يعد تعليم الإملاء للأطفال من المهام الأساسية اللي بتسعى لتحقيقها كل أم عشان تضمن تطور مهارات أطفالها في القراءة والكتابة.
ودلوقتي تعددت الطرق والأساليب المبتكرة اللي بإمكانك اتباعها لتسهيل عملية التعلم، وجعلها ممتعة في نفس الوقت.
هنعرض لِك في المقال دا أسهل طريقة لتعليم الإملاء للأطفال في المنزل باستخدام أساليب علمية وتربوية موثوقة، وأهم النصائح لتتفيذ دا بشكل ممتع، تابعي معانا.
قواعد الكتابة الأساسية
قبل ما تبدئي تعلمي طفلك الإملاء لازم الأول تعرفيه القواعد الأساسية للكتابة عشان تسهلي عليه خطوة الإملاء، واللي منها:
حروف المد الـ 3 (أ، و، ي)
ودا من خلال التدرب الكتير على شكل الكلمات اللي فيها مد، وممكن تستخدمي في دا بعض الحركات زي: رفع الإيد في حالة مد الألف، وخفضها في مد الياء، وضمها في مد الواو.
الحركات الأصلية
الحركات الأصلية هي الفتحة، والكسرة، والضمة، ودي الطفل بيكون متعرف عليها من بداية تعلمه للحروف، ومعرفة أصواتها في شكل أَ، إِ، أُ وهكذا.
التنوين
علمي طفلك يطبق على الأنواع المختلفة للتنوين زي: الضم، والفتح، والكسر، وخليه يركز على مواضعه، وحاولي توضحي له إن تنوين الفتح بيقف دايماً على الألف، ما عدا في حالة التاء المربوطة فبيكون فوقها.
الشدة بأنواعها
الشدة واحدة من أهم الحركات، ودا بيكون من خلال تركيزك على الحرف وانتِ بتنطقيه مع بيان نوعها، الفتح، أو الضم، أو الكسر.
حركة السكون
معرفة حركة السكون مهمة كمان، ودي ممكن توريها للطفل من خلال حفظه لقصار السور القرآنية، وركزي على كيفية نطقها.
اللام الشمسية واللام القمرية
التفريق بين اللام الشمسية واللام القمرية من أهم القواعد السهلة على الأطفال، وبيقدروا يتعرفوا عليها من خلال طريقة نطقها.
التاء المربوطة والهاء المربوطة
وضحي لطفلك الاختلاف بين التاء المربوطة والهاء المربوطة من خلال الأمثلة.
إلى جانب كل دا، ساعدي طفلك يكتب الحروف بشكل سليم، ويعرف صوتها الصحيح، ويربط كل حرف بالصوت بتاعه.
معرفة القواعد دي هتسهل على الطفل الإملاء بشكل كبير، وهتبني عنده قاموسه اللغوي، وتحفزه على الكتابة بشكل سليم.
اتعرفي كمان على: أهم 14 طريقة لتعليم الأطفال القراءة ونصائح لتعلم أسهل.
أبرز الطرق لتعليم طفلك الإملاء في المنزل
مهما كان دور المدرسة كبير في تعليم طفلك كل المهارات المطلوبة لتعلم القراءة والكتابة، فدا مايقللش من أهمية دورك في تأسيس طفلك تعليمياً، ومساعدة معلمينه لرفع مستواه، وسرعة استيعابه، وكمان بيكون استغلال سليم منك لوقت فراغ طفلك في المنزل.
ومن أهم المهارات دي هي تعليم الإملاء للطفل، وعشان كدا هنوضحلك أهم وأسهل الطرق اللي هتساعدك تطبقي دا بشكل سليم وممتع.
1- طريقة الكتابة
تعد طريقة الكتابة أسهل طريقة لتعليم الإملاء للأطفال، ودا من خلال تقطيع حروف الكلمة، وتنقيط الحروف، وبعدين بتطلبي من الطفل يعيد توصيل النقط لتشكيل الحروف أكتر من مرة لحد ما يحفظ كتابة الحروف والكلمة، وهكذا.
وممكن بعدها تدخلي الكلمة في جملة بسيطة، وتعيدي بنفس الطريقة عشان الطفل يستوعب كتابة الجمل، وشكل الحروف في الكلمات، وبالتدريب المستمر بيتعلم دا، وبيسهل عليه الإملاء بعدين.
2- استخدام المكعبات التعليمية
تعد المكعبات من أسهل طرق تعليم الإملاء للأطفال، فبتكون المكعبات على شكل حروف، وبيتم ترتيب المكعبات قدام طفلك لتكوين كلمات، وبتطلبي منه يكتبها، وكمان خليه يكوّن بالحروف أكتر من كلمة؛ دا هيكون مسلي بالنسبة لطفلك، ومش تقليدي.
3- كتابة فقرات قصيرة
اختاري فقرة سهلة من قصة بتقرئيها لطفلك وبيحبها، واطلبي منه يكتبها، وفي حالة إنه أخطأ اكتبي السطر منقط، وخليه يعيد توصيل النقط لكتابة الكلمة وخليه يقرأها، ويحاول يكتبها تاني عشان يتغلب على أخطائه.
4- استخدام الكلمات المتداولة
الاعتماد على استخدام الكلمات المتداولة بينكم هو أسهل طريقة لتعليم الإملاء للأطفال، فابدئي بالكلمات اللي بيستخدمها وبيسمعها طول الوقت في البيت زي صباح الخير؟ عامل إيه؟ وهكذا.
5- استخدام طريقة تهجئة الحروف
تبعاً لدراسة اتنشرت على موقع “ScienceDirect” بتؤكد أهمية استخدام التهجئة والصوتيات كأضمن وأسهل طريقة لتعليم الإملاء للأطفال؛ ودا بيكون من خلال نطق الحرف على مسمع الطفل وتعريفه صوت الحرف، وتطلبي منه يردده عشان يفهمه وبعدين يكتبه، ولو غلط بتبدئي تكتبي انتِ قدامه، وبتدربيه على معرفة أصوات الحروف.
6- التنقيط
التنقيط بيعد أحد أسهل طرق تعليم الإملاء للأطفال، فممكن في بداية تعليم طفلك للكتابة، تقرئي معاه فقرة من قصة أو كتاب بشكل كويس أكتر من مرة، وبعد كدا تكتبيها بشكل منقط وهو يمسك القلم ويمشي على النقط وهو بيقرأ الكلمات، وبمرور الوقت هيتقن تحريك إيديه في الكتابة، وهيتعرف على شكل الحروف وسط الكلمات.
7- استخدام الأجهزة الإلكترونية
تستخدم أجهزة الحاسوب اللوحي كأسهل طريقة لتعليم الإملاء للأطفال، ودا من خلال استخدام التطبيقات المتوفرة فيها، والأجهزة المتخصصة في التعليم، ودي متوفرة بشكل سهل وتفاعلي وممتع، زي اللوح الذكية، والكتب الصوتية.
8- استخدام الألعاب التعليمية
كل الأطفال بتحب اللعب ودا بيساعد في تعليمهم حاجات كتير لو استخدمنا دا بطريقة صح، ومن أهم الألعاب دي:
أوراق الهجاء
دي بتكون موجودة في بعض الكتب التدريبية، وبتكون موضحة صورة حيوان أو أداة أو شخص، وبتكتب جزء من الكلمة والطفل بيكملها، أو بيوصل الحرف بالصورة.
مسابقات الهجاء في المنزل
ودي ممكن تنفذيها انتِ وباباه وإخواته كنشاط لفترة 15 دقيقة مثلاً، إن كل شخص يقول كلمة ويتهجاها بشكل صحيح، وممكن تستخدمي كروت لتنفيذها.
التتبع والنسخ والتذكر
دي عبارة عن كروت عليها كلمات بتسمحي لطفلك يبص للكارت عدد ثواني، وبعدين يحاول يكتبها من ذاكرته، دي هتساعده في التركيز بشكل كبير.
البطاقات التعليمية
بتعد البطاقات التعيليمة واحدة من أسهل طرق تعليم الإملاء للأطفال، ومن أقدمهم، وبتكون عبارة عن بطاقات عليها كلمات وصور، بتطلبي من الطفل يقرأ الكلمة ويتهجاها.
الأغاني التعليمية
هتلاقي على اليوتيوب أغاني تعليمية للكلمات وتهجئتها، والطفل بيركز معاها وبيردد، وبتتزرع في الذاكرة عنده.
السلم التعليمي
بيبقى عبارة عن مربعات بشكل سلم، بيوصل فيها الطفل بعد كتابة الحروف للصورة، سواء حيوان أو أداة.
سلاسل الكلمات
دي كلمة مكتوبة بتطلبي من طفلك يبدأ كلمة بآخر حرف، أو يذكر أكتر من كلمة بنفس الحرف ويكتبها، وهكذا.
اقرئي كمان: أبرز 9 تمارين تعليم القراءة والكتابة لطفلك.
فوائد تعليم الإملاء للأطفال
الإملاء من أهم مهارات التعلم للأطفال، وبتساعد على تطوره بشكل كبير، ومن أهم فوائدها:
زيادة التطور المعرفي
بتساعد في زيادة تطورهم المعرفي، ودا لإن الطفل وهو بيحاول يتهجأ الكلمة بيقوم ببعض التمارين الذهنية علشان يفتكر أشكال الحروف والأصوات الخاصة بيها، ويجمعها في شكل كلمات صحيحة، وبالتالي دا بيساعد على نمو أدمغتهم بقوة.
فهم القراءة
باستخدامك لأسهل طريقة لتعليم الإملاء لطفلك وإتقانها، هيقدر يتهجأ الكلمات أسرع، وتتحسن قراءته بمرور الوقت، فيقدر يقرأ القصص الخاصة بيه، ويخمن الكلمات الجديدة اللي بتصادفه من خلال التفكير في كيفية بنائها.
تحسين مهارات التواصل
بيساعد استخدام طرق تعليم الإملاء للأطفال على سرد قصصهم ومشاركة أفكارهم، وفي حالة تحسن مهارة الإملاء عندهم، فدا بيمكنهم من الكلام عن كل اللي عاوزينه بوضوح ومشاركة أفكارهم، ودا بيمثل جزء كبير من تفاعلهم في الحديث، وثقتهم بأنفسهم.
النجاح الأكاديمي
التهجئة الجيدة هي مفتاح النجاح لأمور كتير في المدرسة، فهي بتساعد الطفل على القراءة الجيدة، والكتابة بشكل سليم، والإجابة في الامتحانات، والقدرة على التعبير السليم عن الآراء والإجابات بشكل صحيح.
ودا بيشعرهم بالثقة في أنفسهم، وبينجحوا في الدراسة بشكل كبير.
ودا بتؤكده دراسات كتير من ضمنها دراسة اتنشرت على موقع “ResearchGate” بتوضح مدى أهمية الإملاء في تحسين القراءة والكتابة عند الأطفال، وتطورهم أكاديمياً.
اكتشاف صعوبات التعلم
مشاكل الإملاء والكتابة غير الصحيحة واحدة من أهم أعراض صعوبات التعلم في الكتابة والقراءة، فتعد خطوة مبكرة ومثالية لمعرفة مشكلة الطفل ومعالجتها.
تقدري تتعرفي على: أشهر 7 مراكز لصعوبات التعلم في مصر.
نصائح لتعليم الإملاء للأطفال بطريقة سهلة وممتعة
وبعد ما ذكرنا طرق مختلفة لتعليم الأطفال الإملاء بسهولة في البيت، واللي ممكن تستخدمي أكتر من واحدة فيهم، أو تقيمي أكتر طريقة تناسب طفلك فيهم، هنوضحلك بعض النصائح اللي لازم ممكن تتبعيها عشان طفلك يكتسب مهارة الإملاء.
- صححي الأخطاء من غير لوم وعصبية، وارجعي عيدي الكلمة على الطفل وتهجيها بشكل صحيح قدامه، ووضحيله المدود ودربيه عليها في جمل تانية.
- اقرئي كتير لطفلك وخليه يشوف الكتاب أو القصة، وشاوري على الكلمة وانتِ بتنطقيها، دا بيغذي الذاكرة البصرية عنده، وبيساعده في تعلم الإملاء.
- اعرفي طفلك حابب إيه أكتر، لو بيفضل الورقة والقلم تمام، لو حابب أكتر الإملاء عن طريق الألواح الذكية والسبورة البيضاء مفيش مشكلة.
- دربيه كتير وخليها عادة يومية لحد ما يتحسن فيها ويكتسب المهارة دي بشكل كويس، وحاولي تخليها قدر الإمكان بطريقة ممتعة.
- شجعيه وكافئيه على كل مرة بينجح في قطعة إملاء بأقل أخطاء، ودا من خلال الهدايا البسيطة وكلمات المدح.
- نبهي على طفلك يركز ويسمع كويس ومايتسرعش قبل ما يكتب، ويستوضح وبعدين يكتب.
الخلاصة
تعد الإملاء واحدة من أهم المهارات اللي لازم يتعلمها الطفل ويتقنها من سن مبكر، ودا لإن بيترتب عليها نقاط كتير زي نجاحه في الدراسة، وتحسن مهارات القراءة والكتابة عنده، وقدرته على التعبير عن نفسه بشكل أفضل، وغيرها.
ونتيجة لدا بيخلينا نبحث عن أسهل طريقة لتعليم الإملاء للأطفال عشان نجربها ونشوف الأنسب للطفل، ومن أبرزهم: طريقة الكتابة والتهجئة، ونسخ الفقرات القصيرة، واستخدام الكلمات المتداولة، والتنقيط، واستخدام المكعبات التعليمية.
وأهم نقطة هي التأكيد على القواعد الأساسية للإملاء لإنها بتساعد بشكل كبير على استيعابه وفهمه.
وأخيراً، الممارسة والتدريب المستمر هيحسن مهارة الإملاء عند طفلك، أهم حاجة الصبر والتأني والتشجيع عشان يتحسن بمرور الوقت.
المصادر
How to teach kids spelling| best 15 ways.
How to teach your Child spelling.
How to teach spelling words.
أضف تعليق