كتير من الأهالي بيبقوا محتارين قدام قرارات العلاج، خاصةََ لما الطفل يتعب والدكتور ما يكتبش مضاد حيوي. هل هو مش محتاج؟ طب ليه؟ طب إيه الصح؟
في المقال دا، هنتكلم عن المضاد الحيوي للأطفال بشكل مبسّط وواضح، وهنجاوب على أهم الأسئلة اللي بتهم الأهل، زي إمتى نستخدمها، وإمتى نسيب الجسم يقاوم لوحده، وكمان إيه الأضرار اللي ممكن تحصل لو استخدمناها غلط. كل دا علشان تكوني واثقة إنك بتاخدي القرار المناسب لصحة طفلك.
1- إيه هي المضادات الحيوية وبتشتغل إزاي؟
المضادات الحيوية بتشتغل عن طريق قتل البكتيريا اللي بتسبب العدوى أو بتوقف نموّها وتكاثرها. البكتيريا دي كائنات صغيرة جدًا بتعيش في جسم الإنسان ومع إن أغلبها مش ضار، وفيه منها مفيد، زي اللي في المعدة، فيه أنواع تانية بتسبب أمراض وعدوى، زي:
- التهاب الحلق البكتيري (اللي سببه البكتيريا العقدية).
- إسهال المسافرين اللي سببه بكتيريا.
- التهاب الجيوب الأنفية البكتيري.
- التهابات المسالك البولية.
- التهاب الرئة أو السحايا.
- التهاب الأذن.
- التهاب الرئة.
2- إيه هي أنواع المضاد الحيوي للأطفال الأكتر استخداماََ؟
لما نيجي ندي مضاد حيوي للأطفال، لازم نكون حذرين جدًا ونستخدم الأنواع اللي فعلاً آمنة ومناسبة لسنهم. مش كل المضادات تنفع للأطفال، ودا دور الدكتور يحدده حسب نوع العدوى وعمر الطفل.
الأنواع اللي غالبًا بيستخدمها الأطباء للأطفال:
البنسلينات
زي الأموكسيسيلين والبنسلين جي، ودي غالبًا بتستخدم لعلاج التهاب الأذن والتهاب الجيوب الأنفية البكتيري.
السيفالوسبورينات
زي السيفدينير والسيفتيبوتين والسيفاليكسين، ودي بتنفع لحالات التهاب الأذن المتكرر أو المعقد، وكمان الالتهاب الرئوي والتهاب الجيوب الأنفية.
الماكروليدات
زي الأزيثروميسين والإريثروميسين، وغالبًا توصف في حالات السعال الديكي أو بعض أنواع الالتهاب الرئوي الخفيفة.
التريميثوبريم مع السلفاميثوكسازول
ودا دواء مركب بيتوصف لعلاج عدوى المسالك البولية أو العدوى البكتيرية المقاومة زي المكورات العنقودية.
3- إيه هي أنواع المضاد الحيوي الممنوعة للرضع؟
في مضادات حيوية لازم نتجنبها تمامًا للأطفال، خصوصًا في سن صغير، لأنها ممكن تسبب مشاكل صحية خطيرة أو دائمة، زي:
الفلوروكينولونات
زي الليفوفلوكساسين، الأدوية دي ممكن تأثر على نمو الغضاريف وتسبب مشاكل في المفاصل، علشان كدا ما ينفعش تتاخد للأطفال إلا في حالات نادرة جدًا وبمتابعة دقيقة من الطبيب.
التتراسيكلين
زي الدوكسيسيكلين، النوع دا ممكن يسبب تصبغ دائم في الأسنان، ودا بيأثر على شكل الأسنان طول العمر، علشان كدا ممنوع للأطفال اللي لسه أسنانهم بتتكون.
باختصار، ماينفعش ندي الطفل أي مضاد حيوي من نفسنا، ولا حتى لو حد قال “دا كويس وجربته”، لأن كل حالة وليها ظروفها، والدكتور هو الوحيد اللي يقدر يحدد النوع المناسب والآمن.
4- ما هي الآثار الجانبية لاستخدام المضاد الحيوي للأطفال؟
المضادات الحيوية ممكن تعمل شوية آثار جانبية عند الأطفال، ودا بيحصل تقريبًا مع 10 لـ 20٪ من الأطفال اللي بياخدوها. وأغلب الأعراض دي بتكون بسيطة ومؤقتة، زي:
- طفح جلدي بسيط.
- الغثيان أو القرفان.
- وجع في البطن.
- الإسهال.
- القيء.
وفيه حالات نادرة، ممكن المضاد الحيوي يسبب خلل في توازن البكتيريا النافعة في أمعاء الطفل، ودا ممكن يخلي الطفل يتعرّض لعدوى اسمها “المطثية العسيرة”، واللي بتسبب إسهال مائي، أو أحيانًا إسهال فيه دم مع ألم شديد في البطن.
ومن الحاجات المهمة كمان: الحساسية؛ يعني لو ابنك قبل كدا جاله طفح أو تورم أو صعوبة في التنفس بعد مضاد حيوي، لازم تقولي للدكتور علشان ميكررش نفس النوع.
ودا بيوضح إنك لازم تتابعي نتيجة أي دواء جديد وتأثيره على الطفل، ولو ظهر أي عرض غير طبيعي، كلمي الطبيب فورًا.
5- إيه هي علامات الحساسية للمضادات الحيوية عند الأطفال؟
علامات حساسية المضاد الحيوي للأطفال مش دايمًا بتحصل، وغالبًا بتكون مع مضادات البنسلين. ولو حصلت، هتلاحظي حاجة من دي:
- تورم في الوجه أو الشفتين أو أماكن تانية.
- صوت صفير أو صعوبة في التنفس.
- شرى أو طفح جلدي يسبب حكة.
العلامات دي ممكن تظهر بسرعة خلال أول يوم أو يومين من بداية استخدام الدواء، أو ممكن تظهر بعد كام يوم من استخدامه.
6- ليه الدكتور ما كتبش مضاد حيوي لطفلي اللي عنده برد شديد؟
لما طفلك يعاني من برد قوي، طبيعي تسألي: “ليه الدكتور ما وصفش مضاد حيوي؟” السبب إن أغلب نزلات البرد بيكون سببها فيروسات، والمضادات الحيوية بتشتغل بس على البكتيريا مش الفيروسات. يعني، حتى لو الأعراض كانت مزعجة زي الرشح والسعال والاحتقان، غالبًا هتتحسن من غير أدوية.
كمان الأطفال الصغيرين، خصوصًا اللي بيروحوا الحضانة ممكن يجيلهم من 6 لـ 8 نزلات برد في السنة ودا طبيعي.
7- هل ممكن البرد يتحول لعدوى بكتيرية؟ ولو كدا، ليه ما نبدأش بالمضاد على طول؟
في حالات نادرة ممكن العدوى الفيروسية تتحول لعدوى بكتيرية، بس دا مش بيحصل كتير. ولو بدأنا بالمضاد الحيوي للأطفال بدري من غير حاجة حقيقية ليه، دا ممكن يضر الطفل ويسبب له مشاكل زي الإسهال أو ضعف مناعته قدام البكتيريا بعدين.
ومن الأمراض اللي المفروض ما نستخدمش فيها المضاد الحيوي:
- التهاب الحلق العادي (مش البكتيري).
- الفيروس المخلوي التنفسي (RSV).
- التهاب الشعب الهوائية.
- السعال العادي.
- إنفلونزا المعدة.
- البرد والزكام.
- الإنفلونزا.
8- هل المخاط الأصفر أو الأخضر عند طفلي يعني إنه محتاج مضاد حيوي؟
مش دايمًا؛ لما الطفل يكون عنده دور برد، طبيعي إن لون المخاط يتغير من شفاف لأصفر أو أخضر، ودا مش بالضرورة يعني إنه محتاج مضاد حيوي.
لكن، لو استمر المخاط السميك الأصفر أو الأخضر لأكتر من 10 أيام، أو كان مصحوب بسخونة عالية (فوق 39 درجة مئوية) لمدة 3 أو 4 أيام، أو كان فيه ألم في الوجه، ساعتها ممكن يكون فيه التهاب في الجيوب الأنفية بسبب بكتيريا، ووقتها الدكتور ممكن يكتب مضاد حيوي للأطفال.
يعني مش كل مرة نشوف فيها مخاط لونه متغير ندي مضاد حيوي، لازم نتابع الأعراض ونستشير الدكتور.
9- هل المضادات الحيوية ضرورية لعلاج التهابات الأذن؟
نصف التهابات الأذن على الأقل بتخف لوحدها من غير المضاد الحيوي للأطفال، وكتير من الحالات بتكون بسبب فيروس، يعني مش هينفع معاها المضاد أصلاً. حتى لو كانت بسبب بكتيريا، أحيانًا الجسم بيقدر يتغلب عليها من غير دواء.
فلو الدكتور شاف إن ابنك مش محتاج مضاد حيوي، هيقولك إزاي تهتمي بيه لحد ما يتحسن. أهم حاجة نركّز على تخفيف الألم، لأنه أكتر حاجة بتضايق الطفل.
كمان الدكتور ممكن يوصفلك أدوية زي الباراسيتامول أو الإيبوبروفين (بس طبعًا بجرعة مناسبة لسنه ووزنه)، عشان تساعد في تقليل الألم والحرارة.
أما أدوية البرد زي مزيلات الاحتقان ومضادات الحساسية فمش بتساعد في علاج التهاب الأذن، ولا يُنصح بيها للأطفال الصغيرين.
وفي بعض الحالات، لو ابنك حرارته عالية جدًا، أو الوجع شديد، أو فيه التهاب في الودنين مع بعض، ساعتها الدكتور ممكن يكتب له مضاد حيوي.
ودايماً، لو محتارة أو مش متأكدة، استشيري الدكتور قبل ما تدي له أي حاجة.
10- هل كل التهابات الحلق “الزور” عند الأطفال بتحتاج مضاد حيوي؟
في الغالب لأ؛ أغلب التهابات الزور بتكون بسبب فيروسات، ودي ماينفعش فيها المضاد الحيوي. يعني لو ابنك عنده التهاب زور ومعاه رشح وكحة، غالبًا السبب فيروس، وساعتها مش محتاج تحليل ولا مضاد.
المضاد الحيوي بس بيتوصف لو كان السبب هو بكتيريا اسمها “العقدية من المجموعة أ”، ودا اللي بنسميه “التهاب الحلق العقدي” ودا مختلف تماماََ عن التهاب اللوزتين المعتاد.
والخبر الحلو؛ إن الأطفال اللي عمرهم أقل من 3 سنين نادر جدًا يجيلهم النوع دا من الالتهاب.
ولو الدكتور شَكّ إن ابنك ممكن يكون عنده التهاب حلق عقدي، بيعمله تحليل بسيط. ولو التحليل طلع إيجابي، وقتها بيوصف المضاد الحيوي للأطفال المناسب.
المهم ما نديش مضاد حيوي من نفسنا، ولا نضغط على الدكتور من غير تحليل.
11- هل المضادات الحيوية بتسبب أعراض جانبية لطفلي؟
تبعاََ لمجلة الجمعية الطبية الأمريكية للطب الباطني فإن طفل من كل خمس أطفال بياخدوا مضاد حيوي ممكن يظهر عليهم أعراض جانبية. الأعراض دي ممكن تكون طفح جلدي، حساسية، غثيان، إسهال، أو ألم في المعدة. لو طفلك قبل كدا حصل له حساسية من مضاد حيوي، لازم تبلغي الدكتور فورًا.
ولو لاحظتي طفح جلدي وقت تناول طفلك للمضاد الحيوي، مش شرط يكون حساسية، لكن لو كان الطفح فيه بقع حمراء متورمة (زي الشرى) وظهر بعد أول جرعة مباشرة، دا ممكن يكون رد فعل تحسسي ولازم تقولي للدكتور فورًا.
12- المضاد الحيوي بياخد وقت قد إيه عشان يبدأ مفعوله؟
غالبًا الأعراض بتتحسن بعد 48 لـ 72 ساعة من بدء العلاج بالمضاد الحيوي. لو أعراض طفلك ما اتحسنتش أو زادت بعد 3 أيام لازم تتواصلي مع الدكتور فورًا.
13- هل المضادات الحيوية ممكن تسبب ظهور بكتيريا مقاومة؟
استخدام المضاد الحيوي للأطفال كتير أو تكرارها غلط، وممكن يسبب ظهور بكتيريا مقاومة. يعني بكتيريا ما بتتقتلش بالمضاد الحيوي العادي اللي بنستخدمه. والبكتيريا دي ممكن تنتقل لأطفال تانيين أو حتى للكبار.
عشان كدا مهم جدًا إن طفلك ياخد المضاد الحيوي المناسب بالضبط لنوع العدوى اللي عنده، مش مضاد عام بيغطي كتير من الالتهابات بدون سبب.
ولو طفلك أصيب بعدوى مقاومة، ممكن يحتاج مضاد حيوي خاص، وأحيانًا ممكن يحتاجوا يعطوه الدواء في المستشفى عن طريق الوريد.
14- ما هي الأدوية المضادة للفيروسات؟
في حالات معينة، زي إنفلونزا الأطفال اللي معرضين لمضاعفات، ممكن يتوصف لهم أدوية مضادة للفيروسات. بس أغلب فيروسات البرد والسعال التانية مالهاش علاج مضاد للفيروسات فعال.
15- إزاي أستخدم المضادات الحيوية بأمان مع طفلي؟
- لو فاضلك أدوية من العلاج، ما ترميهاش في القمامة أو الحمام. خديها للمستشفى أو العيادة أو الصيدلية، في أماكن بتجمع الأدوية القديمة عشان تتخلص منها بطريقة صحيحة.
- ما تعطيش دواء طفلك لأي حد تاني، حتى لو كان أخوه أو صديقه، لأن ممكن الدواء يكون مش مناسب ليه ويسبب مشاكل.
- خلي الأدوية في مكان آمن بعيد عن الأطفال والناس التانية، وعِدي الأقراص عشان تتأكدي إن كل الجرعة استُخدمت.
- دايمًا خلي طفلك ياخد الدواء بالظبط زي ما الدكتور وصفه، لا تقللي ولا تزودي الجرعة.
16- هل في أعراض جانبية طويلة المدى للمضادات الحيوية عند الأطفال؟
تبعاََ لـ موقع Journal of infection فإن استخدام المضاد الحيوي للأطفال ممكن تسبب بعض المشاكل اللي بتظهر على المدى الطويل عند الأطفال، ومنها:
- متلازمة القولون العصبي، فبنلاقي إن فيه دراسات أثبتت إن استخدام المضادات الحيوية ممكن يزيد من خطر الإصابة بها بنسبة حوالي 6% مقارنة بالأطفال اللي ما استخدموش المضادات.
- تضيق البواب، وهي حالة بتسبب قيء مستمر عند الطفل، وبتكون مرتبطة باستخدام بعض المضادات الحيوية زي الأريثروميسين قبل عمر 6 شهور.
- السمنة، ودا بيكون أكثر احتمال عند الأطفال اللي استخدموا المضادات الحيوية قبل سن سنتين.
- تغير لون الأسنان، ودا ممكن يبقى دائم، خصوصًا مع مضادات التتراسيكلين عند الأطفال تحت سن 8 سنوات.
عشان كدا مهم نستخدم المضادات الحيوية بحذر شديد ونلتزم بتعليمات الطبيب عشان نقلل من المخاطر دي.
اتعرف على: اضطرابات الأكل عند الأطفال| إزاي تكتشفها وتساعد ابنك يتغلب عليها؟
17- هل يمكن للرضع تناول المضادات الحيوية؟
نعم، يمكن وفي بعض الحالات بيكون المضاد الحيوي للأطفال الرضع واجب لعلاج العدوى البكتيرية زي التهاب المسالك البولية أو التهاب الجيوب الأنفية البكتيري.
وفي وقت تشخيص الطبيب للعدوى البكتيرية، بيلزم الرضيع كامل الجرعة المقررة وفي الوقت المناسب لضمان القضاء التام على البكتيريا.
اتعرف على: كيفية التعامل مع الطفل المريض نفسياََ.
18- ما مخاطر الإفراط في استخدام المضادات الحيوية عند الرضع؟
تبعاََ لدراسة اتنشرت على موقع NIH أوجبت بتجنب إعطاء المضادات الحيوية للرضع من غير سبب واضح، لأن الإفراط في استخدامها ممكن يؤدي لاختلال توازن الميكروبيوم — وهو مجتمع البكتيريا والفطريات النافعة في الجسم، خاصةََ الأمعاء. والاختلال دا بيزود من خطر الإصابة بالعدوى، أمراض المناعة الذاتية، والالتهابات المزمنة.
19- ما علاقة الرضاعة الطبيعية ومقاومة المضادات الحيوية؟
حليب الأم مليان فوائد صحية كتيرة، ومن أهم المكونات فيه بروتين اسمه اللاكتوفيرين، وهو عنصر أساسي في تعزيز المناعة.
البروتين قادر يقضي على ميكروبات مختلفة زي البكتيريا والفيروسات والفطريات، عشان كدا الأطفال اللي بيرضعوا رضاعة طبيعية عندهم مناعة أقوى من غيرهم.
ودا أسندته دراسات كتير منها دراسة منشورة على موقع NIH بتثبت تأثير اللاكتوفيرين في حال إعطاءه بطريقة صناعية للأطفال والكبار، لكن لحد دلوقتي ما وصلوش لنفس فعالية البروتين الطبيعي الموجود في حليب الأم.
وطبعًا، في بحوث شغالة دلوقتي عشان تعرف إذا اللاكتوفيرين يقدر يساعد في مكافحة مشكلة مقاومة المضادات الحيوية، ودا شيء واعد ومهم جدًا لصحة أطفالنا.
نصائح مهمة عند إعطاء المضاد الحيوي للأطفال
- ابتعدي عن إعطاء طفلك أي دواء لو حصل له حساسية شديدة من المضاد إلا باستشارة طبيب الأطفال، ولو كانت الحساسية متأخرة، ممكن يرجع يستخدم الدوا لكن تحت مراقبة الطبيب.
- اتبعي تعليمات الدكتور بخصوص الجرعة ومدة العلاج، وهل ياخد الدوا مع الأكل أو من غيره.
- لا تحتفظي ببقايا المضاد الحيوي ولا تعطيها لطفل تاني حتى لو الأعراض متشابهة.
- لا تفرطي في استخدام المضادات الحيوية عشان ما يحصلش مقاومة.
- التزمي بالنوع اللي الدكتور كتبه والمحدد للعدوى، ومتقبليش بالبديل.
- امتنعي عن إعطاء المضاد الحيوي من غير وصفة طبيب.
- كملي العلاج كامل حتى لو طفلك بدأ يتحسن.
المهم إننا ما نستخدمش أي نوع من نفسنا، ولا نكرر وصفة قديمة، ولا ندي الطفل مضاد أخوه أو حد تاني أخده قبل كدا. ولا نروح للصيدلي يديله حقنة مضاد حيوي من غير كشف وتشخيص سليم؛ لازم دايمًا يكون بوصفة الدكتور.
في النهاية، هيفضل المضاد الحيوي للأطفال أداة مهمة لعلاج بعض العدوى البكتيرية، لكن استخدامه لازم يتم بحذر وتحت إشراف طبي. مهم نعرف إن مش كل تعب أو دور برد محتاج مضاد حيوي، ومجرد الاستخدام الخاطئ ممكن يضر أكتر ما يفيد.
وإن بالتوعية والالتزام بنصايح الطبيب، نقدر نحافظ على صحة أولادنا ونقلل من خطر مقاومة المضادات الحيوية على المدى الطويل.
المصادر
What Parents Should Know About Babies and Antibiotics?
Antibiotics for Children: 10 Common Questions Answered.
How to make sure antibiotics are the right choice?
Understanding antibiotics for kids.
أضف تعليق