أهم 8 معلومات عن المدارس الكندية في مصر 2021

أهم 8 معلومات عن المدارس الكندية في مصر 2021 المزيد على موقع دليل المدارس المصرية: أهم 8 معلومات عن المدارس الكندية في مصر 2021

ظهور المدارس الكندية في مصر حقق حلم عدد كبير من الطلبة اللي حابين يحصلوا على فرصة الدراسة في الجامعات الكندية واستكمال دراستهم بالخارج؛ لإن المدارس دي بتقدم شهادة معتمدة بتتيح للطالب الالتحاق بالجامعات المصرية أو الكندية.

المدارس الكندية أصبحت بديل مميز للمدارس الرسمية -الحكومية سابقًا-؛ لإنها بتقدم مناهج مميزة بتراعي فيها المرحلة العمرية للمتلقي، وبتهتم بتطوير مهاراته بصفة مستمرة عن طريق الأنشطة وغيرها، إلى جانب العديد من المميزات اللي مش موجودة في المدارس الرسمية.

في المقال دا هناخد جولة مع المدارس الكندية في مصر ونتعرف علي النظام التعليمي اللي بيتم تطبيقه فيها، وإيه أهم المميزات والعيوب الموجودة في النظام عشان ولي الأمر يقدر يقارن بين النقط دي قبل التقديم لأولاده في المدارس الكندية.

ما هو نظام الثانوية الكندية

المدارس الكندية في مصر هي مدارس بتقدم منهج كندي معتمد تم تصميمه تبعًا لأحدث التقنيات التعليمية، ونظام الثانوية العامة الكندي بيعد بديلًا للثانوية العامة في مصر.

الثانوية الكندية بتختلف عن الثانوية العامة في أكثر من نقطة زي إن مناهجها بتركز أكثر على الفهم، والنظام مش بيتبع طرق الحفظ والتلقين في المدرسة، ودا بيكسبها مميزات عن الثانوية العامة وبيخلي عدد كبير من الطلبة يقبل عليها كل عام.

الثانوية الكندية كمان بتتعامل بنظام المادة مش بنظام الفصول الدراسية، ودا غير المتعارف عليه في باقي الأنظمة في مصر، وبعد الانتهاء من دراسة المواد دي ودخول الامتحان النهائي بيحصل الطالب على شهادة معتمدة تؤهله لدخول الجامعات المصرية والكندية.

الطلبة في الثانوية الكندية بيدرسوا كلهم نفس المواد في أول سنتين، وبعدها بيختاروا المواد اللي حابين يدرسوها بناء على اهتماماتهم وميولهم.

الطالب بيختار مواد التخصص من 4 مجموعات أساسية وهم: المواد المؤهلة للكليات الطبية، والرياضيات، والمواد الأدبية، والمواد المؤهلة لكليات التجارة والاقتصاد، والمجموعة اللي بيختارها هي اللي بيكمل فيها دراسته لآخر الثانوية.

شروط الالتحاق بالمدارس الكندية في مصر

المدارس الكندية في مصر بيقبل عليها العديد من الطلبة في بداية كل سنة دراسية، وبيكون في مجموعة من الشروط اللي لازم تتوفر عشان المدرسة تقبل الطالب، ومن ضمن الشرط دي:

إتمام الطفل سن 4 سنوات

التعليم في المدارس الكندية في مصر بيبدأ من سن 4 سنوات في مرحلة رياض الأطفال، وبالتالي لازم الطفل يكون أتم 4 سنوات قبل التقديم عشان يقدر يحصل على فرصة الحصول على التعليم الكندي ويتفوق فيه.

استعداد الطالب للدراسة باللغة الإنجليزية

بيتم تدريس المناهج الكندية في مصر باللغة الإنجليزية؛ لإنها لغة عالمية وكمان الطالب بيقدر يفهمها بسهولة، ومن هنا لازم ولي الأمر يدرك النقطة دي ويعرف مدى استعداد طفله للدراسة باللغة الإنجليزية.

كمان لازم يكون حريص على رفع مستوى طفله في اللغة الإنجليزية ومتابعة مستواه بشكل مستمر؛ لإن ده هيساعده على التأقلم مع نظام التعليم الكندي في مصر وفهمه جيدًا.

تقديم جميع الأوراق المطلوبة

التحاق الطالب بالمدارس الكندية في مصر بيتطلب تقديم بعض الأوراق الرسمية اللي بتوضح المعلومات الشحصية للطالب، ومعلومات عن ولي الأمر وحالة الأسرة، وغيرهم، والأوراق دي المدارس بتعلن عنها قبل فتح باب التقديم، وفي حالة عدم تقديم جميع الأوراق اللي المدرسة بتطلبها ممكن يتم رفض ملف الطالب.

الشرط دا ممكن يتحقق بسهولة بتواصل ولي الأمر مع إدارة المدرسة بشكل مباشر والتعرف على المستندات المطلوبة.

مناهج المدارس الكندية في مصر

مناهج المدارس الكندية في مصر

مناهج المدارس الكندية تم تقييمها كأفضل مناهج بتُقدم على مستوى العالم في السنوات الأخيرة، ودا يعد بمثابة برهان على نجاح تطبيق نظام التعليم الكندي، وإنه بالفعل نظام مميز عن باقي الأنظمة التعليمية المختلفة في مصر.

المناهج قائمة على فكرة التطبيق عشان تحسن مهارات الطالب وتنمي قدراته، ودا بيساعده على فهم المادة العلمية بشكل كويس بدون الحاجة إلى الحفظ والتلقين، والتطبيق دا بيكون من خلال ممارسة الطالب للعديد من الأنشطة أثناء فترة دراسته.

القائمين على وضع المناهج بيكونوا حريصين على إن المناهج دي تناسب المرحلة العمرية اللي بيمر بيها الطالب، وبالتالي بيكون في تدرج في صعوبة المواد وتدرج كمان في كم المادة العلمية اللي بيتم تدريسها خلال السنوات الدراسية بطريقة غير مجهدة للطالب، وتساعده على تنمية مهاراته وتطوير ذاته.

لغة الدراسة في المدارس الكندية في مصر

المدارس الكندية في مصر بتدرس مناهج كندية معتمدة باللغة الإنجليزية، والمناهج دي تعد من أفضل المناهج اللي بيتم تقديمها في الأنظمة التعليمية على مستوى العالم؛ ودا لإنها بتركز على الفهم والإدراك أكثر من الحفظ، وبالتالي بيكون في استفادة كبيرة للطالب.

دراسة المناهج المميزة دي باللغة الإنجليزية هتساعد الطالب على ممارسة لغة جديدة ومعرفة مصطلحاتها، وبالتالي هيقدر يكتسب اللغة بمرور الوقت.

بعض الطلبة بيشوفوا إن المناهج الكندية هتكون أسهل لو تم تدريسها باللغة العربية، ولكن الدراسة باللغة الانجليزية في الحالة دي هي الأفضل؛ لإنها هتساعدهم على فهم المصطلحات بشكل أفضل، والصعوبة اللي بتقابلهم في البداية هتختفي مع الوقت.

المدارس الكندية بتقدم كتير من المميزات للطلبة في جميع المراحل الدراسية، والمميزات دي هنتعرف عليها حالًا.

مميزات المدارس الكندية في مصر

مميزات المدارس الكندية في مصر

المدارس الكندية في مصر تُعد بديل مميز للمدارس الرسمية؛ لإنها بتقدم مناهج مميزة بتطبق فيها تقنيات تعليمية حديثة بتؤثر بشكل إيجابي على مهارات الطالب المختلفة، وبتطور من شخصيته، وبتزود مخزون ثقافته العلمية.

كمان من أهم المميزات اللي بتقدمها المدارس الكندية:

تقديم شهادة معتمدة في نهاية الدراسة

المدارس الكندية بتقدم للطالب شهادة معتمدة من وزارة التعليم العالي الكندية ووزارة التربية والتعليم المصرية، وبتكون بمثابة شهادة الثانوية العامة في مصر، فبتأهل الطالب للالتحاق بالجامعات المصرية أو استكمال الدراسة في أحد جامعات كندا.

إتاحة فرصة دراسة مناهج كندية بدون الحاجة إلى السفر

المناهج الكندية بتشتهر بتميزها وتطورها المستمر بشكل يتناسب مع عقلية الطالب، ومن هنا أصبح حلم السفر إلى كندا ودراسة مناهجها يراود عدد كبير من الطلبة في مصر، لكن نظرًا لصعوبة السفر خاصة بعد أزمة كورونا العالمية بنلاقي إن بعضهم بيتخلي عن حلمه.

لكن حاليا أصبحت دراسة المناهج الكندية أمر سهل، وممكن الطالب يحقق حلمه وهوا داخل مصر، ودي تعتبر أحد أهم مميزات الدراسة الكندية.

مساعدة الطالب على إتقان اللغة الإنجليزية

اللغة اللي بتدعمها المدارس الكندية في مصر هي اللغة الإنجليزية، ورغم إن بعض الطلبة ممكن يواجهوا صعوبة في الدراسة بلغة مختلفة عن لغتهم الأصلية إلا إنها بتساعدهم على إتقانها خلال سنوات الدراسة.

عيوب المدارس الكندية في مصر

تطبيق نظام التعليم والمنهج الكندي في مدارس مصر بيقابله كتير من المشاكل، والمشاكل دي أولياء الأمور بيعتبروها من عيوب المدارس الكندية في مصر، وممكن يرفضوا يقدموا لأولادهم فيها بسبب العيوب دي.

من أشهر عيوب نظام التعليم الكندي في مصر:

زيادة الضغط على الطالب

درجات الطالب في المادة الواحدة بيحصل عليها حسب جهده خلال فترة دراستها، بمعنى إن أغلب الدرجات بتكون على الأنشطة اللي بيقوم بيها الطالب، باقي الدرجات -درجات بسيطة- بتكون على الامتحانات، وبالتالي الأمر بيتطلب منه بذل جهد كبير عشان يقدر يحصل على درجات عالية في المادة.

عدم إجبار الطالب على الحفظ

مناهج المدارس الرسمية في مصر بيتم تدريسها بطريقة الحفظ والتلقين، وعدد كبير من الطلبة بيتعودوا على الطريقة دي وبيبدءوا يحفظوا المناهج عشان يقدروا يحلوا كويس في الامتحانات،.

ورغم إن دي مش الطريقة الصح للتعليم إلا إن معظم أولياء الأمور بيشوفوا إنها طريقة مناسبة لتعليم الطلبة في السنوات الأولى وإنهم بيقدروا يتفوقوا في النظام دا.

وبالتالي ولي الأمر اللي بيفكر بالطريقة دي بيكون مقتنع إن عدم إجبار الطفل على الحفظ في المدارس الكندية في مصر هو أحد عيوب النظام.

شروط الالتحاق بالكليات لطلبة المدارس الكندية

الثانوية الكندية تعتبر بديل للثانوية العامة، بمعنى إن الطالب هيقدر يلتحق بالجامعات المصرية بعد حصوله على الشهادة بدون ما يحتاج إلى شهادات أخرى أو إجراء معادلة.

لكن قبل الالتحاق بالكلية بيكون في بعض الشروط اللي لازم تتطبق عشان الطالب يتقبل بالكليات المصرية.

من شروط الالتحاق بالكليات إن الطالب يكون ناجح في 8 مواد درسهم في السنة الأخيرة من الثانوية الكندية (Grade 12)، وبحد أقصى ممكن يكون دارس 3 مواد منهم في Grade 11.

بالنسبة للكليات الطبية فبيتم تطبيق نفس الشرط بالإضافة إلى النجاح في المستوى المتقدم في مادة الأحياء.

أما في كليات الهندسة فلازم الطالب يحقق شرط النجاح في 8 مواد بجانب النجاح في المستوى المتقدم من مادة الرياضيات عشان يتم قبوله في أحد الكليات.

الجامعات الكندية بتقدم باستمرار منح تعليمية للطلبة توفر لهم فرصة الدراسة في كندا والتعرف على مناهجها المميزة، والمنح دي تقدر تتابعها من هنا.

قائمة بالمدارس الكندية في مصر

قائمة بالمدارس الكندية في مصر

من المدارس اللي بتطبق نظام التعليم الكندي في مصر بنلاقي:

المدرسة الكندية الدولية بمصر

المدرسة موجودة في التجمع الخامس في القاهرة، وتعد من أشهر المدارس اللي بتطبق النظام الكندي وبتطبق أهدافه.

للتواصل مع إدارة المدرسة: 0225418277 – 0225418299

مدرسة التراث الدولية

توجد مدرسة التراث الدولية الكندية في أكتوبر – محافظة الجيزة، وللاتصال بإدارتها:
01038736858 – 0238253689

مدرسة بريتش كولومبيا الكندية

مدرسة بريتش بتوجد أيضًا في فيصل محافظة القاهرة وتقدر تتواصل مع الإدارة عن طريق الرقم دا: 01050137911

مدرسة بريتش كولومبيا الكندية الدولية

المدرسة دي هي المدرسة الكندية الوحيدة الموجودة في مدينة الشروق بالقاهرة، وبتقدم خطة تعليمية متميزة تساعد على تطوير مهارات الطلبة.

للتواصل مع المدرسة: 01002128112 – 01227484086

الخلاصة

المدارس الكندية في مصر هي مدارس بتطبق مناهج كندية معتمدة بأحدث التقنيات التعليمية، وبتبدأ من مرحلة رياض الأطفال إلى المرحلة الثانوية، وبتوفر فرصة استكمال الدراسة في كندا.

المناهج بيتم تدريسها باللغة الإنجليزية، فالطالب بيقدر يتقن لغة جديدة أثناء دراسته، إلى جانب إنه بيحصل على مميزات تانية مش موجودة في المدارس الرسمية زي اهتمام المدرسة بالأنشطة، وتطبيق مناهج حديثة تناسب المرحلة العمرية للطفل.

بعض أولياء الأمور بيتراجعوا عن التقديم لأولادهم في المدارس الكندية؛ لإنهم شايفين إن بيكون في ضغط زائد على الطلبة أثناء الدراسة نتيجة إن أغلب الدرجات اللي بيحصلوا عليها بتكون حسب الجهد المبذول في المادة، بالإضافة إلى إن المدارس مش بتجبر الطالب على الحفظ وبتعتمد فقط على الفهم، والطريقة دي مش بتناسب كل الطلبة.

وأخيرًا، المدارس الكندية لازالت بتقدم خدمة تعليمية مميزة للطلبة في جميع المراحل الدراسية بتخليهم قادرين على مواكبة التطور حواليهم، وتقديم ولي الأمر فيها لأولاده بعد التأكد من إن النظام مناسبهم هيساعدهم على التفوق وتحقيق حلمهم.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

ورك شيت للاطفال Worksheet For Kids

ماث شيت – Math Worksheet 2

ماث شيت – Math Worksheet 2 يحتوي  علي الارقام و الاعداد للاطفال في مرحلة الكي جي للتدريبات علي توصيل الارقام و كتابتها و المراجعة عليها

كي جي 1 انترفيو – KG 1 Interview Worksheet

كي جي 1 انترفيو – KG 1 Interview Worksheet بيساعدك تدرب طفلك علي اسئلة اللي بيتعرض ليها اثناء التقديم لاي مدرسة لمرحلة الحضانة تدريبات اخري

انضم إلي جروب دليل المدارس المصرية

إقرأ أكثر..

mood_bad
  • لا توجد تقييمات/تعليقات.
  • اضف تعليق