شروط وقواعد تقديم المدارس المصرية اليابانية للعام الدراسي 2024-2025

أعلنت وزارة التربية والتعليم عن فتح باب تقديم المدارس المصرية اليابانية للعام الدراسي الجديد 2024-2025 في جميع فروع المدارس اليابانية، وبدأ التقديم من يوم الثلاثاء 16 أبريل على أن يستمر لمدة 15 يوم، والتقديم بيكون إلكتروني عن طريق موقع المدارس المصرية اليابانية. 

والمدارس دي زيها زي المدارس الرسمية أو الناشونال، فهي مدارس حكومي بغات، وبيتم فيها تدريس المنهج المصري الجديد 2.0، وبيكون فيه المستوي الرفيع (Connect Plus).  

المدارس المصرية اليابانية بتسعى لتطبيق النموذج الياباني من الأنشطة التعليمية “توكاتسو”، والكلمة دي بتشير إلى مفهوم التنمية الشاملة للطفل من جميع الجوانب، واللي بتركز على بناء شخصية الطفل المتمثلة في سلوكياته، ومهاراته، وقيمه، واتجاهاته بنفس درجة الأهمية لتنمية معارفه، ومعلوماته، ومهاراته العقلية. 

في المقال دا، هنتكلم عن شروط تقديم المدارس المصرية اليابانية، وقواعد التقديم الإلكتروني، والمصروفات الخاصة بالدراسة، وهنذكر عدد من فروع المدارس بالقاهرة، والجيزة، وباقي المحافظات.  

شروط تقديم المدارس المصرية اليابانية

في الفترة الأخيرة زاد تواجد المدارس اليابانية في مصر، فبنلاقي إن عدد المدارس الحالي وصل لـ 51 مدرسة، متوزعين على 26 محافظة داخل جمهورية مصر العربية، واللي تقدر تطلع عليهم من خلال موقع المدارس المصرية اليابانية، وكمان تم الانتهاء من إنشاء وتجهيز عدد إضافي من المدارس، اللي هتدخل الخدمة التعليمية خلال العالم الدراسي الجديد. 

وحفاظًا على مبدأ تكافؤ الفرص، وضعت إدارة المدارس المصرية اليابانية بعض الشروط للتقديم فيها، وهي كالتالي: 

1- الجنسية المصرية

لازم يكون الطفل المتقدم للمدرسة مصري الجنسية، ومن أبوين مصريين، ودا وفقًا لقواعد وزارة التربية والتعليم الفني. 

2- وصول الطفل لسن القبول

من أهم شروط تقديم المدارس المصرية اليابانية إن سن الطفل المتقدم للمدرسة يكون داخل نطاق الشريحة التعليمية اللي مقدم عليها، حسب ترتيب سن المتقدمين للمدرسة في أول أكتوبر من العام الجاري، والنطاق دا بيكون كالتالي: 

• المستوى الأول رياض أطفال: من سن 4 سنوات لحد 5 سنين إلا يوم. 
• المستوى الثاني رياض أطفال: من سن 5 سنوات لحد 6 سنين إلا يوم. 
• الصف الأول الابتدائي: من سن 6 سنوات لحد 7 سنين إلا يوم. 
• الصف الثاني الابتدائي: من سن 7 سنوات لحد 8 سنين إلا يوم. 
• الصف الثالث الابتدائي: من سن 8 سنوات لحد 9 سنين إلا يوم. 

وقبول الطفل بيعتمد على عدد الأماكن المتاحة في الفرع اللي مقدم فيه، ولو الطفل محول من مدرسة تانية فلازم يكون جاي من مدرسة لغات، ومعاه بيان قيد معتمد بختم النسر من الإدارة التعليمية الخاصة بمدرسته اللي هينقل منها، بتفيد بقيد التلميذ بمدرسة رسمية لغات، أو خاصة لغات، أو عائد من الخارج. 

اقرأ أيضًا: الفرق بين المدارس اليابانية والمدارس الحكومية. 

3- ثبات محل الإقامة

تالت شرط من شروط تقديم المدارس المصرية اليابانية متعلق بمكان الإقامة، فبتشترط المدرسة ثبات الإقامة في المنطقة المحيطة بالمدرسة، أو النطاق الجغرافي اللي مقدمين عليه، ودا وفقًا للعنوان المثبت ببطاقة الرقم القومي لولي الأمر. 

4- التقديم حسب النطاق الجغرافي

في حال تواجدت مدرستين أو أكتر في نفس النطاق الجغرافي، فوقتها التقديم بيكون على النطاق بالكامل، مش على مدرسة بعينها، وبيحق لواحدة إدارة المدارس المصرية اليابانية تسكين المتقدمين بناءً على القواعد المعمول بيها، وخطة الكثافة الطلابية الداخلية لكل مدرسة، للصالح العام للمدارس، ومش من حق ولي الأمر الاعتراض على القاعدة دي. 

وبعد قبول ملف الطالب بالمدرسة اللي اختاروها فـ ما ينفعش التحويل منها لأي مدرسة يابانية تانية تحت أي مسمى قبل ما يمر عام دراسى كامل، ومش بيتم النظر في أي طلب للتحويل قبل نهاية العام الدراسى. 

وبعد مرور عام دراسي كامل، وفي حال توافر مكان فاضي بالمدرسة اللي عاوز تنقل طفلك ليها، واتباع كافة شروط تقديم المدارس المصرية اليابانية اللي ذكرناها بيتم التحويل على مسؤولية ولي الأمر. 

5- توقيع ولي الأمر على الإقرار

بيشترط كمان توقيع ولي الأمر على إقرار بالعلم والموافقة على قواعد العمل بالمدارس المصرية اليابانية، وفي حال رفضه للتوقيع على الإقرار، فبيتم إلغاء طلبه. 

6- سداد المصروفات

يجب على ولي الأمر سداد المصروفات الدراسية بأقساطها، حسب المواعيد والجدول الزمني المحدد لدا، وفي حالة مخالفة المواعيد دي، بيتم اتخاذ الإجراءات المقررة قانونًا، من غير إنذاره أو إخطاره بشكل رسمي، وهنتكلم بتفاصيل أكبر بعد شوية عن طرق سداد المصروفات الخاصة بتقديم المدارس المصرية اليابانية. 

7- التقديم الورقي للطلاب ذوي الاحتياجات الخاصة

في حالة كان الطفل من الطلاب ذوي الاحتياجات الخاصة، فبيرجى من ولي الأمر إنه يقدم للمدرسة ورقيًا في المواعيد المُعلن عنها، ويجيب معاه كافة المستندات المطلوبة، بما فيها التقارير الطبية للحالة عشان يتم دراستها، وعرضها على لجنة مختصة بدارسة الأوراق دي. 

أما في حالة عدم إفصاح ولي الأمر عن الحالة الصحية لطفله بعد التقديم الإلكتروني، فبيتم إحالة الأمر لنفس اللجنة، واتباع نفس الإجراءات للنظر في صحة الالتحاق من عدمه. 

قواعد التقديم الإلكتروني للمدارس المصرية اليابانية

بخلاف الطلاب من ذوي الاحتياجات الخاصة، هنلاقي إن إدارة المدرسة بتشترط إن تقديم المدارس المصرية اليابانية يكون إلكتروني بالكامل من خلال موقعهم، ومش بيتم النظر أو قبول أي طلبات للتقديم بأي وسيلة تانية، أو بعد المواعيد المحددة. 

والتقديم الإلكتروني دا ليه بعض القواعد المنظمة ليه، واللي هي: 

• ملئ البيانات الشخصية بحرص شديد، مع كتابة الاسم رباعي زي ما مكتوب في بطاقة الرقم القومي. 
• كتابة العنوان اللي موجود في البطاقة، وعنوان تاني يمكن إثباته في حالة اختلافه عن عنوان البطاقة. 
• ترشيح كل المتقدمين للقبول، وبيكون القبول النهائي بعد اجتياز الاختبارات، والمقابلات الشخصية. 
• تسجيل رقم هاتف ولي الأمر للتواصل معاه وقت الحاجة، وفي حالة تغييره تكون المسؤولية عليه. 
• توقيع ولي الأمر على كل الإقرارات اللي بتحددها إدارة المدرسة للالتزام الكامل بنظام تشغيلها. 
• مراعاة تسجيل بيانات الطفل مرة واحدة بس، لأنه في حالة التكرار بيتم إلغاء الطلب نهائيًا. 
• الحرص على اختيار مدرسة داخل النطاق الجغرافي لعنوان إقامة ولي الأمر اللي قدمت بيه. 
• التأكد من تفعيل البريد الإلكتروني اللي قدمت بيه على الموقع، والاحتفاظ بكلمة المرور. 
•  التأكد من ملئ كافة البيانات المطلوبة في كل فقرة بدقة عشان يتم حفظ البيانات. 
• عدم إمكانية تعديل البيانات المسجلة للتلميذ بعد الضغط على زر “حفظ”. 

تعرف على: الفرق بين المدارس الخاصة والحكومية. 

المستندات المطلوبة لتقديم المدارس المصرية اليابانية

يتطلب التقديم في المدارس المصرية اليابانية عدد من المستندات، وهي: 

1. توثيق رسمي يثبت عنوان محل الإقامة بتاريخ يسبق التقديم بـ 6 شهور على الأقل (دا لو العنوان مختلف عن البطاقة).
2. شهادة ميلاد مميكنة للطفل (التلميذ) حديثة الإصدار “لا تزيد عن شهر” وتكون بالعلامة المائية. 
3. توقيع ولي الأمر على الإقرار “عدد 2 أصل، نسخة لولي الأمر، ونسخة للمدرسة”. 
4. بطاقة رقم قومي “سارية” لولي الأمر. 

مصروفات تقديم المدارس المصرية اليابانية

أعلنت أ. نيفين حمودة (مسؤولة وحدة المدارس المصرية اليابانية) إن مصروفات المدرسة للعام الدراسي 2024-2025 هي 17200 جنيه مصري لمرحلة رياض الأطفال، بزيادة عن مصروفات السنة اللي فاتت بمبلغ 1400 جنيه، ودا بخلاف مصاريف الكتب الدراسية، والزي المدرسي. 

ومصروفات تقديم المدارس المصرية اليابانية ليها 3 طرق للسداد، وهي: 

1- ماكينة POS

يُمكن السداد المباشر لكامل المصروفات الدراسية، والكتب، والزي المدرسي من خلال ماكينة الدفع المباشر “POS” اللي موجودة في المدرسة. 

2- بنك مصر

كمان تقدر تسدد كامل المصروفات الدراسية، والكتب، والزي المدرسي من خلال أي فرع لبنك مصر، بموجب أصل إيصال/ إيصالات السداد، ومش بيتم قبول صورة من الإيصال، أو صورة على الواتس آب، أو أي تطبيق تاني. 

3- التقسيط

وتقدر تسدد مصروفات تقديم المدارس المصرية اليابانية عن طريق التقسيط، فبيتم دفع المستحقات على 3  أقساط (قسط في خلال أسبوع من إخطار ولى الأمر بقبول ملف الطفل، والقسط التانى في شهر نوفمبر، والقسط التالت في شهر يناير). 

اقرأ كمان: الفرق بين المدارس المصرية الدولية والمدارس الرسمية الدولية. 

الخلاصة

المدارس المصرية اليابانية بتتبع نظام منهج التعليم المصري الجديد 2.0، وما ينفعش تحول طفلك ليها من مدرسة تانية إلا لو كانت لغات، أو من خارج مصر، لكن تقدر تقدم لطفلك عادي لو كان لسه في مرحلة رياض الأطفال. 

وتقديم المدارس المصرية اليابانية بيكون إلكتروني من خلال موقعهم، وبيفتح عادةً في بداية، أو نص شهر أبريل، وبيستمر لمدة 15 يوم بس، ومش بينفع تقدم بطريقة تانية، ولا بيتم النظر لأي طلب اتقدم بعد إنتهاء فترة التقديم اللي أعلنوها، ودا حفاظًا على مبدأ تكافؤ الفرص. 

ولحد هنا نكون عرضنا ليك قواعد وشروط تقديم المدارس المصرية اليابانية للعام الدراسي 2024-2025، وطبعًا لو عندك أي استفسار ما تترددش تسألنا.