ظهور المدارس الكندية في مصر حقق حلم عدد كبير من الطلبة اللي حابين يحصلوا على فرصة الدراسة في الجامعات الكندية، واستكمال دراستهم بالخارج؛ لإن المدارس دي بتقدم شهادة معتمدة بتتيح للطالب الالتحاق بالجامعات الكندية أو المصرية.
في المقال دا هنعرض لك أهم المعلومات عن نظام التعليم الكندي في مصر، وإيه أهم المميزات والعيوب الموجودة فيه، عشان تقدر تقارن بين النقط دي قبل التقديم لأولادك، وتشوف إيه الأنسب ليهم.
1- ما هو نظام الثانوية الكندية؟
هو واحد من الأنظمة البديلة للثانوية العامة في مصر، وبيعترف بيه من وزارة التعليم الكندي والمصري، يعني الطالب بيحصل على شهادتين ثانويتين.
لكن بيتميز النظام الكندي عن الثانوي العام في أكتر من نقطة، ودا لإنه بيعتمد على أحدث التقنيات التعليمية، ومناهجه بتركز أكتر على الفهم، وبيكون مركز أكتر في الاتجاه اللي الطالب عاوز يكمل فيه، ودا بيكسبها مميزات عن الثانوية العامة وبيخلي عدد كبير من الطلبة يقبل عليها كل سنة.
بالإضافة إلى إنها بتتعامل بنظام المادة مش بنظام الفصول الدراسية، ودا غير المتعارف عليه في باقي الأنظمة التعليمية في مصر.
وبعد الانتهاء من دراسة المواد دي، ودخول الامتحان النهائي؛ بيحصل الطالب على شهادة معتمدة بتأهله لدخول الجامعات المصرية والكندية.
وبيعتمد نظام الدراسة في الثانوية الكندية على إن الطلبة بيدرسوا كلهم نفس المواد في أول سنتين، وبعدها بيختاروا المواد اللي حابين يدرسوها بناءً على اهتماماتهم وميولهم.
وبيختار الطالب مواد التخصص من 4 مجموعات أساسية وهما: المواد المؤهلة للكليات الطبية، أو الرياضيات، أو المواد الأدبية، أو المواد المؤهلة لكليات التجارة والاقتصاد، والمجموعة اللي بيختارها هي اللي بيكمل فيها دراسته لآخر الثانوية.
تعرف على أهم 8 معلومات عن النظام الأمريكي في مصر
2- شروط الالتحاق بالمدارس الكندية في مصر
المدارس الكندية في مصر بيقبل عليها العديد من الطلبة في بداية كل سنة دراسية، وبيكون في مجموعة من الشروط اللي لازم تتوفر عشان المدرسة تقبل الطالب، ومن ضمن الشروط دي:
إتمام الطفل سن 4 سنوات
بتقبل المدارس الكندية في مصر الطلاب من سن 4 سنوات في مرحلة رياض الأطفال، وبالتالي لازم الطفل يكون كملهم قبل التقديم عشان يقدر يحصل على فرصة التعليم الكندي ويتفوق فيه.
استعداد الطالب للدراسة باللغة الإنجليزية
المناهج الكندية في مصر بتُدرس باللغة الإنجليزية؛ ودا لإنها لغة عالمية، وكمان الطالب بيقدر يفهمها بسهولة، ومن هنا لازم ولي الأمر يدرك النقطة دي ويعرف مدى استعداد طفله للدراسة باللغة الإنجليزية.
وكمان لازم يكون حريص على رفع مستوى طفله في اللغة الإنجليزية ومتابعة مستواه بشكل مستمر؛ لإن دا هيساعده على التأقلم مع نظام التعليم الكندي في مصر وفهمه كويس.
تقديم جميع الأوراق المطلوبة
التحاق الطالب بالمدارس الكندية في مصر بيتطلب تقديم بعض الأوراق الرسمية اللي بتوضح المعلومات الشخصية للطالب، ومعلومات عن ولي الأمر، وحالة الأسرة، وغيرهم.
والأوراق دي المدارس بتعلن عنها قبل فتح باب التقديم، وفي حالة عدم تقديم جميع الأوراق المطلوبة، ممكن يترفض ملف الطالب.
والشرط دا ممكن يتحقق بسهولة بتواصل ولي الأمر مع إدارة المدرسة بشكل مباشر، والتعرف على المستندات المطلوبة.
3- مناهج مدارس الكندية في مصر
مناهج المدارس الكندية اتقيمت كأفضل مناهج بتُقدم على مستوى العالم في السنوات الأخيرة، ودا دليل على نجاح تطبيق نظام التعليم الكندي، وإنه بالفعل نظام مميز عن باقي الأنظمة التعليمية المختلفة في مصر.
والمناهج قائمة على فكرة التطبيق عشان تحسن مهارات الطالب وتنمي قدراته، ودا بيساعده على فهم المادة العلمية بشكل كويس بدون الحاجة إلى الحفظ والتلقين.
والتطبيق دا بيكون من خلال ممارسة الطالب للعديد من الأنشطة أثناء فترة دراسته.
والقائمين على وضع المناهج بيكونوا حريصين على تكون مناسبة للمرحلة العمرية اللي بيمر بيها الطالب، وبالتالي بيكون في تدرج في صعوبة المواد، وتدرج كمان في كمّ المادة العلمية اللي بتدرس خلال السنوات الدراسية بطريقة تساعد الطالب على تنمية مهاراته، وتطوير ذاته.
4- لغة الدراسة في المدارس الكندية في مصر
لغة الدراسة هتكون باللغة الإنجليزية زي ما وضحنا قبل كدا، ودا لإنها بتركز على الفهم، والإدراك أكتر من الحفظ، وبالتالي بيكون في استفادة كبيرة للطالب.
دا غير إن دراسة المناهج المميزة دي باللغة الإنجليزية؛ هتساعد الطالب على ممارسة لغة جديدة، ومعرفة مصطلحاتها، وبالتالي هيقدر يكتسب اللغة بمرور الوقت.
بالرغم من دا، فبعض الطلبة بيشوفوا إن المناهج الكندية هتكون أسهل لو اتدرست باللغة العربية، ولكن الدراسة باللغة الإنجليزية في الحالة دي هي الأفضل؛ لإن ممارسة اللغة من سن صغير بتكون أفضل، وكمان على المستوى الأكاديمي الدراسة غالبًا بتكون باللغة الإنجليزية.
5- مميزات المدارس الكندية في مصر
تعد المدارس الكندية في مصر بديل مميز للمدارس الرسمية؛ لإنها بتقدم مناهج مميزة بتطبق فيها تقنيات تعليمية حديثة بتؤثر بشكل إيجابي على مهارات الطالب المختلفة، وبتطور من شخصيته، وبتزود مخزون ثقافته العلمية، ومن أهم مميزاتها:
تقديم شهادة معتمدة في نهاية الدراسة
المدارس الكندية بتقدم للطالب شهادة معتمدة من وزارة التعليم العالي الكندية، ووزارة التربية والتعليم المصرية، وبتكون بمثابة شهادة الثانوية العامة في مصر، فبتأهل الطالب للالتحاق بالجامعات المصرية، أو استكمال الدراسة في واحدة من جامعات كندا.
إتاحة فرصة دراسة مناهج كندية بدون الحاجة إلى السفر
المناهج الكندية بتشتهر بتميزها، وتطورها المستمر بشكل يتناسب مع عقلية الطالب، وبكدا قدر عدد كبير من الطلبة في مصر يحققوا حلم الدراسة في كندا بدون ما يحتاجوا للسفر.
6- عيوب المدارس الكندية في مصر
تطبيق نظام التعليم الكندي في مدارس مصر بيقابله كتير من المشاكل، ودا اللي بيصعب القرار على أولياء الأمور وبيشوفوه عيب، وممكن يرفضوا يقدموا لأولادهم فيها.
ومن أشهر عيوب نظام التعليم الكندي في مصر:
زيادة الضغط على الطالب
درجات الطالب في المادة الواحدة بتكون نتيجة مجهوده خلال فترة دراستها، بمعنى إن أغلب الدرجات بتكون على الأنشطة اللي بيقوم بيها الطالب.
وباقي الدرجات “درجات بسيطة” بتكون على الامتحانات، وبالتالي الأمر بيتطلب منه بذل جهد كبير عشان يقدر يحصل على درجات عالية في المادة.
عدم إجبار الطالب على الحفظ
مناهج المدارس الرسمية في مصر بتدرس بطريقة الحفظ والتلقين، وعدد كبير من الطلبة بيتعودوا على الطريقة دي، وبيحفظوا المناهج عشان يقدروا يحلوا كويس في الامتحانات.
وبالرغم من إن دي طريقة غير صحيحة للتعليم؛ إلا إن معظم أولياء الأمور بيشوفوا إنها طريقة مناسبة لتعليم الطلبة في السنوات الأولى، وإنهم بيقدروا يتفوقوا في النظام دا.
وبالتالي ولي الأمر اللي بيفكر بالطريقة دي بيكون مقتنع إن عدم إجبار الطفل على الحفظ في المدارس الكندية في مصر هو واحد من عيوب النظام.
7- شروط الالتحاق بالكليات لطلبة المدارس الكندية
الثانوية الكندية واحدة من بدايل الثانوية العامة زي ما قولنا قبل كدا؛ بمعنى إن الطالب هيقدر يلتحق بالجامعات المصرية بعد حصوله على الشهادة من غير ما يحتاج لشهادات تانية، أو إجراء معادلة.
لكن قبل الالتحاق بالكلية بيكون في بعض الشروط اللي لازم تتطبق عشان الطالب يتقبل بالكليات المصرية، ومنها نجاح الطالب في 8 مواد درسها في السنة الأخيرة من الثانوية الكندية (Grade 12)، وبحد أقصى ممكن يكون دارس 3 مواد منهم في Grade 11.
وبالنسبة للكليات الطبية فبيتطبق نفس الشرط؛ بالإضافة إلى النجاح في المستوى المتقدم في مادة الأحياء.
أما في كليات الهندسة فلازم الطالب يحقق شرط النجاح في 8 مواد، بجانب النجاح في المستوى المتقدم من مادة الرياضيات عشان يتقبل في واحدة من الكليات.
اتعرف أيضًا على: أهم المعلومات عن شهادة الدبلومة الكندية
8- مصاريف المدارس الكندية في مصر
بما إن المدارس الكندية بتنتمي لفئة المدارس الانترناشونال، فمصاريفها بتكون مرتفعة؛ بداية من 145 ألف جنيه لمراحل رياض الأطفال والصف الأول الابتدائي، وتصل لـ 170 ألف جنيه للثانوية، وبيكون الاختلافات بين المدارس بسيطة.
ولكن المصاريف دي بتكون مقابل جودة التعليم اللي بيتلقاها الطالب، واللي بتأثر على شخصيته، ومستقبله بشكل إيجابي.
9- قائمة بالمدارس الكندية في مصر
من المدارس اللي بتطبق نظام التعليم الكندي في مصر :
المدرسة الكندية الدولية بمصر
المدرسة موجودة في التجمع الخامس في القاهرة، وتعد من أشهر المدارس اللي بتطبق النظام الكندي، وبتطبق أهدافه.
وللتواصل مع إدارة المدرسة: 0225418277 – 0225418299
مدرسة التراث الدولية
توجد مدرسة التراث الدولية الكندية في أكتوبر – محافظة الجيزة، وللاتصال بإدارتها: 01038736858 – 0238253689
مدرسة بريتش كولومبيا الكندية
مدرسة بريتش موجودة في فيصل محافظة القاهرة، وتقدر تتواصل مع الإدارة عن طريق الرقم دا: 01050137911
مدرسة بريتش كولومبيا الكندية الدولية
المدرسة دي هي المدرسة الكندية الوحيدة الموجودة في مدينة الشروق بالقاهرة، وبتقدم خطة تعليمية متميزة تساعد على تطوير مهارات الطلبة.
للتواصل مع المدرسة: 01002128112 – 01227484086
الخلاصة
المدارس الكندية في مصر؛ هي مدارس بتطبق مناهج كندية معتمدة بأحدث التقنيات التعليمية، وبتبدأ من مرحلة رياض الأطفال إلى المرحلة الثانوية، وبتوفر فرصة استكمال الدراسة في كندا.
المناهج بيتم تدريسها باللغة الإنجليزية، فالطالب بيتعود على لغة جديدة أثناء دراسته، إلى جانب إنه بيحصل على مميزات تانية مش موجودة في المدارس الرسمية؛ زي اهتمام المدرسة بالأنشطة، وتطبيق مناهج حديثة تناسب المرحلة العمرية للطفل.
لكن بعض أولياء الأمور بيتراجعوا عن التقديم لأولادهم في المدارس الكندية؛ لإنهم شايفين إن بيكون في ضغط زائد على الطلبة أثناء الدراسة نتيجة إن أغلب الدرجات اللي بيحصلوا عليها بتكون حسب الجهد المبذول في المادة.
بالإضافة إلى إن المدارس مش بتجبر الطالب على الحفظ، وبتعتمد فقط على الفهم، والطريقة دي مش بتناسب كل الطلبة.
عشان كدا مهم توازن كويس بين المميزات والعيوب، عشان تقدر تحدد إذا كانت المدارس دي مناسبة لطفلك ولا لأ.
أضف تعليق