حلول للحد من مخاطر التكنولوجيا على الأطفال

 أطفالنا نشأوا في زمن كله تكنولوجيا، اتولدوا والموبايل والتابلت واللاب والشاشة وغيرهم من الأجهزة موجودة.

دا غير إنهم شايفين أهاليهم بيستخدموها لأوقات طويلة ومش بيشاركوهم أي أنشطة أو وقت، وبالتالي كبروا وزاد استخدامهم ليها وكمان حبوا المحتوى اللي بتقدموا لإنه جذاب بالنسبالهم عن الحياة الواقعية.

يمكن دا يبان بسيط لكن الحقيقة إن الاستخدام المفرط للتكنولوجيا تأثيره سلبي جداً على الأطفال وبيسببلهم مشاكل كتيرة أهمها اضطراب النوم والانفعال الزايد والكسل وغيره.

ودا يخلينا ندور على حلول للحد من مخاطر التكنولوجيا على الأطفال عشان نحميهم منها، ونخليهم يستفيدوا منها بطرق سليمة.

في المقال دا، هنعرض أهم مخاطر التكنولوجيا على الأطفال، وأهم الحلول للحد من مخاطرها، وإزاي نقدر نبدل الوقت الطويل على الشاشات لوقت مفيد ونغير من عادات أطفالنا، تابع معانا.

الآثار السلبية للإفراط في استخدام الشاشات على الأطفال

الاستخدام المفرط للشاشات ليه آثار سلبية كتير على صحة الطفل النفسية والبدنية وفقاً لدراسة اتنشرت على موقع NIH ومن أهمها:

1. فترة اهتمام أقصر

الأطفال اللي بيتعرضوا لمحتوى سريع الإيقاع بيكون عندهم صعوبة في التركيز على الأنشطة التقليدية زي القراءة أو حل الألغاز.

لإن التحفيز المستمر اللي بتوفره الشاشات بيخلي الدماغ متعودة على الإشباع الفوري، وبالتالي دا بيضعف القدرة على التركيز على المهام طويلة المدى.

2. صعوبة التعاطف

الأطفال بتحتاج لتفاعل مباشر لتطوير التعاطف وفهم مشاعر الآخرين.

والاستخدام المفرط للشاشات بيقلل من الفرص المتاحة للتفاعلات دي، وبالتالي بيحصل صعوبة في قراءة تعبيرات الوجه أو فهم نبرة الصوت، وبالتالي التأثير على مهاراتهم الاجتماعية بتقل وتعاطفهم بيقل.

وبالتالي واحد من أهم الحلول للحد من مخاطر التكنولوجيا على الأطفال بيكون من خلال التواصل الجيد معاهم.

3. ضعف التحكم في الانفعالات

تبعاً لدراسة اتنشرت على موقع NIH أثبتت إن الأطفال اللي بتتعود تقضي وقت طويل أمام الشاشات للحصول على مكافآت سريعة، زي الألعاب الإلكترونية أو مقاطع الفيديو القصيرة.

بيكون عندهم ضعف في القدرة على ضبط النفس، وبالتالي بيخليهم أكتر عرضة لنوبات الغضب، وضعف القدرة على التحمل العاطفي، وصعوبة التعامل مع الإحباط في الحياة الواقعية.

4. الإصابة ببعض الأمراض

تبعاً لدراسة اتنشرت على موقع Researchgate أثبتت إن الجلوس الطويل أمام الشاشات للأطفال بيصيبهم بضعف في النظر، واضطراب النوم، وضعف المستوى البدني والعقلي بشكل كبير عن غيرهم من الأطفال.

حلول للحد من مخاطر التكنولوجيا على الأطفال

بسبب التطور التكنولوجي الكبير اللي بنعيشه وتوافر الأجهزة بأنواعها بقى من الصعب نحدد للأطفال وقت معين للشاشات، خصوصًا مع التطبيقات، والألعاب، والسوشيال ميديا اللي بقت جزء من حياتهم اليومية.

ولإن استخدام الشاشات بزيادة ممكن يسبب مشاكل كتير؛ فدي أهم الحلول للحد من مخاطر التكنولوجيا على الأطفال من غير ما يحسوا بالحرمان:

1. حدد وقت معين للشاشات

خلي في قواعد واضحة للوقت المسموح بيه يوميًا، ويفضل ما يزيدش عن ساعة أو ساعتين للأطفال الصغيرين، وكمان حدد وقت معقول للأطفال الأكبر.

ودا لإن وجود حدود واضحة هيسهل عليك التحكم في الوضع من غير ما يحصل مشاكل أو اعتراضات.

2. اعمل أماكن في البيت خالية من الشاشات

حدد أماكن ممنوع فيها استخدام الشاشات، زي السفرة أو أوضة النوم. دا هيشجع التفاعل العائلي وهيقلل من إغراء الأطفال إنهم يستخدموا الموبايل أو التابلت أثناء الأكل أو قبل النوم.

3. شجع اللعب والحركة

واحد من أبرز الحلول للحد من مخاطر التكنولوجيا على الأطفال هو التحفيز  على ممارسة أنشطة بدنية زي ركوب العجل، أو الجري، أو زيارة الحدائق، أو الرياضة بأنواعها، أو الأنشطة الإبداعية المختلفة. الأنشطة دي مش بس هتشغلهم عن الشاشات، لكن كمان هتفيد صحتهم ونموهم.

4. خليك قدوة ليهم

من أسهل الحلول للحد من مخاطر التكنولوجيا على الأطفال هو رؤيتهم للأشخاص اللي حواليهم مش بيستخدموها كتير، وبيقوموا بأنشطة تانية زي القراءة والمشي والمساعدة في أمور المنزل.

فلو أنت طول الوقت ماسك موبايلك أو بتتفرج على التلفزيون، أكيد أطفالك هيقلدوك، فمهم جداً تقلل من استخدامك للشاشات قدامهم وركز أكتر على الأنشطة الواقعية.

5. خصص أوقات بدون شاشات

خلي في أوقات معينة خلال اليوم من غير موبايلات ولا تلفزيون، زي وقت الغدا، أو بعد الرجوع من المدرسة، أو قبل النوم. دا هيشجعهم إنهم يعملوا حاجات تانية مفيدة بدل ما يعتمدوا على الشاشات للتسلية.

6. خلي وقت الشاشة مفيد

ومن ضمن الحلول للحد من مخاطر التكنولوجيا على الأطفال هو الاستخدام المفيد للشاشات.

شجعهم يشوفوا فيديوهات تعليمية، أو يستخدموا تطبيقات تساعدهم في التعلم، بدل ما يكون وقت الشاشة مجرد تضييع وقت في الألعاب والتصفح العشوائي.

7. وفر بدائل مسلية بعيدًا عن الشاشات

عشان تنفذ حلول الحد من مخاطر التكنولوجيا على الأطفال لازم توفر بدايل ممتعة ليهم بدل ما يزهقوا ويلجأوا للموبايل، زي ألعاب الذكاء، والكتب، وألعاب الطاولة، والأنشطة اليدوية. كل ما كانت عندهم بدائل مشوقة، هيكون أسهل تبعدهم عن الشاشات.

8. أشركهم في أنشطة عائلية

خلي الأطفال يشاركوا في حاجات عائلية زي الطبخ، أو الزراعة، أو زيارة الأهل، أو شراء مستلزمات البيت؛ دا هيخليهم يحسوا بالانتماء وهيشغلهم عن استخدام الأجهزة طول الوقت.

9. استخدم أدوات التحكم الأبوي

معظم الأجهزة دلوقتي فيها إعدادات تخليك تتحكم في وقت استخدام الأطفال للشاشات، وتحدد المحتوى اللي يقدروا يشوفوه. استغل الميزات دي علشان تضمن إن وقت الشاشة يكون مناسب ومفيد ليهم.

ومن ضمن  أدوات إدارة وقت الشاشة تطبيقات زي:

• Google Family Link: لمراقبة وقت الشاشة والمحتوى.

• Apple Screen Time: لتحديد قيود زمنية على التطبيقات.

• Circle Home Plus: لإدارة الإنترنت المنزلي وتصفية المحتوى.

10. قلل وقت الشاشة بالتدريج

لو ابنك متعود يقضي وقت طويل قدام الشاشة، متحاولش تقطع عنه مرة واحدة، لأن دا ممكن يسبب مقاومة. ابدأ بالتقليل تدريجيًا، زي إنك تقلل 15 دقيقة كل أسبوع، لحد ما توصل للوقت اللي يناسب سنه ويكون صحي له.

وباتباع الحلول للحد من مخاطر التكنولوجيا على الأطفال هتقدر تخلي طفلك يستخدم الشاشات بشكل متوازن، من غير ما يحس إنه محروم منها أو مضغوط.

اقرأ أيضاً: الواقع الافتراضي في التعليم | تجربة تعليمية تفاعلية وممتعة.

إزاي تقلل استخدام الأطفال للشاشات أثناء الأكل؟

من الحجج اللي بيستخدمها الأطفال لاستخدام الأجهزة هي المشاهدة وقت الأكل سواء بالتلفزيون أو الموبايل أو التابلت.

لكن الخبراء بينصحوا إننا نقلل استخدام الشاشات وقت الأكل علشان نشجعهم على عادات غذائية صحية، ونحسن الهضم، وكمان نقوّي الترابط العائلي.

ودي بعض الحلول للحد من مخاطر التكنولوجيا على الأطفال في وقت الوجبات:

1. حط قواعد واضحة لوقت الأكل

خلي وقت الأكل خالي من الشاشات تمامًا، واشرح لطفلك إن دا وقت للأكل والتواصل مع العيلة. لو من الأول حددت القواعد ومنعت وجود أي أجهزة على السفرة، هتلاقي إن الموضوع بقى عادة عندهم ومش هيطلبوا الموبايل أو التابلت.

2. خلي وقت الأكل ممتع ومشوق

بدل ما الطفل يركز في الشاشة، خلي الأكل نفسه مصدر جذب ليه. استخدم أطباق ملونة، وقدّم الأكل بأشكال مرحة تشد انتباهه. كمان ممكن تحكي له قصة عن الأكل اللي بياكله علشان تخليه يستمتع بالأكل من غير ما يحتاج لشاشة.

3. ثبّت روتين الوجبات

من الحلول للحد من مخاطر التكنولوجيا على الأطفال وقت الأكل؛ هو تثبيت روتين، فلو خليت مواعيد الأكل ثابتة ومتوقعة، دا هيساعدهم إنهم يركزوا على الأكل بدل ما يفكروا في الشاشات. فلما يكون وقت الأكل حاجة منتظمة ومحبوبة، هيقل عندهم الإحساس بالملل أو الرغبة في التسلية بالموبايل.

4. استخدم التشجيع والمكافآت

لو طفلك أكل من غير ما يطلب الشاشة، شجّعه وامدحه علشان يعيد التصرف دا تاني. وممكن تدي له مكافأة بسيطة زي إنك تخليه يختار الحلوى أو الفاكهة اللي عايزها بعد الأكل. التشجيع الإيجابي هيخليه يربط وقت الأكل بالإحساس بالإنجاز والمتعة.

5. خليهم يشاركوا في تحضير الأكل

الأطفال بيحبوا يحسوا إنهم جزء من أي نشاط، فلو خليتهم يساعدوك في تحضير الأكل، زي إنهم يقلبوا السلطة، أو يرتبوا السفرة، هيكونوا متحمسين أكتر للوجبة نفسها وهيقل تفكيرهم في الشاشات.

6. قلل وقت الشاشة تدريجيًا

لو ابنك متعود على الشاشات وهو بياكل، متحاولش تمنعها فجأة علشان متحصلش مقاومة. قلل الوقت بالتدريج، زي إنك تطفي الشاشة بعد أول خمس دقايق، وبعدين تزود الوقت لحد ما يختفي استخدامها تمامًا أثناء الأكل.

7. خلي وقت الأكل وقت عائلي ممتع

استغل وقت الأكل علشان تتكلم مع طفلك عن يومه، وتسأله عن الحاجات اللي بيحبها. لما يحس إن وقت الأكل ممتع وفيه تفاعل مش هيحس باحتياج للشاشات.

8. تحلى بالصبر والثبات

استخدام حلول للحد من مخاطر التكنولوجيا على الأطفال مرهقة لتنفيذها وخاصةً لو الطفل بيقضي وقت كبير عليها يومياً، في البداية ممكن تواجه شوية اعتراض أو صعوبة، لكن مع الصبر والاستمرارية، طفلك هيبدأ يتعود إن وقت الأكل هو وقت العيلة والتواصل، مش وقت الموبايل أو التابلت.

بالتدريج، هتقدر تخلي طفلك يستمتع بوقت الأكل من غير شاشات، وهتساعده يكتسب عادات صحية مفيدة ليه على المدى الطويل.

إدارة وقت الشاشة للأطفال حسب العمر: دليل شامل للآباء

صعب تمنع الشاشات تماماً ودا لإن ليه جانب مفيد جداً ممكن يساعدك بشكل كبير في تعليم وتطوير مهارات طفلك، كل المطلوب منك هو إدارة الوقت والمحتوى بشكل يتناسب مع طفلك.

واستخدام حلول للحد من مخاطر التكنولوجيا على الأطفال اللي هتخليك توازن بين وقت الشاشة والأنشطة المهمة لنمو طفلك العقلي والجسدي.

ودي أهم التوصيات لاستخدام الشاشات حسب الفئة العمرية، ونصائح لمساعدة الأطفال على تطوير عادات صحية.

0 – 2 سنة: لا وقت للشاشة

توصي الأكاديمية الأمريكية لطب الأطفال (AAP) بتجنب وقت الشاشة تمامًا، باستثناء مكالمات الفيديو مع العائلة.

ودا لإن المرحلة دي حاسمة لتنمية المهارات الحسية والحركية، وعشان كدا يُفضل التركيز على اللعب الحركي والتفاعل الاجتماعي بدلاً من الشاشات.

وفي حال اضطريت لدا يكون وقت بسيط ويكون على شاشة كبيرة ممكن فيديو ليكم أو لأطفال من عيلته هو متعود على صوتهم وعارفهم، ودا في الغالب من فوق السنة ونصف عشان تبعده عنك في وقت الأعمال المنزلية.

2 – 5  سنوات: وقت محدود (40 دقيقة يوميًا)

يُنصح بألا يزيد وقت الشاشة عن 40 دقيقة يوميًا، مع التركيز على المحتوى التعليمي، ويفضل يكون الآباء جزء من تجربة المشاهدة لمناقشة المحتوى مع الطفل وتعزيز الفهم.

ولازم تحقيق توازن بين وقت الشاشة والأنشطة الحركية زي اللعب، الرسم، والقراءة.

6 – 12 سنة: ساعتان كحد أقصى يوميًا

يسمح للأطفال في العمر دا قضاء ساعتين يوميًا كحد أقصى على الشاشات مع مراقبة نوع المحتوى اللي بيتفرجوا عليه.

ويُفضل وضع حدود زمنية واضحة لتجنب تأثير الشاشات على الدراسة والهوايات والتفاعل الاجتماعي.

والأفضل في المرحلة دي التشجيع على الأنشطة البدنية زي الرياضة واللعب الإبداعي للحفاظ على صحة الطفل وتوازنه النفسي.

أكتر من 13 سنة: التوازن مع إرشادات الأسرة

ممكن وقت استخدام الشاشات يزيد بسبب الدراسة، ووسائل التواصل الاجتماعي، والألعاب، لكن من الضروري تحقيق التوازن.

ومهم للمراهقين تخصيص وقت للأنشطة غير الرقمية زي التمارين الرياضية، التفاعل العائلي، والنوم الكافي.

وواجب على الآباء توعية المراهقين على المخاطر المحتملة زي اضطرابات النوم، إجهاد العين، والتأثير النفسي لوسائل التواصل الاجتماعي.

دور الأنشطة الخارجية في تقليل وقت استخدام الأطفال للشاشات

الأنشطة الخارجية من أفضل الحلول للحد من مخاطر التكنولوجيا على الأطفال، ودا لإنها بديل ممتع وصحي وبيقلل من إدمان الشاشات، ومن أهم فوائدها:

1. تعزيز الصحة الجسدية

تُساعد الأنشطة الخارجية زي ركوب الدراجات، كرة القدم، أو المشي في تحسين اللياقة البدنية للأطفال، وتقوية عضلاتهم، وتعزيز مهاراتهم الحركية. دا بالإضافة إنها بتقلل من مخاطر السمنة الناتجة عن نمط الحياة الخامل، خاصةً مع الجلوس الطويل أمام الشاشات.

2. تحسين الصحة العقلية والعاطفية

الوقت اللي بيقضيه الأطفال في الطبيعة له تأثير مهدئ يُقلل من التوتر والقلق، عشان كدا يعتبر من أفضل الحلول للحد من مخاطر التكنولوجيا على الأطفال؛ لإن اللعب في الهواء الطلق يُساعد في تصفية الذهن، ويُعزز المرونة العاطفية، وبالتالي الأطفال بتكون أكتر قدرة على التعامل مع المشاعر المختلفة مقارنةً بغيرهم المعتمدين على الشاشات كمصدر رئيسي للترفيه.

3. تنمية المهارات الاجتماعية

على عكس التفاعل الرقمي المحدود، تُشجع الأنشطة الخارجية اللعب الجماعي، ودا بيساعد الأطفال على تنمية مهارات زي التواصل، التعاون، وحل النزاعات.

دا بالإضافة للمشاركة في الألعاب الجماعية اللي بتعلمهم العمل بروح الفريق وبتعزز صداقاتهم.

4. تحفيز الإبداع وحل المشكلات

اللعب الحر في الهواء الطلق بيحفز الخيال عند الأطفال، سواء من خلال بناء الحصون، استكشاف الطبيعة، أو ابتكار ألعابهم الخاصة.

النوع دا من الأنشطة بيطور قدرتهم على التفكير الإبداعي واتخاذ القرارات، وهي مهارات مش موجودة وقت الشاشة.

5. تحسين جودة النوم

الاستخدام المفرط للشاشات خاصةً قبل النوم، بيأثر سلبي على دورة النوم بسبب الضوء الأزرق الصادر منها.

على عكس الأنشطة الخارجية اللي بتساعد في ضبط الساعة البيولوجية للأطفال، وبالتالي نومهم بيتحسن وبيكونوا نشيطين أكتر خلال النهار.

الخلاصة

زيادة استخدام الأطفال للتكنولوجيا لساعات طويلة بيأثر عليهم وبيؤدي لمشاكل كتيرة زي مرض السمنة، واضطراب النوم، وقلة الحركة البدنية، وغيرها.

ودا بيكون نتيجة للاستخدام السيء للتكنولوجيا وعدم متابعة الأهل للوقت والمحتوى اللي طفلهم بيقضيه على الأجهزة.

وعشان كدا استخدام حلول للحد من مخاطر التكنولوجيا على الأطفال بقى شيء مهم وواجب للحفاظ على صحتهم، ومن أهم القواعد دي: استخدام التكنولوجيا لأغراض تعليمية، وتحديد وقت معين للشاشات، ومراقبة المحتوى اللي الطفل بيشوفه، ومنع استخدام الأجهزة وقت الأكل، والحفاظ على تقليل استخدام الأهل للأجهزة عشان يكونوا قدوة لأطفالهم.

والأهم هو الحفاظ على الوقت العائلي والمناقشات والأنشطة المشتركة لإنشاء روتين صحي خالي من الشاشات للطفل.

المصادر

Why & How to Reduce Screen Time For Kids?

10 Easy Tips.

6 Tips on How to Prevent Tech Addiction in children.

5 Ways to Protect your Young Child Online.

The Negative Effects of Technology on Children.

How to Avoid Technology Addiction.