دليل أفكار للأطفال بالكرتون: 14 فكرة بالكرتون تساعد في تنمية مهارات طفلك

الأنشطة اليدوية البسيطة زي أفكار للأطفال بالكرتون تعتبر من أهم الوسائل اللي بتساعد على تطوير مهارات الطفل في المراحل العمرية الأولى.

واللعب بالكرتون مش مجرد تسلية، لكنه كمان أداة فعّالة لتعزيز الإبداع، وتنمية الخيال، وتقوية المهارات الحركية؛ فلما الطفل يستخدم أدوات بسيطة زي الكرتون والكرات، بيتعلم بطريقة تفاعلية بتجمع بين المرح والتعليم.

 والأفكار دي بتشجع الطفل على التفكير، والمحاولة، وحل المشكلات، وبتساهم كمان في بناء ثقته بنفسه وهو بيشوف نتيجة شغله.

في المقال دا هنعرض لك مجموعة من الأفكار الممتعة والمفيدة للأطفال باستخدام الكرتون عشان تنمي مهارات طفلك، وتشغلي وقته بطريقة صحيحة. 

أفكار للأطفال بالكرتون| 14 فكرة مسلية ومفيدة

مش شرط يكون اعتمادك على شراء الألعاب الغالية للطفل طول الوقت عشان ينبسط بيها، ممكن باستخدام أدوات موجودة في البيت تعمليله لعبة تسليه ويحبها، وممكن لما يكبر ويفهم شوية تجيبي الأدوات وتساعديه وتنفذوها سوا. 

ودلوقتي هنعرض لك أهم وأبسط أفكار للأطفال بالكرتون تقدري تنفذيها لطفلك. 

1- لعبة سقوط الكرات 

استخدمي كرتونة كبيرة وتكون سليمة على شكل مربع، واعملي فتحات دائرية بحجم الكرة على واجهتها؛ وممكن تلوني كل فتحة بلون حسب ألوان الكور. 

وخلي الطفل يرمي الكرات داخل الفتحات ويحاول يسقطها في الكرتونة على حسب اللون، وشغلي Timer واتنافسي معاه أو حد من إخواته. 

وممكن تثبتي الكرتونة في الحائط وتحطي سلة بالكرات، والطفل يدخلها من خلال الفتحات. 

الفوايد

• تنسيق اليد والعين: من خلال محاولة إصابة الهدف بدقة.
• تنمية المهارات الحركية: رمي الكرات وتحريكها.
• التسلية التفاعلية: اللعبة فيها متعة وتكرار.

2- سباق الكرات على منحدر 

اصنعي منحدر باستخدام كرتون مقصوص على شكل مائل والزقيه على الحائط، واستخدمي كرات صغيرة وخلي الطفل ينزلها من أعلى المنحدر ويشوف الكرة وهي بتتحرك للأسفل.

الفوايد

• تعليم المفاهيم الفيزيائية: زي الميل والجاذبية.
• تشجيع الحركة: الطفل بيتحرك لإعادة الكرات.
• تعزيز الملاحظة: متابعة حركة الكرات.

3- متاهة الكرات 

أفكار للأطفال بالكرتون متنوعة وتقدري تنفذي بيها ألعاب كتير، زي لعبة المتاهة، تقدري تعملي متاهة بسيطة باستخدام كرتونة هتكون في شكل نهائي زي علبة البيتزا، هترسمي المتاهة على وجه وتعملي فتحات صغيرة للكور، وتخلي قاعدتها مرتفعة وفيها فتحة لخروج الكرة زي ما مُوضح في فيديو كيفية عمل متاهة للأطفال.

وممكن تعمليها بطريقة تانية إنك تجيبي قاعدة علبة البيتزا أو أي كرتونة سمكها بسيط وتشيلي الـ Cover بتاعها، وتلزقي في القاعدة 3 أسطوانات من الكرتون أو الورق المقوى والطفل يبدأ يحرك الكور الصغيرة لحد ما تدخل أي اسطوانة فيهم.

تقدري تشوفي الشكل النهائي من خلال أفكار للأطفال بالكرتون.

الفوايد

• تنمية المهارات الحسية: لمس وتحريك الكرة داخل المتاهة.
• تقوية التنسيق بين اليد والعين: تحريك الكرة بحرص.
• زيادة التركيز والصبر: لإيجاد المسار الصحيح.

4- لعبة الأنفاق بالكرتون والكرات

اصنعي أنفاق صغيرة باستخدام الكرتون على الأرض، بحيث تكون واسعة كفاية لمرور الكرات، وخلي الطفل يحاول دحرجة الكرات داخل الأنفاق للوصول إلى الطرف الآخر.

الفوايد

• تعزيز مهارة التتبع: متابعة حركة الكرة من البداية للنهاية.
• تحفيز الحركة: الطفل يزحف أو يمشي وراء الكرة.
• تنسيق اليد والعين: توجيه الكرات داخل الأنفاق.

5- لعبة الدودة الملونة 

يمكنك تحضير هذه اللعبة عن طريق اتباع الخطوات التالية: 

1- تحضير جسم الدودة

1. قصي ورقة كرتون على شكل مستطيل أو خط طويل وارسمي عليها شكل دودة ممتدة.
2. قسمي جسم الدودة إلى دوائر متصلة (كل دائرة تمثل جزء من الجسم).
3. ثبتي غطاءات زجاجات ملونة (أحمر، أزرق، أصفر…) على الدوائر باستخدام لاصق قوي.

2- إعداد بطاقات الأنماط

جهزي كروت صغيرة وارسمِي عليها أنماط مختلفة بنفس ألوان غطاءات الزجاجات الموجودة على الدودة (زي: أحمر – أزرق – أصفر).

3- اللعبة

أعطي الطفل الكروت وخليه يطابق الألوان بنفس ترتيب النمط الموجود على الكارت عن طريق وضع غطاء الزجاجة على الدوائر المناسبة.

الفوايد

• تنمية المهارات الحركية الدقيقة: وضع الغطاء على الأماكن المناسبة.
• تعزيز التفكير المنطقي: مطابقة الأنماط تبعاً للبطاقات.
• تعلم الألوان: الطفل بيتعرف على الألوان وبيميز بينها.
• تنسيق اليد والعين: التركيز أثناء ترتيب الغطاءات.

6- لعبة كرة السلة الصغيرة والكوب المطاطي

واحدة من أفكار للأطفال بالكرتون هو صناعة شكل صندوق مفتوح الطرفين يشبه شبكة السلة ويُلصق على الحائط وهتجيبي كوب ورقي وتشيلي قاعدته بحيث يكون مجوف، وهتقصي بالونة ويكون طرفها مربوط، وتحطيها على قاعدة الكوب، ويقدر يستخدمها الطفل من خلال شد الجزء المطاطي للبالونة وتصويب الكرة الصغيرة ناحية الهدف. 

الفوايد

• تقوية المهارات الحركية الدقيقة: الطفل بيتعلم يتحكم في الكوب المطاطي وهو بيطلق الكرات، ودا بيقوي حركة إيده وأصابعه.
• التنسيق بين العين واليد: محاولات الطفل إنه يصيب الهدف بتساعده ينسق بين نظره وحركة إيده بشكل أفضل.
• تعليم الصبر والإصرار: لما الطفل يحاول أكتر من مرة يوصل للهدف، بيتعلم الصبر وما يستسلمش بسهولة.
• تقوية المهارات الاجتماعية: لو بيلعب مع أصحابه أو أسرته، بيتعلم التفاعل والتعاون من خلال اللعبة.
• تعزيز التفكير المنطقي: بيبدأ يلاحظ تأثير القوة والزوايا على حركة الكرة، ودا بينمي التفكير التحليلي عنده.
• زيادة التركيز والانتباه: اللعبة بتحتاج تركيز عشان يحدد المسافة والاتجاه المناسب لإصابة الهدف.

7- صنع أقنعة وحيوانات بالكرتون

قصي أشكال حيوانات أو شخصيات كرتونية على الكرتون، وخلي الطفل يلونها ويلبسها كقناع.

الفوايد

• تنمية المهارات اليدوية: الطفل هيقص ويلون بنفسه.
• التعبير عن الذات: ممكن يمثل دور الشخصية اللي اختارها.
• تعزيز الثقة بالنفس: لما يشوف شغله ويتباهى بيه.

8- صنع بيت من الكرتون

استخدمي كرتونة قديمة وصممي مع طفلك بيت صغير؛ ممكن تضيفوا شبابيك، باب بيتفتح ويتقفل، وكمان شوية ديكور بسيط زي رسم الأشجار أو تلبيس الكرتونة بورق ملون.

الفوايد

• تنمية المهارات الحركية الدقيقة: الطفل هيستخدم مقص، ألوان، ولصق.
• الخيال والإبداع: الطفل هيخطط شكل البيت ويضيف له تفاصيل زي اللي بيحلم بيها.
• التعاون: لو اتعمل كمشروع مع الأخوات أو الأصدقاء.

9- صنع ساعة تعليمية بالكرتون

اصنعي ساعة دائرية من الكرتون وركبي عقارب متحركة باستخدام دبوس.

الفوايد

• تنمية المهارات الحركية: تركيب العقارب وتحريكها.
• تعلم قراءة الوقت: بشكل ممتع.

10– شجر التفاح لتعلم العد

تعد أفكار للأطفال بالكرتون في بداية تعلمهم أمر إيجابي، وبيساعدهم في تعلم أمور كتيرة، فنشاط زي دا هيثبت معاه الأرقام وهيحفظها. 

هتجيبي كرتونة وتقسميها مربعات عليها الأرقام وترسمي شجر عليهم، وتعملي ثقوب على حسب العدد المكتوب، واستعملي الأعواد المستخدمة لتنظيف الأذن، ولوني طرف منها بالأحمر. 

الطفل هيمسك الرقم ويعد الأعواد ويحطها في الثقوب. 

الفوايد

• تنمية المهارات الحركية الدقيقة: لما الطفل يمسك الأعواد ويحطها في الثقوب، دا بيقوي عضلات إيده الصغيرة ويزود تركيزه.
• التمييز بين الأرقام: لما يشوف الأرقام مكتوبة قدامه ويبدأ يعد الأعواد، هيعرف يميز بينهم بسهولة.
• تعليم العد بشكل عملي: الطفل بيتعلم يعد الأرقام بطريقة مرحة وعملية بعيدًا عن التلقين.
• زيادة التركيز والانتباه: النشاط دا بيشغل دماغه وإيده مع بعض، فبيخليه يركز أكتر.

11– تعلم الحروف

أفكار للأطفال بالكرتون من أفضل الطرق لصناعة ألعاب تفيد الطفل وتعلمه القراءة والكتابة الصحيحة في بداية تعلمه. 

هتجيبي كرتونة وتقسميها لـ 28 مربع وترسمي عليهم الأحرف بشكل يعرف الطفل إنه يتتبع منحنياته بحيث يعرف رسمة الحرف.

وبعدين هتجيبي كرتونة وتعمليها على شكل طبق وتحطي فيها شوية ملح وممكن تلونيه بأي لون، الطفل هيبص على الحرف ويجرب يلمسه بإصبعه عشان يعرف رسمته ويقلدها على الملح؛ النشاط دا مناسب من عمر سنتين ونصف. 

الفوايد

• المساعدة على زيادة التركيز والملاحظة من خلال تقليد الحرف.
• تعلم الحروف وكتابتها من سن صغير. 
• تحسن المهارات الحركية. 

12- تطابق الأشكال

الأشكال وأحجامها من الحاجات المهم الطفل يتعلمها من عمر مبكر، وبإمكان أفكار للأطفال بالكرتون مساعدتك لمعرفتها بشكل كويس. 

فممكن تجيبي كرتون مسطح وترسمي عليه أشكال مربع ومثلث ومستطيل ودايرة، وتقطعيهم بالقطر، وتلوني الأشكال، وترسمي على لوح تاني الأشكال، والطفل يحاول يطابق الشكل. 

وممكن تستخدمي الشفاطات الخاصة بالعصير وتقطعيها، وترسمي أشكالها على الكرتون، وتقطعي مكانهم بالقطر، وتخلي الطفل يدخل كل واحدة في مكانها المناسب. 

الفوايد

• التركيز والانتباه لتطابق الشكل والرسمة أو المكان. 
• معرفة الأشكال وحفظها. 

13- التعرف على المشاعر

عشان تنمي التفاعل الاجتماعي عند طفلك ممكن تستخدمي بعض أفكار للأطفال بالكرتون، ودا من خلال رسم وجه على الكرتون، وعمل بطاقات خاصة بالتعبيرات زي الفرح بضحكة، والحزن من خلال الدموع، التفكير من خلال علامات تعجب، وهكذا.

الفوايد

• هينمي عند الطفل ذكائه العاطفي ومهاراته الاجتماعية. 
• هيزود عنده التركيز والانتباه. 

14– الرسم بالكرتون والدقيق

كل ما خليتي اللعب ممتع مع طفلك كل ما اتعلم أكتر وأصبح مبدع وعقله منتبه، ومن خلال أفكار للأطفال بالكرتون تقدري تنمي مهارات زي الرسم والخيال والإبداع. 

ممكن تجيبي بطاقات كرتونية وترسمي عليها أشكال زي سحب، سيارة، شمس، فواكه، أزهار، وغيرها، وبعدين هتقطعي بالقطر مكانها بحيث تكون مجوفة. 

وبعدين جهزي مكان لطفلك، هتجيبي الكروت ومصفاة فيها دقيق، وهتخليه يرش على الكارت، وبالتالي هيترسم الشكل، ممكن يعمل لوحة كاملة باستخدام النشاط. 

الفوايد

• شَغل وقت الطفل بلعبة مسلية وتعليمية.
• تنمية الخيال ومهارة الرسم عند الطفل.

اقرأ أيضاً: 10 ألعاب لزيادة التركيز عند الأطفال في البيت والروضة والمدرسة. 

نصائح لاستخدام أمثل لأفكار للأطفال بالكرتون

الكرتون ممكن يبقى أداة رائعة تعملي بيها أنشطة مفيدة وممتعة لأولادك. عشان كدا، دي شوية نصايح ليكي لاستخدام أفكار الأطفال بالكرتون:

استغلي الكرتون اللي عندك

بدل ما ترمي كراتين الأدوات المنزلية أو الألعاب، خديها وابدئي بيها. دايمًا شوفي إزاي تعيدي استخدام الحاجات اللي متوفرة عندك، ومش شرط كراتين بس ممكن أكواب، علب، أو أي حاجة ممكن تعملي بيها نشاط أو لعبة.

شاركي طفلك في التحضير

لاستغلال أمثل لأفكار للأطفال بالكرتون اشركي طفلك في تقطيع الكرتون أو التلوين، هيحس إنه جزء من النشاط، ودا هيزود حماسه.

اعملي أنشطة مناسبة لعمره

اختاري الأنسب لطفلك، يعني لو صغير، خلي الأنشطة سهلة زي التصنيف أو التلوين، ولو أكبر شوية، دخلي أفكار فيها تحدي زي المتاهة أو البناء.

اختاري أفكار فيها تعليم

خلي كل نشاط يتعلم منه حاجة زي الأرقام، الحروف، الألوان، أو حتى التفكير الإبداعي.

حافظي على سلامته

استخدمي أدوات آمنة، زي مقص للأطفال، وخليكي معاه طول الوقت لو النشاط فيه لصق أو قطع.

سجلي اللحظة

بعد ما تخلصوا النشاط، صوري النتيجة النهائية ووريهاله، هيحس بفخر إنه عمل حاجة مميزة.

اقرأ أيضاً: أنشطة وألعاب ذكاء للأطفال في البيت من عمر 1 إلى 15 سنة. 

قنوات ومواقع مفيدة لمعرفة أفكار للأطفال بالكرتون

ودلوقتي هنعرفك على أهم قنوات ومواقع تساعدك في معرفة أفكار أكتر، ومنها:

1- قناة Art for Kids Hub

قناة بتعلم الأطفال الرسم والأنشطة الإبداعية بخطوات بسيطة.

2- موقع Pinterest

هتلاقي عليه أفكار لا نهائية لأفكار للأطفال بالكرتون؛ اكتبي “Cardboard crafts for kids” وهتشوفي إبداعات كتير.

3- قناة Red Ted Art

قناة مليانة أفكار DIY للأطفال باستخدام خامات بسيطة زي الكرتون.

4- قناة Mamazadvice

بتقدم نصائح للأمهات لاستغلال وقت الطفل بأقصى فائدة من خلال تنفيذ أفكار للأطفال بالكرتون وغيرها. 

5- قناة Montessori at home by malak

قناة تعليمية بتعرض أفكار ترفيهية للأطفال، وأهم النصائح لتعلم الطفل بطريقة منتسوري. 

في النهاية، لو استخدمنا الكرتون بشكل إبداعي، هنعرف نقدم أنشطة ممتعة ومفيدة للأطفال في نفس الوقت، والأنشطة دي مش بس هتنمي مهاراتهم، لكن كمان هتخليهم يستمتعوا ويتعلموا مع بعض.

أهم حاجة وأنتي بتنفذي أفكار للأطفال بالكرتون إنك تكوني معاه أثناء تنفيذ الأنشطة، عشان تشجعيه وتشاركيه اللحظات الحلوة دي، ومن خلال تجربتك للأفكار دي هتلاقي طفلك بيحب التعلم بشكل مختلف.