الاختيار بين مدارس اللغات المختلفة مش قرار سهل لأي أسرة، وكل ولي أمر بيدور على مدرسة تضمن لأولاده تعليم ممتاز، بالإضافة لتنمية مهاراته، وتوفير بيئة آمنة ليه.
في المنصورة، بيتوفر مجموعة من المدارس المتميزة اللي بتقدم مستوى تعليمي قوي، وأنشطة متنوعة تناسب كل الاحتياجات.
في المقال دا هنعرضلك أبرز مدارس لغات في المنصورة ومعلومات تفصيلية عن العناوين، والمصاريف للعام الدراسي 2024 – 2025م، وأهم المميزات لكل مدرسة، عشان نساعدك تختار الأفضل لأطفالك.
كيف تختار مدرسة اللغات الأنسب لطفلك؟
اختيار مدرسة لطفلك لازم يكون قائم على معايير أساسية بتحدد جودة التعليم وراحته في نفس الوقت، ومن خلال اتباع النقاط دي هتقدر تاخد قرار سليم، وتختار الأنسب من أفضل مدارس لغات في المنصورة.
1- مستوى التعليم
شوف ترتيب المدرسة وشهاداتها المعتمدة، واتأكد إن مستوى اللغات قوي وبيغطي مهارات القراءة والكتابة والنطق.
2- الكادر التعليمي
اسأل عن خبرة المدرسين وتخصصاتهم، وهل المدرسة بتوفر تدريبات مستمرة ليهم ولا لأ.
3- الأنشطة الإضافية
اختار مدرسة عندها تنوع في الأنشطة زي الرياضة، والفنون، والموسيقى؛ لإنها ضرورية لتنمية شخصية طفلك.
4- عدد الطلاب بالفصل
كل ما كان العدد أقل، كل ما زاد تركيز المدرسين على الطلاب بشكل فردي.
5- المناهج المستخدمة
اعرف إذا كانت المدرسة بتقدم منهج دولي، أو قومي، أو مزدوج (لغات وعربي)، وشوف الأنسب لطفلك.
6- وسائل الأمان
اتأكد من توفر كاميرات مراقبة، وبوابات أمان، ونظام دقيق لتوصيل واستلام الطلاب.
7- تكاليف التعليم
قارن المصاريف بالميزانية المتاحة، وشوف إذا كان فيه خدمات إضافية زي خصومات للإخوة أو مواصلات.
8- آراء الأهالي
اسأل أولياء أمور الطلاب الحاليين عن تجربتهم في المدرسة من حيث جودة التعليم وتعامل الإدارة.
9- القرب من البيت
المسافة بين البيت والمدرسة هتأثر على راحة طفلك ووقته اليومي؛ فاختار مدرسة قريبة لتقليل المجهود.
10- زيارة المدرسة
روح بنفسك وشوف الفصول، والمرافق، وطريقة تعامل الإدارة عشان تكون الصورة واضحة.
وافتكر كويس إن بالتخطيط الجيد والتركيز على التفاصيل دي، هتضمن بيئة تعليمية مناسبة وداعمة لطفلك.
تعرف كمان على: الفرق بين المدارس الرسمية للغات والرسمية المتميزة للغات.
قائمة بأفضل مدارس لغات في المنصورة
تتعدد مدارس اللغات بمدينة المنصورة بمختلف المناهج التعليمية، ودا بيوفر اختيارات متنوعة وكتيرة أمام أولياء الأمور، بنقدم لك قائمة تفصيلية عن أهم مدارس اللغات بالمنصورة، وتقدر تختار اللي يناسبك فيهم.
1- مدرسة السيدة خديجة الإسلامية الخاصة للبنات
تعد من أفضل مدارس لغات في المنصورة ، وبتعتمد على نظام تعليمي “ناشونال” بيركز على تقديم المناهج الدراسية المصرية مع تعزيز اللغة الإنجليزية.
وبتقدم اهتمام خاص بالأنشطة الإضافية زي الرياضة والفنون، وتنظيم فعاليات لتكريم الطلاب المتفوقين.
دا غير إنها بتوفر بيئة مدرسية منظمة، بتهتم بالتطوير الشخصي والأكاديمي للطلاب، بالإضافة للخدمات التعليمية الحديثة زي المنصات الرقمية اللي بتسهل عملية التواصل بين أولياء الأمور والمدرسة.
ودي بعض آراء أولياء الأمور عنها:
- “فيها النظامين عربي ولغات، وإدارة المدرسة محترمة في حزم في كل حاجة وفي نفس الوقت في اهتمام ورعاية بالبنات بيعاملوهم زي بناتهم ودا المهم إن أحس بنتي معاهم في أمان، دا غير مستوى الدراسة متابعة يومية مع الأمهات في جروب كل فصل، ونظافة المدرسة وجميلة ومتناسقة”.
- “المدرسة فيها لغات وعربى وعن تجربة مدرسة جميلة جداً نضافة واهتمام بالبنات وضمير ماشاء الله عليهم”.
- “بالنسبة لمصاريفها أنا بعتبرها أحلى مدرسة بنات حالياً الإدارة ممتازة وعجبني فيها الاهتمام بالدين وبالبنات المدرسة جميلة”.
ودي أهم التفاصيل عنها:
- العنوان: شارع المديرية – المختلط – خلف مزلقان السكة الحديد (ش فريدة حسان).
- المصاريف الدراسية: بتبدأ من 12000 جنيه لـ KG 1 وبتزيد للمراحل الدراسية الأكبر.
- أرقام التواصل: 0502316616 – 0502316519.
2- مدرسة الصفوة الدولية البريطانية (SILS)
تعد مدرسة الصفوة أول مدرسة دولية في المنصورة وبتتميز بمكانها الاستراتيجي وسط المدينة ودا بيخلي الوصول ليها سهل من مختلف المناطق، دا غير إنه بيوفر الآمن للأطفال لإنها موجودة في حي الجامعة وبيتوفر بيه كل الخدمات.
ومن أهم المميزات للمدرسة:
- توفير أنشطة رياضية وفنية متعددة.
- توفير بيئة تعليمية حديثة وأمان عالي.
- الاعتماد على المنهج البريطاني.
أهم التفاصيل عنها:
- العنوان: الطريق الدائري أمام مسجد الفرج – المنصورة الجديدة، بجوار نادي الصفوة.
- المصاريف: بتبدأ من 35 ألف جنيه لـ Kg1 وبتزيد في المراحل اللي بعدها.
- رقم التليفون: 0502364538.
3- مدرسة المنصورة كولدج الدولية
واحدة من أفضل مدارس لغات في المنصورة ومُصنفة عالمياً من موقع ميكروسوفت إنها مدرسة رائدة في التكنولوجيا، ومن المدارس الدولية القليلة اللي بتلتزم تماماً بكل المعايير الدولية للتعليم.
بتقدم المنهج بالنظام الأمريكي أو النظام القومي في المدرسة الثانوية وبيكون المنهج مخصص ومميز لإعداد طلاب ليهم دراية ثقافية وعقلية مختلفة.
بتقبل الأطفال في مرحلة التمهيدي من عمر 3 سنوات في أول أكتوبر من كل عام.
وبتبدأ المصاريف الدراسية لمرحلة رياض الأطفال من 30000 جنيه مصري وبتزيد لكل مرحلة دراسية، ومتاح تدفع على قسطين.
ودي التفاصيل الخاصة بيها:
- العنوان: أول طريق نبرة – طلخة – المنصورة.
- أرقام التليفون: 0502588888 – 01129990666.
4- مدرسة الدلتا الأمريكية الدولية (DILS)
تعد مدرسة الدلتا من أبرز مدارس لغات في المنصورة تم انشأها عام 1995 وتم اختيارها من ضمن 14 مدرسة على مستوى الجمهورية لإدخال وإدماج تكنولوجيا المعلومات بالمدارس عام 2004م.
بتتميز بوجود مجموعة كبيرة من المعلمين المتميزين الحاصلين على دورات تدريبية على أعلى مستوى من مدربين أمريكيين ومصريين، لضمان جودة التعليم اللي بيتلقاها الطالب.
وهي أول مدرسة خاصة لغات تحصل على شهادة الاعتماد والجودة الشاملة في التعليم من الهيئة القومية لضمان جودة التعليم.
بتقدم المناهج الأمريكية، وبتعتمد على الأنشطة المتنوعة والبرامج لدعم الطلاب الموهوبين.
ومن ضمن آراء أولياء الأمور عنها:
- “مدرسة رائعة، مكان مميز، مباني مميزة، تدريس ممتاز”.
- “مدرسة مثقفة وتعليمية”.
ودي أهم التفاصيل عنها:
- العنوان: طلخا طريق دمياط – المنصورة.
- المصاريف: بتبدأ من 59500 جنيه، 250 دولار للاعتماد، 3500 جنيه يونيفورم، 3000 جنيه نشاط.
- رقم التليفون: 01090700727.
5- مدرسة المنصورة رويال الخاصة للغات
من أفضل مدارس لغات في المنصورة ورؤيتها “مدرستنا المنصورة رويال سكولز يمتلكها مجموعة من المستثمرين، ويقوم بإدارتها رئيس مجلس إدارة يؤمن بقيمة التعليم الشامل المتمركز على الطالب، والقائم على خلق بيئة تعليمية تخاطب كافة جوانب شخصيته النفسية والروحية؛ وكذلك الجوانب الجسدية والتي تؤهله للتواجد بقوة في مجتمع دائم التغير، وتعده بفكر عالمي يمكنه من مواكبة كافة مستويات الإنجاز”.
ودا بيوضح توجهات المدرسة وتركيزها على جودة التعليم اللي بيتلقاه الطالب؛ عشان تساعده ينمو في بيئة تعليمية تحفزه على التفكير والإبداع.
إدارة المدرسة اتغيرت ودا نتج عنه توسعات واهتمام أكتر بالمرافق والأجهزة، وغير كدا حرصت على تقديم تخفيضات للمصاريف الدراسية للعام الجديد 2024.
ودا لينك التقديم للعام الدراسي الجديد وبعد ما بيستوفي ولي الأمر كل المعلومات المطلوبة بيتابع نتيجة التقديم أونلاين.
ومن آراء أولياء الأمور:
- “حقيقي روياااااااااال ممتازة جداااااااا كمستوى تعليمي وكل المدرسين اللي فيها ممتازين جداااااا وشرحهم هايل وكمستوى ترفيهي هايل فيها تجديدات رائعة”.
- “مدرسة جميلة جداً هي فاتحة من زمان، لكن الإدارة الجديدة والتوسعات عاملين عروض وتخفيضات”.
- الميزة اللي في المدرسة إن فعلاً مش هتحتاجي دروس للأولاد”.
- “المدرسة كويسة جداً والإدارة الجديدة محترمة”.
أهم التفاصيل الخاصة بيها:
- العنوان: المحلة – طريق طلخا – 500 متر بعد كوبري الجامعة.
- المصاريف: بتبدأ من 16000 جنيه لمرحلة الـ pre kg وبتزيد على حسب المرحلة الدراسية.
- رقم التليفون: 01000692685 – 01000692675.
ودي نشرة المصاريف للعام الدراسي 2024 – 2025م على الصفحة الرسمية للمدرسة.
6- مدرسة جلوري للغات
مدارس جلوري الأمريكية بتوفر تعليم ناشونال وانترناشونال أميريكان وبريطاني، ودا بيخليها واحدة من أفضل مدارس لغات في المنصورة، دا غير إنها من المدارس اللي ليها سُمعة طيبة، وآراء إيجابية.
ومن ضمن آراء أولياء الأمور عنها:
- “جلوري مدرسة ممتازة بجد عن تجربة”.
- “جلوري مدرسه ممتاز جدًا”.
ودي أهم التفاصيل الخاصة بيها:
- العنوان: فرع الناشونال “أول طريق نبروة بجوار شركة الكلثوم”، وفرع الانترناشونال “بعد كوبري جديلة”.
- رقم التليفون: 01008863066.
- المصاريف بتبدأ من 30000 جنيه لمرحلة kg1 قسم الناشونال، وبتزيد بفروقات مش كبيرة لباقي المراحل، وبتختلف طبعاً عن أسعار فرع الانترناشونال.
7- مدرسة نوبلز الدولية للغات
من أبرز مدارس لغات في المنصورة ودا لمستوى التعليم فيها، ووجودها في وسط البلد ودا بيسهل الوصول ليها.
وبتجمع مدارس نوبلز بين التعليم الناشونال والانترناشونال، وبتتميز بمساحاتها الواسعة؛ فبنلاقي إنها بتضم 54 فصل و9 معامل، دا بالإضافة لتوافر ملاعب كرة قدم واسكواش، وحمام سباحة نصف أوليمبي، وجيمانزيوم؛ لضمان وجود أنشطة متنوعة مفيدة للطلاب.
دا غير اعتماد نظام الكاميرات بكل مكان لتوفير الأمان للطلبة، وبيتوفر منح جامعية خارج مصر لطلاب الانترناشونال، وبيقوم على العملية التعليمية معلمين على أعلى الكفاءات مع الاستعانة ببعض المعلمين الأجانب.
وبتعتمد النظام البريطاني في التعليم.
ومن ضمن آراء أولياء الأمور عنها:
- “لحد الان كويسة بيعطوا للاولاد بوكلت يساعدهم في الدراسة الحقيقة والمنهج الإضافي ممتاز وتقيل والمعلمات في الانجليش مفيش كلمه عربي انا ابني كان في ig كنت خايفة مستواه يقل في الانجليزي خصوصاً انه دخل ناشونال بس الحمد لله بالعكس محافظ لسه ع مستواه وبيحلوا تمارين كتير معاهم اضافيه وشيتات في كل المواد تقريبا اه اتاخرنا قوي في استلام الكتب بس خدنا البوكلت من اول اسبوعين واشتغلوا مع الولاد الترفيه كتير شويتين بس علشان يكسروا ملل اليوم الدراسي لان بيخلصوا ٣ ونص اه ابني في اولى اعدادي”.
- “نوبلز فى قلب المنصوره حلوة جداااا وفعلا مش هتحتاج دروس بره خالص”.
ودي أهم التفاصيل عنها:
- العنوان: المنصورة – خلف مستشفى الشبان المسلمين.
- رقم التليفون: 01277477290 – 01000390602.
- المصاريف: بتبدأ من 29550 جنيه لمرحلة رياض الأطفال + 3500 جنيه كتب وأنشطة، وبتزيد للمراحل الدراسية الباقية.
8- مدرسة طيبة للغات
ونضيف لقائمة أفضل مدارس لغات في المنصورة مدرسة طيبة مودرن سكولز الدولية، وهي من أحدث المدارس المنشأة مؤخراً، ولكن انتشر عنها سُمعة طيبة ومستوى تعليمي متميز.
المدرسة بتوفر تعليم ناشونال لغات وانترناشونال بنظام الدبلومة الأمريكية والنظام البريطاني.
ومن آراء أولياء الأمور عنها:
- “مدارس طيبة للغات مدرسة جميلة جدًا، وعاملين خصومات للدفعة الذهبية، ومدرسين ممتازين”.
أهم التفاصيل الخاصة بيها:
- العنوان: المنصورة – جديلة – قبل معهد النيل وكوبري الشرقاوية طريق المنصورة دمياط القديمة.
- رقم التليفون: 01222235671.
- المصاريف: بتبدأ من 29785 جنيه إجمالي مصاريف الـ kg شاملة الكتب والأنشطة ولا تشمل الباص والزي المدرسي، والرقم دا بعد خصم الدفعة الفضية للمتقدمين في العام الدراسي الجديد 2024.
9- مدرسة السانت فاميه الخاصة اللغات للبنات
من أفضل مدارس لغات في المنصورة، ومشهورة بالالتزام وتعليم البنات الإتيكيت والقواعد الأخلاقية، لكن بتركز على مؤهل الوالدين بشكل كبير في القبول، وبيكون صعب التحويل ليها، لإنها بتكتفي بالعدد اللي معاها من kg.
معظم آراء أولياء الأمور عنها إنها بتحتاج مجهود كبير في المذاكرة والمتابعة؛ لإن المدرسة بتعمل امتحانات شهرية، وبتتطلب كمية مذاكرة كبيرة من الطالبات، لكن بعض الأهالي شايفينها نقطة قوة لإنها بتأسس البنات تعليمياً بشكل قوي.
ودي أهم الآراء عنها:
- “بصي انا حولت لبنتى من الوادى ل السانت فاميه بقالنا 3 سنين اهو المدرسه بتخلى البنت ملتزمه جدا اخلاقيا واتيكت وأسلوب فظيع في تعامل البنت مع الغير وازاى البنت تتكلم وتقعد وتمشي وتاكل وتلبس ك تعليم ف دا بقي فوق الممتااااااااااز حاجه كدا مش هتلاقيها في اى مدرسه تانيه المشكله بقي عندهم انهم محتاجين مجهود من الام والبنت جباااااااااااااااار اللى هو مش هتلاقي وقت تشربي،فيه انتى متخيله دا غير كم الكتابه اللى بيكتبوها في الكلاس والامتحان عندهم يعنى امتحان لا غش ولا مساعده ولا الهوا”.
- “سلبيات لا تذكر لكن لو قد المذاكرة والالتزام والمجهود ده اتكلى على الله و حولى طبعا هى دراسة والتزام ونظام وكم كتابة وتأسيس مش هتلاقيهم فى مدرسة تانية”.
- “حقيقى السانت فاميه مفيش فيها أي سلبيات مدرسة ممتازة”.
ودي أهم التفاصيل عنها:
- العنوان: شارع سعد الشربيني – المنصورة.
- المصاريف: 14000 جنيه لرياض الأطفال.
- رقم التليفون: 0502315001.
10- مدرسة السلام الخاصة للغات
من أفضل مدارس لغات في المنصورة المتوسطة في المصاريف والمتميزة في مستوى التعليم، والاهتمام باللغات وتنمية مهارات الطلاب.
آراء أولياء الأمور عنها:
- “مدارس السلام بها مدرسين اكفاء وتهتم بالانشطة الفنية والرياضية ومنظمة جدا ومستوى التربية ممتاز والتعليم ممتاز وباحدث الطرق متطورين جدا … يعيبها عدم وجود اماكن لانتظار السيارات نظرا لوجود المدرسة بمنطقة تجارية و ورش السيارات … انصح بها جدا”.
- “من أفضل مدارس المنصورة”.
- “مستوي المدرسه حلو جدا”.
ودي أهم التفاصيل عنها:
- العنوان: 8 شارع رستم – الحسينية – المنصورة.
- رقم التليفون: 0502238855.
- المصاريف: 12000 جنيع لمرحلة kg2، ودي باقي المصروفات بناءً على المنشور الرسمي للمدرسة:
11- مدرسة الوادي الخاصة للغات بنات
من أفضل مدارس لغات في المنصورة ودا لإنها بتتميز بـ:
- أنشطة متنوعة: بتقدم أنشطة رياضية وفنية، بالإضافة إلى المعسكرات والموسيقى لتحفيز الطلاب وتنمية مهاراتهم.
- مرافق متطورة: بتوفر المدرسة بيئة تعليمية حديثة تشمل مكتبة، ومختبرات علمية، وأتوبيسات للنقل.
- رعاية طبية: بتضمن المدرسة وجود رعاية طبية جيدة داخل الحرم المدرسي.
وبتعتمد المدرسة على التعليم الناشونال لغات.
ومن أهم آراء أولياء الأمور عنها:
- “مدرسة الوادي جميلة ومدرسين كويسين وإدارة منظمة”.
- “المدرسة مستواها التعليمي كويس لكن ممكن تحتاجي ياخد دروس في بعض المواد”.
ودي أهم التفاصيل الخاصة بيها:
- العنوان: أول طريق نبروة – المنصورة.
- رقم التليفون: 0502411165.
- المصاريف: 24000 جنيه لرياض الأطفال.
في النهاية، اختيار مدرسة اللغات المناسبة لأولادك في المنصورة هو قرار مهم لازم يتعمل بعناية وبحث؛ لإن كل مدرسة ليها مميزاتها اللي ممكن تناسب احتياجات عيلتك وأهدافك التعليمية.
المهم استفسر عن المناهج، وشوف مستوى الأنشطة والخدمات، واتأكد إن المدرسة بتوفر بيئة آمنة ومشجعة على التطور.
في المقال دا قدمنالك دليل بسيط عن أبرز مدارس لغات في المنصورة يساعدك تبدأ رحلتك لاختيار الأفضل لأولادك عشان تضمنلهم تعليم مميز ومستقبل مشرق.
أضف تعليق