أبرز 9 تمارين تعليم القراءة والكتابة لطفلك

من بين كل المهارات اللي الطفل لازم يتعلمها في صغره، بنلاقي إن مهارة القراءة والكتابة هي الأهم، لإنها بتفتح ليه طُرق تعلم كتيرة، وبيكون قادر من خلالها يترجم كُل حاجة حواليه، وزي ما مشهور: “أهم حاجة الطفل يفك الخط”، ومن أسهل الحاجات اللي بتساعد على تعلم اللغة تمارين تعليم القراءة والكتابة.

هتعرفي في المقال دا إزاي تساعدي طفلك في تعلم اللغة من خلال التمارين، وإيه أفضل التمارين دي.

أهمية تمارين تعليم القراءة والكتابة؟

بتكتسب التمارين أهميتها من أهمية القراءة والكتابة، لكونها أمر بيسهل عملية التعلم، لإن القراءة والكتابة من العوامل الأساسية في نهضة المجتمع وتطوره، وكمان بتنمي الشخص، وبتؤثر فيه وفي نمط تفكيره، وعدم الاهتمام بتعلم اللغة بالطريقة الصحيحة ممكن يؤدي لكره الطفل ليها، ولكُل العلوم اللي هيدرسها -فيما بعد- لكونها اللغة اللي بيدرس بيها العلوم دي.

التمارين هتساعد الطفل، وتسهل عليه التعلم وهو في سن صغير -قبل سبع سنين-. في الوقت دا بيكون إدراكه واستيعابه للغات خاصة لغته الأساسية أكبر بكتير من بعد كدا، والتمارين بتركز على أساسيات اللغة، وتعلم الحروف الأبجدية خلال وقت صغير.

دا غير إن تعلم اللغة العربية بيأهل الطفل للتفوق الدراسي، وبيطور مهارات كتير عنده منها مهارات التواصل، وهتربط الطفل بتاريخه، وشخصيات التاريخ اللي هتأثر في تكوين شخصيته.

أمور يجب مراعاتها عند تعليم الطفل القراءة والكتابة

علشان ميحصلش نفور من الطفل، فمحتاجة تختاري ليه تمارين مناسبة، وتاخدي بالك من شوية حاجات، منها:

مراعاة سنه وعدم إجباره

ضروري تفهمي نفسية طفلك وقدراته، وتبدئي تطبقي معاه تمارين مناسبة ليه من غير ضغط أو إجبار، وتدوري على المشكلة اللي ممكن تكون سبب في عدم ميوله للقراءة والكتابة، وتحاولي تتجنبيها وتحليها.

عدم مقارنة طفلك مع غيره

المقارنة ليها أثار سلبية جدًا على الطفل، وبتتسبب في مشاعر عداء مع أصحابه، دا غير إنها مقارنة غير سوية، لإن كُل طفل عنده مواهبه وقدراته اللي بتتفاوت عن غيره، والواقع بيثبت إن السن مش سبب للمقارنة.

انتقال الطفل من اللعب للتعلم

طفلك قبل ما يُدخل حضانة أو تبدئي معاه منهج تعليمي كان أغلب وقته بيلعب ويتحرك من غير ما يلتزم بمهام معينة، فخليكي مقدرة فكرة إنه فجأة بقى مفروض يصحى يروح حضانة، ويرجع، يعمل تمارين و Homework، وينام بدري، وغيرها من العادات، فمتحاوليش تلزميه بتمارين كتير أو صعبة عليه.

اتباع التمارين المناسبة لمستواه

كُل سن ومرحلة للطفل ليها ما يُناسبها، بمعنى إن فيه تمارين تناسب طفل لسه بيبدأ، وتمارين تانية هتكون مناسبة لطفل بيحاول يُجيد القراءة ويحسن منها، علشان كدا خلينا نقولك إن مستوى الطفل هو اللي بيحدد تمارينه، بنقدملك تمارين تعليم القراءة والكتابة.

9 تمارين تعليم القراءة والكتابة

هتلاقي طرق كتير تقدري تطبقيها مع ابنك علشان يتقن القراءة والكتابة، ومن أبرز التمارين اللي ممكن تعتمدي عليها:

1- تنقيط الحروف

الطريقة دي من أشهر تمارين تعليم القراءة والكتابة، ومستخدمة في الكتب التعليمية في الحضانات، وفكرة التمرين إنك بتساعدي الطفل في البداية يكتب الحرف لوحده من خلال رسم حدود لمساره بالنقاط، وبتتبع النقاط دي هيكتب الحرف بدون مساعدة خارجية.

2- درجات السلم

من تمارين تعليم القراءة والكتابة هو استخدامك لتمارين درجات السلم التعليمية؛ ودا لأنه بيساعد الطفل إنه يكمّل من غير زهق، ويحس بالتطور والإنجاز مع الوقت، وتقدري تخصصي للطفل ملف تسجلي فيه تطوره مع الوقت، والنتايج اللي بتحصلي عليها بعد كل تمرين.

3- تجزئة الكلمات

نقصد بالطريقة دي تقسيم الكلمة لمقاطع صوتية أصغر، علشان تكون مفهومة للطفل زي “ما ما”، ويقدر يكتبها أو يقرأها، وبيساعد جدًا في تعلم اللغة طرق جديدة ومفيدة زي طريقة نور البيان، اللي بتعتمد على الحركات مش بس الحروف، وبيكون الطفل مع الوقت قادر يقرأ بالتشكيل بسهولة، ويفهم الاختلافات في النطق.

4- بطاقات صور الكلمات

الطفل في صغره بيتشد جدًا للصور والألوان، فتقدري تستغلي دا في ربط الألوان والصور بقصص للحروف، أو تربطي الكلمات بمعانيها من خلال الرسومات والصور، مثلًا: كلمة أسد تتربط في ذهن الطفل بصورة الأسد، وهكذا، وتعد الطريقة دي من أسهل تمارين تعليم القراءة والكتابة للأطفال.

5- البحث عن الحروف

عشان ننمي مهارات الطفل البصرية في التعرف على الحروف، وحفظ أشكالها، وتذكرها، فتمرين البحث عن الحروف يُعد من أفضل تمارين تعليم القراءة والكتابة، ودا بنقوم من خلاله بكتابة حرف معين من اختيارنا في وسط الكراسة، وكتابة تحته عدد كبير من الحروف، وبعدها بنطلب من الطفل إنه يدوّر على الحرف المرسوم في وسط الحروف دي، ومع تكرار التمرين بيبدأ الطفل يحفظ الحروف وأشكالها تدريجيًا، ومن هنا بننتقل للتمرين التالي.

6- رسم الحروف

استخدام طريقة كتابة الطفل للحروف وتكرارها عشان تثبت في دماغه بالطريقة التقليدية بيسبب عنده ملل وضجر، ودا ممكن نتفاداه لو علمناه يرسم الحروف بطريقة جديدة؛ على سبيل المثال: إننا ندمج التمرين دا بتمرين يعتمد على المهارات الحسية، فممكن نخليه يرسم الحروف باستخدام الصلصال أو الرسم على الرمال، أو الملح، أو الدقيق، والطريقة دي ليها فوائد مختلفة، زي إنها:

• بتقوي مهارة التركيز والانتباه عنده.
• بتنمي عضلاته الدقيقة.
• بتعلمه الحروف بطريقة سهلة وممتعة.
• بتزود التناسق بين عينه وحركة إيده.

7- استخدام مجسمات الحروف لتكوين كلمة

بعد إتقان الطفل للحروف بشكل كامل، نقدر من خلال البازل ومجسمات الحروف المختلفة نساعده في تمرين تكوين الكلمة، وفي البداية بنكتبله الكلمة عشان يقدر يقلدها، ويكوّن كلمة بنفس حروفها، ومع الاستمرار والتدريب على التمرين دا، بنطلب منه يكتب كلمات بنقولها له شفويًا من غير ما نكتبها، عشان يقوي ذهنه وخياله، وفي الغالب بتكون الكلمات دي بسيطة ومن 3 أو 4 حروف بالكتير، ودا بيكون من أسهل تمارين تعليم القراءة والكتابة اللي ممكن نستخدمها مع الأطفال.

8- استخدام سجادات الحروف

سجادات الحروف من أمتع تمارين تعليم القراءة والكتابة، وخصوصًا للطفل الحركي، فبتكون عبارة عن سجادة مرسوم عليها الحروف بأشكال مختلفة زي مثلًا شجرة الحروف، واستخدامها بيتم عن طريق إننا بنقول للطفل كلمة، وهو بيبدأ يرسمها في ذهنه وينط على الحروف بتاعتها بالترتيب ولو كوّنها صح بنكافئه مادي، أو معنوي، ولو غلط فيها بنطلب منه يعيدها تاني لحد ما يتقنها، وبكدا بنكون نمّينا عند الطفل مهاراته الحركية الكبرى، والتآزر البصري الحركي، وخرجنا طاقته الجسدية بطريقة ممتعة وصحية.

9- مشاركة الطفل القراءة والكتابة

مشاركة الطفل في أي حاجة بتساعده يتعلم أسرع ويكون متحمس أكتر، وعشان نقدم له تمارين القراءة والكتابة بطريقة أسهل، نقدر نشاركه بطرق مختلفة، على سبيل المثال، ممكن نقرأ له قصة ونساعده يقرأ معانا واحدة واحدة، وبعد كدا يطلع الكلمات اللي كانت صعبة عليه، ويبدأ يكتبها بره، ويكررها باستمرار، وبالطريقة دي هنكون شاركناه وعلمناه في وقت واحد.

نصايح هتساعدك في تعليم ابنك القراءة والكتابة

من النصايح المهمة اللي هتفيدك:

• التجديد، لإن دايمًا في ابتكارات جديدة لتمارين وأفكار أحسن لتعليم الأطفال اللغات، فحاولي تكوني متابعة وتجربي تمارين مختلفة علشان تلاقي الطريقة الأفضل لطفلك.
• عدم توقع نتائج فورية، لإن الطبيعي إن التطور والإتقان بيجي مع الممارسة والتكرار.
• تقديم المكافآت الرمزية على إنجازات الطفل البسيطة، لإنها بتساعده يتعلم أحسن.
• تجنب العصبية والعنف مع الطفل، لإن العصبية ممكن تؤدي لنتيجة عكسية، فكوني صبورة واستمري في تعليمه.
• إضافة المتعة والألعاب الجذابة لتمارين تعليم القراءة والكتابة، علشان تحببي الطفل في اللغة.

يمكنك أيضًا قراءة: تعليم الأطفال القراءة والكتابة الإنجليزية وأهم مراحل التعليم للطفل 

أخيرًا

تمارين تعليم القراءة والكتابة عددها كبير جدًا، ودا لأننا ممكن نخترع ونكتشف طرق كتيرة ومختلفة من أبسط الوسائل اللي حوالينا، واللي نقدر من خلالها نعلم الطفل المهارات اللغوية المهمة اللي هتساعده في رحلته التعليمية فيما بعد، وفي المقال دا قدمنا لك أهم وأبرز التمارين اللي هتساعد طفلك يتعلم بطريقة سهلة، مبسطة وممتعة.