الفرق بين المدارس الخاصة والحكومية | 10 فروقات رئيسية

من أول الحاجات اللي بتشغل بال أولياء الأمور لما بيوصل طفلهم لسن 4 – 5 سنوات هي نوع المدرسة اللي هيدخلوه فيها، وبيكون في حيرة وأسئلة كتيرة عن الفرق بين المدارس الخاصة والحكومية.

فبيبدءوا يسألوا عن المميزات والعيوب، وفرق المصاريف، والأفضل للطفل من حيث المنهج والتعليم، وفي المقال دا هنوضح الفرق بينهم كويس، عشان تقدر كولي أمر تختار الأنسب لابنك. 

ما هي المدارس الحكومية؟

هي مدارس تم إنشائها وتمويلها من خلال الحكومة، وبتعتمد على أموال الضرائب المفروضة في الدولة، وبتشمل المدارس الابتدائية، والإعدادية، والثانوية. ولإن الحكومة هي المسؤولة عن التمويل، فهنلاقي إنها بتقدم خدماتها لكل الطلبة مقابل سعر معقول وبسيط.

وبيتم قبول وتوزيع الطلاب على المدارس حسب الموقع الجغرافي، وكل طالب ملزم إنه يدخل المدرسة المتواجدة في محل سكنه. أما عن المناهج والامتحانات ومواعيدها فهما موحدين على مستوى الجمهورية، ودا بيوضح الفرق بين المدارس الخاصة والحكومية. 

ولإن خطوة اختيار المدرسة المناسبة خطوة مهمة، هنبدأ نتعرف على مميزات وعيوب المدارس الحكومية، عشان تكون مُلم بتفاصيلها.

مميزات المدارس الحكومية

من أبرز مميزات المدارس دي بنلاقي:

• اعتماد مناهج موحدة على مستوى الجمهورية.
• الاهتمام باللغة العربية بشكل أساسي. 
• انخفاض المصروفات الدراسية.
• توظيف معلمين أكفاء.

عيوب المدارس الحكومية

للمدارس الحكومية بعض العيوب اللي بتخلي ولي الأمر يفكر كتير قبل ما يقرر التقديم فيها لأولاده، وهي فيصل أساسي بيوضح الفرق بين المدارس الخاصة والحكومية، ومنها: 

• ضغط بعض المدرسين على الطلاب لإجبارهم على الدروس الخصوصية.
• إهمال النشاط البدني، والهوايات زي: الرسم، والزراعة، ممارسة الرياضة.
• إهمال بعض المدرسين للغة الإنجليزية، والنطق غير الصحيح لها.
• ارتفاع كثافة الطلاب بالفصول للضعف مقارنة بالمدارس الخاصة.
• اعتماد التعليم على الحفظ والتلقين نتيجة صعوبة المناهج.
• عدم توفير مرافق كافية بالمدارس تخدم عدد الطلاب.  

ما هي المدارس الخاصة؟

هي مدارس مملوكة لجهات خاصة، وتمويلها بيكون من خلال المصروفات والرسوم الخاصة بالطلاب، ودا السبب الرئيسي اللي بيخلي مصروفاتها أعلى بكتير من المدارس الحكومية، ومصاريفها بتبدأ من 10,000 جنيه، وممكن توصل لـ 100,000 جنيه حسب نوع الدراسة، والشهادة المعتمدة.

ولإن المدارس الخاصة مش خاضعة لإشراف حكومي -ما عدا الجزء الخاص بالالتزام بالقواعد التعليمية والتوجيهية من وزارة التربية والتعليم-، فالمدير هو المتحمل الرئيسي لمسؤولية وإدارة المدرسة.

المدارس دي هي اللي بتحدد معايير اختيار الطلاب، وتوظيف المعلمين، ومش شرط إن المدرس يكون خريج كليات تربوية، ودا بيوضح الفرق بين المدارس الخاصة والحكومية.

مميزات المدارس الخاصة

تعددت مميزات المدارس الخاصة، واللي خلت الفرق واضح بينها وبين المدارس الحكومية، ومنها: 

• اعتماد المناهج على التبسيط والشرح، وتنمية الإبداع عند الطلاب.
• الاهتمام بتقليل أعداد الطلاب في الفصول عن المدارس الحكومية.
• تطور مناهجها باستمرار لتصبح معاصرة لتطورات المجتمع.
• تهتم بالتكنولوجيا، وتعتمد عليها في بعض المناهج. 
• تهتم باللغة الإنجليزية بشكل أساسي.
• تهتم بالأنشطة وتنمية الهوايات. 

عيوب المدارس الخاصة

الفرق بين المدارس الخاصة والحكومية بيوضح أكتر من خلال بعض العيوب اللي بنلاقيها في المدارس الخاصة، واللى بتخلى أولياء الأمور مترددين في اختيارها وهي:

• أغلب المدارس الخاصة، بالذات الانترناشونال لا تعتمد على الكتب الدراسية.
• بعض المدارس منهاجها غير محددة، وكل مدرسة بتضع منهج خاص بها.
• مصاريف الأدوات المدرسية والكتب مرتفعة عن المدارس الحكومية. 
• بعض من مدرسيها غير مؤهلين للعمل في المدارس الحكومية.
• استحالة الاستغناء عن الدروس الخصوصية بجانب المدرسة.
• إهمال اللغة العربية بشكل كبير.

الفرق بين المدارس الخاصة والحكومية 

اختيارك كولي أمر لمدرسة ابنك هو قرار بيترتب عليه حاجات كتيرة في مستقبله، عشان كدا مهم جدًا تعرف الفروقات بين المدارس، وتحدد الأنسب ليه. 

وبالنسبة للفروقات بين المدارس الخاصة والمدارس الحكومية في مصر فبنلاقي إنها بتتمثل في:

طبيعة المناهج 

مناهج المدارس الحكومية موحدة على مستوى الجمهورية بشكل عام لكل المراحل الدراسية، وتعتمد على الكتب الدراسية من أول العام الدراسي، واعتمادها على التكنولوجيا خفيف جدًا، ومؤخرًا وفرت التابلت الدراسي للمرحلة الثانوية فقط.

أما المدارس الخاصة فمناهجها متغيرة من مدرسة للتانية، وكل سنة بتختلف عن السنة اللي بعدها، ومش دايمًا بيكون فيه كتب دراسية من أول العام الدراسي، لإنها بتعتمد أكتر على التكنولوجيا الحديثة برفع المواد الدراسية على موقع خاص بالمدرسة، وطباعة التدريبات من خلاله. 

قبول الطلاب بالمدرسة

في المدارس الحكومية بيتم قبول الطالب بناءً على الموقع، أما في المدارس الخاصة فبيتم القبول غالبًا بعد:

• اختبار الطفل في عدة مواد دراسية 
• اختبار الذكاء لمعرفة هل مناسب إن الطالب ينضم للمدرسة ولا لأ.
• عرض الطفل على أخصائي نفسي، للتأكد من عدم معاناته من مرض نفسي أو سلوك سيء. 
• عمل مقابلة للتعرف على الأب والأم، ومعرفة مستواهم في اللغة الانجليزية.
• معرفة دراسة الأب والأم ووظائفهم، لضمان تحمل المصاريف.

اقرأ كمان: الفرق بين التعليم الخاص والتجريبي واللغات في مصر

لغة الدراسة

المدارس الحكومية بتدرس اللغة العربية، وبتعتمد عليها في تدريس باقي المواد، أما المدارس الخاصة فبتدرس اللغة الإنجليزية أكتر، وبالتالي اغلب المواد دراستها باللغة الإنجليزية، ودا بيوضح الفرق بين المدارس الخاصة والحكومية.

جودة التعليم

المدارس الحكومية بتعاني من نقص في الكفاءة التعليمية الحديثة، وكمان بعض المواد الدراسية بتكون معقدة، لكن على الجانب التاني بنلاقي إن المدارس الخاصة بتقدم جودة تعليمية أفضل، لإنها بتوفر موارد دراسية ومعلمين مدربين بشكل جيد على التعليم الحديث.

كثافة الطلاب

في السنوات الأخيرة لاحظنا إن عدد الطلاب في الفصول ابتدى يزيد، وأحيانًا ممكن يتخطى الـ 60 طالب، ودا طبعًا بيأثر على استيعاب الطالب، لإن المدرس بيكون صعب عليه إنه يهتم بكل طالب بشكل فردي أثناء الحصة اللي مدتها بتكون صغيرة. 

أما المدارس الخاصة فكثافة طلابها بالفصول أقل، ودا طبعًأ أفضل للطالب والمدرس. 

مستوى الطلبة

الفرق بين المدارس الخاصة والحكومية من حيث مستوى الطالب، معتمد على اجتهاد الطالب نفسه، وبنلاقي إن المدارس الحكومية بيطلع منها أوائل جمهورية كتير جدًأ، وكمان المدارس الخاصة بيطلع منها طلبة متفوقين.

لكن بشكل عام الطالب بيبذل مجهود أكبر في المدارس الحكومية، عشان يقدر يفهم ويستوعب المناهج الدراسية، على عكس طالب المدارس الخاصة اللي بتكون المناهج عنده إلى حد ما متوسطة.

التسهيلات الإضافية

المدارس الحكومية مقيدة في توفير  بعض التسهيلات بسبب ميزانيتها المحدودة، أما المدارس الخاصة فبتقدم احتياجات إضافية ومتنوعة للطلاب، زي: 

• مختبرات مجهزة للمواد الدراسية زي: الكيمياء والفيزياء وغيرها من المواد العملية.
• ملاعب رياضية مجهزة، زي: كرة القدم، كرة السلة، السباحة، والتنس.
• توفر ورش عمل وأنشطة إضافية تشجع الهوايات الفنية المختلفة. 

التوجيه والدعم الفردي

بالرغم من وجود معلمين مؤهلين في المدارس الحكومية إلا إنها بتواجه مشكلة في تقديم التوجيه والدعم الفردي للطلاب، لإن عددهم كبير جدًا زي ما وضحنا.

أما النموذج التعليمي في المدارس الخاصة بيتميز إنه بيقدم مساعدة أكتر للطلاب، عشان يوجههم بشكل فردي، ويساعدهم يوصلوا لأهدافهم التعليمية والمهنية.

المصاريف

بيتم كل عام دراسي جديد توضيح لمصاريف المدارس الحكومية من خلال وزارة التربية والتعليم، واللي بيكون غالبًأ الفرق مش كبير بين السنة والتانية، ودي نقطة بتوضح الفرق بين المدارس الخاصة والحكومية من حيث المصاريف. 

بنلاقي كمان إن الوزارة بتعتمد مبدأ التقسيط على ثلاث دفعات للمصاريف التعليمية بالمدارس الحكومية، وبالنسبة لتفاصيل المصاريف لكل مرحلة دراسية فموضحة في بيان وزارة التربية والتعليم، وهي كالآتي: 

• مصاريف مرحلة رياض الأطفال، والمرحلة الابتدائية: 312.60 جنيه.
• مصاريف المرحلة الاعدادية: 212.60 جنيه.
• مصاريف الصف الأول الثانوي: 575.60 جنيه.
• مصاريف الصف الثاني والثالث الثانوي: 512.60 جنيه.

أما عن مصاريف المدارس الخاصة فبتكون أعلى شوية، والأفضل إنك ترجع للمدرسة اللي حابب تقدم لابنك فيها وتسألها بالتفصيل عن الأسعار، لإنها بتكون متغيرة.

التأهيل الوظيفي

البعض شايف إن عدم اهتمام المدارس الحكومية باللغة الإنجليزية بيأثر على تأهيل خريجيها للوظائف المختلفة، وإن طالما المدارس الخاصة بتهتم أكتر باللغات فهتسهل فرصة التحاق خريجيها بالوظائف، لكن مش دا اللي بيحصل دائمًا -إلا لما نيجي نتكلم عن المدارس الانترناشونال-. 

لإن أغلب المسؤولين عن التوظيف بيهتموا بمهارات الشخص أكتر من شهاداته، وبالتالي فشهادة المدرسة مش هي الفيصل الوحيد في نقطة الحصول على وظيفة مستقبلية.

وبعد معرفة الفرق بين المدارس الخاصة والحكومية، خلينا نتعرف إزاي تقدر تحدد المدرسة المناسبة لابنك.

كيف تختار المدرسة الأفضل لطفلك؟

اختيار المدرسة المناسبة لابنك أمر مهم، وقرار محتاج وقت، وبذل مجهود في البحث عن المدارس بنفسك، وعلشان كدا هنقولك على بعض النصائح اللى لازم تحطها في اعتبارك وأنت بتختار المدرسة، سواء كانت خاصة أو حكومية وهما:

تحديد الأهداف

قبل ما تبدأ البحث عن الفرق بين المدارس الخاصة والحكومية حدد الأول احتياجات طفلك ومتطلباتك التعليمية والاجتماعية والثقافية ليه اللى محتاج تكون موجودة بالمدرسة، وايه قدراته واهتماماته وإزاي تنميها.

تحديد الميزانية

اعرف التكلفة والرسوم التعليمية للمدرسة المناسبة لطفلك، وحدد هل هتناسب قدرتك المادية ولا لأ، عشان متخرجش عن الحدود المادية المناسبة ليك، وتجهد نفسك في دفع المصاريف، أو تضطر تنقل طفلك بعد مدة قصيرة فيتأثر دراسيًا ونفسيًا.

البحث والمقارنة

ابدأ بالبحث عن المدارس المتاحة في منطقتك وتصنيفها وتقييمها، وقارن المعلومات اللي بين المدارس الحكومية والخاصة، واتكلم مع أولياء الأمور ، وشوف على آرائهم وتقيمهم بالنسبة للمدرسة والمدرسين. 

مراجعة الموقع والمواصلات

اتأكد من موقع المدرسة وطريقة الوصول ليها. وهل فيه وسائل مواصلات متاحة ومريحة؟ وهل مواعيدها واماكنها يناسب مواعيد عملك أو وجودك في البيت؟

ومن هنا هتبدأ الرؤية توضح أكتر. 

الاهتمام بمتطلبات الطفل

لازم تتأكد من دور المدرسة في تلبية إحتياجات طفلك، واعرف هل فيه دعم إضافي للطلاب اللي بيعانو من مشكلات معينة في التعلم، وهل الدروس المتنوعة متلائمة مع مستواه العقلي ولا لأ.

الخلاصة

الفرق بين المدارس الخاصة والحكومية بيتضح في نقاط كتيرة جدًا زي طبيعة المناهج، وطريقة قبول الطالب، ولغة الدراسة، ومستوى جودة التعليم، ومعدل الكثافة الطلابية، وغيرها زي ما ذكرنا. 

وعشان تقدر تختار المدرسة الأنسب لابنك لازم تكون على دراية بالفروقات دي كويس، وتهتم بتحديد هدفك من اختيار المدرسة، بجانب إنك تراعي ميزانيتك الخاصة مقابل المصروفات اللي بتحتاجها المدرسة وتتأكد إنك هتقدر تتحمل المصاريف دي. 

وفي النهاية لازم تتأكد من اختيار بيئة آمنة ومشجعة لطفلك، بتلبي احتياجاته التعليمية، وبتساعده يتفوق فيها.