الرياضة للأطفال حسب العمر | دليلك للرياضة المناسبة لكل عمر

حركة الأطفال ولعبهم بتعد من أهم الدلائل على سلامتهم وصحتهم، وخصوصًا لو قدرنا نستغل الحركة ونحولها لرياضة بيمارسها الطفل بشكل دوري، ومهم نراعي سنه ونختار الرياضة للأطفال حسب العمر. 

وبالفعل هنلاحظ أثر الرياضة على نمو الطفل، وصحته الجسدية، والعقلية، والنفسية؛ الأمر اللي هيأثر عليه بشكل كامل في مراحل حياته المختلفة. 

وعشان نوصل لأفضل نتيجة هنحتاج لاختيار الرياضة للأطفال حسب العمر والميول، عشان يمارسوها بحب، ويقدروا يتفوقوا، ويتميزوا فيها، ويحققوا نجاحات كتير، ودا اللي هنتناوله في المقال. 

فوائد الرياضة للأطفال 

بتظهر أهمية الرياضة في تنوع فوائدها، وهتظهر أكتر لو تم اختيار الرياضة للأطفال حسب العمر، وبتنقسم إلى: 

1- فوائد صحية 

• بتقوي عضلة القلب، وبتقلل من خطر الإصابة بالأمراض المختلفة.
• بتقي من السمنة، ومن الأمراض الخطيرة اللي بتترتب عليها.
• بتزود شهية الطفل، وبتحافظ على نشاط جسمه وحيويته. 
• بتقوي عضلاته، وبتكسبها صلابة أكبر.
• بتعزز جهاز المناعة. 

2- فوائد عقلية 

بتساعد الرياضة على تنمية قدرات الأطفال العقلية المختلفة، وزيادة التركيز، وتفتيح الذهن، وبتعرفهم ازاي يديروا وقتهم صح، وازاي ياخدوا قراراتهم في ظروف مختلفة، وبالتالي دا بيساعدهم في توسيع مداركهم. 

وبحسب المراجعة اللي قدمتها “National Library of Medicine” عن “تأثير الرياضة على الوظائف التنفيذية عند الأطفال” بنلاقي إن مشاركة الأطفال والمراهقين خلال سن 6-18 سنة في الألعاب الرياضية ليه تأثير إيجابي كبير على الذاكرة العاملة عندهم.

ودا بيعزز من أداء العقل في الوظائف التنفيذية، وبالتالي بيكون مفيد في تطورهم المعرفي بشكل عام. 

3- فوائد نفسية وتربوية 

الرياضة بتساعد على زيادة شعور الثقة بالنفس عند الأطفال، وبتعلمهم الإصرار والمثابرة لتحقيق الأهداف والانتصارات.

دا غير إنها لو لعبة جماعية فدا بيعلمهم التعاون والعطاء، وبيفهم كل طفل إنه جزء مهم من مجموعة كاملة، وإنه بينتمي ليهم ولازم يساعد في تحقيق أهدافها، وعشان كدا مهم نختار الرياضة للأطفال حسب العمر، وحسب اللي بيناسبهم. 

بالإضافة إلى إن الرياضة بتعد بديل جيد وصحي للألعاب الإلكترونية، لإنها بتخلي الطفل يتواجد في المكان الصح اللي لازم يكون فيه، وبتشغله في حاجة تنفعه أكتر، وتنمي من مهاراته. 

كمان النشاط البدني بيحسن من الحالة المزاجية للأطفال والمراهقين مقارنةً بغيرهم اللي مش بيمارسوا رياضة، ودا تبعًا للمراجعة اللي نشرتها المجلة الدولية للبحوث البيئية والصحة العامة عن “تأثير الرياضة على الصحة النفسية للأطفال“، ودا ملخص اللي اتذكر فيها: 

فبنلاقي التحليلات أظهرت إن ممارسة المراهقين -من 12 سنة فيما فوق- للتمارين لمدة 30-60 دقيقة كان ليه تأثير كبير على المشاعر الإيجابية. 

وعشان الطفل يستفيد فعلًا من الرياضة، فبيحتاج من الأب والأم إنهم يساعدوه في اختيار الرياضة المناسبة ليه ولشغفه. 

الرياضة للأطفال حسب العمر 

مع كل سن بيوصله الطفل بيحتاج يمارس رياضة مختلفة تتناسب مع قدراته الجسمانية، والعقلية، والنفسية، عشان فعلًا يقدر يستفيد منها وما تتحولش وتنقلب ضده. 

ودي بعض الرياضات المقترحة لفئات عمرية مختلفة تقدر تستعين بيها وأنت بتختار الرياضة للأطفال حسب العمر مع طفلك: 

أولًا: من عمر سنتين لخمس سنوات 

في السن دا بتعتمد الرياضة على الحركة العشوائية غير المنتظمة، عشان بيكون صعب على الطفل الالتزام بقواعد وقوانين، لإنه ما زال في سن استكشاف، ومش هيخضع للقوانين بسهولة، فممكن نعتمد على اللعب الحر: زي الجري، والقفز، والسباحة، وركوب الدراجة، والتسلق. 

وهنا ممكن تجرب تروح مع طفلك مشوار وأنتو بتتمشوا أو بتجروا أو وهو راكب عجلة بدل من المواصلات. 

لكن تنمية مهارات الطفل مش بتكون عن طريق اختيار الرياضة للأطفال حسب العمر بس، لإن في طرق كتير ممكن تستغلها، وتقدر تتعرف عليها من خلال مقال: طرق وأساليب تنمية مهارات الأطفال 5 سنوات. 

ثانيًا: من عمر 6 سنوات لـ 9 سنوات 

في المرحلة العمرية دي بيبدأ الطفل يتطور أكتر في مهاراته، وانضباطه، وتركيزه، فبالتالي تقدر تمارس معاه أنشطة رياضية أوسع ممكن ينضم فيها مع غيره، وفيها بعض القواعد زي: كرة القدم، والسباحة، والتنس، بالإضافة لرياضات الفئة العمرية اللي فاتت. 

ثالثًا: من عمر 10 سنوات لـ 12 سنة 

في الفترة دي بيكون الطفل عنده المقدرة على حفظ القوانين واستراتيجيات اللعب، بالإضافة للألعاب السابقة. 

فممكن يبدأ يختار فن من الفنون القتالية (الكاراتيه، الجودو، والجوجيتسو .. إلخ) ويتعلمه، ويمارسه، أو يمارس كرة السلة أو البيسبول وغيرهم، بإشراف مدربين محترفين، عشان ينتبهوا لحركاته وتكون صحيحة ما تأثرش عليه بالسلب، وتضعفه، وتسبب أي مضاعفات عكسية نتيجة سقوطه على الأرض أو غيره. 

رابعًا: من عمر 12 لـ 14 سنة 

الفئة دي بتبدأ تستعد لمرحلة الشباب وبتكون ناضجة أكتر، وبالتالي مهم نتبع معاهم دليل اختيار الرياضة للأطفال حسب العمر، فممكن بالإضافة للألعاب السابقة، يبدأ الطفل يلعب ضغط وسكوات، وممكن يبدأ في رفع الأثقال لكن تحت إشراف حد متخصص -لو كانت بنيته تسمح برفع الأثقال-. 

خامساً: من عمر 15 فيما فوق 

الفئة دي بتتفتح لها أنواع الرياضة المختلفة، ويقدر ابنك يختار منها بحريته، كمان ممكن تسجل له في جيم أو نادي بحيث يكون تحت إشراف متخصصين. 

ومهم يكون في نظام معين للعب والأكل، عشان يحافظ على صحته، ويكمل نموه بشكل صحي وسليم، وتقدر تشارك معاه لعبه الرياضة، لإن دي الحاجة اللي هتشجعه بشكل أكبر. 

نصائح هامة لاختيار الرياضة المناسبة لطفلك 

خلال فترة اختيار الرياضة للأطفال حسب العمر خلي طفلك يجرب رياضات مختلفة الأمر، دا هيساعده على الاختيار بشكل أحسن، واتأكد إن الرياضة تكون آمنة لطفلك، وبتتوفر فيها عوامل السلامة، ولازم يكون بيمارس اللي بيتناسب مع سنه، ومع حجمه وقدراته. 

كمان في بداية الاختيار ركز إن الرياضة تحقق المتعة للطفل بشكل أكبر، مش مجرد تعزيز الهدف وهو الفوز وبس، وكل ما طفلك يكبر في العمر وينضج، ابدأ اغرس فيه مفاهيم الفوز والخسارة، والتحدي بشكل شريف، لإنه هيكون عنده وعي وإدراك أكبر.

بنلاقي إن الرياضات اللي يقدر يمارسها الأطفال متنوعة، في رياضات ممكن الطفل يمارسها لوحده، وفي رياضات تانية يقدر يمارسها مع مجموعة.

لكل نوع فيهم مميزاته وعيوبه، وبالتالي ليه دور في تنمية الطفل في كافة الجوانب، والمهم نعرف إن اختيار الرياضة للأطفال حسب العمر أمر رئيسي هنا. 

الفرق بين الرياضات الجماعية والفردية ومميزات وعيوب كل منها 

في طفل المناخ المناسب ليه هو المناخ الجماعي، وبيأدي بشكل أفضل لما يشارك غيره ويتعاون معاهم، وعلى العكس، في طفل تاني تميزه بيظهر لما يلعب بشكل منفصل وفردي، وأداؤه ضمن المجموعة بيكون مش أفضل حاجة. 

عشان كدا وأنت بتختار لطفلك ما بين الرياضات الفردية أو الرياضات الجماعية، لازم تكون فاهم إن العامل الأساسي اللي بيتحكم في الاختيار -بجانب اختيار الرياضة للأطفال حسب العمر- هو ميول الطفل نفسه وشخصيته.

وسواء اخترت لطفلك لعبة فردية أو جماعية، فالاختيار دا ليه مميزاته وعيوبه.

مميزات الرياضة الجماعية 

• تنمية وتقوية مهارات التواصل عند الطفل، وتعزيز علاقاته الاجتماعية. 
• اكتساب الطفل لمهارات العمل الجماعي، وتعزيز روح التعاون عنده.
• تعلم التحكم بالمشاعر وضبط النفس، وتعزيز الروح الرياضية.  
• زيادة التقدير للنفس والإحساس بالذات. 

مميزات الرياضة الفردية 

• اكتساب مهارة التخطيط ووضع الأهداف بشكل مناسب. 
• تحسين اللياقة البدنية للطفل بشكل يناسب احتياجه. 
• الاعتماد على النفس وتحمل المسؤولية بشكل أكبر.  
• تطوير مهارات التفكير وصناعة واتخاذ القرار. 
• زيادة التركيز والانتباه، لتحقيق أداء فردي جيد. 

وعلى الرغم من وجود المميزات لكل نوع فيهم إلا إنها كمان ليها عيوب. 

عيوب الرياضة الجماعية 

• زيادة التنافس عن حد معين مع عدم التوجيه يقلبها إلى عداوة. 
• زيادة خطر الإصابات، بسبب الاتصال المباشر بالمنافسين. 
• صعوبة الموازنة بين الحياة الرياضية والحياة الشخصية. 
• زيادة الاعتمادية على الغير. 

عيوب الرياضة الفردية 

أما عن عيوب الرياضة الفردية فهي:  

• تحمل الضغوط بشكل فردي، ودا بيزود من القلق والتوتر.
• زيادة الشعور بالوحدة، والانعزال عن المجتمع.
• افتقاد روح المشاركة والتعاون مع الغير.  
• قلة الذكاء الاجتماعي عند الطفل.
• قلة فرص التعلم من الآخرين. 

بالإضافة إلى اختيار الرياضة للأطفال حسب العمر، لازم نوازن ما بين الرياضات الجماعية والرياضات الفردية، ونختار الأفضل للطفل، ونقيم عيوب ومميزات كل رياضة، ونحاول نتخلص من عيوب كل نوع قدر الإمكان بطريقة مناسبة. 

كيفية ضمان أمان وصحة الطفل أثناء ممارسة الرياضة 

عشان تكون الرياضة آمنة لطفلك، وبتضيف لصحته، ويقدر يحصل على فوائد منها، لازم تراعي بعض الأمور عشان يستفيد الاستفادة القصوى، واللي منها: 

1. استشير الطبيب أثناء اختيار الرياضة للأطفال حسب العمر، ودا في حالة إنه بيعاني من مرض معين. 
2. اهتم بأدوات السلامة الخاصة بالرياضة اللي بيلعبها، وما تفرطش فيها لإنها بتحميه من الأذى.
3. اختار الرياضة المناسبة للطفل حسب عمره، واتأكد إن بنيته الجسمانية مناسبة للرياضة دي.
4. اختار المكان المناسب والآمن لممارسة الرياضة، واتأكد من وجود كامل احتياطات السلامة. 
5. حدد وقت ثابت أسبوعياً لطفلك لممارسة الرياضة، عشان يلتزم، وتلاقي أثرها فعلاً.
6. خلي وجبات طفلك صحية ومليئة بالعناصر الغذائية، عشان تمده بالطاقة اللازمة. 

ما تنساش تفحص طفلك بشكل دوري عشان تتأكد من سلامته، ولو ظهرت عليه أي أعراض غير طبيعية اعرضه على طبيب، عشان يفحصه، ويتأكد من سلامته وصحته. 

طيب لو طفلك أظهر تميزه في رياضة معينة، إيه اللي ممكن تعمله عشان تستغل موهبته دي وتنميها؟ 

خيارات الاحتراف والمنافسة المناسبة لطفلك 

لما بنختار الرياضة للأطفال حسب العمر بشكل يناسب شغفهم وقدراتهم ونموهم الجسدي، فهنا بيظهر الطفل تميز فريد في اللعب، وبيجي دور الأب والأم في اكتشاف الموهبة دي وتنميتها بشكل سليم. 

1. شارك لطفلك في منافسات بسيطة، وساعده عشان ينجح ويدخل مسابقات أكبر. 
2. اتأكد إن المسابقات دي مناسبة لطفلك، وإنه حابب يخوض التجربة ويحترف اللعب.
3. وازن بين ممارسة ابنك للرياضة وبين تفوقه الدراسي، وساعده في تنظيم وقته.
4. علمه التنافس الشريف، وإنه يحافظ على سلامته وسلامة اللي بيلعب معاهم. 
5. فهمه إن الرياضة مكسب وخسارة، وخليه يتعلم من أخطائه بشكل مستمر.
6. وفر مدرب كويس، ممكن تسجله في نادي وتتابع مع المدرب بتاعه.
7. حسسه إنه مميز حتى في بداياته، وإنك فخور بيه وبمستواه. 
8. قدم لطفلك الدعم المعنوي اللازم عشان يكمل. 

ومتنساش إن اختيار الرياضة للأطفال حسب العمر هو أول طريق الاحتراف، بس لازم تكون فاهم كويس إن الموضوع بيحتاج صبر وإرادة قوية، وإن عدد المحترفين اللي بيتحملوا دا قليل.

فمن بين كل 4 رياضيين محترفين في الابتدائية بيكمل منهم واحد بس في مرحلة الثانوية، ومن بين كل 6600 لاعب كورة هاوي في الثانوية، بيكمل واحد بس بعد كدا في صفوف كرة القدم الاحترافية، ودا حسب الإحصائية اللي قدمتها منظمة American Academy of Pediatrics في مقالها عن كيفية اختيار البرنامج الرياضي المناسب للأطفال. 

في النهاية 

مقولة العقل السليم في الجسم السليم مقولة بنسمعها من زمان وبشكل متكرر، وواحدة من أهم الطرق في المحافظة على العقل والجسم هي الرياضة، واكتساب الطفل للعادات الصحية من صغره سواء الأكل الصحي أو الرياضة للأطفال حسب العمر أمر هيستمر معاه لحد ما يكبر وهتستمر فوايده. 

جرب تخلي ممارسة الرياضة نشاط بيشارك فيه الأسرة كلها، وبالتالي هتقوي العلاقات بين أفراد الأسرة، وفي نفس الوقت هتقضوا وقت ممتع كعائلة، وتحافظوا على صحتكم، ويتغرس في الأطفال إن الرياضة هي عادة يومية مهمة. 

لأن ممارسة الرياضة مش أمر ثانوي نقدر نهمله أو نتجاهله، بل هي أمر مهم نقدر نوظفه عشان نخلي حياة أطفالنا أكتر سعادة وصحة وأمان، ونختار الرياضة للأطفال حسب العمر عشان ما نضرهمش.

المصادر 

Choosing Sports for Kids: 8 Ways Parents Can Help.

Is Your Child Ready for Sports?