أهم مدارس مبارك كول الجيزة، وبتضم تخصصات للبنين والبنات، زي:

• تخصص فني إداري.
• الملابس الجاهزة.
• تركيبات كهربائية.
• طباعة، وصباغة.
• إلكترونيات.

العنوان: أكتوبر، الحي السادس – بجوار سنتر وادي الملوك.
رقم التليفون: 01148668630.

2- مدرسة مبارك كول الثانوية الميكانيكية المشتركة

المدرسة دي بيتوفر فيها تخصصات كتير، وهي:

• تشغيل ماكينات بلاستيك.
• ميكانيكا صيانة وإصلاح.
• ميكانيكا تركيبات.
• طباعة، وتغليف.
• معدات ثقيلة.
• تبريد وتكييف.
• فني سيارات.

العنوان: شارع 5 – الحي الـ 11 – بجوار سنتر النخيل 2 – أكتوبر.
رقم التليفون: 02/38310755.

3- مدرسة الجيزة الكهربائية

من المدارس الشهيرة اللي بيتوفر فيها تخصصات مهمة، زي:

• صيانة وإصلاح السيارات.
• ميكانيكا صيانة وإصلاح.
• تركيبات كهربائية.
• ميكانيكا تركيبات.
• تبريد وتكييف.
• نجارة أثاث.

العنوان: أول شارع فيصل – بجوار المركز الطبي للخلفاء الراشدين – الجيزة.
رقم التليفون: 02/35850704.

4- مدرسة الطباعة الثانوية بإمبابة

أحد مدارس مبارك كول الجيزة اللي بيتوافر فيها تخصص واحد بس وهو الطباعة والتغليف، واللي بيؤهل الطالب لمعرفة أنواع الطباعة، ومراحلها، وبتجهزه للعمل بشركات الطباعة.

العنوان: 3 شارع العامل الأول – مدينة العمال – الجيزة.
رقم التليفون: 02/37130640.

5- مدرسة مبارك كول الجيزة الفنية

المدرسة الفنية للبنات بتجمع بين تخصصين مهمين مهنياً وفرصة العمل بيهم كبيرة، وهما: الملابس، وفني إداري.

العنوان: عمر مكرم، ساقية مكي، الجيزة، داخل شركة الجيزة للغزل والنسيج بكفر حكيم.
رقم التليفون: 02/35721363.

6- مدارس مبارك كول أبو رواش الصناعية

تعد من أشهر مدارس مبارك كول الجيزة، وفي آراء إيجابية عليها من أولياء الأمور والطلبة، وبيتوفر بيها تخصصات مهمة، زي: الملابس، سمكرة ودوكو، تبريد وتكييف.

العنوان: منطقة أبو رواش السكنية – إمبابة – الجيزة.
رقم التليفون: 01149998070 – 37692211.

مصاريف مدارس مبارك كول الجيزة

أعلن وزير التربية والتعليم والتعليم الفني بإن مصاريف الالتحاق بمدارس مبارك كول الثانوية بجميع أنحاء الجمهورية بمختلف أقسامها هي نفس مصاريف التعليم الفني في جمهورية مصر العربية، ويمكن للطالب زيارة أقرب مدرسة ليه والسؤال على المصاريف، أو التواصل معهم من خلال أرقام تليفونات مدارس مبارك كول.

الأوراق المطلوبة للالتحاق بمدارس مبارك كول الجيزة

التقديم لابنك في واحدة من المدارس المذكورة بيتطلب الأوراق دي:

• استمارة تقديم الطالب، وقياس الطول والوزن للطالب قبل ملء الاستمارة.
• أصل إيصال تسديد مصروفات المقابلة الشخصية، والاختبارات.
• تقديم بيان نجاح الطالب بكل مواد الشهادة الإعدادية.
• أصل الشهادة الإعدادية، وصورة منها.
• شراء ملف التقديم من المدرسة.
• صورة شهادة الميلاد (مميكنة).
• تقديم 8 صور شخصية للطالب.
• شهادة طبية مختومة للطالب.
• صورة بطاقة ولي الأمر.

اعرف أكتر عن: أنظمة التعليم الحديثة في مصر.

الخلاصة

التعليم في مصر ممكن يتطور بشكل إيجابي لو قدمنا اهتمام أكبر بالتعليم الفني، وفكرة التعليم المزدوج كانت فكرة عبقرية لفتح طرق واختيارات مختلفة أمام الأهالي والطلبة، للاختيار بين التعليم المزدوج، وباقي أنواع التعليم الفني، كبدائل للثانوية العامة.

مدارس مبارك كول الجيزة مش هي مدارس التعليم المزدوج الوحيدة في مصر، بالعكس هتلاقي فروع ليها في كل المحافظات على مستوى الجمهورية، وبالتالي دا بيسهل على الطلبة الالتحاق بيها أكتر، لأنهم مش محتاجين يتغرّبوا عن أهاليهم.

وهنا بيكون كل المطلوب بس إن الطالب وولي الأمر يتناقشوا سوا بخصوص المدارس دي، وطريقة التعليم فيها، ولو مناسبة للطالب يبقى ولي أمره يتواصل مع أقرب مدرسة ليهم، ويقدمله فيها على طول.