في عمر السنتين طِفلك بيكون في قمة مرحلة اكتشاف العالم حواليه، وبتبدأ علامات ذكاء الطفل في عمر سنتين تظهر بشكل واضح؛ من طريقة تواصله معاكي، لفضوله واستكشافه لكل حاجة حواليه، وحتى حركته وأسلوب لعبه.
والذكاء في السن دا مش بس وراثة، لكنه كمان نتيجة للتجارب اليومية والتفاعل مع البيئة المحيطة.
في المقال دا هنعرض لك أهم علامات ذكاء الطفل في عمر سنتين، وهنعرفك إزاي تلاحظيها، وتساعدي طفلك يطوّرها بأفضل طريقة.
لماذا يعتبر عمر السنتين مرحلة حاسمة لتطور الذكاء؟
دماغ الأطفال بيمر بفترات حرجة للتطور، وأهمها بيكون أول مرة عند عُمر سنتين والتانية في فترة المراهقة؛ وفي الفترة دي عدد الوصلات العصبية (المشابك) في دماغ الطفل بيتضاعف لدرجة إنه بيبقى ضعف العدد اللي عند الكبار.
وعلشان كدا الأطفال في المرحلة دي بيقدروا يتعلموا أسرع من أي وقت تاني في حياتهم، وبتظهر علامات ذكاء الطفل في عمر سنتين بشكل واضح عليهم.
وبتبدأ الفترة الحرجة الأولى من سن سنتين لحد سن سبع سنين، ودي فرصة ذهبية لتأسيس تعليم قوي وشامل للطفل.
وعلشان تستفيدي قدر الإمكان من الفترة دي، لازم نركز على:
- فهم نوعية التجارب اللي الطفل بيمر بيها في المرحلة دي، وإنها بتأثر عليه بشكل كبير ودائم في حياته.
- الابتعاد عن فكرة إن تعليم الأطفال مجرد تمهيد للتعلم “الحقيقي”، لإن دا أساس مهم في حياتهم.
- تنويع مجالات التعليم بدل ما نركز على حاجة واحدة بعمق.
- الاهتمام بتنمية ذكائه العاطفي بجانب التعلم الأكاديمي.
- تشجيع الطفل إنه يحب التعلم.
تعرف على: أبرز أنشطة وألعاب ذكاء للأطفال في البيت من عمر 1 لـ 15 سنة.
ما هي المراحل الطبيعية لتطور الطفل في عمر السنتين
وقبل ما نتعرف على أهم علامات ذكاء الطفل في عمر سنتين، لازم نفهم إيه هي مراحل التطور الطبيعية للطفل في العمر دا؛ فبنلاقي إن في عمر السنتين، طفلك بيكون في مرحلة مليانة تطورات مهمة، سواء في التواصل أو الحركة أو حتى التفاعل مع اللي حواليه، ودا بيكون وقت مثالي لملاحظته ودعمه علشان ينمو بطريقة صحية وسليمة.
ودي أهم السمات لكل التطورات اللي بتحصل للطفل في العمر دا:
التطور الاجتماعي والعاطفي
طفلك في السن دا بيحب يقلّد الكبار والأطفال اللي حواليه، وبيشعر بالسعادة لما يكون مع أطفال تانيين؛ دا غير إنه بيبقى أكتر استقلالية وأحيانًا بيتحدى الأوامر.
تطور اللغة والتواصل
بيبدأ الطفل يقول جمل بسيطة من كلمتين لـ 4 كلمات، وبيعرف أجزاء جسمه، ويشير للحاجات لما تسميها، وبيعرف يكرر كلمات سمعها ويتبع تعليمات سهلة.
تطور الدماغ
بيقدر يميّز الأشكال والألوان، وبيدور ويلاقي الحاجات اللي بتخبيها، وبيكمل جمل من كتب بيحبها، ويبني أبراج صغيرة. كمان بيبدأ يلعب ألعاب تخيلية بسيطة، ويفهم تعليمات بخطوتين.
التطور الحركي والجسدي
بيجري، ويركل الكرة، ويرميها فوق رأسه، دا غير إنه بيعرف يطلع وينزل من الأثاث لوحده، وممكن كمان يرسم خطوط ودوائر بسيطة.
الطعام والتغذية
بيبدأ يمضغ كويس، ويستخدم المعلقة والشوكة بشكل كويس إلى حدٍ ما.
أبرز علامات ذكاء الطفل في عمر سنتين
وفقاً لدراسة اتنشرت على موقع Sage Journals اتنفذت على 241 طفل ذكي بتتراوح درجة ذكائهم بين 160 – 237، ووجدوا سمات مشتركة في أغلب الأطفال، وهي:
التواصل الفعّال – قدرة الطفل على التعبير عن احتياجاته
التواصل الفعّال علامة مُبكرة لعلامات ذكاء الطفل في عمر سنتين؛ فبتلاحظي إن الطفل بيبدأ يعبر عن نفسه بشكل أوضح، وبيستخدم كلمات وإشارات عشان يوصل للي محتاجه.
زي لما يشاورلك عشان تديه حاجة أو يقول “ماء” لما يكون عطشان؛ الأطفال اللي عندهم قدرة على التواصل الجيد بيكون عندهم قدرة أكبر على التعبير عن رغباتهم، ودا بيخلي تفاعلهم مع الناس أسهل.
أمثلة على التواصل الفعّال:
1- الطفل اللي عنده تواصل فعال يقدر كمان يتبع تعليمات بسيطة زي “هات اللعبة” أو “حط الكتاب هنا”، وتقدري تعلميه حاجة وتلاقيه بيعملها وراكي؛ دا معناه إنه بيعرف يتواصل ودا بيساعده يبني علاقات جيدة مع الناس.
2- لو مش قادر يعبر بكلامه، هتلاقيه بيستخدم إيده أو وجهه عشان يوضح مشاعره، زي لما يبكي لو زعل، أو يبتسم لما يكون سعيد.
3- لو الطفل جاع، ممكن يجي لك ويقول “أكل” أو يشير للطعام عشان يلفت انتباهك.
الفضول والاستكشاف – حب التعلم والاكتشاف
الفضول والاستكشاف من أبرز علامات ذكاء الطفل في عمر سنتين؛ فبيكون عنده رغبة كبيرة في اكتشاف كل حاجة حواليه، وبيحب يسأل أسئلة عن كل شيء ويجرب حاجات جديدة.
فلو لقيتي طفلك بيقلب في الكتب أو بيستكشف أي حاجة في البيت، دا دليل على إنه بيحب يتعلم ويكتشف.
أمثلة على الفضول والاستكشاف:
- لو كان في مكان مفتوح زي الحديقة، بيحب يركض ويلعب مع النباتات أو الحيوانات، ويستمتع بكل لحظة استكشاف؛ دا معناه إنه فضولي وبيحب يتعلم. ممكن تلاحظي دا لما يفضل يسألك “دا إيه؟” على كل حاجة جديدة.
- لما يكون عنده لعبة جديدة، يفضل يستكشف كل تفاصيلها، ويشوفها من كل الزوايا، ويحاول يفهم إزاي بتشتغل.
- لو مشي في مكان جديد، بيلاحظ كل حاجة حواليه وبيحب يسأل “إيه ده؟” أو “ليه ده كده؟”.
القدرة على حل المشكلات
بتظهر القدرة على حل المشكلات كعلامة ذكاء واضحة عند الطفل في عمر السنتين، فبيُظهر فهم أكبر للأشياء من حواليه، وبيحاول يلاقي حلول لأي حاجة بتواجهه من تحديات بطريقة مبتكرة.
وفي السن دا، ممكن تلاحظي طفلك بيحاول يفتح باب أو يجمع ألعاب بطريقة معينة أو حتى يحل مشكلة زي إنه يلاقي مكان يقدر يوصل فيه لحاجة بعيدة.
أمثلة على قدرة الطفل في حل المشكلات:
- لو كان في مشكلة بسيطة زي إنه مش قادر يوصل لحاجة على الرف، ممكن يبدأ يفكر في حلول زي إنه يجيب كرسي أو يطلب مساعدتك بطريقة مبتكرة.
- لو حاجة اتعطلت أو وقعت في مكان بعيد، بيحاول يلاقي طريقة للوصول ليها، سواء كان باستخدام شيء تاني أو بطرق تانية.
- لو كان عنده لعبة مش شغالة، بيحاول يكتشف سبب المشكلة ويصلحها بنفسه، أو يحاول يغير طريقة اللعب.
الذاكرة القوية – تذكر المعلومات والأحداث
الذاكرة القوية هي واحدة من أهم علامات ذكاء الطفل في عمر سنتين؛ ودا لإن الطفل اللي عنده ذاكرة قوية بيقدر يتذكر الأحداث والتفاصيل اللي مرّ عليها فترة طويلة، ودا بيساعده في التعلم بسرعة ويخليه قادر على فهم الأشياء بشكل أعمق.
وفي السن دا، بتلاقي الطفل بيتذكر الأماكن اللي رحتوا لها أو الأشخاص اللي قابلهم حتى لو كانوا من زمان، وكمان بيقدر يتذكر تفاصيل صغيرة من القصص أو الأغاني اللي سمعها.
أمثلة على الذاكرة القوية عند الطفل:
- الطفل يمكن يذكر اسم شخص من العائلة كان زاركم من فترة، أو يذكر حدث حصل له في يوم معين في مكان معين، دا دليل على ذكائه.
- لو سمعتيه بيغني أغنية أو بيحكي قصة سمعها قبل كدا، دا دليل إنه قادر يتذكر التفاصيل حتى بعد فترة طويلة.
- الطفل يمكن يتذكر أماكن لعبه المفضلة، ويحاول يروح لها تاني.
الإبداع والخيال – القدرة على خلق عوالم خيالية
القدرة على خلق عوالم خيالية من أهم علامات ذكاء الطفل في عمر سنتين؛ فنلاقي إن الأطفال الأذكياء بيبدأوا يفكروا بخيال واسع وإبداع ملفت، وبيلعبوا وبيخلقوا قصص من دماغهم أو بيتعاملوا مع ألعابهم كأنها شخصيات حقيقية.
أمثلة على الإبداع والخيال عند الطفل:
- ممكن تلاقي طفلك واخد عربية صغيرة وبيتصرف كأنها سفينة فضائية طايرة.
- ممكن ياخد ورقة وقلم، ويرسم شخبطات وبعدين يقولك “دا بيت أو عربية”.
- ممكن يمسك دبدوب ويبدأ يطعمه أو يكلمه كأنه صديقه الحقيقي.
الاهتمام بالتفاصيل – التركيز والدقة في المهام
في عمر السنتين؛ الطفل الذكي بيبدأ يلفت النظر بقدرته على التركيز على الحاجات الصغيرة والاهتمام بالتفاصيل، فتلاقيه مثلاً بيحاول يركب لعبة معينة بإصرار، ويرجع يحاول لو ما نجحش، أو يلاحظ حاجة بسيطة زي اختلاف لون قطعة لعبة وسط باقي القطع.
أمثلة بتوضح الاهتمام بالتفاصيل عند الطفل:
- لو طفلك قاعد يلعب بمكعبات، وتلاقيه بيصِر إنه يبني برج بنفس الحجم أو الشكل اللي في باله.
- لو مسك كتاب أطفال وبدأ يلاحظ تفاصيل صغيرة في الصور زي لون القطة أو شكل الزهور.
- لما يشوف حاجة مش في مكانها، زي لعبة على الأرض، ويقولك “اللعبة هنا غلط.”
وعشان كدا يعد الاهتمام بالتفاصيل واحدة من أميز علامات ذكاء الطفل في عمر سنتين؛ لإنها بتعكس قدرته على التفكير المركز والدقيق، ودي مهارة بتساعده يطور ذكائه، ويمكن تدعميها عن طريق ألعاب زي تركيب البازل أو النشاطات اليدوية البسيطة اللي تخليه يستخدم عقله ويديه في نفس الوقت.
التفاعل الاجتماعي – القدرة على التفاعل مع الآخرين
من أبرز علامات ذكاء الطفل في عمر سنتين ظهور تفاعله الاجتماعي بشكل مميز، فبنلاقي إن الطفل اللي عنده ذكاء اجتماعي بيفضّل يكون وسط الناس، وبيحب يلعب مع الأطفال التانيين بدل ما يقعد لوحده؛ كمان بيبدأ يفهم مشاعر اللي حواليه.
أمثلة بسيطة للتفاعل الاجتماعي في السن دا:
- بيلعب مع أطفال تانيين، وبيشاركهم ألعابه بدل ما يحتكرها كلها، فدا دليل على ذكائه الاجتماعي.
- بيُظهر اهتمامه بأفراد الأسرة، زي لما يشوفك تعبانة ويجيلك يقول “ماما، إنتِ كويسة؟”
- بيتعرف على ضيوف جداد في البيت، تلاقيه بيبادر يسلم عليهم أو بيحاول يتكلم معاهم.
التفاعل الاجتماعي في المرحلة دي بيعكس قدرة الطفل على فهم العالم اللي حواليه والتواصل معاه بذكاء، وكل ما تدعميه في المواقف دي، كل ما هيتطور أكتر ويتفاعل مع الناس أو يشارك لعبه مع الآخرين بكل سعادة.
مهارات حركية متطورة
ممكن كتير يربط علامات ذكاء الطفل في عمر سنتين بسرعة الانتباه أو الاستجابات المختلفة، لكن المهارات الحركية المتطورة واحدة من علامات الذكاء الملحوظة للأطفال؛ فبيكونوا قادرين على التحكم في حركتهم بطريقة دقيقة وواضحة، ودا بيبان في الأنشطة اليومية اللي بيعملوها.
ومن المهارات دي:
- استخدام الأدوات الصغيرة: الطفل اللي يقدر يمسك أدوات صغيرة زي الملعقة والشوكة ويأكل لوحده، أو يستخدم الألوان للرسم على الورق، بيكون عنده تحكم عالي في عضلاته الدقيقة.
- رمي الكرة والتحكم فيها: لو الطفل بيعرف يرمي الكرة بشكل دقيق أو يحاول يركلها برجله في الاتجاه الصح، دا بيعكس قدرة على التنسيق بين عينه وإيده أو رجله.
- التسلق وصعود السلالم: لو طفلك بيقدر يطلع وينزل السلم من غير مساعدة أو مع مساعدة بسيطة، دا بيعكس تطور في القوة البدنية والتوازن.
- الركض والتوازن: لما تلاقي طفلك بيقدر يجري بثبات من غير ما يقع أو يتعثر كتير، دا مؤشر إن قدراته الحركية والجسدية متطورة.
اتعرفي كمان على ألعاب لزيادة التركيز عند الأطفال في البيت والمنزل والروضة.
علامات أخرى لذكاء الأطفال في عمر سنتين
ذكرنا أهم 8 علامات ذكاء الطفل في عمر سنتين وأكتر مواقف ممكن تمري بيهم معاه، دا بالإضافة لعلامات تانية بنعتبرها علامات لذكاء الطفل، وهي:
- بيهتم بالحاجات المعقدة زي الكمبيوتر أو مشغل الأقراص، وبيعرف يستخدمها لو أديتيه فرصة.
- بيكون عنده إصرار كبير على إنه يعمل الحاجة بطريقته وما يسيبهاش غير لما يخلصها.
- بيكون متسلط شوية، وبيفقد الاهتمام بالأطفال اللي مش بيعملوا اللي هو عايزه.
- مش بيتشتت بسهولة عن اللي عايز يعمله، يعني صعب تلهيه بأي حاجة تانية.
- بيتعرف على حروف وألوان وأرقام كتير، سواء بالترتيب أو بشكل عشوائي.
- بيتعرف على الأشكال الأساسية، وبيشوفها في حاجات تانية حواليه.
- بيكون الحس الفكاهي عنده متطور ومختلف عن الفكاهة التقليدية.
- بيعتقد أفراد العيلة الكبار إنه طفل عنيد أو مدلل بسبب تصرفاته.
- لازم يعرف “ليه؟” قبل ما يعمل الحاجة اللي بتطلبها منه.
- بيقدر يتكلم ويفهم كلام الناس حواليه بشكل واضح.
- بيقدر يرسم ويحدد الرسمة اللي عملها.
- بيلاحظ جمال الطبيعة وبيعبر عنه.
- بيبني أبراج من 6 مكعبات أو أكتر.
كيفية دعم ذكاء الطفل في المنزل
إزاي نقدر نعزز علامات ذكاء الطفل في عمر سنتين؟ إليكِ بعض النصائح المفيدة:
تقليل وقت استخدام الأجهزة اللوحية
خلي وقت الأجهزة اللوحية محدود علشان ما يأثرش على تطور مهاراتهم الاجتماعية واللغوية، وخلي معظم الوقت مخصص للعب مع الأطفال أو القراءة لهم.
الاهتمام بالتغذية الصحية
خلي الأكل الصحي والمتوازن هو الأساس، وركزي إن طفلك ياكل فواكة وخضار وبروتينات مغذية، وقللي من الحلويات والسكريات؛ لإن الأكل الصحي بيساعد في تطور الدماغ بشكل سليم.
التواصل اللغوي المستمر
تبعاً لدراسة اتنشرت على موقع Pediatrics اتنفذت على 146 عائلة واستمرت لمدة 10 سنين، وجدوا فيها إن الأطفال اللي استمر أهلهم في التحدث معهم من عمر 18 شهر لـ 24 شهر، كان ليهم دور كبير جداً في رفع معدل ذكائهم في مرحلة المراهقة، وجودة استخدامهم للغة والمفردات.
عشان كدا اتكلمي مع طفلك بانتظام؛ فكل ما تتواصلي معاه وتشرحي له الحاجات حواليه؛ دا بيعزز قدرته على فهم اللغة وتنمية مهاراته التواصلية، وبينمي عنده علامات ذكاء الطفل في عمر سنتين بالتدريج.
اللعب مع الأطفال
اللعب هو وسيلة رائعة لتطوير مهارات الطفل زي تعلم القراءة والرياضيات ودا وفقاً لدراسة اتنشرت على موقع NIH؛ فحاولي تلعَبي معاه بشكل منتظم. اللعب مش بس للتسلية دا بيساعده على التفكير وحل المشكلات.
التواصل مع البيئة
خلي طفلك يشارك في النشاطات اليومية زي إنكم تسألوه عن الأشياء اللي حواليه وتدلوه عليها بأسمائها؛ دا بيساعده في اكتساب مفردات جديدة وفهم العالم من حوله، وبتظهر عليه علامات ذكاء الطفل في عمر سنتين.
استخدام الألعاب التعليمية
اشتري له ألعاب تعليمية تساهم في تطوير مهاراته العقلية؛ وركزي إن الألعاب تكون من النوع اللي بتحفز التفكير الإبداعي والذكاء؛ وبتساعده في تعلم حاجات جديدة بطرق ممتعة.
المشاركة في الأنشطة البسيطة
خلي طفلك يشارك معاكي في أنشطة منزلية بسيطة زي ترتيب الألعاب أو طي الملابس؛ الحاجات دي بتساعد في تعزيز التركيز وزيادة مهاراته الحركية.
ومن خلال تفعيل كل الحاجات دي، هتقدري تعززي ذكاء طفلك وتساعديه في التطور بشكل صحي وسليم.
الخلاصة
الطفل في عمر السنتين بيبدأ يظهر عليه مراحل تطور في كل المهارات سواء المعرفية، أو العاطفية، أو الحركية، وفي بعض الأحيان بيظهر عليه علامات ذكاء الطفل في عمر سنتين، ودا بيكون في الغالب تطور أكبر من المعتاد زي التواصل الفعّال، لما يقدر يعبر عن احتياجاته بشكل واضح.
والفضول والاستكشاف بيكونوا واضحين عليه، فبتلاقيه بيحب يكتشف كل حاجة، والقدرة على حل المشكلات والخيال الواسع بتظهر في تصرفاته اليومية، زي لما يبتكر طرق جديدة للعب.
بالإضافة إلى الذاكرة القوية والتركيز على التفاصيل، ودي بتساعده في تذكر الأشياء بشكل أفضل، والتفاعل الاجتماعي مع الأهل والأصحاب بتكون علامة مهمة، كل دي مهارات بتتطور وبتساعده على النمو بشكل صحي وسليم.
أضف تعليق