مصاريف المدارس الألمانية في مصر للعام الدراسي 2023- 2024

مصاريف المدارس الألمانية في مصر

التعليم في المدارس الانترناشونال المختلفة بقى هو التعليم السائد في مصر؛ ودا لإن ولي الأمر بيحاول يوفر تعليم مميز لأولاده، بعيدًا عن الأنظمة غير المتطورة؛ اللي بتركز أكثر على معدل حفظ الطالب للمنهج، حتى لو الطالب مش قادر يفهم كويس. 

المدارس دي بالفعل بتقدم برامج تعليمية حديثة قائمة على التفكير، وتحفيز الطالب على المشاركة والإبداع، ومن أشهر المدارس دي هي المدارس الألمانية في مصر.

وبالمقارنة بين مصاريف المدارس الألمانية في مصر فبنلاقي إنها مرتفعة عن المدارس الخاصة التانية ودا لإنها مدارس بتقدم خدمات تعليمية متميزة بدعم من الحكومة الألمانية.

فبتحصل على رسوم سنوية مقابل دا، وبتقدم شهادة معتمدة بتأهل الطالب لاستكمال دراسته في الخارج، وفي المقال دا هنتعرف على تفاصيل أكتر عن المدارس دي ومصاريف كل مدرسة، وكمان مميزات وعيوب نظام الدراسة الألماني.

نظام التعليم في المدارس الألمانية في مصر 

نظام التعليم في المدارس الألمانية في مصر، بيبدأ من مرحلة رياض الأطفال إلى مرحلة التعليم الثانوية، وفي النظام دا بيتم دراسة مناهج ألمانية معتمدة تم وضعها طبقًا لمهارات التعلم الحديثة. 

مناهج المدارس الألمانية بتهتم بتوعية الطالب بالتطورات اللي موجودة حواليه، وبتعلمه إزاي يتعامل معاها، وبالتالي بتوسع أُفقه وبيكون قدامه مجال كبير للتفكير والإبداع، ودا بيضيف كتير لشخصيته بشكل عام.

التعليم في المدارس الألمانية في مصر بيضمن للطالب الحصول على شهادة معتمدة، بتتيح له فرصة استكمال الدراسة الجامعية في الخارج بعد اجتياز امتحان Abitur، وبالتالي بيقدر يتعرف على المناهج في جامعات ألمانيا المتميزة.

أما عن مصاريف المدارس الألمانية في مصر فبتكون مرتفعة عن المدارس الرسمية، وده طبيعي؛ لإنها بتقدم خدمات ومميزات إضافية عن المدارس التانية.

على الجانب الآخر ظهرت بعض العيوب للنظام الألماني في مصر خلت في تراجع لعدد المقبلين على المدارس الألمانية، زي صعوبة الامتحان التأهيلي، وفشل الطلبة في اجتيازه، وغيرها من العيوب اللي هنتعرف عليها.

مصاريف المدارس الألمانية في مصر

بتختلف مصاريف المدارس الألمانية من مرحلة لمرحلة تانية فبنلاقي:

مصاريف المدارس الألمانية لمرحلة KG 

مرحلة رياض الأطفال هي أهم مرحلة دراسية في عمر الطالب؛ لإنه بيتعلم فيها الأساسيات اللي هتساعده في باقي المراحل التعليمية بعد كده، وبيكون شخصيته على أساس اللي بيتعلمه في الوقت دا، وبالتالي فهي بتحتاج إلى مجهود كبير من المدرسة وأولياء الأمور عشان الطالب يقدر يكون شخصية واعية وناجحة.

المدارس الألمانية بتكون مدركة أهمية المرحلة دي في حياة الطفل، فبتقدم مناهج متطورة تساعد على تنمية مهاراته وتحسين إدراكه للي حواليه.

مصاريف المدارس الألمانية في مصر بتختلف من مدرسة للثانية، ودا بيكون على حسب الموقع الجغرافي ومميزات المدرسة وغيرهم، لكن في المتوسط بنلاقي إن المصاريف بتبدأ من حوالي 30.000 جنيه مصري وبتوصل لأكتر من 100.000 في مرحلة KG.

مصاريف المدارس الألمانية في مصر للمرحلة الابتدائية

دراسة المرحلة الابتدائية في المدارس الألمانية بيكون لها تأثير إيجابي في حياة الطالب؛ لإنه بيتعلم فيها الاعتماد على النفس في المذاكرة، بالإضافة إلى إنها بتزود ثقافته وبتفهمه كتير من المصطلحات الموجودة حواليه بطريقة تناسب عقله وسنه. 

مصاريف المدارس الألمانية في مصر للمرحلة الابتدائية بتتراوح بين 65.000–80.000 جنيه مصري بالإضافة إلى مصاريف مواصلات الطالب خلال السنة الدراسية، والمصاريف دي بتكون مقابل المميزات العديدة اللي بيحصل عليها الطالب في المرحلة الابتدائية. 

مصاريف المدارس الألمانية للمرحلة الإعدادية

المرحلة الإعدادية في المدارس الألمانية هي مرحلة الاستعداد للثانوية والحصول على شهادة الأبيتور التأهيلية، وبالتالي فهي بتحتاج لمتابعة المدرسة وولي الأمر باستمرار مع الطالب، لتحديد مستواه، ووضع خطة لمساعدة الطالب على التفوق في المرحلة دي؛ عشان يقدر يجتاز المرحلة الثانوية كمان بسهولة. 

مصاريف المدارس الألمانية في مصر في المرحلة دي بتكون حوالي 70.000 جنيه مصري، إلى جانب المصاريف اللي بتحتاجها المدرسة خلال فترة الدراسة. 

مصاريف المدارس الألمانية للمرحلة الثانوية 

المرحلة الثانوية في المدارس الثانوية تعد بمثابة الثانوية العامة في المدارس الرسمية، وبالتالي فهي مرحلة فاصلة في حياة الطالب؛ لإنه بعدها بينتقل للتعليم الجامعي اللي بيختلف تماما عن التعليم في المدارس.

مصاريف المدارس الألمانية في مصر بنلاقي إنها بتوصل لأكتر من  100.000 جنيه مصري في المرحلة الثانوية للطالب في بعض المدارس 

ملحوظة: المصروفات المدرسية بتختلف سنويًا، وكمان بتختلف من مدرسة للثانية زي ما وضحنا، وبالتالي يرجى من ولي الأمر إنه يرجع للمدرسة اللي حابب يقدم فيها لأولاده، ويعرف من الإدارة المصاريف المطلوبة بالتفصيل خلال السنة الدراسية؛ عشان يحدد هل يقدر على سداد المصروفات دي ولا لأ. 

قائمة بالمدارس الألمانية في مصر

قائمة بأشهر المدارس الألمانية في مصر

المدارس الألمانية أثبتت نجاحها في مصر بالنظام التعليمي المميز اللي بتقدمه، فمن أشهر المدارس الانترناشونال الألمانية في مصر: 

المدرسة الألمانية الإنجيلية الثانوية 

تعد المدرسة الألمانية الإنجيلية أكبر وأقدم المدارس الألمانية على مستوى العالم، ترعاها الكنيسة الإنجيلية في القاهرة، وبتوفر مستوى تعليمي متميز بوجود نخبة من المدرسين الأكفاء بيساهم في الارتقاء بمستوى الطالب، وبيقوم على احترام الثقافات والأديان والمختلفة.

ومصاريف المدارس الألمانية في مصر بتكون مرتفعة إلى حد ما عن مصاريف باقي المدارس الانترناشونال، فبنلاقي إن مصاريف المدرسة الألمانية الإنجيلية وصلت لأكتر من 90.000 جنيه لمرحلة رياض الأطفال، بالإضافة ل 4800رسوم أخرى زي: رسوم امتحانات الطلبة الجدد ومصروفات الفترة التجريبية، ومصروفات فترة الملاحظة، وكمان في الرسوم الإدارية وصلت لأكتر من 4000 جنيه، ودا لعام 2022.

عنوان المدرسة:  شارع الدقي – الجيزة

 للتواصل مع الإدارة: 37481475 – 37481649 

مدرسة بيفرلي هيلز

تعد مدرسة بيفرلي هيلز الألمانية من أرخص المدارس اللي بتطبق المنهج الألماني في مصر، فبنلاقي إن أسعارها في 2021-2022 بتبدأ من حوالي 35.000 جنيه مصري، ورغم مصاريفها القليلة إلا إنها بتحرص على تقديم نظام تعليمي متطور. 

عنوان المدرسة: بيفرلي هيلز – الجيزة – الشيخ زايد. 

للتواصل مع الإدارة: 0238576402 – 01000777916 

المدرسة الألمانية بالغردقة

المدرسة الألمانية بالغردقة تقوم بتقديم المناهج الألمانية بنظام ثنائي اللغة، وتهتم بشكل كبير باللغات. 

وتبدأ مصروفات المدرسة من 30.000 جنيه مصري لمرحلة رياض الأطفال، وبتزداد لكل مرحلة فبتوصل 96.000 جنيه مصري في المرحلة الثانوية.

تقدر تعرف أكتر عنها من خلال صفحة الرسوم على موقع المدرسة.

 عنوان المدرسة: شارع بولينج – الغردقة

 للتواصل مع الإدارة: 01004612747 

المدرسة الألمانية لراهبات سان شارل بورمي بالقاهرة 

ومدرسة راهبات سان شارل بورمي بالقاهرة هي من المدارس الألمانية اللي بتحرص على تقديم خدمة تعليمية مميزة جدًا للطالبات، فبتساعدهم على تطوير مهاراتهم بشكل مستمر. 

تعتبر مصاريف سان شارل بورمي من أغلى مصاريف المدارس الألمانية في مصر، ودا لإنها بتوصل لأكتر من 100.000 جنيه مصري في مرحلة رياض الأطفال، شاملة رسوم التسجيل ورسوم سيارات المدرسة وكمان الأدوات اللي هيساخدمها خلال فترة الدراسة، وبيتم سداد المصروفات دي على 3 أقساط خلال السنة. 

عنوان المدرسة: شارع محمد محمود – باب اللوق – القاهرة

للتواصل مع الإدارة: 0227900088

المدرسة الألمانية لراهبات سان شارل بورمي بالإسكندرية 

المدرسة بتجمع بين الحضارة الألمانية والحضارة المصرية، وبتوفر مناهج ألمانية معتمدة للطالبات بالإسكندرية، وبتطبقها بطريقة مميزة، ودا اللي ساعدها على الحصول على شهادة الجودة في التعليم.

 مصاريف مدرسة راهبات سان شارل بورمي بالإسكندرية بتصل لأكثر من 71,000 مصري لمرحلة رياض الأطفال، وبتختلف المصروفات مع اختلاف المرحلة الدراسية.

 عنوان المدرسة: شارع صلاح الدين – العطارين – الإسكندرية

للتواصل مع الإدارة: 01222494151

المدرسة الأوروبية بالقاهرة

 المدرسة الأوروبية بالقاهرة هي مدرسة بتقدم أكثر من نظام تعليمي أهمهم نظام التعليم الألماني، ومصاريفها بتوصل إلى 105.740 جنيه مصري في مرحلة رياض الأطفال.

عنوان المدرسة: المدرسة الأوروبية بالقاهرة، الشهيد عاطف السادات، عبد الملك بن مروان، قسم أول القاهرة الجديدة، محافظة القاهرة‬.

للتواصل مع الإدارة: 01207777914 – ‎‎0122 790 3951

مميزات المدارس الألمانية في مصر

مميزات المدارس الألمانية في مصر

المدارس الألمانية في مصر بتوفر مناهج تعليمية مميزة للطلبة الملتحقين بيها، وهدفها هو مساعدة الطلبة دي على التميز، وتحقيق أهدافهم المستقبلية، بالإضافة إلى الارتقاء بذواتهم.

من أهم المميزات اللي بتقدمها المدارس دي ومش بتكون موجودة في المدارس الرسمية في مصر بنلاقي:

تطبيق نظام تعليمي حديث

المدارس الألمانية بتحرص على تطبيق نظام تعليمي يساعد الطلبة على الارتقاء بنفسهم وأوطانهم زي ما وضحنا، فبتضم العديد من المدرسين الخبراء اللي بيقدروا يطبقوا أهداف النظام الألماني في مصر، وبيساعدوا في بناء جيل مبدع. 

تقديم شهادة معتمدة تعادل شهادة الثانوية العامة

الطالب في المدارس الألمانية بيحصل على شهادة معتمدة تؤهله للالتحاق بالجامعات الألمانية، واستكمال الدراسة الجامعية فيها، وبالتالي بيقدر يحصل على المناهج الجامعية في ألمانيا المعروفة بمستواها العالي.

وبالنسبة للجامعات الألمانية فبتقدم مناهج بجودة عالية مقابل رسوم رمزية، ودي بتكون فرصة كويسة لخريجين المدارس الألمانية، عشان كدا مصاريف المدارس الألمانية في مصر أعلى من غيرها.

تحفيز الطلبة باستمرار

الطالب في المدارس الألمانية في مصر مش بيحتاج حد يطلب منه يذاكر؛ لإنه بيبقى فاهم دوره كويس، وعارف إيه المطلوب منه بالظبط، والمدرسة بتكون حريصة على تحفيزه بشكل مستمر عشان يقدر يكمل مذاكرة بشغف، ويحقق حلمه.

عيوب المدارس الألمانية في مصر

عيوب المدارس الألمانية في مصر

تطبيق نظام التعليم الألماني في مصر له كتير من المميزات للطلبة زي ما وضحنا، ولكن على الجانب الآخر لاحظنا وجود بعض العيوب فيه، واللي بسببها بدأ يتراجع بعض أولياء الأمور عن قرار التقديم لأولادهم في المدارس الألمانية، فمن العيوب دي: 

صعوبة امتحان Abitur التأهيلي 

المدارس الألمانية في مصر بتقدم للطالب شهادة معتمدة بعد اجتيازه امتحان Abitur التأهيلي، والامتحان دا بيكون صعب مقارنة بباقي الإمتحانات التأهيلية في الأنظمة التعليمية الثانية؛ لإنه بالشهادة دي بيقدر يلتحق بجامعات ألمانية معروفة بمستواها العالي، فالمدارس بتكون حريصة إن الطالب اللي بيجتاز امتحان Abitur يكون مستحق فعلًا لفرصة الالتحاق بالجامعات الألمانية. 

ومن هنا بيزيد القلق عن العديد من الطلبة وأولياء الأمور، وبيفضلوا إنهم يقدموا في نظام تعليمي مختلف بيقدم امتحان تأهيلي أسهل. 

زيادة الضغط النفسي على الطالب 

الطالب في المدارس الألمانية بيكون مطلوب منه مذاكرة المناهج العلمية باستمرار، واجتياز جميع الامتحانات اللي بيدخلها خلال العام الدراسي؛ عشان يقدر ينتقل للسنة اللي بعدها ومنها ينتقل للمراحل المختلفة، ودا لإن في كل نهاية مرحلة بيكون فيها امتحانات بتحدد هل الطالب مستعد للصعود إلى المرحلة الي بعدها ولا لأ.

بالتالي الطالب بيواجه ضغط باستمرار، خلال دراسته للمنهج الألماني. 

ارتفاع مصاريف المدارس الألمانية في مصر

بعض أولياء الأمور بيواجهوا صعوبة في سداد مصاريف المدارس الألمانية كل سنة؛ لإنها بترتفع عن مصاريف المدارس الرسمية نظرًا للخدمات الإضافية اللي بتقدمها للطلبة، وبالتالي بيبدأ ولي الأمر يبحث عن أرخص مدرسة انترناشونال لأولاده. 

الخلاصة

المدارس الألمانية في مصر هي مدارس بتقدم مناهج تعليمية معتمدة بتركز فيها على تطوير فكر الطالب، وتوفير فرصة للإبداع والتعبير عن الذات، والمدارس دي بدأت تنتشر في العديد من محافظات مصر في الفترة الأخيرة.

المدارس بتقدم خدماتها التعليمية بمقابل مادي مرتفع عن المدارس الرسمية، فبنلاقي إن مصاريف المدارس الألمانية في مصر بتتخطى أحيانًا 100.000 جنيه مصرى. 

من أهم مميزات المدارس الألمانية إنها بتحرص على تطبيق نظام تعليمي حديث، وبتقدم شهادة معتمدة للطلبة، وكمان بتهتم بتحفيز الطلبة باستمرار عشان تساعدهم يوصلوا لهدفهم.

 أما عن العيوب فمن أشهرها: صعوبة امتحان Abitur التأهيلي، وبالتالي بيفشل عدد كبير من الطلبة في اجتيازه، بالإضافة إلى زيادة الضغط النفسي على الطالب، وارتفاع مصاريف المدارس الألمانية في مصر عن باقي المدارس. 

وبالتالي لازم ولي الأمر يقارب كويس بين مميزات وعيوب المدارس الألمانية، عشان يقدر يختار المدرسة المناسبة لابنه؛ اللي هيكمل فيها جميع مراحل دراسته.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق