كتير من الأمهات والآباء بيتفاجئوا لما طفلهم يزعق أو يعيط فجأة من غير سبب واضح، أو لما يتخانق مع إخواته بسبب حاجات بسيطة. بس الحقيقة إن الطفل ساعات بيكون مش عارف يقول هو حاسس بإيه أو إزاي يعبر عن اللي جواه.
التعبير عن المشاعر للأطفال زي تعلم لغة جديدة؛ ولو ما عرفش يعبر عنها بطريقة صح، هتظهر في تصرفاته بشكل مزعج أو مؤذي لنفسه أو للي حواليه.
في المقال دا هنتكلم عن أهمية تعليم الطفل ازاي يعبر عن مشاعره، وهنعرف أسباب كتم المشاعر عند الأطفال، وإزاي نساعدهم يفهموا إحساسهم ويتكلموا عنه بثقة وارتياح.
يعني إيه التعبير عن المشاعر للأطفال؟
التعبير عن المشاعر معناه إن الطفل يقدر يقول هو حاسس بإيه، سواء بالكلام أو بالفعل، من غير ما يخاف أو يخجل.
يعني لما يكون زعلان يقول “أنا زعلان”، أو لو فرحان يضحك ويشارك فرحته، أو حتى لو متضايق من حاجة يقولها بدل ما يكتم جواه.
التعبير عن المشاعر للأطفال بيخليهم مرتاحين نفسيًا، وبيتعاملوا مع الناس بطريقة أحسن. لكن لو الطفل اتعود يكتم كل حاجة، دا بيخليه عصبي، أو منطوي، أو يبص لنفسه بطريقة سلبية.
كل ما الطفل عرف يسمي إحساسه، كل ما قدر يتصرف فيه بشكل ناضج أكتر، حتى لو كان صغير في السن. ودا بالضبط اللي محتاجين نساعده يتعلمه من بدري.
اقرأ أيضاََ: كيفية التعامل مع الطفل العصبي في عمر سنتين من خلال 7 طرق فعالة.
مراحل التطور العاطفي للطفل، وامتى نبدأ تعليم التعبير عن المشاعر للأطفال؟
تبعاََ لدراسة اتنشرت على موقع NIH لمراحل التطور العاطفي للطفل، ووجدوا إن المراحل دي بتبدأ من أول يوم في عمره، وبتتطور مع الوقت:
من الولادة لـ 6 شهور
الطفل بيبدأ يتعرّف على وشوش اللي حواليه، وبيتكوّن جواه ارتباط عاطفي مع الأم أو أي شخص بيتواصل معاه بشكل يومي زي الأب والجدة. بيبتسم، يضحك، وبيكّون استجابة لأي تفاعل اجتماعي. ودا أول شكل من أشكال التواصل العاطفي حتى لو من غير كلام.
من 6 شهور لسنة
الطفل بيكون اجتماعي أكتر، بيبدأ يفهم معاني بسيطة، وبيقلد اللي حواليه. في المرحلة دي، مهم نبدأ نربط بين مشاعره وردود فعله بكلمات بسيطة، زي: “أنت زعلان؟”، “أنا مبسوطة عشانك”.
من سنة لسنتين
الطفل بيكتشف العالم، وبيبدأ يقول “لأ”، ودا جزء من شعوره بالاستقلال. بيلعب جمب أطفال تانيين (اللعب الموازي)، وبيستجيب لتوجيهات زي “لأ” و”توقف”. هنا نقدر نبدأ نعلمه أسامي المشاعر: “دي اسمها فرحة”، “أنت شكلك مضايق شوية؟”.
من سنتين لـ 3 سنين
بيبدأ يفهم مشاعر غيره ويطور تعاطف بسيط. بيبدأ يلعب مع أطفال تانيين ويفهم فكرة المشاركة. في الوقت دا، نبدأ فعليًا نعلّمه التعبير عن المشاعر للأطفال بالكلام أو بالرسم، ونوضح له الفرق بين مشاعر زي الغضب، الحزن، والفرح.
من 3 لـ 4 سنين
بيكون وعيه أكتر بنفسه وباللي حواليه، وبيبدأ يعبر عن مشاعره بشكل أوضح. هنا نقدر نعلمه أدوات التعبير، ونسأله “حاسس بإيه؟”، ونبدأ نرسم أو نحكي قصص عن المشاعر.
من 4 لـ 5 سنين
بيتطور عنده التمييز بين الصح والغلط، وبيتعاطف أكتر مع اللي حواليه. بيعرف يتعاون ويلعب ضمن مجموعة. دا الوقت اللي نقدر نرسّخ فيه قواعد التعبير عن المشاعر للأطفال، ونعلمه يوقف وياخد نفس، أو يستخدم كلمات بدل العصبية.
ما هي الطريقة الصحيحة لتعليم التعبير عن المشاعر للأطفال؟
من عمر سنة ونص لـ 4 سنين، بيبدأ الطفل يتكوّن عنده إحساس بالذات، وبيحاول يعبر عن نفسه سواء بالرفض أو التملك أو حتى التظاهر في اللعب. ومن سن 3 لـ 4سنين، بيتطور اللعب الخيالي عنده، وبيبدأ يفهم بعض المشاعر زي الغضب أو الخوف، بس لسه مش بيعرف يفرق كويس بين الحقيقة والخيال.
ودا بيخلينا نعرف إن الوقت المناسب لتعليم التعبير عن المشاعر للأطفال من بدري جدًا، من أول ما يبدأ يتكلم ويفهم، ودا بنعمله عن طريق:
1. خصص وقت للكلام
كل يوم، حتى لو 5 دقايق، اقعد مع طفلك واسأله: “حاسس بإيه؟ حصل حاجة ضايقتك النهاردا؟” لما بتعمل كدا كل يوم، الطفل هيحس إنك مهتم، وإنه يقدر يحكيلك من غير خوف أو توتر.
2. امدح الطريقة الصح
لو الطفل عبّر عن غضبه بالكلام بدل ما يضرب أو يزعق، قوله: “أنا فخور بيك علشان قلت إنك زعلان بدل ما تخبط الباب”. المدح بيشجعه يكرر السلوك الإيجابي.
3. أكد له إن مشاعره مقبولة
حتى لو هو خايف من حاجة إنت شايفها تافهة، قوله: “أنا فاهم إنك خايف، كلنا ساعات بنخاف”. ما تستهونش بمشاعره، ولو حصل وشاركت معاه موقف مشابه حصلك، هتحسسه بالأمان أكتر.
4. علّمه يوقف ويراجع نفسه
بعض الأطفال بيتحول من هادي لغاضب فجأة، علشان مش بيبقوا واعيين هم مضايقين ليه. ساعده يسأل نفسه: “أنا حاسس بإيه دلوقتي؟ جسمي حاسس بإيه؟” دا بيخليه يبدأ يفكر بدل ما ينفجر.
5. كن قدوته
وفقاََ لدراسة اتنشرت على موقع Sage Journals بتؤكد إن الأطفال بتتعلم عن طريق محاكاة اللي بيعمله أهلهم بالأفعال.
عشان كدا اتكلم عن مشاعرك بصوت عالي قدامه، زي: “أنا متضايق علشان اتأخرت، بس هاخد نفس وأهدى”. كدا هو هيتعلم إن المشاعر حاجة عادية، وإنه ممكن يتحكم فيها زيك.
6. اتعامل بتعاطف وقت الغلط
لو عبّر عن مشاعره بسلوك غلط، ما تردش بعصبية. بالعكس، حاول تفهم هو ليه اتصرف كدا، ووجّهه بهدوء لأسلوب أحسن.
اقرأ أيضاََ: تعديل سلوك الطفل العنيد والعصبي | أكثر من 10 نصائح مجربة.
أنواع المشاعر التي يمر بها الأطفال وكيفية مساعدتهم في التعبير عنها
مهم تتعرف على كل المشاعر اللي بيمر بيها الطفل، وتتعرف عليها؛ لأن الطفل لما بيلاقي حد فاهمه، وبيسمع له، وبيسمي له إحساسه، دا بيطمنه وبيخليه يحس بالأمان.
ومع الوقت، بيتعلم يعبر عن نفسه من غير خوف أو عنف أو إنغلاق. ودا حجر أساس في تربية طفل سوي نفسيًا واجتماعيًا.
خلينا نتعرّف على أشهر المشاعر اللي ممكن يمر بيها الطفل، وطرق عملية لتعليمه التعبير عن المشاعر للأطفال بشكل سليم:
1. الفرح
- إزاي بيظهر؟: ضحك، نشاط، لعب، كلام كتير، حب المشاركة.
- إزاي نساعده؟: شاركه لحظات الفرح، اسأله “إيه اللي خلاك مبسوط كدا؟”، وادّيله فرصة يعبر عن فرحته بالرسم أو الغُنا أو الحكي.
2. الحزن
- إزاي بيظهر؟: بكاء، انعزال، رفض اللعب، شكوى بدون سبب واضح.
- إزاي نساعده؟: احتويه، اسمعه من غير ما تقلل من مشاعره، وقل له “أنا شايف إنك زعلان، تحب تحكيلي؟”. شاركه تجارب مشابهة مرّيت بيها وإزاي اتجاوزتها.
3. الغضب
- إزاي بيظهر؟: صريخ، رمي ألعاب، عناد، ضرب أحيانًا.
- إزاي نساعده؟: علّمه يهدأ قبل ما يتكلم، زي إنه ياخد نفس عميق أو يعدّ للعشرة. بعد ما يهدأ، ناقشه بهدوء في اللي حصل وساعده يسمي شعوره: “كنت زعلان علشان…”
4. الخوف
- إزاي بيظهر؟: لازق في الأم أو الأب، تجنب مواقف معينة، بكاء مفاجئ، أو كوابيس.
- إزاي نساعده؟: طمّنه، ووضح له إن كل الناس بتخاف أحيانًا. إلعب معاه ألعاب تمثيل المواقف اللي بتخوفه وساعده يتدرّج في مواجهتها خطوة بخطوة.
5. الخجل
- إزاي بيظهر؟: بيستخبى ورا الأهل، بيكتم كلامه، بيتهرب من التواصل البصري.
- إزاي نساعده؟: ما تضغطش عليه يتكلم قدّام ناس، شجّعه بلُطف، وإديله وقت عشان يتأقلم. احكيله عن مواقف مرّيت فيها بالخجل وإزاي تغلّبت عليه.
6. الإحباط
- إزاي بيظهر؟: عصبية، بكاء، “مش عارف أعملها!”، ترك المهام أو الألعاب.
- إزاي نساعده؟: قسم المهمة له لخطوات، شجّعه على المحاولة، واحتفل بأي تقدم بسيط. قل له: “أنا شايفك بتحاول، ودا كويس جدًا”
أهمية التعبير عن المشاعر للأطفال؟
بعد ما عرفنا إمتى وإزاي نعلم الطفل يعبر عن اللي جواه، لازم نعرف كمان ليه دا شيء أساسي ومهم؟ ببساطة، لأن التعبير عن المشاعر للأطفال بيساعدهم في حاجات كتير زي:
بيروّح عن نفسه
لما الطفل يقدر يقول إنه زعلان أو متضايق، دا بيساعده يفرّغ التوتر والقلق بطريقة صحية بدل ما يكتم أو يتصرف بعصبية.
بيفهم غيره ويفهموه
تبعاََ لدراسة اتنشرت على موقع SRCD أثبتت إن الطفل اللي بيعرف يعبر عن مشاعره، بيقدر كمان يحس بمشاعر اللي حواليه، ودا بيخليه يبني علاقات أقوى ويتعلم التعاطف.
بيعرف يتصرف صح
لما الطفل بيتعلم يسمي مشاعره، دا بيساعده ياخد قرارات أحسن ويفهم ليه بيتصرف بطريقة معينة لما يكون غضبان أو فرحان.
بيثق في نفسه أكتر
لما نحسسه إن رأيه ومشاعره مسموعة، بيحس إنه مهم، ودا بيعزز ثقته بنفسه ويخليه يحس إنه محبوب ومقبول.
سلوكياته بتتحسن
الطفل اللي بيعرف يشرح هو حاسس بإيه، مش بيحتاج يضرب أو يعيط كتير. بيعرف يتعامل مع المواقف الصعبة بشكل أنضج.
بيقوي علاقته بأهله
لما يلاقي إن البيت فيه أمان يقدر فيه يقول هو حاسس بإيه، دا بيقربه من أسرته وبيخلي العلاقة فيها حب وفهم.
بيحل مشاكله بنفسه
لما يتعود يعبر عن اللي مضايقه، بيعرف يحدد المشكلة ويلاقي ليها حل بدل ما يفضل زعلان أو حاسس بالعجز.
بيحمي نفسه نفسيًا
التعبير المستمر عن المشاعر بيقلل من تراكم الحزن أو الإحباط، وبيخلي الطفل يقدر إنه يتعامل مع أي تحدي نفسي من بدري قبل ما يزيد.
أنشطة لتعليم التعبير عن المشاعر للأطفال
الأطفال ساعات بيبقوا مش عارفين يشرحوا هما حاسين بإيه، ودا طبيعي لإنهم لسه بيتعلموا. علشان كدا فيه أنشطة بسيطة ولطيفة ممكن تساعدهم يعبروا عن نفسهم من غير ما يتلخبطوا:
1. لعبة “إعرف الشعور”
إعمل قايمة بمشاعر زي: الفرح – الحزن – الغضب – الخوف – الحماس، وابدأ بشرح كل شعور بشكل بسيط.
مثلًا: “الفرح زي لما تبقى مبسوط علشان خارجين”، واطلب من الطفل يقول مشاعر تانية هو يعرفها. بعد كدا، خليه يقول أنهي مشاعر بتخلي الناس مبسوطة وإيه بيخليهم زعلانين.
2. نرد المشاعر
اصنع نرد (مكعب) عليه وشوش بتعبر عن مشاعر مختلفة. كل مرة الطفل يرمي النرد، ويقول دا إحساس إيه؟
وممكن كمان يحكي عن موقف حصل له وحس فيه بالشعور دا. النشاط دا بيساعد الطفل يربط بين المشاعر والمواقف اللي بتحصل له كل يوم.
3. لو حصل كدا.. تحس بإيه؟
حضر شوية مواقف واكتبهم على ورق، زي: “حد أخد لعبتك”، أو “بابا جابلك هدية”. خلي الطفل يسحب ورقة ويحكي هيحس بإيه لو هو في الموقف دا. كدا بنعلمه يترجم الموقف لإحساس.
4. حكايات عن المشاعر
اقرأ قصة عن المشاعر واسأل الطفل: الشخصية كانت حاسة بإيه؟ ليه حست كدا؟ كانت بتتصرف إزاي؟ كدا الطفل هيتعلم يلاحظ المشاعر من خلال المواقف ويقارنها بتجاربه.
5. عجلة المشاعر
اعمل دايرة كبيرة مقسمة لأجزاء، وكل جزء عليه وش بيعبر عن شعور. الطفل يدورها، ولما تقف على وش معين، يقول دا شعور إيه، ويحكي إمتى حس كدا؟
6. تمثيل المشاعر بالوش والجسم
خلي الأطفال يمثلوا مشاعر بوشهم وحركات جسمهم، زي إنهم يعملوا وش زعلان أو مبسوط، ويخمنوا مشاعر بعض. دا بيخليهم يلاحظوا تعبيرات الناس حواليهم.
7. اللعب بالدمى
ممكن نستخدم العرايس في تمثيل مواقف زي “العروسة زعلت علشان العروسة التانية أخدت لعبتها”، ونسأل الطفل: “تحب تقولها إيه؟” أو “هي ممكن تحس بإيه؟”. كدا الطفل هيعبر من خلال اللعب بسهولة أكتر.
8. مجلة المشاعر
هات مجلات وقص منها صور لناس وشهم باين عليه مشاعر مختلفة. وخليه يعمل لوحة ويلزق الصور ويكتب تحت كل واحدة: دي حاسة بإيه؟ وعلشان إيه؟ دي لعبة ممتعة وكمان بتساعد الطفل يلاحظ تفاصيل التعبير.
9. بينغو المشاعر
إعمل لعبة بينغو، لكن بدل الأرقام، خلي المربعات فيها وشوش مشاعر مختلفة. كل مرة تسحبوا كارت، الطفل يغطي الوش اللي زيه ويحكي عن مرة حس فيها بالشعور دا.
10. لعبة كروت الذاكرة
إعمل كروت مزدوجة لوشوش مشاعر، واقلبهم على وشهم. كل طفل يقلب كارتين، ولو طلعوا شبه بعض، يحكي عن شعورهم وإمتى حس كدا. اللعبة دي مسلية وبتقوي الذاكرة وكمان بتعلم المشاعر.
وأخيراََ، التعبير عن المشاعر للأطفال مش بس مهارة مهمة، دا أساس لبناء شخصية سوية وقادرة تتعامل مع الناس والمواقف المختلفة. من خلال أنشطة بسيطة زي لعبة الوجوه، عجلة المشاعر، أو حتى الحكي بالدمى والقصص، بتساعد الطفل يفهم إحساسه ويتكلم عنه بسهولة.
كل اللي محتاجينه شوية وقت واهتمام، وبيئة آمنة نحسس الطفل فيها إنه مسموع ومقبول مهما كان شعوره. جرب الأنشطة دي وشوف أد إيه هتفرق في تواصل أولادك مع نفسهم ومع اللي حواليهم!
المصادر
Helping kids identify and express feelings.
Helping Kids Express Emotions Appropriately.
benefits of babies, toddlers, & preschoolers expressing emotions.
أضف تعليق