“المدرسة مملة أوي مش عاوز أروحها”
“مش عاوز أخرج، مش قادر أعمل حاجة”
“ماليش مزاج أخرج هفضل هنا وهلعب فيديو جيمز”
سمعتي الكلام دا كتير من طفلك وبشكل متكرر؟ حاسه إنه على طول زهقان ومش قابل بأي حاجة بيعملها؟
في الغالب دي سمات الطفل المهمل أو اللامبالي، ودا طفل ما عندوش حافز إنه يعمل أي حاجة لأسباب كتير ممكن تتعلق بسلوكيات غلط بتعمليها معاه في تربيته وما تعرفيش نتيجتها، أو سلوكيات أشخاص تانية حواليه.
وفي المقال هنوضح لك أهم سمات الطفل المهمل، وأبرز الأسباب وراء السلوك دا، وكيفية التعامل مع الطفل المهمل، وأهم الطرق والنصائح للتغلب على السلوك دا عند طفلك.
سمات الطفل المهمل
الأطفال كلهم بييجي عليهم وقت بيكسلوا وبيبقوا مش عاوزين يبذلوا مجهود، ودا ممكن يكون بسبب الإرهاق الشديد، أو بعد فترة امتحانات طويلة، أو مشاكل في البيت سببت له ضغط، أو دور تعب جامد، وغيره
ودا أمر طبيعي، ومش مستمر، وبيحصل على فترات طويلة، لكن الطفل المهمل دا بيكون الكسل عنده شيء مستمر وما عندوش رغبة لأي نشاط.
وقبل ما نقولك كيفية التعامل مع الطفل المهمل بشكل صحيح، هنعرفك أهم صفاته واللي لازم تكون بتتكرر معاه بشكل كبير :
- طلب كل حاجاته من اللي حواليه؛ فتلاقيه بيطلب منك كل حاجة زي إنك تجيبي له مياه، وتجمعي اللعب بعد ما يلعب، وهكذا.
- عدم الاهتمام بأدواته الخاصة زي إنه يرمي شنطته في أي مكان، وما يجمعش أدواته بعد المذاكرة.
- نسيان الواجبات المدرسية، وتركها قبل ميعاد المدرسة أو الدروس مباشرةً.
- تبلد المشاعر، والخمول في الحركة.
- عدم الاهتمام بالأشخاص اللي حواليه.
- الكسل وقلة النشاط.
وقبل ما ننتقل لطرق كيفية التعامل مع الطفل المهمل، لازم تعرفي الأسباب اللي ورا السلوك دا، عشان تقدري تتعاملي صح.
ما هي أسباب سلوك الإهمال عند الأطفال؟
تبعًا لدراسة اتنشرت على موقع Springer Link فسلوك الإهمال من أكتر السمات الواضحة عند الأطفال اللي بيعانوا من مشاكل عقلية زي اضطراب فرط الحركة ونقص الانتباه أو التوحد.
وبيتطور عندهم سلوك الإهمال نتيجة تحديات التعلم الخاصة بيهم، واللي بتسبب لهم الشعور بالإرهاق، وبالتالي بيهملوا معظم واجباتهم. ومع ذلك في أطفال أصحاء بيعانوا من سلوك الإهمال تجاه المدرسة، والأنشطة، والحياة عمومًا.
وبيرجع السبب إلى إن الطفل المهمل بيكون في الغالب مفتقر لوجود حافز لفعل أي شيء، دا بجانب العوامل الاجتماعية، والبيولوجية، والنفسية.
ومن أكتر الأسباب اللي بتخلي الطفل يفتقد لوجود دافع كبير هي عدم تلبية احتياجاته الأساسية، زي تكوين صداقات مثلًا.
فالطفل لو ما كونش صداقة مع طفل زيه بيفقد الثقة في الآخرين، وبيفقد الشعور بالسعادة في اللعب والخروج، لإنه في الغالب بيحتاج لطفل زيه يلعب معاه ويفهمه.
دا بجانب سبب تاني مهم جدًا وهو ضغط الأهالي على أبنائهم للحصول على درجات عالية في الدراسة، لإن دا بيأثر بشكل كبير على تحفيزهم، وبيحسسهم بالقلق والاكتئاب.
وبالتالي دا بيسبب للطفل إرهاق فبيلجأ لعوامل تشتيت زي ألعاب الفيديو جيمز، وبيبعد عن أداء واجباته المدرسية عشان يبعد عن الضغط دا.
دا بالإضافة لأسباب تانية مهمة بتسبب نفس النتيجة، ومهم تكوني عارفاها عشان تعرفي كيفية التعامل مع الطفل المهمل بشكل صحيح زي:
- عدم وجود قواعد النظام والترتيب في البيت.
- وجود خدم في البيت واعتماده الكلي عليه.
- الانتقادات على كل حاجة بيعملها.
- الحماية المفرطة والدلع الزايد.
- عدم إشراكه في أعمال البيت.
اتعرفي على: أهم صفات الطفل السلبي وكيفية التعامل معاه بطريقة صحيحة.
كيفية التعامل مع الطفل المهمل
أسلوب التربية اللي بتتابيعيه مع طفلك بيفرق في سلوكياته بشكل كبير، وفي أساليب وخطوات مهم جدًا اتباعها مع الطفل المهمل، وأهمها القواعد السلوكية والنظم اللي البيت ماشي عليها زي اللايحة كدا وتكون واضحة للطفل، ومن أهم الأساليب دي:
إلزام الطفل ببعض المسؤوليات
لازم تحافظي على مشاركة طفلك في مسؤوليات مناسبة لعمره، وتقدري تعملي دا من خلال التالي:
- شاركي طفلك في بعض الأنشطة اللي تحدديها معاه أسبوعيًا، واعمليها معاه وشجعيه.
- عوديه على تنظيف مكانه، وترتيب غرفته وسريره من سن صغير عشان يتعود على كدا.
- احرصي إنه يلم حاجته سواء بعد ما يخلص مذاكرة، وكتابة واجباته، أو بعد اللعب.
- وضحي الالتزامات اللي على طفلك، وحددي الأعمال اللي يشارك فيها في البيت.
الابتعاد عن التقليل من طفلك
من أكتر الأساليب الغلط اللي بتعملها الأمهات هي التقليل من طفاها قدام الآخرين، أو مقارنته مع إخواته أو قرايبه؛ زي أنت مش نضيف أنت كسلان، أنت ليه مش زي فلان؟ ليه هو أحسن منك؟
الطريقة دي هتخليه يعاندك، ويهمل أكتر. كمان ابعدي عن تذكيره بزلاته طول الوقت؛ لإن دا أسلوب مش صحيح، وبيسبب إحباط كبير للطفل، ودي نقطة مهمة في كيفية التعامل مع الطفل المهمل.
وضع قواعد محددة للسلوك
استكمالًا لرحلتك في معرفة كيفية التعامل مع الطفل المهمل فضروري تحطي قواعد سلوكية، بمعنى إنك تتكلمي معاه عن التصرف السليم في أغلب المواقف الحياتية، وتركزي على السلوك الصحيح أكتر من مرة عشان يعمله.
مهم تبعدي عن المثالية في كلامك معاه عن طفولتك أنتي أو باباه، وتفهميه إن عادي أي حد يغلط المهم يعترف بغلطه، ويحاول يصلحه، وما يكرروش تاني. وتستخدمي أسلوب الثواب والعقاب لكل فعل بيعمله الطفل، ومش مقصود العقاب بالأذى، أو الضرب، أو الإهانة.
الاعتماد على لغة الحوار
اتكلمي مع طفلك على قد ما تقدري، واعرفي دوافعه، وطريقة تفكيره ومشاعره، وهتقدري توصلي لدا من خلال:
- تغيير أسلوب الكلام معاه، يعني بدل “لِم حاجتك أنت مهمل” ، لـ “رتب حاجتك أنت بتحب النظام”.
- الاعتماد على الجلسات الحوارية مع طفلك، وفهم كل دوافع سلوكياته عشان تحليها.
الابتعاد عن المكافآت المتكررة
يعني ما تستخدميش أسلوب الرشوة معاه في كل حاجة، لإن ما ينفعش يكون كل واجب بيعمله يكون قدامه حاجة. فهميه إنه زي ما ليه حقوق عليه واجبات يعملها بدون مقابل، ويعملها بغرض المساعدة والمشاركة.
التقليل من وقت الشاشات
الطفل المهمل بيميل للشاشات وألعاب الفيديو بإسراف، وهنا دورك تقللي الوقت دا قدر الإمكان، وتبدليه بأنشطة مفيدة.
اقرئي: تأثير التكنولوجيا على الأطفال
الابتعاد عن أسلوب التهديد
حاولي قدر الإمكان ما تنفعليش عليه بشكل مبالغ لو تكاسل عن أي حاجة متفقين عليها، ونشطيه بطريقة محببة ليه، وابعدي عن أسلوب التهديد عشان الطفل ما يتعلمش التجاهل.
تجنب التسويف
ما تسوفيش أي حاجة اتفقتي معاه عليها، لإن بكدا أنتي بتهدمي الفكرة اللي بتحاولي تغذي عقله بيها، وهي المجهود والالتزام بيه.
وبكدا نكون ذكرنا لك أهم الطرق الصحيحة لكيفية التعامل مع الطفل المهمل، وأهم الطرق اللي تمنع نمو السلوك دا عنده.
اتعرفي أيضًا على: طريقة التعامل مع الطفل العنيد وشديد الذكاء
نصائح للأم للتغلب على سلوك الإهمال عند الأطفال
ما تقلقيش لو طفلك ظهر عليه سلوك الإهمال دا بشكل كبير، لإن سهل تتغلبي عليه وترجعي له نشاطه مرة تانية، ومن أهم النصائح اللي هتساعدك في دا:
خلي توقعاتك واقعية مع طفلك
التوقعات العالية للأهالي بتخلق طفل مهمل ولامبالي بشكل كبير ودا، لإنهم بيتوقعوا يكون الطفل شاطر، ومحترم، ومنضبط، وبيسمع الكلام، ودا مستحيل.
وبالتالي بيكون عليه ضغط من كل جهة، فبيبدأ يحس إنه مطلوب منه يكون شخص تاني عشان يحبوه، ودا بيسبب له إحباط، وبينمي عنده سلوك الإهمال
وهنا نصيحتنا ليكي “حبي طفلك بكل جوانبه وشخصيته، وانسي الطفل اللي كان نفسك تخلفيه”.
اعرفي طفلك كويس
من أهم خطواتك للتعرف على كيفية التعامل مع الطفل المهمل ومعالجة السلوك دا عنده هي معرفة
حقيقة طفلك؛ يعني بيحب إيه، وبيعرف يعمل إيه، وإيه هي نقاط قوة شخصيته، وإيه اللي بيسعده، ويحب يقضي وقته فين وإزاي، وهكذا
الطريقة دي هتعرفك دوافع طفلك، وإيه أهم الطرق لتحفيزه عشان يمارس حياته بشكل منتظم من غير شعوره بالملل.
اعرفي أحلامه
أكبر غلطة بيرتكبها الأهالي هي إجبار الطفل على أداء رياضة غير مناسبة، أو ممارسة أنشطة نفسهم يعلموها لطفلهم، وما يكونش حاببها أو عاوزها.
فبيحس بالإجبار، وبالتالي بيحس بالإحباط، وبيظهر عليه سلوك الإهمال تجاه النشاط دا، وبعض الأنشطة التانية.
عشان كدا خليكي حريصة إنك ما تفرضيش عليه حاجة من وجهة نظرك أو تتوقعي إنه يشوف الأمر زيك، لإن هو ليه أحلامه المختلفة عنك وعن أبوه تمامًا.
خليكي نموذج لتحفيزه
الطفل في أول سنواته بيستمد كل أفعاله منك أنتي وباباه؛ بيقلدكم في كل حاجة؛ يعني ما ينفعش تبقوا ما بتخرجوش وماسكين الموبايل في الأوقات اللي فاضيين فيها، وتتوقعوا إنه يكون نشيط للخروج والتمشية، أو للتمرين، أو للمدرسة.
هيسمع من باباه إنه مش بيحب الشغل، وبيشتكي منه طول الوقت ما تتوقعيش منه يكون نشيط في أداء واجباته ومذاكرته.
الصح هو إن طفلك يحب يشوفكم بتمارسوا رياضة، وبتخرجوا تتمشوا معاه، وبتقرأوا، وعندكم أهداف بتخططو لها وبتسعوا لتحققيها.
بكدا هتحفزي طفلك، وهتكوني قدوته، وهيقلدك بطريقته، وبالحاجات اللي بيحبها، بس هيتخلق عنده الحافز والنشاط.
اتأكدي من قيام طفلك بمجهود بدني وعقلي
لو طفلك طول الوقت مرتاح وما بيعملش أي حاجة في البيت طبيعي يكون كسول، وما يحبش يخرج، أو يروح التمرين.
وبالتالي لازم تشاركوه في الأعمال المنزلية اللي يقدر عليها، ويكون في وقت للتمشية من غير العربية. كمان لازم ينجز واجباته بنفسه بس وأنتي موجودة ومركزة معاه، ويعمل الأنشطة المطلوبة منه في المدرسة بمساعدتك.
دا هيخلق طفل متحمس ونشيط. أهم حاجة اشرحي لطفلك أهمية عمله، ومساعدته ليكم، وأهمية تشغيله لعقله لأداء واجباته ومجهوده في التمرين وغيره.
أظهري الحب والدعم لطفلك
دعم الأطفال في الاتجاهات اللي بيحبوها عامل مهم للتشجيع، ودا من خلال المكافآت الخارجية؛ يعني لو طفلك بيحب ممارسة رياضة الكرة اشتري له طقم للتمرين كل فترة، أو شارة عشان أداءه يتحسن أكتر كمان، ودا بينعكس على جوانب تانية.
استخدمي كلمات تشجيعية
أظهري دايمًا لطفلك إنك مهتمة بيه من خلال ملاحظاتك زي “النهاردة لعبت كويس”، “الجول كان عظيم”، “أنا فخورة جدًا بتصرفك في الموقف دا”، “أنا مبسوطة بيك وبمجهودك”.
لكن بلاش يكون دا بشكل مفرط لإن بينتج عنه طفل نرجسي وأناني ودا ليه توابع نفسية سيئة كتير تبعًا لمقال اتنشر على موقع Forbes.
شاركي طفلك
مش معنى إن طفلك مسؤول عن واجباته ومذاكرته إنه لازم يعملها لوحده، أو تقعدي جمبه وتكوني مش مركزة معاه، أو ماسكة الموبايل والتليفزيون شغال بصوت عالي، والمفروض إنه يركز وينجز واجباته.
الأفضل تخصصي وقت لإنجاز الواجبات، وتهيئي المكان، وتفضلي متابعة الطفل لحد ما تتأكدي إنه خلص وفهم كل حاجة.
دا هيساهم بشكل كبير في تقبله لوقت المذاكرة، وتحسن أداءه الأكاديمي تبعًا لدراسة اتنشرت على موقع IOP Science بتتكلم عن فرق الأطفال اللي بيشاركهم أهلهم في وقت المذاكرة، وقد إيه بيحفزهم على الإنجاز والفهم عن غيرهم من الأطفال.
وأخيرًا، أغلب البيوت بيكون فيها طفل مهمل مش مهتم بحاجته، وكسول عن أداء أغلب الأنشطة، ودا بيرجع لأسباب بيولوجية ونفسية واجتماعية، أهمها التدليل الزايد والحماية المفرطة، والانتقاد المستمر، وعدم التزامه بقواعد ونظم للبيت، ووجود خدم وأشخاص بيعتمد عليهم بشكل كلي.
ودا بيخلي الأمهات تسأل عن كيفية التعامل مع الطفل المهمل؛ فبنلاقي إن أهم حاجة اتباع قواعد السلوك والنظام في البيت عشان نزرع في الطفل إحساسه بالمسؤولية وعشان يقوم بواجباته.
ومن أهم الطرق للتغلب على السلوك دا إننا نقلل توقعاتنا في أطفالنا، ونتقبل إنهم مختلفين عننا كأهالي، ونعرف الطفل كويس، ونعرف أحلامه، ونشاركه في تحقيقها، وكمان نكون نموذج لتحفيزه.
ومع الوقت والمثابرة هيتعود الطفل إنه يكون مسؤول، وهيقل إهماله بالتدريج بإذن الله.
المصادر
How to address Apathy in school aged children.
أضف تعليق