أهم الإسعافات الأولية للأطفال عند السقوط

أهم الإسعافات الأولية للأطفال عند السقوط

مين فينا موقعش وهو صغير؟

تقريبا مستحيل تلاقي طفل ما تعرضش لإصابة نتيجة سقوطه في مرحلة من مراحل حياته الأولى. سقوط الطفل هو شيء عادي بيحصل في مراحل نموه الطبيعية; لأن الأطفال بطبيعتهم كائنات حركية عشوائية، عندهم فضول وحب استطلاع يعرفوا ويكتشفوا كل حاجة حواليهم، ودا بيخليهم معرضين بشكل كبير للإصابات اللي ممكن تكون بسيطة، وممكن بردو تكون خطيرة ومحتاجة تدخل سريع.

وعشان كدا مهم جدًا تكون الأمهات على علم بأهم الإسعافات الأولية للأطفال عند السقوط، عشان يقدروا يتعاملوا مع أي موقف طارئ بشكل صحيح.

أسباب سقوط الأطفال

أسباب سقوط الأطفال

في أسباب كتير تخلي الطفل يتعرض للسقوط منها أسباب طبيعية زي:

  1. تعرض الأطفال الرضع للسقوط من السرير أو أي مكان مرتفع.
  2. تعثر وسقوط الأطفال في مرحلة بداية تعلم المشي والجري.
  3. تعرض الطفل للسقوط في المدرسة نتيجة اللعب والهزار مع أصدقائه أو التدافع والزحام.
  4. سقوط الطفل في النادي أو أثناء ممارسة الرياضة.
  5. التعرض لحوادث السير.

ولكن أحيانا بيكون كثرة تعرض الطفل للسقوط دليل على وجود مشاكل صحية أو جسدية زي:

  • مشاكل العضلات.
  • المفاصل.
  • الإبصار.
  • الغدة الدرقية.

وأمراض تانية كتير، عشان كدا لازم نتابع نمو الطفل وحركته بشكل دائم وباهتمام كبير، عشان ناخد بالنا بدري لو في أي مشكلة.

كيفية التصرف عند تعرض طفلك للسقوط

يعد الفحص الجيد من أول وأهم خطوات الإسعافات الأولية للأطفال عند السقوط، عشان تقدري تحددي مكان الإصابة، وتقيمي الوضع بشكل صحيح، وتحددي إذا كانت إصابته بسيطة أو خطيرة.

هنا لازم تحافظي على هدوءك وتركيزك، وتحاولي تهدي الطفل وتطمنيه، وكمان تتأكدي إنه في كامل وعيه، وتنفسه طبيعي.

طرق الإسعافات الأولية للأطفال عند السقوط

بتختلف طرق الإسعافات الأولية للأطفال عند السقوط على حسب مجموعة عوامل زي:

  • شدة ومكان الإصابة اللي تعرض لها الطفل.
  • الأعراض اللي ظهرت عليه بعدها.

فمثلًا بنلاقي:

الإسعافات الأولية للأطفال عند السقوط والإصابة بالرأس

إذا كانت الإصابة بالرأس بسيطة عبارة عن كدمة أو تورم خفيف نقدر نستخدم تلج أو مياه باردة على المنطقة المصابة لمدة ربع ساعة، أو لحد ما الألم يبدأ يقل، لكن يفضل يكون التلج في كيس أو أي عازل من البلاستيك مش على رأس الطفل مباشرة، عشان ما يحصلش نقص تروية أو زرقان في الجلد.

ممكن كمان الطفل ياخد مسكن خفيف زي باراسيتامول يساعده يهدأ، والأفضل نخليه يرتاح، وما يبذلش مجهود لمدة يوم كامل، ونخليه تحت الملاحظة، عشان نتطمن أنه ما ظهرش عليه أي أعراض مقلقة أو سلوك غريب.

لكن أحيانًا بتكون الأعراض أشد من كدا، ووقتها بيكون التصرف مختلف، ومن أبرزها:

  • فقدان الوعي بعد الإصابة مباشرة.
  • القيء أكتر من مرة خصوصا لو قيء لا إرادي.
  • اتساع في بؤبؤ العين.
  • تشتت في الذاكرة.
  • الرغبة الشديدة في النوم بشكل غير عادي.
  • صداع قوي.
  • صعوبة في التنفس.
  • نزيف من الأنف أو الفم.
  • نوبات تشنج.
  • عدم القدرة على تحريك جزء من جسمه.
  • ألم شديد غير مبرر.

وفي حالة ظهور عرض من الأعراض دي، بيكون التصرف الصح سرعة التوجه للطواريء أو طلب الإسعاف، لأن التأخير ممكن يعرض الطفل لمضاعفات خطيرة.

الإسعافات الأولية للأطفال عند السقوط والإصابة بالكسور

تعد إصابات كسور العظام من الحالات الشديدة والمؤلمة اللي المفروض يتم التعامل معاها بوعي وحرص، فهنا:

  • ما تحاوليش تحرك الطفل من مكانه أو تضغط على مكان الإصابة خاصة إذا كان الكسر في الرقبة أو العمود الفقري.
  • حاولي تبردي المنطقة المصابة بكمادات مياه باردة، عشان تقللي الألم اللي الطفل حاسس بيه بشكل مؤقت.
  • غطي الطفل، وساعديه يحس بالدفء لو كان بردان.
  • اتصلي بالإسعاف بسرعة، لطلب المساعدة ونقل الطفل للطوارئ، وهناك هيتم عمل الأشعة والإجراءات اللازمة لحالته.

الإسعافات الأولية للأطفال عند السقوط والإصابة بالجروح

قبل التعامل مع أي جرح لازم تتأكدي من غسل ايديكي كويس جدًا بالمياه والصابون، ويفضل تلبسي جوانتي طبي لو متوفر، وبعدها:

  • اضغطي على مكان الجرح لو في نزيف بسيط عشان توقفه.
  • نضفي الجرح باستخدام محلول ملح لو متوفر أو أي مياه معقمة.
  • غطي الجرح بشاش طبي معقم، عشان الجرح ما يتعرضش للتلوث.
  • غيري على الجرح كل 24 ساعة.
  • اسرعي بزيارة الطبيب لو حصل أي تورم أو احمرار أو ارتفاع في درجة حرارة الجسم أو رعشة.

اقرأ أيضًا: صندوق الإسعافات الأولية في المنزل.

الإسعافات الأولية للأطفال عند السقوط وحدوث نزيف الأنف

الإسعافات الأولية للأطفال عند السقوط وحدوث نزيف الأنف

النزيف من الحاجات المخيفة لأي أب وأم، لكن ضروري جدا تمالك النفس في الحالات دي، والتعامل بشكل سريع للحد من النزيف، وعمل شوية إجراءات ممكن تكون بسيطة لكنها فعالة، زي:

  1. حاولي تهدي الطفل، لأن العصبية والحركة الزيادة ممكن تزود النزيف.
  2. ثبتي الطفل في وضعية الميل أو الانحناء لقدام على عكس المتعارف عليه بإرجاع الرأس للخلف وهو تصرف غلط، لأن دا ممكن يسبب ابتلاع الدم أو القيء.
  3. اضغطي على الأنف لمدة من 5 لـ 10 دقايق على الأقل بشكل متواصل، عشان توقف النزيف.
  4. اتجهي للطوارئ فورًا لو النزيف موقفش بعد مرور 20 دقيقة.

وعشان الوقاية خير من العلاج، ضروري نتبع مجموعة إجراءات لحماية أطفالنا من خطر السقوط.

طرق الوقاية لحماية الطفل من السقوط

من أهم النصائح اللي بتساعد على حماية الطفل من السقوط:

  1. حاولي ما تسيبيش أطفالك الصغيرين لوحدهم بدون متابعة أو إشراف من شخص كبير تحت أي ظرف حتى لو لفترة زمنية قصيرة؛ المتابعة بتكون مهمة جدًا في السن الصغير.
  2. اتأكدي إن ملابس الطفل مناسبة، وإنه بيستخدم وسائل حماية لتأمينه زي الخوذة أو واقي الركبة والكوع لو بيمارس أي نشاط رياضي.
  3. أمني البيئة المحيطة بالطفل، وابعديه عن الأماكن المرتفعة والسلالم.
  4. حاولي تجهزي للطفل في مرحلة تعلم المشي مكان للحركة واللعب يكون سطح مستوي وجاف، وتشيلي أي عقبات ممكن تسبب تعرضه للسقوط.
  5. اهتمي بإضاءة المنزل، واستخدمي لمبات الإنارة الليلية، عشان تسهلي على الطفل الرؤية، وتمنعيه من التعثر.
  6. ابعديه عن الشبابيك والبالكونات، واتأكدي من إغلاقهم جيدًا، وإن الطفل مش هيقدر يفتحهم.
  7. اتأكدي أن الطفل قاعد في المكان المخصص ليه في العربية، ولابس حزام الأمان.
  8. اتفرجي مع طفلك علي فيديوهات توعية لمخاطر السقوط، واشرحي له أهم الإسعافات الأولية للأطفال عند السقوط، وإزاى يتصرف لو حصل دا لحد من زمايله، دا هيشجعه ويحسسه بالمسؤولية.
  9. حاولي تتناقشي مع طفلك، واشرحي له خطورة العادات السيئة زي مثلا القفز من مكان عالي، وحفزيه بالتشجيع والمكافآت.

في النهاية لازم نكون مؤمنين أن الحذر لا يمنع القدر، ومهما حاولنا نحمي أطفالنا من التعرض للإصابات والحوادث عمرنا ما هنقدر نعيشهم في فقاعة ونقفل عليهم طول الوقت، عشان نأمنهم ونضمن سلامتهم. كل اللي نقدر نعمله إننا ناخد احتياطاتنا، عشان نقلل فرص الإصابة، ونتفاداها على قد ما نقدر، ولو لا قدر الله حصلهم أي إصابة نكون مستعدين، وعلى وعي كامل بمفهوم الإسعافات الأولية للأطفال عند السقوط.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق