عمرك فكرت إزاي تعلم طفلك حاجة جديدة من غير ما تضغط عليه أو تخليه يحس إنه في امتحان؟
منهج منتسوري بيخلي الطفل هو بطل قصة تعليمه، بيختار ويتعلم براحة وبحب، مش بس بيحفظ.
المنهج ده مش بس طريقة تعليم، دي فلسفة بتشوف الطفل بعين مختلفة، وبتحترم قدراته واهتماماته من أول يوم.
وسواء كنتِ أم أو أب، أو حتى بتفكروا تقدموا لمدرسة، مهم تفهموا الأساس اللي بيقوم عليه نظام منتسوري التعليمي.
وفي المقال دا هنجاوب عن ما هو منهج منتسوري، وأشهر الأسئلة المتعلقة بطريقة منتسوري في التربية والتعليم.
ما هو منهج منتسوري؟
هو نظام تعليمي مختلف طورته دكتورة إيطالية اسمها ماريا منتسوري. بيعتمد على احترام قدرات الطفل الطبيعية، وبيشجع التعلم الذاتي في بيئة منظمة ومجهزة مخصوص.
وبتركز طريقة منتسوري في التعليم إنها تخلّي الطفل هو اللي يقود عملية التعلم بنفسه، وبتديله حرية يختار الأدوات والأنشطة اللي بتناسب سنه واهتماماته، وده كله بيتم تحت إشراف المعلم.
أصل الفكرة وفلسفة منهج منتسوري
فكرة ما هو منهج منتسوري بدأت مع دكتورة ماريا منتسوري في أوائل القرن العشرين، وكانت شايفة إن الطفل عنده عقل بيمتص كل حاجة حواليه، خصوصًا في أول 6 سنين من عمره.
ومن هنا بدأ يتأسس نظام منتسوري التعليمي اللي بيركز على إن الطفل يتعلم من بيئته الطبيعية من غير ضغط أو تقييمات تقليدية.
كمان طريقة منتسوري في التعليم بتؤمن إن الطفل عنده دافع داخلي للتعلم، ومش محتاج يتحفّز بالمكافآت علشان ينجح أو يتقدم.
اتعرف على: أفضل طرق المذاكرة للأطفال ونصائح للتشجيع على التفوق.
المبادئ اللي بيعتمد عليها منهج منتسوري
علشان نفهم بوضوح ما هو منهج منتسوري، لازم نعرف إنه قايم على ركائز أساسية بتفرقه تمامًا عن أي نظام تعليمي تقليدي.
1. احترام الطفل
أكتر حاجة بتميز نظام منتسوري التعليمي هي احترامه للطفل كفرد مستقل. يعني الطفل يقدر يختار الأنشطة اللي يحبها، ويشتغل على راحته، ويغلط ويتعلم من غلطه من غير ما حد يضغط عليه.
2. إعداد بيئة تعليمية مجهزة بعناية
طريقة منتسوري في التعليم بتعتمد على بيئة اسمها “البيئة المعدة”، ودي بتكون منظمة، هادية، وكل حاجة فيها ليها هدف واضح ومكانها معروف.
والأدوات التعليمية بتكون في متناول الطفل علشان يقدر يتعلم باستقلال.
3. إعطاء الطفل الحرية مع النظام
الطفل عنده حرية يختار هو هيشتغل على إيه ويقعد فين، لكن في نفس الوقت فيه قواعد عامة بتحافظ على النظام والاحترام بين الأطفال وبعض.
4. السماح بالتعليم الذاتي
من أهم إجابات سؤال ما هو منهج منتسوري إنه بيعتمد على فكرة إن الطفل هو اللي بيعلم نفسه بنفسه. دور المعلم هنا هو إنه يجهز البيئة ويكون موجود لو الطفل احتاج توجيه أو دعم.
5. الاعتماد على التعلم الفردي
في نظام منتسوري التعليمي، كل طفل ليه خطة تعليم خاصة بيه. مفيش منهج واحد للجميع، بالعكس، كل واحد بيتعلم حسب سرعته واهتماماته.
6. تحديد فترات الحساسية
طريقة منتسوري في التعليم كمان بتركز على إن كل طفل بيمر بفترات بيكون فيها مستعد يتعلم حاجات معينة، والمنهج بيستغل الفترات دي كويس علشان يقدمله الأنشطة المناسبة في الوقت الصح.
الأنشطة في منهج منتسوري
لو بتسألي ما هو منهج منتسوري، هتلاقي إن واحد من أهم عناصره هو الأنشطة التعليمية اللي الطفل بيشارك فيها بنفسه. والنظام بيقسم الأنشطة دي لمجالات أساسية بتخلي الطفل ينمو فكريًا، بدنيًا، واجتماعيًا في نفس الوقت.
1. أنشطة الحياة العملية
لما بنسأل نفسنا ما هو منهج منتسوري؟، أول حاجة لازم نعرفها إن أنشطة الحياة العملية جزء أساسي جدًا من نظام منتسوري التعليمي، وبتكون غالبًا أول أنشطة الطفل بيتفاعل معاها في الفصل لأنها مألوفة ليه من حياته اليومية.
والأنشطة دي بتتنوع بين العناية بالنفس والعناية بالبيئة، زي:
- يغسل إيده ووشه، وينضف أسنانه، ويهتم بشكله زي تمشيط الشعر.
- يلبس هدومه لوحده، يربط الحذاء الخاص بيه.
- طي الملابس وتحضير وجبات بسيطة.
أما العناية بالبيئة، فدي بتشمل:
- صب الماء أو الحبوب من إناء للتاني، الكنس والمسح بأدوات صغيرة تناسب الطفل.
- ترتيب الورد، وسقي الزرع، وتقطيع الفاكهة أو الخضار.
2. الأنشطة الحسية والاجتماعية
في طريقة منتسوري في التعليم، فيه أنشطة خاصة بـ “الأدب والسلوك الاجتماعي” زي:
- تعليمه طريقة التصرف الصحيحة وقت الأكل، وإزاي يقدّم حاجة لحد باحترام.
- طريقة سلام الطفل بأدب وتقديم الناس لبعض.
أما بالنسبة للأنشطة الحسية، فهي جزء أساسي في نظام منتسوري التعليمي، وبتشتغل على تنمية الحواس والتمييز بين التفاصيل:
- في أنشطة اللمس: زي كيس الغموض اللي الطفل بيحس الحاجات جواه من غير ما يشوفها، وألواح بدرجات خشونة مختلفة.
- أنشطة السمع: زي الأسطوانات الصوتية اللي بيطابق بيها الأصوات، والأجراس اللي لها نغمات متنوعة.
كل التفاصيل الصغيرة دي بتخلي الطفل وعيه أكبر ببيئته، وبتنمي تركيزه وقدرته على التمييز والإدراك، وده من أهداف منهج منتسوري الأساسية.
3. أنشطة اللغة
في طريقة منتسوري في التعليم، الطفل بيتعرف على الحروف والقراءة والكتابة من خلال حاجات ملموسة زي الحروف الخشبية والكروت المصورة.
وكل ده بيتم بطريقة تدريجية وشيّقة، تخلي الطفل يحب اللغة ويتفاعل معاها من بدري.
وممكن هنا نستخدم كتب الصور وألعاب المفردات لتوسيع مفردات الطفل من خلال:
- وقت القصة والقراءة لتحبيب الطفل في اللغة.
- ترتيب ومطابقة الحروف.
- أغاني الأبجدية والأصوات.
4. أنشطة الرياضيات
الرياضيات في منهج منتسوري مش مجرد أرقام، هي أدوات وخرز وألوان. الطفل بيتعلم المفاهيم الحسابية زي الجمع والطرح من خلال لمس الأشياء وعدّها، وده بيسهل عليه يستوعبها بشكل أعمق، زي:
- العد باستخدام أدوات ملموسة زي الحبوب أو الكرات.
- ألعاب الذاكرة بالأرقام وألواح الـ 10 والـ 100.
- ترتيب الأشياء حسب الحجم من الأصغر للأكبر.
5. الأنشطة الثقافية والعلمية
ودي بتوسع أفق الطفل، بتعرفه على الجغرافيا، الكواكب، جسم الإنسان، وحتى الثقافات المختلفة. وغالبًا الجزء ده من الفصل بيتغير كل شهر حسب الموضوع الجديد، ومن أمثلتها:
- دراسة دورات الحياة زي تربية الفراشات أو الضفادع.
- رحلات في الطبيعة والمشي في الهواء الطلق.
- فرز الكائنات الحية من غير الحية.
- تجارب بسيطة عن أجزاء النبات.
6. أنشطة النظر والإدراك
في طريقة منتسوري في التعليم، بيتم التركيز على تطوير النظر والإدراك البصري عند الطفل من خلال أنشطة ممتعة زي:
- ألواح الألوان اللي بتساعد الطفل يميز بين درجات الألوان المختلفة.
- الأشكال الهندسية وألعاب البازل اللي بتنمي التفكير والتركيز.
- استخدام البرج الوردي لتعلم التدرج في الأحجام.
تعرف على: أبرز أسباب عدم التركيز عند الطفل وكيفية التغلب عليها.
ما هو منهج منتسوري وأهم أدواته؟
لازم تعرفي إن واحد من أهم عناصر المنهج هو الأدوات التعليمية اللي الطفل بيستخدمها. الأدوات دي مش موجودة عشوائي، كل واحدة ليها هدف واضح ومصممة بدقة علشان الطفل يتعلم من خلالها بإيده، ويكتشف أخطائه بنفسه من غير ما حد يقوله.
في نظام منتسوري التعليمي؛ هتلاقي حاجات زي:
- الخرز الملون: بيساعد الطفل يفهم الرياضيات بشكل ملموس.
- الحروف المحسوسة: بتسهل عليه يتعلم القراءة والكتابة.
- البرج الملون: بيعلم التدرج في الحجم.
- الأسطوانات: بتدرب على التمييز البصري.
- ألواح الألوان: بتنمي الحس الفني.
وكمان في أدوات للحياة اليومية زي أواني صغيرة، مكانس، ومشابك علشان يتعلم يعتني بنفسه وبيئته، وده جزء مهم جدًا في طريقة منتسوري في التعليم.
المراحل العمرية في منهج منتسوري: لكل سن طريقته
نظام منتسوري التعليمي بيقسم تطور الطفل لـ 4 مراحل أو “مستويات نمو”، وكل مرحلة ليها طريقة تعليم مختلفة حسب احتياجات الطفل:
من 0 لـ 6 سنين
هنا الطفل بيتعلم من كل حاجة حواليه، وبيكون عنده “عقل ماص”، يعني بيكتسب المعلومات بسهولة ومن غير مجهود.
من 6 لـ 12 سنة
الطفل بيبدأ يسأل ويستكشف، وبيهتم أكتر بالحاجات الاجتماعية والأسئلة الكبيرة.
من 12 لـ 18 سنة
هنا بيشتغل على بناء شخصيته، ومهاراته الحياتية، وبيكون مستعد يواجه العالم.
أنشطة منتسوري حسب العمر
للرضع (حتى 6 شهور)
أنشطة بسيطة زي بازل بقطع كبيرة وآمنة، كروت أبيض وأسود، إضاءات وألعاب سيليكون ملونة.
للأطفال الصغار (18 شهر – 3 سنين)
نشاطات زي ري النباتات، وترتيب الطاولة، وفتح وغلق صناديق وأوعية مختلفة، وكمان المشاركة في شوية شغل بسيط في البيت.
لسن الحضانة (3 – 6 سنين)
في المرحلة دي، أنشطة منتسوري بتكون معقدة أكتر وشغلها بيركز على تطوير استقلالية الطفل ومهاراته الحركية بشكل كبير.
هنا الطفل بيبدأ يتحمل مسؤوليات حقيقية في حياته اليومية.
- أنشطة الآداب والسلوك الاجتماعي.
- العناية بالبيت والبيئة.
- أنشطة في المطبخ.
- أنشطة الصب والنقل.
- أنشطة الحديقة والنباتات.
- رعاية الحيوانات الأليفة.
- العناية بالنفس.
مميزات منهج منتسوري
لو بتدور عن ما هو منهج منتسوري وليه ناس كتير بتفضله، وإيه أهم مميزاته:
- بيساعد الطفل ينمي مهاراته الاجتماعية من خلال التفاعل مع أطفال أكبر أو أصغر منه، وده بيقوي روح التعاون ويقلل فرص التنمر.
- بيخلي الطفل يتعلم من غير ما يستنى مكافأة أو يتخوف من العقاب.
- بيعلّم الطفل الاستقلالية والثقة بالنفس من بدري.
- بيخلي الطفل يعتمد على نفسه، يحل مشاكله.
عيوب منهج منتسوري
بعد ما عرفنا ما هو منهج منتسوري، لازم كمان نكون عارفين إن رغم مميزاته، ليه شوية تحديات؛ أهمها:
- التكلفة، لأن أغلب المدارس اللي بتطبّق منهج منتسوري بتكون أغلى من المدارس العادية، وده ممكن يصعّب على بعض الأهالي يختاروه.
- الاحتياج لروتين أو توجيه مستمر، لأن في أطفال محتاجين نظام وتعليمات واضحة طول الوقت، وطريقة منتسوري اللي بتعتمد على الاستقلالية ممكن تخلّيهم يحسّوا بتشتت.
- صعوبة الانتقال للتعليم التقليدي، لأن بعض الأطفال لما بينتقلوا لمدارس عادية معتمدة على امتحانات ودرجات، بيلاقوا فرق كبير في أسلوب التعليم وده ممكن يكون تحدّي ليهم.
أشهر الأسئلة عن منهج منتسوري
ودلوقتي هنجاوب على بعض الأسئلة المكملة لما هو منهج منتسوري، وطرق تطبيقه المختلفة.
1- إزاي بيتطبق منهج منتسوري في الحضانات والمدارس؟
لو بتسأل ما هو منهج منتسوري وبيطبقوه إزاي في المدارس؛ فخليني أقولك إن أول حاجة هتلاحظها هي شكل الفصل نفسه. مفيش صفوف وكراسي تقليدية، لكن هتلاقي الفصل متقسم لمناطق تعليمية: لغة، حسّي، رياضيات، حياة عملية، وثقافية.
كل منطقة فيها أدوات تعليمية مخصوصة، ومترتبة على رفوف في مستوى الطفل علشان يختار ويتعلم بنفسه.
نظام منتسوري التعليمي بيعتمد على إن المدرّس مش هو محور الفصل، لكنه مراقب ومرشد. بيشوف كل طفل مهتم بإيه وبيقدمله دروس فردية تناسبه.
كمان الأطفال بيكونوا من أعمار مختلفة، وده بيشجع التعاون ويخلي الكبير يساعد الصغير.
2- هل ممكن أطبّق منتسوري في البيت؟
نعم، وبكل سهولة. مش لازم أدوات غالية، لكن المهم توفر بيئة تساعد الطفل يكون مستقل.
يعني مثلًا، تحط هدومه وأدواته في مستوى يقدر يوصل له، تستخدم كراسي أو ترابيزات على قده، وتوفر له مساحة يشتغل فيها بحرية، سواء ركن للرسم، أو القراءة، أو أنشطة الحياة اليومية.
3- إزاي أنظم ركن منتسوري في البيت بخامات بسيطة؟
تنظيم ركن منتسوري في البيت مش محتاج ميزانية كبيرة، المهم تجهز بيئة منظمة وبسيطة تشجع الطفل على الاستقلالية وتخليه يستكشف بحرية في نظام منتسوري التعليمي من خلال:
اختيار وإعداد المساحة
أول حاجة اختار مكان هادي ومنظم بعيد عن المشتتات زي التليفزيون والضوضاء. مش لازم تكون المساحة كبيرة، ممكن يكون ركن صغير في أوضة الطفل أو جزء من غرفة المعيشة.
والمكان ده هيكون نقطة انطلاق الطفل في تعلمه بحرية وفق طريقة منتسوري في التعليم.
الأثاث الأساسي
1- الرفوف المنخفضة: استخدم رفوف مفتوحة ومنخفضة علشان الطفل يقدر يوصل للأدوات والمواد التعليمية بنفسه. ممكن تشتري رف أو حتى تستخدم صناديق خشب مقلوبة بدل الرفوف.
فكرة الرفوف المفتوحة دي من أهم مبادئ نظام منتسوري التعليمي عشان الطفل يشوف الأنشطة كلها قدامه ويختار بحرية.
2- تربيزة وكرسي صغيرين: وفر تربيزة وكرسي بمقاس مناسب لحجم الطفل. لو عندك تربيزة عادية ممكن تقصر رجلها عشان تناسب الطفل وتسمح له يشتغل براحة.
3- سجادة أو بساط للعمل: حط سجادة صغيرة أو بساط يقدر الطفل يشتغل عليه على الأرض، وده بيساعد على التركيز ويسهل عليه الحركة.
4- أدوات المطبخ:
- أباريق وأكواب بلاستيك صغيرة للصّب والنقل، سهلة الاستخدام وآمنة للطفل.
- علب فارغة (معلبات، علب بلاستيك) مختلفة الحجم للفتح والغلق، بتساعد على تطوير المهارات الحركية.
- صواني مافن أو كراتين البيض لأنشطة الفرز والفرز بالألوان والأشكال.
- معالق خشبية وأوعية بلاستيك لتمرين التنسيق اليدوي.
5- أقمشة ومنسوجات:
- مناديل ومناشف صغيرة للتنظيف وتعليم الطفل العناية بالنفس.
- قطع قماش قديمة للطي واللعب بالإحساس والملمس.
6- علب وصناديق:
- علب الأحذية أو علب بلاستيك فارغة للتخزين أو أنشطة الإدخال والفرز.
- كراتين لإعادة التدوير وصنع ألعاب تعليمية بسيطة.
أفكار اقتصادية إضافية
1- إعادة تدوير الأدوات: زي استخدام برطمانات الزجاج لتخزين الأزرار أو الخرز، أو علب الطعام البلاستيكية للفرز والتصنيف.
2- استغلال الطبيعة: جمع أغصان، أوراق، حصى وأشياء طبيعية تقدر تستخدمها في أنشطة الحسّ والإدراك.
3- مشاركة الطفل في التحضير: خلي الطفل يساعدك في تجهيز المواد، مثلاً يغسل ويجهز الخضار، أو يرسم كروت الأنشطة.
4- ما هو منهج منتسوري ومين الأطفال اللي بيناسبهم؟
المنهج مناسب لمعظم الأطفال، لكن بيظهر تأثيره بوضوح مع الأطفال اللي بيحبوا الاستقلال والتعلم على راحتهم.
ولإن نظام منتسوري التعليمي بيهتم بكل طفل على حدة، وده بيخلي الأطفال ذوي الاحتياجات الخاصة أو اللي ليهم أسلوب مختلف في التعلم يلاقوا بيئة مناسبة ليهم.
كمان، الأطفال اللي عندهم فضول طبيعي وبيحبوا يكتشفوا ويجرّبوا، بيزدهروا جدًا في طريقة منتسوري في التعليم لأنها بتسيب لهم حرية اختيار الأنشطة وتقدّم لهم بيئة مشجعة على الاستكشاف.
5- إيه أشهر كتب مفيدة لتطبيق منهج منتسوري في البيت؟
لو بتفكر تبدأ وعايز تفهم أكتر ما هو منهج منتسوري وتطبقه مع أطفالك، فيه كتب ممتازة ممكن تساعدك زي:
1- كتاب The Montessori Baby وكتاب The Montessori Toddler لـ Simone Davies، دول مناسبين جدًا لو أول مرة تتعرف على نظام منتسوري التعليمي وعايز تطبقه في أول سنين الطفل.
2- كتاب Montessori from the Start و Teach Me to Do It Myself، الكتب دي بتديك أفكار عملية ونصائح سهلة تقدر تنفذها في البيت.
3- لو حابب تتعمق في فلسفة طريقة منتسوري في التعليم نفسها، يبقى لازم تقرأ كتب ماريا منتسوري الأصلية زي The Montessori Method و The Absorbent Mind.
في النهاية، لو لسه بتسألِ نفسك ما هو منهج منتسوري؛ فببساطة هو أسلوب تربية وتعليم بيحترم شخصية الطفل، ويديله حرية الحركة والاختيار جوّه حدود واضحة، مع بيئة بسيطة ومجهزة تساعده يتعلم بنفسه خطوة خطوة.
وبتضمن أنشطة منتسوري أنواع مختلفة منها العملية، والحسية، واللغوية، والرياضية اللي بتبني عنده الاستقلالية، والتركيز، وحب التعلم، وبتخليه يشارك في شغل البيت والمدرسة بشكل حقيقي مش مجرد لعب عشوائي.
ودور الأهل هنا إنهم يوفروا ركن هادي ومنظم في البيت، بأدوات بسيطة وعلى قد الإمكانيات، ويشجعوا الطفل يجرب، ويغلط، ويتعلم من غير ضغط أو مقارنة بغيره.
ولو حسيت إن طريقة منتسوري مناسبة لقيم أسرتك وطريقتك في التربية، ابدأ بخطوات صغيرة في البيت، ومع الوقت هتشوف أثرها على ثقة طفلك بنفسه وتعاملاته معكم ومع العالم حواليه.
أضف تعليق