مدرسة الأورمان ايليت - Orman Elite School

مدرسة الاورمان ايليت اسوء مدرسه سيبك من شكل المبانى الحلو ده مش هنعمل بيه حاجه الإدارة فاشلة مفيش مشكلة تتحل عادى كده لازم الكل يتكلم وبدل المرة 100مرة عشان يتصرفوا و كل اما حد يتصل يشتكي يقولوا مفيش حد اشتكى غيرك يعني مثلا اشتكيت من السنة اللى فاتت أن الفصل مفيهوش مصدر إضاءة غير من الشباك يعنى معتمدين على ضوء الشمس يقولوا مفيش حد اشتكى من الموضوع ده ولما سألت على جروب أولياء الأمور الفصل أتضح أنه الكل اشتكى والكل أترد عليه بنفس الرد اللى هو محدش اشتكى من الموضوع ده غير حضرتك عشان يسكتوا الناس وخلاص وكذلك مفيش مروحة فى الفصل ولحد الان المشكلة زى ما هى
ده غير أن الباص مش تابع للمدرسة ولا حتى مأجرين من شركة سياحة أو نقل ركاب لا المدرسة بتتعامل مع سواقين ميكروباص من الساعة كذا ل الساعة كذا ف اللى بيحصل أن السواق أوقات بيتأخر فى الصباح او فى المرواح ف يروحوا المدرسة متأخرين على الحصة التانية ولا الثالثة و فى الرجوع ممكن الطفل يوصل على الساعة 4 ولا 5 يكون مرهق جدا من كتر اللف ولا بيقدر يذاكر حاجه يدوبك يأكل وينام
ده غير أن اشكال السواقين غريبة طبعا وده غير آمن نهائيا أنهم يجيبوا سواقين من الموقف كده ويبقى شايل مسئولية الاطفال واحنا ولا نعرفه ولا شغال موظف فى المدرسة ف هيكون لا انكشف على بطاقته ولا اتعمله تحليل مخدرات شوفت كذا مره ميكروباص يكون حاطط ورقة على الطابلوه مكتوب عليها orman elite وشغال فى موقف الجيزة بعد ما يخلص دوره المدرسة وبيحمل ركاب ده اكبر دليل أن الميكروباص مش تبع المدرسة عشان لو قالوا غير كده
أما بالنسبة للمدرسين ف كم من مدرسين كانوا كويسين سابوا المدرسة و المدرسة ممكن تخلى اى مدرس يشرح اى مادة حتى لو مش تخصصة مثال على كده فيه مدرسه فى primary المفروض انها بتشرح social خلوها تشرح ict وهيا طبعا لا تفقه فى المادة دى اى شئ وده اكتر عبث فى الحياة

انا بقالى فى المدرسة من kg1 بس فى البداية الصراحه كانت الإدارة كويسة جدا وفيه مدرسين ممتازين لحد ما اتغيرت الإدارة بقت المدرسة لا تطاق احنا هنخلص primary معاهم و هننقل بأذن الله
ده تلخيص تجربتي فى المدرسة قولت احاول انشرة عشان محدش يتضرر زى عشان مصاريف المدرسة غاليه و مفيش قيمة أو خدمة مقابل سعرها ده نهائي