أهم ما تريد معرفته عن مدارس مبارك كول بعد الإعدادية 2024-2025

هل التعليم الفني قادر على إحياء مصر صناعيًا مرة تانية؟ 

في ظل بحث الدولة عن حلول فعّالة للنهوض بالصناعة المصرية مرة تانية، كان التعليم الفني هو أحد أهم الحلول دي، واللي بيتيح نظام التعليم المزدوج، اللي بيُعد بديل للثانوية العامة في مصر.

ومن هنا بدأ بحث أولياء الأمور وأبنائهم عن مدارس مبارك كول بعد الإعدادية، ومعرفة مميزاتها وعيوبها. 

وفي المقال دا هنتكلم عن أبرز التفاصيل اللي محتاج تعرفها عن نظام التعليم المزدوج “مدارس مبارك كول”، وهنذكر الأقسام المتاحة، وتنسيقها، وكيفية التقديم عليها، والأوراق المطلوبة للتقديم، بس خلينا الأول نفهم فكرة المشروع. 

ما هو مشروع مبارك كول؟

هو أحد برامج تطوير التعليم الفني في مصر، واللي تم بالتعاون بين الحكومة المصرية والحكومة الألمانية، ودا بعد زيارة رئيس الجمهورية السابق محمد حسني مبارك لدولة ألمانيا سنة 1991م، فنتج عنها بداية إنشاء مدارس مبارك كول بعد الإعدادية، أو ما يُعرف حاليًا بمدارس التعليم المزدوج. 

ودي نبذة عن بعض محاور المشروع: 

فكرة البرنامج

الفكرة هنا بتتمثل في مشاركة قطاع الأعمال الخاص مع الحكومة المصرية المتمثلة في وزارة التربية والتعليم، لتدريب الخريجين الجدد، وتهيئتهم لسوق العمل، ودا بالاعتماد على النظام الألماني في التدريس، اللي أثبت كفاءة عالية في النهوض بالصناعة في ألمانيا. 

نظام التعليم في مدارس مبارك كول بعد الإعدادية

صحيح إن مدة الدراسة في مدارس مبارك كول بتكون 3 سنين، لكن نظام الدراسة فيها بيختلف كليًا عن مدارس التعليم الفني العادية، فبتكون الأولوية للتدريب على الشق العملي، وبيتم تقسيم الأسبوع الدراسي ليومين بس للدراسة النظرية، و 4 أيام كاملة للتدريب في الورش والمصانع. 

بتستمر السنة الدراسية لمدة 11 شهر كاملين، ومفيش أجازة نصف سنوية، يعني السنة بتتقسم كالتالي: 

• 9 شهور دراسة. 
• شهر واحد إجازة صيفية. 
• شهرين تدريب عملي في المصانع بدون دراسة نظرية. 

 وبعد انتهاء مدة الدراسة، كل طالب بيحصل على شهادة معتمدة بمكان تدريبه، وبيكون ليه الأولوية في التعيين بشركات المشروع بعد تخرجه من مدارس مبارك كول بعد الإعدادية. 

العائد على قطاع الأعمال من المشاركة في المشروع

قطاع الأعمال الخاص بيقدم تدريبات متنوعة لطلبة مدارس مبارك كول، ودي بتعود عليه بالنفع في: 

• الاعتماد على المتدربين في الصيانة والإنتاج أثناء فترة تدريبهم، ودا في حالة عدم توافر عمالة كافية. 
• تدريبهم لطلاب مدارس مبارك كول بعد الإعدادية يُعد بمثابة واجب قومي، وبيتم تقديره من الدولة. 
• ضمان ولاء المتدربين ليه، لأنهم نشأوا على إيده، وتطبعوا على إدارته. 
• الحصول على عمالة بتكاليف منخفضة، نظرًا لأنهم في فترة تدريب. 
• توفير الوقت والتكاليف المستهلكة في تدريب العمالة غير المُدربة. 
• ضمان تجنب المخاطر اللي بتنتج عن تشغيل عمالة غير مُدربة. 

اقرأ كمان: أبرز ما تريد معرفته عن مدارس البريد بعد الإعدادية. 

أقسام مدارس مبارك كول وتنسيقها

مدارس مبارك كول بعد الإعدادية بيختلف تنسيقها سنويًا تبعًا لمعدلات الطلبة، لكنه عادةً بيكون أقل من تنسيق الثانوية العامة، ومن بعض المدارس الفنية الأخرى. 

وكمان بيختلف تنسيق الأقسام داخل المدرسة الواحدة، فبعد قبول الطالب بالمدرسة، بيسجل رغباته بحد أقصى 3 أقسام فقط، وبيتقبل في القسم المناسب لمجموعه. 

وتنسيق الأقسام حسب السنين اللي فاتت كان كالتالي: 

1. قسم الإلكترونيات الصناعية (بنين وبنات): بيقبل من 240 درجة.
2. قسم الفني الإداري (بنين وبنات): بيقبل من 230 درجة. 
3. قسم التبريد والتكييف: بيقبل من 225 درجة. 
4. قسم صيانة وإصلاح السيارات: بيقبل من 220 درجة. 
5. قسم التركيبات الكهربائية: بيقبل من 215 درجة. 
6. قسم المعدات الثقيلة: بيقبل من 215 درجة. 
7. قسم ميكانيكا (صيانة وإصلاح): بيقبل من 205 درجة. 
8. قسم ميكانيكا تركيبات: بيقبل من 205 درجة. 
9. قسم تشغيل ماكينات البلاستيك: بيقبل من 205 درجة. 
10. قسم الطباعة: بيقبل من 200 درجة. 
11. قسم سمكرة ودوكو: بيقبل من 195 درجة. 
12. قسم نجارة الأثاث: بيقبل من 195 درجة. 
13. قسم المنسوجات: بيقبل من 195 درجة. 
14. قسم الصناعات الغذائية (بنين وبنات): بيقبل من 190 درجة. 
15. قسم الملابس الجاهزة (بنين وبنات): بيقبل من 190 درجة.

مهم تكون فاهم إن الأرقام دي بتتغير أحيانًا من مدرسة للتانية، ووارد تلاقيها بتختلف كل سنة في نفس المدرسة عادي، دا غير إن بعض المدراس مفيهاش كل الأقسام، وبالتالي ممكن تحتاج تتواصل مع إدارة المدرسة تليفونيًا الأول. 

ودا بنساعدك فيه من خلال مقال: أرقام تليفونات مدارس مبارك كول في مصر.

مميزات مدارس مبارك كول بعد الإعدادية

كعادة أي نظام دراسي لازم يكون فيه مميزات وعيوب، ودورك كولي أمر إنك توازن بينها عشان تقدر تاخد القرار الصح المناسب لابنك أو بنتك. 

ومن مميزات مدارس مبارك كول بعد الإعدادية بنلاقي: 

• منح الطالب المجتهد والمتميز عقد عمل بعد التخرج، في واحدة من الشركات اللي اتدرب فيها. 
• الحصول على شهادة معتمدة من المصنع أو الورشة اللي اتدرب فيها الطالب أثناء الدراسة. 
• وجود فروع للمدارس دي بكل محافظات مصر، يعني الطالب مش محتاج يتغرب عن أهله. 
• ترشيح الطالب بعد التخرج في الشركات والمصانع، ودا في حالة عدم حصوله على وظيفة. 
• إعطاء الأولوية في العمل لطلاب مدارس مبارك كول عن باقى مدارس التعليم الفني.
• تقديم مكافآت مالية للطلاب خلال فترة التدريب، لتحفيزهم على الالتزام بالدراسة.  
• عدد الطلاب في الفصل محدود، لضمان جودة التعليم (مايزدش عن 24 طالب). 
• الحصول على شهادة تقييم بعد الدارسة، واللي بتُعد كشهادة خبرة للطالب. 
• اكتساب المهارات المطلوبة لسوق العمل، عن طريق التدريب العملي. 
• منح إجازات للطلبة قبل بداية الامتحانات، واللى بتوصل لأسبوع. 
• توفير ورش ودورات تدريبية مجانية للطلاب لتنمية مهاراتهم. 
• عدد المواد الدراسية 6 مواد بس، وبتختلف حسب القسم. 
• تأهيل الطلاب للعمل بالخارج، خصوصًا بالخليج العربي. 
• إمكانية الالتحاق بكلية الهندسة في حال تفوق الطالب. 

المزيد على موقع دليل المدارس المصرية: أشهر أنظمة التعليم الحديثة في مصر ومُميزات كل منها. 

عيوب مدارس مبارك كول بعد الإعدادية

أما عن عيوب مدارس مبارك كول بعد الإعدادية، فهي: 

• الدراسة العملية في المصانع بتستمر لأربع أيام كامة، ودي حاجة مُرهقة لبعض الطلبة غير المدربة. 
• الطالب الراسب في الصف الأول بيتحول لمدرسة تانية على طول، ومش بيقدر يعيد السنة. 
• الطالب عُرضة للإصابات أثناء التدريب؛ لأنه بيتولى مهام حقيقية في مجاله. 
• الإجازة السنوية بتكون شهر واحد بس، ودا ممكن يكون غير كافي للطلبة. 
• مفيش منح دراسية لدولة ألمانيا، سواء أثناء الدراسة أو بعدها. 
• مفيش أتوبيسات تابعة للمدرسة لنقل الطلبة منها وإليها. 

وبكدا نكون وضحنا الصورة كاملة وقدرنا نعمل مقارنة بكل شفافية لأهم المميزات والعيوب. 

شروط التقديم في مدارس مبارك كول بعد الإعدادية، ومصاريفها

القبول في مدارس مبارك كول بيتم عن طريق عدة شروط، منها: 

• حصول الطالب على الشهادة الإعدادية العامة في نفس عام التقديم في المدرسة. 
• الطالب يكون مصري الجنسية، ويُشترط حُسن المظهر، والسلوك، والسمعة. 
• سن الطالب عند التقديم مايزدش عن 18 سنة ونص للذكور، و 19 سنة للإناث. 
• حصول الطالب على الدرجات اللي بيحددها التنسيق للقسم اللي هيقدم عليه. 
• عدم معاناة الطالب من أي أمراض مُزمنة، أو أمراض مُعدية. 
• تمتع الطالب بلياقة بدنية تؤهله للعمل الفني في الورش. 
• اجتياز الطالب لاختبارات القدرة، والمقابلة الشخصية. 
• طول الطالب مايقلش عن الحد الأدنى (150 سم). 

رغم المميزات الإضافية لمدارس مبارك كول عن باقي مدارس التعليم الفني، لكن تظل مصاريف الدراسة مساوية لمصاريف المدارس الفنية الأخرى بدون زيادة ملحوظة، وتقدر تتأكد منها من خلال التواصل مع إدارة أي مدرسة منهم. 

الموانع الطبية للالتحاق بمدارس مبارك كول

نظام الدراسة العملي في الورش والمصانع التابعة لمدارس مبارك كول بعد الإعدادية بيتطلب إن الطالب يكون معافى صحيًا من بعض الأمراض اللي ممكن تعرض حياته للخطر، زي: 

• النحافة الشديدة، أو الزيادة المفرطة في الوزن. 
• عمى الألوان، وضعف النظر الشديد. 
• الأمراض المزمنة كالسكر. 
• الأمراض الجلدية المعدية. 
• فقدان إحدى العينين. 
• فقدان أحد الأطراف. 
• وجود إعاقة حركية. 
• حساسية الصدر. 
• ضعف السمع. 
• أمراض القلب. 
• الأنيميا الحادة. 
• الأورام. 
• الصرع. 

وبيتم عمل كشف طبي للتأكد من إن الطالب مُعافى من الموانع الطبية دي، قبل القبول في المدرسة.  

كيفية التقديم في مدارس مبارك كول، والأوراق المطلوبة

بيدخل الطالب الراغب في التقديم على مدارس مبارك كول بعد الإعدادية على الموقع المخصص لوزارة التربية والتعليم، ويسجل بالإيميل الخاص بيه، ويملأ بياناته الشخصية كلها، وبعدها يختار المدرسة اللي عاوز يقدم عليها، ويستنى ميعاد الامتحان المخصص ليه داخل المدرسة. 

أما عن الأوراق المطلوبة للتقديم، فهتحتاج: 

• أصل إيصال تسديد مصروفات المقابلة الشخصية والاختبارات. 
• أصل وصورة شهادة إتمام المرحلة الإعدادية (وش وضهر). 
• قياس طول ووزن الطالب قبل ملء الاستمارة. 
• عدد 8 صور شخصية للطالب (مقاس 4*6). 
• شراء ملف التقديم من المدرسة. 
• شهادة ميلاد مميكنة للطالب. 
• صورة بطاقة ولي الأمر. 

اقرأ أيضًا: مدارس التعليم الفني | تعرف على أشهر 10 مدارس. 

الخلاصة

التقديم في مدارس مبارك كول بعد الإعدادية ممكن يكون خطوة مهمة في مستقبل ابنك، لأنه واحدة من أهم الخطوات التطويرية اللي عملتها الدولة لتطوير التعليم الفني في مصر، بالتعاون مع الحكومة الألمانية، ودا طبعًا بعد ما تتأكد إذا كان النظام دا مناسب لابنك ولا لأ. 

فالمدارس دي رغم إنها بتتميز بحاجات كتير مهمة، زي إن هدفها الأساسي هو تهيئة الطلبة فيها لتلبية احتياجات سوق العمل، من خلال تدريبهم في شركات ومصانع تابعة للمشروع، إلا إنها بتستهلك جزء كبير من وقت، ومجهود الطلبة على مدار الـ 3 سنين، لإن الدراسة فيها بتستمر لـ 11 شهر كل سنة. 

وعشان كدا لازم تتكلم مع ابنك، وتناقش معاه كل مميزات وعيوب مدارس مبارك كول بعد الإعدادية اللي ذكرناها، وتحددوا سوا إذا كان هيقدر فعلًا يتأقلم مع النظام دا ولا لأ.