نظام التعليم الأمريكي في مصر | أهم 8 معلومات يجب أن تعرفها

أصبح الإقبال على المدارس الرسمية في مصر أقل من السنين اللي فاتت؛ ودا نتيجة عدم الاهتمام بالطلبة بشكل كافي، والتركيز على تحصيل الدرجات فقط بغض النظر عن مدى فهم الطالب، بالإضافة لبعض المشكلات التانية اللي بتواجه الطلبة. 

ومن هنا بدأ ولي الأمر يدور على بديل للمدارس الرسمية يقدم مستوى تعليمي أرقى ويهتم بتطوير مهارات الطالب قدر الإمكان، وبالفعل في عدد كبير من الأنظمة التعليمية بيقدموا المستوى التعليمي المطلوب.

ومن أهمهم نظام التعليم الأمريكي في مصر ؛ ودا لإنه نظام تعليمي مميز بيقدم للطلبة مناهج تحترم عقليتهم وتفيدهم بعد كدا في حياتهم العملية. 

وبيختلف نظام التعليم الأمريكي في نقط كتير عن النظام المصري، وبالتالي لازم نتعرف على تفاصيل النظام ونعرف أهم المميزات والعيوب فيه قبل التقديم للطالب، تابع معنا. 

أهم ملامح نظام التعليم الأمريكي في مصر

النظام التعليم الأمريكي هو نظام متكامل، ويعد من أفضل الأنظمة التعليمية اللي بتتبع تقنيات التعليم الحديثة بهدف مواكبة التطورات وخلق جيل واعي قادر على الإبداع وحل المشكلات اللي بتواجهه بطريقة عملية، ودا بيساعد الطالب على تطوير مهاراته باستمرار. 

النظام دا بيقدم مناهج أمريكية معتمدة تخلو من الحفظ لحد كبير؛ لإن الهدف الأساسي منها هو الفهم والتطبيق، عشان كدا أغلب شغل الطلبة في المدارس بيكون قائم على الأنشطة. 

وبيستمر نظام التعليم الأمريكي في مصر  لمدة 12 سنة دراسية، وفي النهاية الطالب بيدخل امتحان SAT ويحصل على شهادة الدبلومة الأمريكية بعد اجتياز الامتحان، والشهادة دي بتعادل شهادة الثانوية العامة في مصر. 

ولكن شهادة امتحان SAT حاليًا غير معترف بيها في مصر من فبراير 2021؛ بمعنى إنها بتأهل الطالب لدخول الجامعات الأمريكية لكن مش بتكون كافية للالتحاق بالجامعات المصرية، والطالب بيدخل امتحان مصري مشابه اسمه EST عشان يتقبل في الجامعات المصرية، والامتحان دا هنتعرف عليه بالتفصيل. 

أما بالنسبة لعدد الامتحانات اللي بيدخلها الطالب على مدار السنة في نظام التعليم الأمريكي بتكون أقل من امتحانات المدارس الرسمية، والدرجات اللي بتدخل في المجموع النهائي من الامتحانات دي بتكون قليلة، وبالتالي الضغط النفسي على الطالب بيقل وبيكون معاه فرصة أكبر للإبداع. 

تقسيم السنة الدراسية في نظام التعليم الأمريكي في مصر

طريقة تقسيم السنة الدراسية في نظام التعليم الأمريكي بتختلف عن الطريقة المتعارف عليها في النظام المصري، فبنلاقي إن السنة متقسمة إلى 3 أو 4 فصول دراسية، ودا بيكون حسب النظام اللي بتتبعه المدرسة. 

وبيكون في كل فصل دراسي في مجموعة كبيرة من الأنشطة اللي لازم الطالب يشارك فيها؛ لإن عليها درجة كبيرة في المجموع النهائي في آخر السنة. 

وبعد انتهاء الفصل الدراسي بيكون في امتحانات تقييمية للطالب ومش بتكون تعجيزية، والهدف منها بس هو معرفة مدى فهم الطالب للمادة العلمية واستفادته من المعلومات اللي حصل عليها من دراسته، والامتحانات دي بيكون عليها درجات أقل من درجات الأنشطة. 

وبالتالي تقسيم السنة الدراسية وتوزيع الدرجات بالطريقة دي بيخفف الضغط النفسي على الطالب وبيخليه يركز دايمًا على تطوير مهاراته وشخصيته عشان يقدر يواكب التطور اللي حواليه، ودا مش بيكون موجود في المدارس الرسمية -الحكومية سابقًا-. 

المراحل الدراسية في نظام التعليم الأمريكي

نظام التعليم الأمريكي في مصر هو نظام تعليمي شامل زي ما ذكرنا، فبيبدأ من المرحلة الابتدائية إلى المرحلة الثانوية، والدراسة فيه بتستمر لمدة 12 سنة، والسنوات دي بتتقسم إلى 6 سنوات في المرحلة الابتدائية، و 3 سنوات في المرحلة الإعدادية، و 3 سنوات في المرحلة الثانوية زي النظام التعليمي المصري. 

وآخر سنتين في التعليم في النظام الأمريكي (Grade 11 – Grade 12) بيكونوا مكافئين للثانوية العامة، وبتكون الدرجات متقسمة فيهم على 3 أقسام، وهما:

1- الـ GPA

ودي درجات بيحصل عليها الطالب من المدرسة، وبتمثل 40%  من الدرجات، ومواد الـ GPA هي مجموع أعلى 8 مواد من G11 & G 12.

واختيار مواد الـ GPA بتنقسم لـ:

• مواد أساسية لدخول القطاع الهندسي وعددهم 4، وهما: (اللغة الإنجليزية، والفيزياء، والكيمياء، والرياضيات) وباقي المواد بتكون اختياري.
• مواد أساسية لدخول القطاع الطبي وعددهم 5، وهما: (اللغة الإنجليزية، والفيزياء، والكيمياء، والرياضيات، والأحياء) وباقي المواد اختياري. 
• مادة واحدة أساسية وهي اللغة الإنجليزية وباقي المواد اختياري للكليات النظرية. 

2- الـ General Tests

ودي امتحانات دولية بيدخلها الطالب وبتكون في مادتي الرياضيات، واللغة الإنجليزية، والامتحان الأساسي للقبول بالجامعات المصرية هو EST 1، وامتحان ACT 1 للكليات خارج مصر. 

3- الـ Specific Tests

ودي امتحانات دولية لدخول القطاع الطبي أو الهندسي، وبيكون امتحان EST 2 للقبول بجامعات مصر فقط، و ACT 2 للجامعات خارج مصر. 

وبتتيح المدارس الأمريكية فرصة تحويل والتحاق الطلبة بيها في أي مرحلة دراسية، يعني الطالب اللي بيدرس في المدارس الرسمية يقدر يلتحق بيها بعد دراسته لو نظام الدراسة في المدارس الرسمية مش مناسب له. 

مناهج نظام التعليم الأمريكي في مصر

المناهج اللي بيتم تدريسها في نظام التعليم الأمريكي بتكون مناهج أمريكية معتمدة بتركز على تطوير مهارات الطالب وتحسين إدراكه، والمناهج دي مختلفة بالفعل عن مناهج النظام التعليمي المصري. 

فبنلاقي إن المرحلة الابتدائية بيدرس الطالب اللغة الإنجليزية والعلوم وغيرهم من المواد الموجودة في المدارس الرسمية لكن بمناهج ولغة مختلفة، وفي كل سنة من المرحلة دي بيبدأ المنهج يتطور عشان يتناسب مع عقلية الطلبة. 

أما في المرحلة الإعدادية بتزيد عدد المواد اللي بيدرسها الطالب، وكمان المناهج بتكون أكبر، لكن مش ما بتكونش صعبة في دراستها؛ لإن المدرسة بتهتم بالتطبيق العملي للمواد أكتر من الحصول على درجات فيها.

ومع دخول الطالب للمرحلة الثانوية بيبدأ يدرس المستويات المتقدمة من المواد بطريقة أكتر تخصصًا، بالإضافة إلى بعض مواد النظام المصري. 

امتحانات نظام التعليم الأمريكي

امتحانات نظام التعليم الأمريكي في مصر بتكون في نهاية كل فصل دراسي، وفي نهاية العام بيتحسب متوسط درجات الطالب في جميع الفصول الدراسية، والامتحانات دي بيكون عليها أقل من 50% من مجمل الدرجات اللي بيحصل عليها الطالب خلال السنة، وباقي الدرجات بتكون على الأنشطة.

وفي المرحلة الثانوية بيدخل الطالب امتحان تقييمي معين عشان يقدر يلتحق بالجامعات، والامتحانات دي زي امتحان السات والـ EST وغيرهم. 

امتحان سات ومشاكله التي ظهرت مؤخرًا

امتحان SAT هو امتحان تأهيلي بيدخله الطالب في نهاية سنوات دراسته -بداية من Grade 11- في المدارس اللي بتطبق نظام التعليم الأمريكي في مصر؛  عشان يقدر يلتحق بالجامعات الأمريكية؛ لإن المجموع النهائي للطالب -الـ GPA- مش بيكون كافي لإثبات إن الطالب مؤهل فعلاً للالتحاق بالجامعات دي، والمؤسسة المسئولة عنه هي مؤسسة College board. 

فبيكون الامتحان عبارة عن جزئين: جزء SAT 1 ودا امتحان عام بيتم اختبار الطالب فيه في 4 حاجات أساسية وهما: 

• القراءة 
• الكتابة 
• الرياضيات 
• المقال (بيكون اختياري) 

أما الجزء الثاني (SAT 2) فهو متخصص أكتر، وبيكون مطلوب في الكليات العملية.

وتم اعتماد امتحان السات في مصر لفترة كبيرة، بمعنى إن شهادة السات كانت كافية لدخول الكليات المصرية بدون الحاجة إلى أي شهادة معادلة.

لكن ظهرت بعض المشاكل اللي أدت إلى إلغاء اعتماد السات في مصر زي تسريب الامتحانات والإلغاء المتكرر لها، وتم استبدال الامتحان دا بامتحان مصري يشبه السات إلى حد ما في طريقة الأسئلة ويؤهل الطلبة للالتحاق بالجامعات المصرية، والامتحان دا بتشرف عليه مصر فقط. 

اتعرف كمان على: سعر امتحان SAT في مصر لعام 2024.

الفرق بين اختبار sat و act و est

دايمًا في نهاية الدراسة في أي نظام تعليمي بيكون في امتحان تأهيلي للطالب يعكس مدى استعداده للالتحاق بالجامعات، وفي نظام التعليم الأمريكي في مصر بنلاقي امتحانات مختلفة زي SAT و ACT و EST، والامتحانات دي بتختلف عن بعضها في أكتر من نقطة. 

اختبار SAT

هو اختبار تابع لمؤسسة College board زي ما ذكرنا بيأهل الطلبة للالتحاق بعدد كبير من الجامعات الخارجية، وبيكون عليه إشراف كلي من خارج مصر. 

في الامتحان دا الطالب بيكون معاه فرصة إنه يقدم عليه أكتر من مرة لحد ما يحصل على المجموع المطلوب لدخول الجامعات، والفترة دي امتحان سات غير معترف بيه في مصر، ولكن لازم الطالب يجتازه لو هيقدم في كلية دولية. 

اختبار ACT

امتحان ACT هو امتحان بيشبه السات في بعض النقاط زي إنه بيأهل الطلبة للالتحاق ببعض الجامعات الأمريكية.

وكمان طريقته قريبة من امتحان السات، لكن بنلاحظ إن امتحان ACT بيكون أسهل وأقل تخصصًا من السات. 

لكن الامتحان دا تم اعتماده لفترة في مصر ولكن اتلغى في أغسطس 2021، وأصبح مطلوب للطالب اجتيازه لبعض الجامعات الدولية فقط.

اختبار EST

امتحان EST هو امتحان مصري بديل للـ SAT والـ ACT بتشرف عليه وزارة التربية والتعليم المصرية، وهو الامتحان الوحيد المعترف بيه حاليًا كامتحان تأهيلي لطلاب الدبلومة الأمريكية لدخول الجامعات المصرية. 

اتعرف على: أهم 5 نصائح للتدريب على امتحان السات. 

مميزات نظام التعليم الأمريكي في مصر

بتختلف أنظمة التعليم الموجودة في مصر عن بعضها وبيكون لكل منها مميزات وعيوب، ومن أهم المميزات الموجودة في نظام التعليم الأمريكي بنلاقي: 

تقديم شهادة دراسية معتمدة

الطالب في نظام التعليم الأمريكي في مصر بيحصل على شهادة معتمدة بعد اجتيازه امتحان الـ SAT، والشهادة دي بتمكنه من الالتحاق بالجامعات الأمريكية واستكمال دراسته خارج مصر بجانب حصوله على الدرجات المطلوبة. 

فيقدر يقدم على امتحان السات ويتدرب عليه كويس قبل دخوله شكل رسمي. 

الاهتمام خلال العام الدراسي بتطوير مهارات الطالب

المدارس اللي بتطبق نظام التعليم الأمريكي في مصر بتكون حريصة على تطوير مهارات الطالب بجانب حرصها على رفع مستوى الطالب التعليمي.

وبالتالي بيكون في مشاركة من الطالب في العديد من الأنشطة على مدار العام الدراسي، واللي هدفها التأثير في شخصية الطالب وتطوير مهاراته. 

تقليل الضغط على الطالب

توزيع الدرجات في المدارس الأمريكية في مصر بيقلل الضغط على الطالب بشكل كبير، فبنلاقي إن الأنشطة اللي بيمارسها الطالب خلال فترة الدراسة بيكون عليها أكتر من 50 % من مجموع الدرجات الكلي.

وباقي الدرجات بتتوزع على الامتحانات، وبالتالي الطالب بيذاكر عشان يفهم المادة العلمية كويس مش عشان ينجح، على عكس اللي بيحصل في المدارس الرسمية. 

دا غير إن الطالب بيكون عنده فرصة لتعويض الدرجات، لإن كل ربع من السنة الدراسية بيمتحن عليها وبتتحسب درجاته، وبيكون نتيجة السنة معتمدة على متوسط درجاته في الأربع فصول، وبتمثل الامتحانات 30% بس من 

عدم الحاجة إلى الكتب الخارجية

الكتب الخاصة بالمدارس اللي بتطبق نظام التعليم الأمريكي في مصر بتحتوي على معلومات شاملة عن المنهج، والطالب مش بيكون مضطر إنه يشتري الكتب الخارجية عشان يفهم المادة العلمية.

اتعرف على: أهم 7 معلومات عن المدارس الأمريكية المعتمدة في مصر. 

في نظام التعليم الأمريكي بنلاقي بعض المشاكل اللي بتواجه الطلبة أثناء دراستهم، وبالتالي المشاكل دي بتندرج تحت قائمة العيوب.

 

ومن أبرز من عيوب نظام التعليم الأمريكي: 

دراسة مناهج غير كافية لتأهيل الطلبة للجامعات

مناهج المدارس الأمريكية المعتمدة بتكون متميزة ومفيدة للطلبة، لكن بعض المناهج مش بتكون كافية إنها تأهل الطالب للكليات العملية، وبالتالي الطالب بيلتحق بالكليات دي بدون ما يكون عنده خلفية كويسة عنها تساعده في فهم مناهجها. 

إلغاء اعتماد امتحان الـ SAT

بعض الطلبة بيكون هدفهم من دخول المدارس الأمريكية المعتمدة هو الحصول على شهادة امتحان السات عشان يقدروا يكملوا دراستهم خارج مصر، وبعد إلغاء اعتماد السات بدأ عدد من أولياء الأمور يعيدوا النظر في قرار التقديم لأولادهم في المدارس دي. 

وفي حال رغبة الطالب لأداء امتحان السات بيضطر يسافر خارج مصر ودا بيكون عبء مادي على الأهالي.

اعتماد اللغة الإنجليزية في الدراسة

رغم إن دراسة المناهج باللغة الإنجليزية بتساعد الطلبة على إتقان لغة جديدة، إلا إن بعض الطلبة بيواجهوا صعوبة في دراسة المناهج دي بسبب اللغة، وبيعتبروها عيب في نظام التعليم الأمريكي. 

غياب الرقابة على المناهج

لا يوجد رقابة على المناهج والامتحانات في السنوات الدراسية الأولى، ما عدا في G11 & G12 بيكون المنهج والامتحان تابع للنظام الأمريكي العالمي.

اتعرف على: مميزات الدبلومة الأمريكية في مصر لعام 2024 – 2025.

الخلاصة

نظام التعليم الأمريكي في مصر هو نظام شامل بيدرس فيه الطالب مناهج أمريكية معتمدة بتركز على تطوير مهارات الطالب باستمرار، وهدفها هو خلق جيل واعي قادر على مواكبة التطور. 

ومن مميزات النظام دا إنه بيقدم للطالب شهادة معتمدة تأهله للالتحاق بالجامعات الأمريكية، وبيقلل الضغط النفسي على الطالب بإن أغلب الدرجات بتكون على الأنشطة اللي بيمارسها الطالب أثناء العام الدراسي، أما الامتحانات فبيكون عليها درجات بسيطة في النهاية.

بالإضافة إن نظام التعليم الأمريكي في مصر بيخلي الطالب مش بيحتاج للكتب الخارجية عشان يقدر يذاكر، وكتب المدرسة بتكون كافية جدًا لفهم المادة العلمية. 

أما عن العيوب بنلاقي إن بعض المناهج العلمية مش بتكون كافية إنها تاهل الطالب للدراسة الجامعية، وبكدا مش هيكون عنده خلفية كافية عن الكلية قبل ما يدخلها. 

كمان بعض الطلبة بيشوفوا إن إلغاء اعتماد السات في مصر أثر بالسلب على نظام التعليم الأمريكي؛ ودا لإن البعض بيدخل المدرسة للحصول على شهادة السات فقط.