نظام التعليم الأمريكي في مصر | أهم 8 معلومات يجب أن تعرفها

 

الإقبال على المدارس الرسمية في مصر أصبح أقل من السنين اللي فاتت؛ ودا نتيجة عدم الاهتمام بالطلبة بشكل كافي، والتركيز فقط على تحصيل الدرجات بغض النظر عن مدى فهم الطالب، بالإضافة إلى بعض المشكلات التانية الليب بتواجه الطلبة.

ومن هنا بدأ ولي الأمر يدور على بديل للمدارس الرسمية يقدم مستوى تعليمي أرقى ويهتم بتطوير مهارات الطالب قدر الإمكان، وبالفعل في عدد كبير من الأنظمة التعليمية بيقدموا المستوى التعليمي المطلوب، ومن أهمهم نظام التعليم الأمريكي في مصر ودا لإنه نظام تعليمي مميز بيقدم للطلبة مناهج تحترم عقليتهم وتفيدهم بعد كده في حياتهم العملية.

نظام التعليم الأمريكي بيختلف في كثير من النقط عن النظام المصري، وبالتالي لازم نتعرف على تفاصيل النظام ونعرف أهم المميزات والعيوب فيه قبل التقديم للطالب.

أهم ملامح نظام التعليم الأمريكي في مصر

نظام التعليم الأمريكي في مصر هو نظام متكامل، ويعتبر من أفضل الأنظمة التعليمية اللي بتتبع تقنيات التعليم الحديثة بهدف مواكبة التطورات وخلق جيل واعي قادر على الإبداع وحل المشكلات اللي بتواجهه بطريقة عملية، ودا بيساعد الطالب على تطوير مهاراته باستمرار.

النظام ده بيقدم مناهج أمريكية معتمدة تكاد تخلو من الحفظ؛ لإن الهدف الأساسي منها هو الفهم والتطبيق، عشان كده أغلب شغل الطلبة في المدارس بيكون قائم على الأنشطة.

نظام التعليم الأمريكي في مصر بيستمر لمدة 12 سنة دراسية، وفي النهاية الطالب بيدخل امتحان SAT ويحصل على شهادة الدبلومة الأمريكية بعد اجتياز الامتحان، والشهادة دي بتعادل شهادة الثانوية العامة في مصر.

لمعلوماتك، شهادة امتحان SAT حاليا غير معترف بيها في مصر، بمعنى إنها بتأهل الطالب لدخول الجامعات الأمريكية لكن مش بتكون كافية للالتحاق بالجامعات المصرية، والطالب بيدخل امتحان مصري مشابه اسمه EST عشان يتقبل في الجامعات المصرية، والامتحان دا هنتعرف عليه بالتفصيل.

عدد الامتحانات اللي بيدخلها الطالب على مدار السنة في نظام التعليم الأمريكي بتكون أقل من امتحانات المدارس الرسمية، والدرجات اللي بتدخل في المجموع النهائي من الامتحانات دي بتكون قليلة، وبالتالي الضغط النفسي على الطالب بيقل وبيكون معاه فرصة أكبر للإبداع.

تقسيم السنة الدراسية في نظام التعليم الأمريكي

طريقة تقسيم السنة الدراسية في نظام التعليم الأمريكي بتختلف عن الطريقة المتعارف عليها في النظام المصري، فبنلاقي إن السنة متقسمة إلى 3 أو 4 فصول دراسية، ودا بيكون حسب النظام اللي بتتبعه المدرسة.

في كل فصل دراسي بيكون في مجموعة كبيرة من الأنشطة اللي لازم الطالب يشارك فيها؛ لإن عليها درجة كبيرة في المجموع النهائي في آخر السنة.

بعد انتهاء الفصل الدراسي بيكون في امتحانات تقييمية للطالب لكنها غير تعجيزية، وبيكون الهدف منها بس هو معرفة مدى فهم الطالب للمادة العلمية ومدى استفادته من المعلومات اللي حصل عليها من دراسته، والامتحانات دي بيكون عليها درجات أقل من درجات الأنشطة.

تقسيم السنة الدراسية وتوزيع الدرجات بالطريقة دي بيخفف الضغط النفسي على الطالب وبيخليه يركز دايما على تطوير مهاراته وشخصيته عشان يقدر يواكب التطور اللي حواليه، ودا مش بيكون موجود في المدارس الرسمية -الحكومية سابقًا-.

المراحل الدراسية في نظام التعليم الأمريكي

نظام التعليم الأمريكي في مصر هو نظام تعليمي شامل زي ما ذكرنا، فبيبدأ من المرحلة الإبتدائية إلى المرحلة الثانوية، والدراسة فيه بتستمر لمدة 12 سنة، والسنوات دي بتتقسم إلى 6 سنوات في المرحلة الإبتدائية، و 3 سنوات في المرحلة الإعدادية، و 3 سنوات في المرحلة الثانوية زي النظام التعليمي المصري.

آخر سنتين في التعليم في النظام الأمريكي (Grade 11 – Grade 12) بيكونوا بمثابة الثانوية العامة، والطالب بيبدأ فيهم يدخل امتحان السات بشكل رسمي.

المدارس الأمريكية بتتيح فرصة تحويل والتحاق الطلبة بيها في أي مرحلة دراسية، يعني الطالب اللي بيدرس في المدارس الرسمية يقدر يلتحق بيها بعد دراسته لو نظام الدراسة في المدارس الرسمية مش مناسب له.

مناهج نظام التعليم الأمريكي في مصر

المناهج اللي بيتم تدريسها في نظام التعليم الأمريكي في مصر بتكون مناهج أمريكية معتمدة بتركز على تطوير مهارات الطالب وتحسين إدراكه، والمناهج دي مختلفة بالفعل عن مناهج النظام التعليمي المصري.

في المرحلة الإبتدائية بيدرس الطالب اللغة الإنجليزية والعلوم وغيرهم من المواد الموجودة في المدارس الرسمية لكن بمناهج ولغة مختلفة، وفي كل سنة من المرحلة دي بيبدأ المنهج يتطور عشان يتناسب مع عقلية الطلبة.

أما في المرحلة الإعدادية بتزيد عدد المواد اللي بيدرسها الطالب، وكمان المناهج بتكون أكبر، لكن مش بيكون في صعوبة في دراستها؛ لإن المدرسة بتهتم بالتطبيق العملي للمواد أكثر من الحصول على درجات فيها.

ومع دخول الطالب للمرحلة الثانوية بيبدأ يدرس المستويات المتقدمة من المواد بطريقة أكثر تخصصًا، بالإضافة إلى بعض مواد النظام المصري.

امتحانات نظام التعليم الأمريكي

امتحانات نظام التعليم الأمريكي في مصر بتكون في نهاية كل فصل دراسي، وفي نهاية العام بيتم حساب متوسط درجات الطالب في جميع الفصول الدراسية، والامتحانات دي بيكون عليها أقل من 50% من مجمل الدرجات اللي بيحصل عليها الطالب خلال السنة، وباقي الدرجات بتكون على الأنشطة.

في المرحلة الثانوية بيدخل الطالب امتحان تقييمي معين عشان يقدر يلتحق بالجامعات، والامتحانات دي زي امتحان السات والـ ACT وغيرهم.

امتحان سات ومشاكله التي ظهرت مؤخرًا

امتحان SAT هو امتحان تأهيلي بيدخله الطالب في نهاية سنوات دراسته -بداية من Grade 11- في المدارس اللي بتطبق نظام التعليم الأمريكي في مصر عشان يقدر يلتحق بالجامعات الأمريكية؛ لإن المجموع النهائي للطالب -الـ GPA- مش بيكون كافي لإثبات إن الطالب مؤهل فعلا للالتحاق بالجامعات دي، والمؤسسة المسئولة عنه هي مؤسسة College board.

الامتحان بيكون عبارة عن جزئين: جزء SAT 1 وده امتحان عام بيتم اختبار الطالب فيه في 4 حاجات أساسية وهما:

• القراءة
• الكتابة
• الرياضيات
• المقال (بيكون اختياري)

أما الجزء الثاني (SAT 2) فهو متخصص أكثر وبيكون مطلوب في الكليات العملية.

امتحان السات تم اعتماده في مصر لفترة كبيرة، بمعنى إن شهادة السات كانت كافية لدخول الكليات المصرية بدون الحاجة إلى أي شهادة معادلة.

لكن في الفترة الأخيرة ظهرت بعض المشاكل اللي أدت إلى إلغاء اعتماد السات في مصر زي تسريب الامتحانات والإلغاء المتكرر لها، وتم استبدال الامتحان دا بامتحان مصري يشبه السات إلى حد ما في طريقة الأسئلة ويؤهل الطلبة للالتحاق بالجامعات المصرية، والامتحان دا بتشرف عليه مصر فقط.

الفرق بين اختبار sat و act و est

دايما في نهاية الدراسة في أي نظام تعليمي بيكون في امتحان تأهيلي للطالب يعكس مدى استعداده للالتحاق بالجامعات، وفي نظام التعليم الأمريكي في مصر بنلاقي امتحانات مختلفة زي SAT و ACT و EST، والامتحانات دي بتختلف عن بعضها في أكثر من نقطة.

اختبار SAT

هو اختبار تابع لمؤسسة College board زي ما ذكرنا بيأهل الطلبة إلى الالتحاق بعدد كبير من الجامعات الخارجية، وبيكون عليه إشراف كلي من خارج مصر.

في الامتحان دا الطالب بيكون معاه فرصة إنه يقدم عليه أكثر من مرة لحد ما يحصل على المجموع المطلوب لدخول الجامعات، والفترة دي امتحان سات غير معترف بيه في مصر.

اختبار ACT

امتحان ACT هو امتحان بيشبه السات في بعض النقاط زي إنه بيأهل الطلبة للالتحاق ببعض الجامعات الأمريكية، وكمان طريقته قريبة من امتحان السات، لكن بنلاحظ إن امتحان ACT بيكون أسهل وأقل تخصصًا من السات.

الامتحان دا تم اعتماده لفترة في مصر ولكن القرارات الأخيرة وضحت إن اعتماده هيتلغي في شهر أغسطس من العام الحالي.

اختبار EST

امتحان EST هو امتحان مصري بديل للـ SAT والـ ACT بتشرف عليه وزارة التربية والتعليم المصرية، وهو الامتحان الوحيد اللي هيتم الاعتراف بيه الفترة الجاية كامتحان تأهيلي لدخول الجامعات المصرية.

مميزات نظام التعليم الأمريكي في مصر

اختلاف أنظمة التعليم الموجودة في مصر عن بعضها بيضيف لها بعض المميزات، والمميزات دي هي اللي بتساعد ولي الأمر إنه يقارن بين الأنظمة المختلفة ويختار أنسب مدرسة لابنه.

من أهم المميزات اللي موجودة في نظام التعليم الأمريكي في مصر بنلاقي:

تقديم شهادة دراسية معتمدة

الطالب في نظام التعليم الأمريكي في مصر بيحصل على شهادة معتمدة بعد اجتيازه امتحان الـ SAT، والشهادة دي بتمكنه من الالتحاق بالجامعات الأمريكية واستكمال دراسته خارج مصر بجانب حصوله على الدرجات المطلوبة.

لكن الشهادة دي أصبحت غير إلزامية في مصر، وبالتالي لو الطالب حابب يكمل دراسته في جامعة خارجية يقدر يقدم على امتحان السات ويتدرب عليه كويس قبل دخوله شكل رسمي.

الاهتمام خلال العام الدراسي بتطوير مهارات الطالب

المدارس اللي بتطبق نظام التعليم الأمريكي في مصر بتكون حريصة على تطوير مهارات الطالب بجانب حرصها على رفع مستوى الطالب التعليمي، وبالتالي بيكون في مشاركة من الطالب في العديد من الأنشطة على مدار العام الدراسي، واللي هدفها التأثير في شخصية الطالب وتطوير مهاراته.

تقليل الضغط على الطالب

توزيع الدرجات في المدارس الأمريكية في مصر بيقلل الضغط على الطالب بشكل كبير، فبنلاقي إن الأنشطة اللي بيمارسها الطالب خلال فترة الدراسة بيكون عليها أكثر من 50 % من مجموع الدرجات الكلي، وباقي الدرجات بيتم توزيعها على الامتحانات، وبالتالي الطالب بيذاكر عشان يفهم المادة العلمية كويس مش عشان ينجح، على عكس اللي بيحصل في المدارس الرسمية.

عدم الحاجة إلى الكتب الخارجية

الكتب الخاصة بالمدارس اللي بتطبق نظام التعليم الأمريكي في مصر بتحتوي على معلومات شاملة عن المنهج، والطالب مش بيكون مضطر إنه يشتري الكتب الخارجية عشان يفهم المادة العلمية.

عيوب نظام التعليم الأمريكي في مصر

في نظام التعليم الأمريكي بنلاقي بعض المشاكل اللي بتواجه الطلبة أثناء دراستهم، وبالتالي المشاكل دي بتندرج تحت قائمة العيوب.

من عيوب نظام التعليم الأمريكي:

دراسة مناهج غير كافية لتأهيل الطلبة للجامعات

مناهج المدارس الأمريكية المعتمدة بتكون متميزة ومفيدة للطلبة، لكن بعض المناهج مش بتكون كافية إنها تأهل الطالب للكليات العملية، وبالتالي الطالب بيلتحق بالكليات دي بدون ما يكون عنده خلفية كويسة عنها تساعده في فهم مناهجها.

إلغاء اعتماد امتحان الـ SAT

بعض الطلبة بيكون هدفهم من دخولهم المدارس الأمريكية المعتمدة هو الحصول على شهادة امتحان السات عشان يقدروا يكملوا دراستهم خارج مصر، وبعد إلغاء اعتماد السات بدأ عدد من أولياء الأمور يعيدوا النظر في قرار التقديم لأولادهم في المدارس دي.

الدراسة باللغة الإنجليزية

رغم إن دراسة المناهج باللغة الإنجليزية بتساعد الطلبة على إتقان لغة جديدة، إلا إن بعض الطلبة بيواجهوا صعوبة في دراسة المناهج دي بسبب اللغة، وبيعتبروها أحد عيوب نظام التعليم الأمريكي في مصر.

الخلاصة

نظام التعليم الأمريكي في مصر هو نظام شامل بيدرس فيه الطالب مناهج أمريكية معتمدة بتركز على تطوير مهارات الطالب باستمرار، وهدفها هو خلق جيل واعي قادر على مواكبة التطور.

من مميزات النظام دا إنه بيقدم للطالب شهادة معتمدة تأهله للالتحاق بالجامعات الأمريكية، وبيقلل الضغط النفسي على الطالب بإن أغلب الدرجات تكون على الأنشطة اللي بيمارسها الطالب أثناء العام الدراسي، أما الامتحانات فبيكون عليها درجات بسيطة في النهاية.

كمان من نظام التعليم الأمريكي في مصر إن الطالب مش بيحتاج للكتب الخارجية عشان يقدر يذاكر، وكتب المدرسة بتكون كافية جدًا لفهم المادة العلمية.

أما عن العيوب بنلاقي إن بعض المناهج العلمية مش بتكون كافية إنها تاهل الطالب للدراسة الجامعية، وبكده مش هيكون عنده خلفية كافية عن الكلية قبل ما يدخلها.

كمان بعض الطلبة بيشوفوا إن إلغاء اعتماد السات في مصر أثر بالسلب على نظام التعليم الأمريكي؛ ودا لإن البعض بيدخل المدرسة للحصول على شهادة السات فقط.